ໃນວັນທີ 25 ສິງຫາ 2026 ຜ່ານມານີ້, ທີ່ຫ້ອງຮັບແຂກ VIP ຕຶກຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ(ມຊ). ທ່ານ ອຳເຄັງ ເພັງລາສີ ຮອງຫົວໜ້າຫ້ອງການສັງລວມ ແລະ ພົວພັນຕ່າງປະເທດ ມຊ ພ້ອມດ້ວຍພະນັກງານທີ່ກ່ຽວຂ້ອງ ໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ພົບປະປຶກສາຫາລື ຂອງ ທ່ານ ສຈ. ດຣ. Han Yonghui, ປະທານບໍລິຫານ ສະຖາບັນຍຸດທະສາດສາກົນ ກວາງຕຸ້ງ (Guangdong Institute for International Strategies) ສປ ຈີນ ພ້ອມດ້ວຍຄະນະ.
ການມາຢ້ຽມຢາມ ມຊ ຂອງຄະນະຜູ້ແທນດັ່ງກ່າວໃນຄັ້ງນີ້, ແມ່ນເພື່ອປຶກສາຫາລືວຽກງານການຮ່ວມມືດ້ານວະຊາການ ກັບ ມຊ, ໂດຍສະເພາະແມ່ນການສົ່ງເສີມການຮ່ວມມືທາງດ້ານອຸດສາຫະກຳ ແລະ ການແລກປ່ຽນທາງດ້ານວິຊາການ ລະຫວ່າງ ລາວ ແລະ ຈີນ, ນອກຈາກນີ້, ຍັງໄດ້ແລກປ່ຽນທ່າແຮງການຮ່ວມມືດ້ານ ໂຄງລ່າງພື້ນຖານ, ເສດຖະກິດດິຈິຕອນ, ພະລັງງານສີຂຽວ, ເຕັກໂນໂລຊີການກະເສດ, ການຄ້າຂ້າມແດນ ແລະ ການຕີພິມບົດຄວາມການຄົ້ນຄວ້າວິທະຍາສາດຕ່າງໆ.
ໃນຕອນບ່າຍ ວັນທີ 25 ສິງຫາ 2026, ທີ່ຫ້ອງປະຊຸມ 205 ຕຶກສໍານັກງານຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ(ມຊ), ໄດ້ມີພິທີຕ້ອນຮັບຄະນະຜູ້ແທນຈາກ ມະຫາວິທະຍາໄລ ຟູດັນ (Fudan University), ສາທາລະນະລັດ ປະຊາຊົນຈີນ(ສປ.ຈີນ) ຢ່າງເປັນທາງການ. ໂດຍແມ່ນ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ມີຫົວໜ້າຫ້ອງການ ແລະ ພະນັກງານທີ່ກ່ຽວຂ້ອງໃຫ້ກຽດຕ້ອນຮັບ.
ຄະນະຜູ້ແທນຈາກ ມະຫາວິທະຍາໄລ ຟູດັນ ທີ່ເດີນທາງມາຢ້ຽມຢາມໃນຄັ້ງນີ້ ນຳ ໂດຍ ທ່ານ ສຈ. ຈິງ ອີຈ່ຽງ (Prof. JING Yijia), ຄະນະບໍດີ ສະຖາບັນນະໂຍບາຍສາທາລະນະໂລກ (Dean of Institute for Global Public Policy), ພ້ອມດ້ວຍ ທ່ານ ອຈ. ສຽນ ຮ່າວຊີ (Assoc. Prof. QIAN Haoqi), ຮອງຄະນະບໍດີ ແລະ ທ່ານ ນາງ ຈາງ ຣົງ (ZHANG Rong), ຫົວໜ້າຫ້ອງການບໍລິຫານ ຂອງສະຖາບັນດັ່ງກ່າວ.
