ການຈັດສອບເສັງຄັດເລືອກນັກສຶກສາໃໝ່ ສາຂາຄູພາສາຈີນ ປະຈຳສົກສຶກສາ 2026-2027 ຂອງສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ (ມຊ) ໄດ້ຈັດຂຶ້ນໃນວັນທີ 15 ສິງຫາ 2026, ໂດຍການເຂົ້າຮ່ວມ ສັງເກດການ ແລະ ຕິດຕາມຂອງທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມຊ, ທ່ານ ຮສ. ປອ. ໄກສອນ ເພັງໂສພາ ຫົວໜ້າກົມການສຶກສາຊັ້ນສູງ ກະຊວງສຶກສາທິການ ແລະ ກິລາ (ສສກ), ທ່ານ ຄຳຮຸ່ງ ຈັນທະວົງ ຫົວໜ້າສະຖາບັນຂົງຈື ຝ່າຍລາວ, ທ່ານ ເຟີ່ງ ກວາງຫົວ ຫົວໜ້າສະຖາບັນຂົງຈື ຝ່າຍຈີນ, ພ້ອມດ້ວຍທ່ານຮອງຜູ້ອຳນວຍການໃຫຍ່ ມຊ, ພະນັກງານ, ຄູ-ອາຈານ ເຂົ້າຮ່ວມ.
ສຳລັບການສອບເສັງຄັດເລືອກນັກສຶກສາຂອງສະຖາບັນຂົງຈື ໃນສົກສຶກສາ 2026-2027 ນີ້ແມ່ນໄດ້ເປີດໃຫ້ຜູ້ທີ່ມີພື້ນຖານພາສາຈີນລະດັບໜື່ງ ທີ່ສົນໃຈສະໝັກ ເລີ່ມແຕ່ 17 ກໍລະກົດ ຫາ ວັນທີ 13 ສິງຫາ 2026 ຜ່ານມາ, ສ່ວນຮູບແບບການສອບເສັງແບບອອກແບ່ງ 2 ພາກຄື: ການສອບເສັງຂຽນ ພາກເຊົ້າເລີ່ມແຕ່ເວລາ 8:30 – 10:00 ໂມງ ສອບເສັງພາສາລາວ-ວັນນະຄະດີ + ຄະນິດສາດ + ພູມິສາດ + ປະຫວັດສາດ; ເວລາ 10:30 – 12:00 ໂມງ ສອບເສັງ ພາສາຈີນ + ພາສາອັງກິດ; ການສໍາພາດ ພາກບ່າຍເລີ່ມແຕ່ເວລາ 13:30 – 16:00 ໂມງ ເຊິ່ງສຳພາດໂດຍອາຈານຈີນ.
ໃນໂອກາດນີ້, ທ່ານ ຄຳຮຸ່ງ ຈັນທະວົງ ຫົວໜ້າສະຖາບັນຂົງຈື ຝ່າຍລາວ ໄດ້ໃຫ້ຮູ້ວ່າ: ສະຖາບັນຂົງຈືໄດ້ມີການແຈ້ງຂ່າວ ແລະ ເຜີຍແຜ່ຂໍ້ມູນກ່ຽວກັບການສອບເສັງເຂົ້າຮຽນຫຼັກສູດປະລິນຍາຕີ ສາຂາຄູພາສາຈີນ ເລີ່ມແຕ່ເດືອນກໍລະກົດເປັນຕົ້ນມາຜ່ານສື່ຕ່າງໆ ຄຽງຄູ່ກັນກັບລົງໂຄສະນາເຜີຍແຜ່ຫຼັກສູດການຮຽນ-ການສອນ ຂອງສະຖາບັນຂົງຈືຢູ່ໂຮງຮຽນມັດທະຍົມສົມບູນໃນຊ່ວງຕົ້ນປີຜ່ານມາ, ໃນສົກສຶກສານີ້ ມີຜູ້ທີ່ສົນໃຈສະໝັກເຂົ້າຮຽນສອບເສັງທັງໝົດ 681 ຄົນ, ເພື່ອຄັດເລືອກເອົານັກສຶກສາຜູ້ທີໄດ້ຄະແນນ ແລະ ມີພື້ນຖານພາສາຈີນດີທີ່ສຸດຈຳນວນ 105 ຄົນ. ຫຼັກສູດປະລິນຍາຕີ ສາຂາຄູພາສາຈີນ ເປັນຫຼັກສູດການຮ່ວມມື ລະຫວ່າງມະຫາວິທະຍາໄລແຫ່ງຊາດ (ລາວ) ແລະ ມະຫາວິທະຍາໄລຊົນເຜົ່າກວາງຊີ (ສປ ຈີນ) ລະບົບການຮຽນ-ການສອນ 2+2, ປີ 1 ຫາ ປີ 2 ແມ່ນຮຽນຢູ່ສະຖາບັນຂົງຈື ມະຫາວິທະຍາໄລແຫ່ງຊາດ, ປີ 3 ຫາ ປີ 4 ນັກສຶກສາທີ່ເສັງຜ່ານລະດັບ HSK ໄດ້ 210 ຄະແນນຂຶ້ນໄປ ແລະ HSKK (ພາກເວົ້າ) ລະດັບກາງຂຶ້ນໄປ ຈະໄດ້ຮັບທຶນການສຶກສາ 100% ໄປຮຽນຕໍ່ຢູ່ ມະຫາວິທະຍາໄລຊົນເຜົ່າກວາງຊີ ສປ ຈີນ ແລະ ເມື່ອຈົບການສຶກສາຈະໄດ້ຮັບໃບປະກາດປະລິນຍາຕີ 2 ໃບ ຈາກທັງສອງມະຫາວິທະຍາໄລ.
ສຳລັບຜົນການສອບເສັງ ແມ່ນຄາດວ່າຈະປະກາດຢ່າງເປັນທາງການໃນທ້າຍເດືອນສິງຫາ 2026 ນີ້, ຫຼັງຈາກນັ້ນຈະໄດ້ເລີ່ມເປີດການຮຽນ-ການສອນໃນທ້າຍເດືອນກັນຍາ 2026. ຫຼັກສູດປະລິນຍາຕີ ສາຂາຄູພາສາຈີນ ໄດ້ເລີ່ມດຳເນີນການສິດສອນມາຕັ້ງແຕ່ປີ 2021 ໂດຍໄດ້ຮັບການອະນຸມັດຈາກ ກະຊວງສຶກສາທິການ ແລະ ກິລາ, ເຊິ່ງປັດຈຸບັນໄດ້ສ້າງບຸກຄະລາກອນຈົບອອກໄປແລ້ວ 2 ຮຸ່ນ.
ໃນວັນທີ 14 ສິງຫາ 2026, ພິທີປະກາດການບົ່ງຕົວແຕ່ງຕັ້ງ ເລຂາຄະນະບໍລິຫານງານພັກ ແລະ ກຳມະການຄະນະບໍລິຫານງານພັກ ມະຫາວິທະຍາໄລແຫ່ງຊາດ (ມຊ) ຢ່າງເປັນທາງການ ທີ່ຫ້ອງປະຊຸມສະຖາບັນຂົງຈື, ໂດຍການເປັນປະທານຂອງ ທ່ານ ຮສ. ປອ. ທອງສະລິດ ມັງໝໍ່ເມກ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ (ສສກ); ໂດຍມີບັນດາການນຳ, ຄະນະບໍລິຫານງານພັກ ມຊ, ຄະນະພັກຮາກຖານ, ຕາງໜ້າ 3 ອົງການຈັດຕັ້ງມະຫາຊົນ (ຊາວໜຸ່ມ, ແມ່ຍິງ, ກຳມະບານ) ພ້ອມດ້ວຍແຂກຖືກເຊີນເຂົ້າຮ່ວມ.