ຈຸດປະສົງຫຼັກຂອງການມາຢ້ຽມຢາມໃນຄັ້ງນີ້ ແມ່ນເພື່ອປຶກສາຫາລືວຽກງານການຮ່ວມມືລະຫວ່າງ ມະຫາວິທະຍາໄລ ຟູດັນ ແລະ ມຊ. ໃນການພົບປະ, ທັງສອງຝ່າຍໄດ້ປຶກສາຫາລືກ່ຽວກັບການຂະຫຍາຍການຮ່ວມມືທາງດ້ານການແລກປ່ຽນທຶນການສຶກສາ ເພື່ອສ້າງໂອກາດໃຫ້ນັກສຶກສາ ແລະ ບຸກຄະລາກອນ ໄດ້ມີການແລກປ່ຽນບົດຮຽນເຊິ່ງກັນ ແລະ ກັນ. ພ້ອມດຽວກັນນີ້, ຍັງໄດ້ເນັ້ນໜັກເຖິງການຮ່ວມມືໃນການຄົ້ນຄວ້າວິໄຈຮ່ວມກັນໃນຂົງເຂດທີ່ທັງສອງຝ່າຍມີຄວາມສົນໃຈ ເພື່ອສົ່ງເສີມການພັດທະນາທາງດ້ານວິຊາການ ແລະ ຍົກລະດັບຄຸນນະພາບການສຶກສາໃຫ້ກ້າວຂຶ້ນຢ່າງບໍ່ຢຸດຢັ້ງ.
ການພົບປະໃນຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງຄວາມເຂົ້າອົກເຂົ້າໃຈ ແລະ ເປັນໄມຕີຈິດມິດຕະພາບອັນດີງາມ, ເຊິ່ງເປັນການເປີດກາລະໂອກາດໃໝ່ໃນການເສີມຂະຫຍາຍສາຍພົວພັນການຮ່ວມມືດ້ານການສຶກສາ ລະຫວ່າງ ສປປ ລາວ ແລະ ສປ ຈີນ ໃຫ້ແໜ້ນແຟ້ນຍິ່ງຂຶ້ນ.
ໃນລະຫວ່າງວັນທີ 20–21 ສິງຫາ 2026 ມະຫາວິທະຍາໄລແຫ່ງຊາດ ຮ່ວມກັບ ມະຫາວິທະຍາໄລມະຫາສາລະຄາມ (Mahasarakham University) ໄດ້ຈັດກອງປະຊຸມສາກົນຄັ້ງທີ 2 The 2nd Collaborative Research Meeting 2026 (CRM 2026) ທີ່ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ (ນະຄອນຫຼວງວຽງຈັນ), ໂດຍການເປັນປະທານຮ່ວມຂອງທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ທ່ານ ຮສ. ດຣ. Prayook Srivilai ອະທິການບໍດີ ມະຫາວິທະຍາມະຫາສາລະຄາມ ປະເທດໄທ ມີບັນດາທ່ານຄະນະອາຈານ, ນັກຄົ້ນຄວ້າ, ຄູ-ອາຈານ ແລະ ນັກສຶກສາ ເຂົ້າຮ່ວມ.
ກອງປະຊຸມມີຈຸດປະສົງເພື່ອສ້າງເວທີແລກປ່ຽນທາງດ້ານວິຊາການສຳລັບນັກຄົ້ນຄວ້າ, ອາຈານ ແລະ ນັກວິຊາການ ໃນການນຳສະເໜີຜົນງານການຄົ້ນຄວ້າ, ແລກປ່ຽນຄວາມຮູ້ ແລະ ພັດທະນາແນວທາງການຮ່ວມມືການຄົ້ນຄວ້າວິທະຍາສາດ ລະຫວ່າງສອງສະຖາບັນ, ພ້ອມທັງສ້າງໂອກາດໃນການພັດທະນາຫົວຂໍ້ ແລະ ໂຄງການຄົ້ນຄວ້າຮ່ວມກັນ, ຂະຫຍາຍເຄືອຂ່າຍນັກຄົ້ນຄວ້າ ແລະ ນັກວິຊາການໃນລະດັບຊາດ-ລະດັບສາກົນ ແລະເພື່ອນຳໃຊ້ຄວາມຮູ້ ແລະ ຜົນຈາກການຄົ້ນຄວ້າໄປສູ່ການແກ້ໄຂບັນຫາ ແລະ ສະໜັບສະໜູນການພັດທະນາຢ່າງຍືນຍົງ.
ໃນກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການນຳສະເໜີຜົນງານການຄົ້ນຄວ້າວິທະຍາສາດໃນ 3 ຫົວຂໍ້ພິເສດເຊັ່ນ: ຫົວຂໍ້: ຄວາມຫຼາກຫຼາຍທາງພັນທຸກຳຂອງເຂົ້າທ້ອງຖິ່ນ: ແຫຼ່ງຊັບພະຍາກອນເພື່ອຄວາມໝັ້ນຄົງດ້ານອາຫານ (Genetic Diversity of Local Rice: The Resource for Local Food Security) ນໍາສະເໜີໂດຍ ທ່ານ ສຈ. ດຣ. Preecha Prathepha ຄະນະບໍດີ ຄະນະເທັກໂນໂລຢີ ຈາກມະຫາວິທະຍາໄລມະຫາສາລະຄາມ ປະເທດໄທ; ຫົວຂໍ້: ເຊື້ອພະຍາດຈາກສັດສູ່ຄົນທີ່ຖືກລະເລີຍໃນ ຫວຽດນາມ–ລາວ–ໄທ: ຈີໂນມິກ, ຄວາມຫຼາກຫຼາຍ ແລະ ວິວັດທະນາການລະດັບໂມເລກຸນ (Neglected Zoonotic Pathogens in Vietnam, Laos and Thailand: Genomics, Diversity and Molecular Evolution) ນຳສະເໜີໂດຍ ທ່ານ ສຈ. ດຣ. Thanh Hoa Le ຈາກສະຖາບັນວິທະຍາສາດ ແລະ ເຕັກໂນໂລຢີ ປະເທດຫວຽດນາມ (VAST: Vietnam); ຫົວຂໍ້: ການປະເມີນມູນຄ່າທາງເສດຖະສາດຂອງຄວາມຫຼາກຫຼາຍທາງຊີວະພາບໃນ ສປປ ລາວ
(Estimation of Economic Value of Biodiversity in Lao PDR) ນໍາສະເໜີໂດຍ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ພ້ອມນັ້ນ ກໍຍັງມີອີກ 8 ກຸ່ມການຄົ້ນຄວ້າທີ່ກວມເອົາຂົງເຂດ ວິທະຍາສາດກະສິກຳ (Agricultural Science), ວິທະຍາສາດຊີວະພາບ (Biological Science), ເຄມີສາດ ແລະ ວັດສະດຸສາດ (Chemistry and Materials Science), ວິທະຍາສາດສິ່ງແວດລ້ອມ (Environmental Science), ວິສະວະກຳ ແລະ ເຕັກໂນໂລຊີ (Engineering and Technology), ວິທະຍາສາດສຸຂະພາບ (Health Science), ເສດຖະສາດ, ທຸລະກິດ ແລະ ສັງຄົມສາດ (Economics, Business, and Social Sciences) ແລະການສຶກສາ, ວັດທະນະທຳ ແລະ ມະນຸດສາດ (Education, Culture, and Humanities).
ໃນວັນທີ 17 ສິງຫາ 2026, ສະຖາບັນຂົງຈື ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີເປີດປ້າຍສະມາຄົມທຶນການສຶກສາສິດເກົ່າຄູສອນພາສາຈີນສາກົນທີ່ ສ ປປ ລາວ ທີ່ຫ້ອງປະຊຸມສະຖາບັນດັ່ງກ່າວ, ໂດຍການເຂົ້າຮ່ວມຂອງ ທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມຊ, ທ່ານ ຢາງ ໂຈວ ຮອງຫົວໜ້າສູນຮ່ວມມືແລກປ່ຽນພາສາຈີນ-ຕ່າງປະເທດ ກະຊວງສຶກສາທິການ ສປ ຈີນ ພ້ອມດ້ວຍຄະນະ, ມີທ່ານຫົວໜ້າສະຖາບັນຂົງຈືຝ່າຍລາວ-ຝ່າຍຈີນ, ແຂກຖືກເຊີນ, ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.
ໃນໂອກາດນີ້, ທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມຊ ກໍໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ທ່ານ ຢາງ ໂຈວ ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ມຊ ພ້ອມທັງສະແດງຄວາມຂອບໃຈມາຍັງສູນຮ່ວມມືແລກປ່ຽນພາສາຈີນ-ຕ່າງປະເທດ ກະຊວງສຶກສາທິການ ສປ ຈີນ ທີ່ໄດ້ໃຫ້ການສະໜັບສະໜູນ ແກ່ ມຊ ກໍຄືສະຖາບັນຂົງຈື ດ້ວຍດີຕະຫຼອດມາ, ການສ້າງຕັ້ງສະມາຄົມສິດເກົ່າຄູສອນພາສາຈີນສາກົນທີ ສປປ ລາວ ແມ່ນເປັນໂຄງການທີ່ມີຄວາມໝາຍຄວາມສຳຄັນຢ່າງຍິ່ງ, ສະມາຄົມດັ່ງກ່າວຈະມີບົດບາດອັນສໍາຄັນໃນການເຕົ້າໂຮມນັກສຶກສາທີ່ໄດ້ທຶນໃນຫຼັກສູດສາຂາຄູພາສາຈີນ 2+2 ກໍຄື ເປັນການຮ່ວມມືກັນລະຫວ່າງ ມຊ ຮ່ວມກັບ ມະຫາວິທະຍາໄລຊົນເຜົ່າກວາງຊີ ສປ ຈີນ.
ໂອກາດດຽວກັນ, ທ່ານ ຢາງ ໂຈວ ຮອງຫົວໜ້າສູນຮ່ວມມືແລກປ່ຽນພາສາຈີນ-ຕ່າງປະເທດ ກະຊວງສຶກສາທິການ ສປ ຈີນ ກໍໄດ້ກ່າວມີຄຳເຫັນ ເຊິ່ງທ່ານກ່າວວ່າ: ໃນປີ 2026 ນີ້ ແມ່ນຄົບຮອບ 65 ປີ ແຫ່ງການສ້າງສາຍພົວພັນທາງການທູດລະຫວ່າງ ລາວ-ຈີນ ແລະ ເປັນປີມິດຕະພາບລາວ-ຈີນ, ການສ້າງຕັ້ງ “ສະມາຄົມທຶນການສຶກສາສິດເກົ່າຄູພາສາຈີນສາກົນ ປະຈຳ ສປປ ລາວ” ປຽບສະເໜືອນເປັນຂົວເຊື່ອມການຕິດຕໍ່ປະສານງານທີ່ໃກ້ຊິດຍິ່ງຂຶ້ນ ລະຫວ່າງສູນການຮ່ວມມື ແລະ ແລກປ່ຽນພາສາຈີນ-ຕ່າງປະເທດ ກັບ ບັນດາມະຫາວິທະຍາໄລລາວ-ຈີນ ແລະ ພາກສ່ວນຕ່າງໆຂອງສອງປະເທດ. ສູນການຮ່ວມມື ແລະ ແລກປ່ຽນພາສາຈີນ-ຕ່າງປະເທດ ໃນຖານະເປັນອົງການວິຊາຊີບທີ່ໃຫ້ການບໍລິການແກ່ການພັດທະນາການສຶກ ສາພາສາຈີນສາກົນທົ່ວໂລກ ໄດ້ໃຫ້ການສະໜັບສະໜູນການສ້າງ ແລະ ພັດທະນາການສຶກສາພາສາຈີນໃຫ້ສອດຄ່ອງກັບສະພາບຕົວຈິງຂອງແຕ່ລະປະເທດ, ພ້ອມທັງຊ່ວຍເຫຼືອບັນດາປະເທດໃນການສ້າງ ແລະ ຝຶກອົບຮົມຄູສອນພາສາຈີນທ້ອງຖິ່ນ, ພ້ອມນັ້ນ ການສ້າງຕັ້ງສູນກັ່ງກ່າວນີ້ ຍັງເປັນ ສູນກາງໃຫ້ແກ່ບັນດາສິດເກົ່າໄດ້ສ້າງສາຍພົວພັນ, ແລກປ່ຽນປະສົບການ, ຊ່ວຍເຫຼືອເຊິ່ງກັນ ແລະ ກັນອີກດ້ວຍ.
ຫຼັງຈາກນັ້ນ, ຕາງໜ້ານັກສຶກສາ ນາງ ສຸດາພອນ ຕັນເສລີ ສະຖາບັນຂົງຈືຜູ້ທີ່ໄດ້ຮັບທຶນ, ໄດ້ຂຶ້ນກ່າວສະແດງຄວາມຂອບໃຈ ແລະ ແບ່ງປັນປະສົບການການເຕີບໂຕໃນການຮຽນຮູ້ຢູ່ສະຖາບັນຂົງຈື ແລະ ການໄປສຶກສາຕໍ່ຢູ່ ສປ ຈີນ ຫຼັງຈາກໄດ້ຮັບທຶນຈາກສູນຮ່ວມມືແລກປ່ຽນພາສາຈີນ-ຕ່າງປະເທດ ໄປສຶກສາທີ່ມະຫາວິທະຍາໄລຊົນເຜົ່າກວາງຊີ, ພ້ອມທັງສະແດງຄວາມມຸ່ງຫວັງທີ່ຈະອຸທິດຕົນໃຫ້ແກ່ວຽກງານການສຶກສາພາສາຈີນ ແລະ ສືບທອດສາຍສຳພັນມິດຕະພາບອັນດີງາມລະຫວ່າງລາວ-ຈີນ.