ໃນພິທີ, ທ່ານ ນາງ ໄພວັນ ແທ່ງຄຳ, ຮອງຫົວໜ້າກົມຈັດຕັ້ງ ກະຊວງສຶກສາທິການ ແລະ ກິລາ ໄດ້ຂຶ້ນຜ່ານມະຕິຕົກລົງ ສະບັບເລກທີ 118/ຄປຈ.ສສກ, ລົງວັນທີ 6 ສິງຫາ 2026 ວ່າດ້ວຍການບົ່ງຕົວແຕ່ງຕັ້ງ ເລຂາຄະນະບໍລິຫານງານພັກ ມະຫາວິທະຍາໄລແຫ່ງຊາດ ໂດຍບົ່ງຕົວແຕ່ງຕັ້ງ ສະຫາຍ ຮສ. ປອ. ສິນທະວອນ ດາລາວົງ, ກຳມະການປະຈຳພັກກະຊວງ ສສກ, ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ເປັນ ເລຂາຄະນະບໍລິຫານງານພັກ ມະຫາວິທະຍາໄລແຫ່ງຊາດ; ພ້ອມທັງຜ່ານມະຕິຕົກລົງຂອງຄະນະປະຈຳພັກກະຊວງສຶກສາທິການ ແລະ ກິລາ ສະບັບເລກທີ 103/ຄປຈ.ສສກ, ລົງວັນທີ 25 ມິຖຸນາ 2026 ວ່າດ້ວຍການບົ່ງຕົວແຕ່ງຕັ້ງ ກຳມະການຄະນະບໍລິຫານງານພັກ ມະຫາວິທະຍາໄລແຫ່ງຊາດ (ເພີ່ມ) ໂດຍບົ່ງຕົວແແຕ່ງຕັ້ງ ສະຫາຍ ຄຳຮຸ່ງ ຈັນທະວົງ, ເລຂາໜ່ວຍພັກຮາກຖານ, ຜູ້ອຳນວຍການສະຖາບັນຂົງຈື ເປັນ ກຳມະການຄະນະບໍລິຫານງານພັກ ມະຫາວິທະຍາໄລແຫ່ງຊາດ (ເພີ່ມ).
ໂອກາດດັ່ງກ່າວ, ທ່ານ ຮສ. ປອ. ທອງສະລິດ ມັງໝໍ່ເມກ ໄດ້ໃຫ້ກຽດໂອ້ລົມຕໍ່ທີ່ປະຊຸມ, ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພົ້ນເດັ່ນ ໃນການຮັບສະໝັກນັກສຶກສາຂອງ ມະຫາວິທະຍາໄລແຫ່ງຊາດ ປະຈຳສົກສຶກສາ 2026-2027. ພ້ອມດຽວກັນນັ້ນ, ທ່ານໄດ້ເນັ້ນໃສ່ 4 ທິດທາງວຽກງານສຳຄັນ ຄື: 1). ເອົາໃຈໃສ່ເຊື່ອມຊຶມ ແລະ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກປະຊາຊົນ ປະຕິວັດລາວ, ພ້ອມທັງປັບປຸງແບບແຜນ, ກົນໄກ ແລະ ວິທີເຮັດວຽກຂອງພັກ-ລັດ ໃຫ້ມີປະສິດທິພາບ ແລະ ປະສິດທິຜົນສູງ; 2). ເນື່ອງໃນໂອກາດສະເຫຼີມສະຫຼອງ ມະຫາວິທະຍາໄລແຫ່ງຊາດ ຄົບຮອບ 30 ປີ, ໃຫ້ທົບທວນຄືນບັນດາວຽກງານຕ່າງໆຂອງພັກ ວ່າໄດ້ມີການຂະຫຍາຍຕົວແນວໃດ ແລະ ກຳນົດແຜນການປັບປຸງໃນຕໍ່ໜ້າ; 3). ເອົາໃຈໃສ່ຍົກສູງບົດບາດ ແລະ ສ້າງຄວາມສາມັກຄີພາຍໃນອົງກອນ ກໍຄືລະຫວ່າງສະມາຊິກພັກໃຫ້ແໜ້ນແຟ້ນ; 4). ເອົາໃຈໃສ່ວຽກງານການສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ; ພ້ອມທັງຮີບຮ້ອນໃຫ້ບັນດາໜ່ວຍພັກສ້າງແຜນການ ເພື່ອແກ້ໄຂ ແລະ ປັບປຸງບັນຫາທີ່ຍັງຄົງຄ້າງ, ໂດຍເລີ່ມຈາກການປັບປຸງແບບແຜນວິທີເຮັດວຽກໃຫ້ດີຂຶ້ນ ເຊິ່ງຖືເປັນວຽກງານສຳຄັນຂອງອົງຄະນະພັກ ມຊ.
ໃນຕອນທ້າຍ, ທ່ານ ຮສ. ປອ. ສິນທະວອນ ດາລາວົງ ໄດ້ຂຶ້ນຮັບຄຳໂອວາດ ແລະ ກ່າວສະແດງຄວາມຂອບໃຈຢ່າງສູງຕໍ່ ທ່ານ ຮສ. ປອ. ທອງສະລິດ ມັງໝໍ່ເມກ ທີ່ຍາມໃດກໍໄດ້ເອົາໃຈໃສ່ຊີ້ນຳ-ນຳພາ ມະຫາວິທະຍາໄລແຫ່ງຊາດ ໃນການກໍ່ສ້າງຊັບພະຍາກອນມະນຸດ, ການຄົ້ນຄວ້າວິທະຍາສາດ, ການສ້າງນະວັດຕະກຳ ແລະ ການບໍລິການທາງດ້ານວິຊາການ ເພື່ອຮັບໃຊ້ການພັດທະນາປະເທດຊາດ; ເຊິ່ງຄຳໂອວາດທັງໝົດນີ້ ຖືເປັນທິດທາງ ແລະ ແນວທາງອັນສຳຄັນ ໃຫ້ຄະນະພັກທຸກຂັ້ນ ແລະ ສະມາຊິກພັກທຸກສະຫາຍຂອງ ມະຫາວິທະຍາໄລແຫ່ງຊາດ ນຳໄປຜັນຂະຫຍາຍ ຈັດຕັ້ງປະຕິບັດເຂົ້າໃນວຽກງານຕົວຈິງຕໍ່ໄປ.
ໃນວັນທີ 13 ສິງຫາ 2026 ຜ່ານມານີ້, ທ່ານ ສຈ.ປອ ເດຊານຸລາດ ແສງດວງເດດ, ອະດີດຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ(ມຊ), ຜູ້ທີ່ໄດ້ອຸທິດຕົນຕະຫຼອດຊີວິດໃນການພັດທະນາການສຶກສາ ແລະ ປັດຈຸບັນໄດ້ຮັບອຸດໜູນບໍານານ, ໄດ້ນຳເອົາຜົນງານການຄົ້ນຄວ້າ ແລະ ເອກະສານວິຊາການອັນລ້ຳຄ່າ ມາມອບໃຫ້ແກ່ຫໍສະໝຸດແຫ່ງຊາດ, ມະຫາວິທະຍາໄລສຸພານຸວົງ, ຄະນະສຶກສາສາດ ພ້ອມດ້ວຍບັນດາສະຖາບັນການສຶກສາ ແລະ ຫ້ອງການຕ່າງໆ.
ພາຍຫຼັງສຳເລັດພາລະກິດໃນການບໍລິຫານ ມຊ ແລະ ເຂົ້າຮັບອຸດໜູນບໍານານ, ທ່ານ ສຈ.ປອ ເດຊານຸລາດ ແສງດວງເດດ ຍັງຄົງຮັກສາອຸດົມການອັນສູງສົ່ງໃນການສົ່ງເສີມການສຶກສາ. ການມອບປຶ້ມໃນຄັ້ງນີ້ ບໍ່ພຽງແຕ່ເປັນການມອບເອກະສານເພື່ອປະກອບສ່ວນທາງດ້ານວິຊາການເທົ່ານັ້ນ, ແຕ່ຫາກເປັນການ "ສົ່ງມອບປັນຍາ ແລະ ປະສົບການ" ທີ່ທ່ານໄດ້ສະສົມມາຕະຫຼອດຊີວິດການເຮັດວຽກຮັບໃຊ້ປະເທດຊາດ. ປຶ້ມ ແລະ ເອກະສານທີ່ນຳມາມອບໃນຄັ້ງນີ້ ມີຄວາມຫຼາກຫຼາຍທາງດ້ານເນື້ອໃນ, ລວມມີ: ຜົນງານການຄົ້ນຄວ້າວິທະຍາສາດລະດັບສາກົນ ເຊັ່ນ: ປຶ້ມຫົວຂໍ້ “Local Transformation under Development of Regional Integration”, ປຶ້ມກ່ຽວກັບປະຫວັດສາດທ້ອງຖິ່ນ, ຄວາມຮູ້ພື້ນບ້ານໃນການຜະລິດ ແລະ ບົດລາຍງານວິຊາການທີ່ມີຄຸນຄ່າສູງ. ເອກະສານເຫຼົ່ານີ້ ຈະເປັນແຫຼ່ງຊັບພະຍາກອນອັນສຳຄັນ ເພື່ອໃຫ້ລູກຫຼານນັກຮຽນ, ນັກສຶກສາ ແລະ ນັກຄົ້ນຄວ້າຮຸ່ນຫຼັງ ໄດ້ສຶກສາຮໍ່າຮຽນ ແລະ ນຳໄປໝູນໃຊ້ໃຫ້ເກີດປະໂຫຍດສູງສຸດແກ່ສັງຄົມ ແລະປະເທດຊາດ.