ໃນໂອກາດສຳຄັນດັ່ງກ່າວ, ທ່ານ ນາງ ສີພະຈັນ ສີວິໄລ ຮອງຫົວໜ້າຫ້ອງການຈັດຕັ້ງ-ພະນັກງານ ແລະ ກວດກາ ຂອງມະຫາວິທະຍາໄລແຫ່ງຊາດລາວ ກໍໄດ້ຜ່ານດຳລັດຂອງທ່ານນາຍົກລັດຖະມົນຕີ ສະບັບເລກທີ 263/ນຍ, ລົງວັນທີ 13 ສິງຫາ 2026, ວ່າດ້ວຍການມອບໃບຍ້ອງຍໍຂັ້ນລັດຖະບານໃຫ້ແກ່ ອາຈານ ລູ້ຢ້າ, ຄູສອນພາສາຈີນທີ່ປະຈໍາການຢູ່ສະຖາບັນຂົງຈື. ທ່ານ ຮສ.ປອ. ສິນທະວອນ ດາລາວົງ ໃຫ້ກຽດມອບໃບຍ້ອງຍໍດັ່ງກ່າວ ເພື່ອຍ້ອງຍໍການອຸທິດຕົນຕະຫຼອດ 11 ປີ ໃນການສິດສອນພາສາຈີນ ແລະ ປະກອບສ່ວນຕໍ່ການກໍ່ສ້າງ-ພັດທະນາສະຖາບັນຂົງຈື ກໍຄືການສົ່ງເສີມການແລກປ່ຽນດ້ານພາສາ ແລະ ວັດທະນະທຳລາວ-ຈີນ.
ພ້ອມນັ້ນ, ອາຈານ ລູ້ຢາ ກໍໄດ້ກ່າວສະແດງຄວາມຮູ້ສຶກຕໍ່ການໄດ້ຮັບໃບຍ້ອງຍໍ ຈາກລັດຖະບານ ສປປ ລາວ ໂດຍທ່ານໄດ້ກ່າວວ່າ: ການໄດ້ຮັບການຍ້ອງຍໍຄັ້ງນີ້ ຖືເປັນຂອງຂວັນອັນລໍ້າຄ່າຢ່າງຍິ່ງໃນຊີວິດ, ປະສົບການ 11 ປີໃນການປະຕິບັດໜ້າທີ ແລະ ສິດສອນທີ່ສະຖາບັນຂົງຈື, ກໍເປັນໄລຍະເວລາອັນມີຄຸນຄ່າໃນຊີວິດເຊັ່ນດຽວກັນ. ພ້ອມທັງສະແດງຄວາມຂອບໃຈຢ່າງຈິງໃຈຕໍ່ຄະນະນຳຂອງສູນຮ່ວມມືດ້ານພາສາ, ຄະນະນຳຂອງມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລຊົນເຜົ່າກວາງຊີ, ຄະນະຜູ້ອຳນວຍການຝ່າຍລາວ ແລະ ຝ່າຍຈີນຂອງສະຖາບັນຂົງຈື, ພ້ອມທັງຂອບໃຈເພື່ອນຮ່ວມງານທຸກຄົນທີ່ໄດ້ຮ່ວມສູ້ ແລະ ເຮັດວຽກຄຽງບ່າຄຽງໄຫຼ່ກັນມາຕະຫຼອດ, ດ້ວຍການສະໜັບສະໜູນຢ່າງເຕັມທີ່ ແລະ ການຮ່ວມມືຈາກທຸກຝ່າຍທີ່ເຮັດໃຫ້ວຽກງານການສຶກສາພາສາຈີນໃນລາວສາມາດກ້າວໜ້າໄປຢ່າງໝັ້ນຄົງ.