ໃນໂອກາດນີ້, ທ່ານ ສຈ.ປອ ເດຊານຸລາດ ແສງດວງເດດ ໄດ້ກ່າວດ້ວຍຄວາມພາກພູມໃຈວ່າ ການແບ່ງປັນຄວາມຮູ້ຜ່ານປຶ້ມເຫຼົ່ານີ້ ແມ່ນວິທີການໜຶ່ງໃນການສືບຕໍ່ປະກອບສ່ວນພັດທະນາຊັບພະຍາກອນມະນຸດ ໃຫ້ມີຄວາມຮູ້, ຄວາມສາມາດ ແລະ ມີວິໄສທັດທີ່ກວ້າງໄກໃນອະນາຄົດ; ໂອກາດດຽວກັນ ຜູ້ຕາງໜ້າບັນດາຫໍສະໝຸດ ແລະ ສະຖາບັນການສຶກສາທີ່ຮັບມອບປຶ້ມ ກໍໄດ້ສະແດງຄວາມຂອບໃຈຢ່າງສູງ ຕໍ່ນ້ຳໃຈອັນປະເສີດຂອງທ່ານ ສຈ.ປອ ເດຊານຸລາດ ແສງດວງເດດ ທີ່ເຫັນໄດ້ຄວາມສຳຄັນຂອງການເກັບຮັກສາ ແລະ ເຜີຍແຜ່ຄວາມຮູ້ ເຊິ່ງຈະເປັນເບົ້າຫຼໍ່ຫຼອມອັນສຳຄັນສ່ວນໜຶ່ງ ໃນການພັດທະນາການສຶກສາຂອງປະເທດຊາດໃຫ້ກ້າວໜ້າຕໍ່ໄປ.
ເພື່ອປະຕິບັດຕາມທິດຊີ້ນໍາຂອງກະຊວງສຶກສາທິການ ແລະກີລາ ກໍຄື ແຜນພັດທະນາຄຸນນະພາບ
ການສຶກສາຂອງ ມະຫາວິທະຍາໄລແຫ່ງຊາດ(ມຊ), ໃນວັນທີ 08 ສິງຫາ 2026 ນີ້, ມຊ ໄດ້ຈັດການສອບເສັງຄັດເລືອກເອົານັກສຶກສາເຂົ້າຮຽນສົກສຶກສາ 2026-2027, ເຊິ່ງເຂດການສອບເສັງໃຫຍ່ແມ່ນຈັດຂຶ້ນທີ່ ວິທະຍາເຂດດົງໂດກ, ໂດຍການເປັນປະທານຂອງທ່ານ ຮສ.ປອ.ສິນທະວອນ ດາລາວົງ ຜູ້ອໍານວຍການໃຫຍ່ ມຊ, ປະທານຄະນະກໍາມະການການສອບເສັງ, ມີ ທ່ານ ນາງ ສິດທັດຖາ ໄຕແກ້ວພິບູນ ຮອງຫົວໜ້າກົມ ປະກັນຄຸນນະພາບການສຶກສາ ກະຊວງສຶກສາທິການ ແລະກີລາ, ມີບັນດາທ່ານຮອງຜູ້ອໍານວຍການໃຫຍ່ ມຊ, ບັນດາຄະນະກໍາມະການຝ່າຍຕ່າງໆ ແລະພະນັກງານທີ່ກ່ຽວຂ້ອງເຂົ້າຮ່ວມ.