ໃນວັນທີ 18 ສິງຫາ 2026, ມະຫາວິທະຍາໄລແຫ່ງຊາດ ໄດຈັດກອງປະຊຸມແລກປ່ຽນວິຊາການຮ່ວມກັບມະມະຫາວິທະຍາໄລເຕັກໂນໂລຊີໂຕກຽວ (Tokyo University of Technology - TUT) ປະເທດຍີ່ປຸ່ນ ແລະ ມະຫາວິທະຍາໄລໄລອຸດສະຫະກໍາ ນະຄອນໂຮຈີມິນ (Industrial University of Ho Chi Minh City - IUH) ສສ ຫວຽດນາມ ເຊິ່ງມີນັກຄົ້ນຄວ້າ ແລະ ອາຈານຈາກພາຍໃນ ແລະ ຕ່າງປະເທດ ເຂົ້າຮ່ວມຫຼາຍກວ່າ 25 ທ່ານ. ກອງປະຊຸມດັ່ງກ່າວດໍາເນີນພາຍໃຕ້ຫົວຂໍ້: Engine of Innovation: How STEAM Education Drive Sustainable Growth ໂດຍການເປັນປະທ່ານຮ່ວມຂອງ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອໍານວຍການໃຫຍ່ ມຊ, ທ່ານ ສຈ. ປອ. ເກັນຈິ ຮາລະ (Prof. Dr. Kenji Hara) ຜູ້ຮັບຜິດຊອບໂຄງການ Glocal STEAM, ມະຫາວິທະຍາໄລເຕັກໂນໂລຊີໂຕກຽວ ແລະ ທ່ານ ປອ. ຮູດູງ ໂງ (Dr. Ngo Huu Dung) ມະຫາວິທະຍາໄລໄລອຸດສະຫະກໍາ ນະຄອນໂຮຈີມິນ. ໃນພິທີຜູ້ເຂົ້າຮ່ວມໄດ້ຮັບຟັງການນໍາສະເໜີໃນຫົວຂໍ້ທີ່ສຳຄັນຕ່າງໆເຊັ່ນ: ບົດບາດຂອງການສຶກສາຕໍ່ການພັດທະນາເສດຖະກິດ, ການຫັນເປັນສາກົນໃນຫຼັກສູດ STEM, ການສຶກສາເສີມການສຶກສາໃນຂະແໜງ STEAM, ການຫັນເປັນດິຈິຕອນ ແລະ ທັກສະໃນອະນາຄົດ. ນອກຈາກນີ້, ຜູ້ເຂົ້າຮ່ວມຍັງໄດ້ສົນທະນາແລກປ່ຽນກ່ຽວກັບການສຶກສາ STEM ແລະ ທິດທາງການຮ່ວມມືໃນຕໍ່ໜ້າເພື່ອສົ່ງເສີມການສຶກສາລະຫວ່າງປະເທດ ແລະ ສ້າງນະວັດຕະກໍາໃນຂະແໜງການສຶກສາເພື່ອດຶງດູດນັກສຶກສາໃຫ້ເຂົ້າຮຽນສາຂາວິທະຍາສາດໃຫ້ຫຼາຍຂື້ນ.
ສູນເຕັກໂນໂລຊີຂໍ້ມູນຂ່າວສານ ມະຫາວິທະຍາໄລແຫ່ງຊາດ ໄດ້ສຳເລັດການຈັດຝຶກອົບຮົມ ໃນຫົວຂໍ້່ “ການນຳໃຊ້ AI ເຂົ້າໃນການຮຽນ-ການສອນ ແລະ ການຄົ້ນຄວ້າ ລະດັບທີ1” ໃນລະຫວ່າງວັນທີ 10-14 ສິງຫາ 2026 ໃຫ້ກັບຄູ-ອາຈານ ຂອງມະຫາວິທະຍາໄລແຫ່ງຊາດ ຈຳນວນ 40 ທ່ານ, ໂດຍການເຂົ້າຮ່ວມ ແລະ ມອບໃບຢັ້ງຢືນ ຂອງທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ທີ່ຫ້ອງຝຶກອົບຮົມສູນເຕັກໂນໂລຊີຂໍ້ມູນຂ່າວສານ.
ສຳລັບຜູ້ທີ່ເຂົ້າຮ່ວມຝຶກອົບຮົມໃນຄັ້ງນີ້ແມ່ນຈະໄດ້ຮຽນຮູ້ການນຳໃຊ້ກັບເຄື່ອງມື AI ຕ່າງໆ ເພື່ອສ້າງສື່ການສອນໄດ້ດ້ວຍຕົນເອງ, ການນຳໃຊ້ AI ໃນການກວດ ແລະ ໃຫ້ Feedback ແກ່ນັກສຶກສາ, ສາມາດບໍລິຫານຈັດການຄະແນນໄດ້ວ່ອງໄວ ຜ່ານ Website ໄດ້ ແລະການຂຽນຄຳສັ່ງຜ່ານຂັ້ນພື້ນຖານໃນການນຳໃຊ້.