ການສອບເສັງຄັດເລືອກນັກເອົາສຶກສາເຂົ້າຮຽນ ມຊ ປີນີ້, ແມ່ນຈັດການສອບເສັງແບບເຊິ່ງໜ້າ, ໃຫ້ນັກຮຽນທີ່ຈົບຊັ້ນ ມ7 ທີ່ໄດ້ລົງທະບຽນຖືກຕ້ອງຕາມຂັ້ນຕອນມາສອບເສັງຢູ່ຕາມຫ້ອງສອບເສັງທີ່ໄດ້ກໍານົດໄວ້. ທ່ານ ຮສ.ປອ. ສິນທະວອນ ດາລາວົງ ຜູ້ອໍານວຍການໃຫຍ່ ມຊ ໄດ້ໃຫ້ສໍາພາດຕໍ່ສື່ມວນຊົນ ກ່ຽວກັບການສອບເສັງ ສົກສຶກສາ 2026-2027 ວ່າ: ເພື່ອຄວາມເປັນລະບຽບ-ຮຽບຮ້ອຍໃນການສອບເສັງຄັດເລືອກເອົານັກສຶກສາເຂົ້າຮຽນ ມຊ ໃນສົກສຶກສານີ້, ທາງ ມຊ ພວກເຮົາໄດ້ມີການກະກຽມຄວາມພ້ອມຕ່າງໆມາຕັ້ງແຕ່ເດືອນ ມິຖຸນາ 2026, ເຊິ່ງໄດ້ແຕ່ງຕັ້ງບັນດາຄະນະກໍາການຮັບຜິດຊອບຝ່າຍຕ່າງໆ ເຊັ່ນຄະນະກໍາມະການຊີ້ນໍາ, ຄະນະກໍາມະການຍ່ອຍເພື່ອລົງເລິກແຕ່ລະໜ້າວຽກຂອງການສອບເສັງ, ເຊິ່ງຜ່ານການກະກຽມມາຮອດມື້ນີ້ ວັນທີ 08 ສິງຫາ 2026 ເປັນມື້ສອບເສັງຕົວຈິງ; ເຫັນວ່າແຕ່ລະໜ້າວຽກແມ່ນມີຄວາມພ້ອມ 100%; ການສອບເສັງຄັດເລືອກເອົານັກສຶກສາ ສົກສຶກສາ 2026-2027 ປີນີ້, ແມ່ນໄດ້ເປີດໃຫ້ນັກສຶກສາລົງທະບຽນຜ່ານລະບົບອອນລາຍ ມາຕັ້ງແຕ່ວັນທີ 06 ກໍລະກົດ ເຖິງວັນທີ 07 ສິງຫາ ແລະພາຍຫຼັງສະໝັກລົງທະບຽນຜ່ານລະບົບອອນລາຍແລ້ວ ແມ່ນໃຫ້ຜູ້ສະໝັກສອບເສັງ ເຂົ້າມາເອົາບັດເຂົ້າຫ້ອງສອບເສັງຂອງຕົນ ຢູ່ທີ່ສະຖານທີ່ລົງທະບຽນ ໃນວິທະຍາເຂດດົງໂດກ ມຊ ເພື່ອກຽມພ້ອມເຂົ້າຫ້ອງສອບເສັງ.
ພາຍຫຼັງເປີດໃຫ້ລົງທະບຽນສະໝັກສອບເສັງ ແຕ່ວັນທີ 06 ກໍລະກົດ ຈົນຮອດມື້ປິດຮັບ ຄືວັນທີ 07 ສິງຫາ 2026, ມີຜູ້ສະໝັກລົງທບຽນເຂົ້າຮຽນທັງໝົດແມ່ນ 8,765 ຄົນ ແລະ ມີໜ້າສອບເສັງຕົວຈິງ ແມ່ນ 7,867 ຄົນ; ເຊິ່ງແບ່ງອອກເປັນ 02 ສູນການສອບເສັງຄື: ສູນວິທະຍາເຂດດົງໂດກ ແລະ ສູນວິທະຍາເຂດໂສກປ່າຫຼວງ; ມີ 16 ຈຸດການສອບເສັງ; ໃນນັ້ນ ສາຍ A ມີ 5 ຈຸດ, ສາຍ B ມີ 10 ຈຸດ (ສໍາຮອງວິທະຍາເຂດດົງໂດກ 1 ຈຸດ ແລະ ວິທະຍາເຂດໂສກປ່າຫຼວງ 1 ຈຸດ; ມີ 387 ຫ້ອງສອບເສັງ. ສາຍ A 107 ຫ້ອງ, ສາຍ B 280 ຫ້ອງ, ແຕ່ລະຫ້ອງບັນຈຸນັກສອບເສັງໄດ້ 20 ຫາ 30 ຄົນ. ມີກຳມະການຍາມຫ້ອງສອບເສັງທັງໝົດ 797 ທ່ານ (ກໍາມະການຕົ້ນຕໍ 750 ທ່ານ; ສຳຮອງ 47 ທ່ານ). ໃນນັ້ນ ສາຍ A ມີກຳມະການຍາມຫ້ອງສອບເສັງ 224 ທ່ານ (ກຳມະການຕົ້ນຕໍ 210 ທ່ານ, ກຳມະການສຳຮອງ 14 ທ່ານ); ສາຍ B ມີຄະນະກຳມະການຍາມຫ້ອງສອບເສັງ 573 ທ່ານ (ກຳມະການຕົ້ນຕໍ 540 ທ່ານ, ກຳມະການສຳຮອງ 33 ທ່ານ) ສໍາລັບຕາຕະລາງການສອບເສັງແມ່ນໄດ້ແບ່ງອອກເປັນ 02 ກຸ່ມ ຄື:A ແລະ B; ກຸ່ມ A ກຸ່ມວິຊາທໍາມະຊາດ ແລະເທັກໂນໂລຊີ STEM ມີ 65 ສາຂາວິຊາ ແລະ ກຸ່ມ B ກຸ່ມວິຊາສັງຄົມສາດ ແລະມະນຸດສາດ NON STEM ມີ 50 ສາຂາວິຊາ ຊຶ່ງໄດ້ຈັດການສອບເສັງໃນມື້ດຽວກັນ ກໍຄື ວັນທີ 08 ສິງຫາ 2026 ມື້ນີ້; ກຸ່ມ A ຕອນເຊົ້າ ເສັງ ຄະນິດສາດ+ຟີຊິກສາດ ໃຊ້ເວລາ 120 ນາທີ; ຕອນບ່າຍ ເສັງ ພາສາລາວ-ວັນນະຄະດີ + ເຄມີສາດ+ຊີວະສາດ ແລະ ພາສາອັງກິດ ໃຊ້ເວລາ 90 ນາທີ; ກຸ່ມ B ຕອນເຊົ້າ ເສັງ ວິຊາຄະນິດສາດ B+ພາສາລາວ-ວັນນະຄະດີ ໃຊ້ເວລາ 120 ນາທີ; ຕອນບ່າຍ ເສັງວິຊາ ພູມີສາດ+ປະຫວັດສາດ ແລະພາສາອັງກິດ ໃຊ້ເວລາ 90 ນາທີ.
ທ່ານກ່າວຕື່ມວ່າ ໃນສົກສຶກສາ 2026-2027 ນີ້, ມຊ ມີແຜນຮັບເອົານັກສຶກສາ ເຂົ້າຮຽນທັງ
ໝົດ ຈໍານວນ 7,025 ຄົນ. ໃນນັ້ນຫຼັກສູດປະລິນຍາຕີ 5,570 ຄົນ, ຫຼັກສູດປະລິນຍາຕີ ນາໆຊາດ 100 ຄົນ, ຫຼັກສູດ ຕໍ່ເນື່ອງປະລິນຍາຕີ 1,295 ຄົນ ແລະ ຫຼັກສູດອະນຸປະລິນຍາ 60 ຄົນ ແລະ ມຊ ເປັນສະຖາບັນການສຶກສາທີ່ມີຫຼາກຫຼາຍສາຂາວິຊາຮຽນ ແຫ່ງທໍາອິດຂອງລາວ ປະກອບມີ 13 ຄະນະວິຊາ, ມີຫຼັກສູດລະດັບປະລິນຍາຕີ 123 ຫຼັກສູດ, ຕໍ່ເນື່ອງປະລິນຍາຕີ 46 ຫຼັກສູດ ແລະ ລະດັບອະນຸປະລິນຍາມີ 6 ຫຼັກສູດ. ຫຼັກສູດທີ່ເປີດຮັບສະໝັກລົງທະບຽນສອບເສັງໃນສົກສຶກສາ 2026-2027 ມີ ລະດັບປະລິນຍາຕີ ທັງໝົດ 115 ຫຼັກສູດ, ໃນນັ້ນປະກອບມີຫຼັກສູດນາໆຊາດ 2 ຫຼັກສູດ. ແບ່ງອອກເປັນ: ສາຍ A (ວິທະຍາສາດ ແລະ ເຕັກໂນໂລຢີ): 65 ຫຼັກສູດ; ສາຍ B (ສັງຄົມສາດ ແລະ ມະນຸດສາດ): 50 ຫຼັກສູດ ແລະພາຍຫຼັງການສອບເສັງຄາດວ່າ ຈະປະກາດຜົນການສອບເສັງ ໃຫ້ສັງຄົມຮັບຊາບໃນວັນທີ 24 ສິງຫາ 2026 ແລະ ຈະເປີດຮັບລົງທະບຽນ ວັນທີ 31 ສິງຫາ 2026 ເປັນຕົ້ນໄປ.
ຂະນະດຽວກັນ ທ່ານຍັງໄດ້ຝາກຄວາມຫ່ວງໃຍເຖິງບັນດາລູກຫຼານ ທີ່ຮຽນຈົບ ມ.7 ຫຼື ທຽບເທົ່າ ທີ່ໄດ້ເຂົ້າສອບເສັງເຂົ້າໃນມື້ນີ້, ກໍຄື ລູກຫຼານທີ່ກຽມເສັງເຂົ້າຮຽນ ມຊ ໃນສົກສຶກສາຕໍ່ໄປ ໃຫ້ຮັບຊາບວ່າ: ທຸກສາຂາວິຊາ ທີ່ດໍາເນີນການຮຽນ-ການສອນ ຢູ່ໃນແຕ່ລະຄະນະວິຊາ ຂອງ ມຊ ແມ່ນມີຄວາມສໍາຄັນເທົ່າທຽມກັນ, ຮຽນຈົບທຸກສາຂາວິຊາ ແມ່ນລ້ວນແຕ່ມີຄວາມສໍາຄັນໃນການປະກອບອາຊີບ ເພື່ອພັດທະນາຕົນເອງ, ສັງຄົມ ແລະ ປະເທດຊາດ ແລະສໍາລັບນ້ອງໆ ແລະລູກຫຼານທີ່ມາເສັງມື້ນີ້, ຈົ່ງເອົາໃຈໃສ່ຕໍ່ການສອບເສັງໃຫ້ໄດ້ຮັບຜົນດີ ແລະໄດ້ຮັບຜົນສໍາເລັດດັ່ງທີ່ຕັ້ງໃຈໄວ້.
ວັນທີ 6 ສິງຫາ 2026: ທີ່ຫ້ອງຮັບແຂກ 213 ຕຶກສຳນັກງານຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ອຳເຄັງ ເພັງລາສີ ຮອງຫົວໜ້າຫ້ອງການສັງລວມ ແລະ ພົວພັນຕ່າງປະເທດ ມຊ, ພ້ອມດ້ວຍພະນັກງານທີ່ກ່ຽວຂ້ອງໄດ້ຕ້ອນຮັບ ການມາຢ້ຽມຢາມຂອງຄະນະຜູ້ແທນຈາກ ມະຫາວິທະຍາໄລແຫ່ງຊາດ ຄັງວອນ (Kangwon National University - KNU), ສາທາລະນະລັດ ເກົາຫຼີ (ສ.ເກົາຫຼີ)
ຈຸດປະສົງການມາຢ້ຽມຢາມ ມຊ ຂອງຄະນະຜູ້ແທນ ມະຫາວິທະຍາໄລແຫ່ງຊາດ ຄັງວອນ ສ.ເກົາຫຼີ ໃນຄັ້ງນີ້, ແມ່ນເພື່ອປຶກສາຫາລືການຮ່ວມມືທາງດ້ານວິຊາການ ແລະທົບທວນຄືນຂອບການຮ່ວມມື ແລະ ກະກຽມຄວາມພ້ອມໃນການຮ່າງຂໍ້ຕົກລົງການຮ່ວມມື (MOU / MOA) ສະບັບໃໝ່ຮ່ວມກັນ, ການພົບປະກັນໃນຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງຄວາມອົບອຸ່ນ, ສະໜິດສະໜົມ ແລະ ເຕັມໄປດ້ວຍໄມຕີຈິດ-ມິດຕະພາບແຫ່ງການຮ່ວມມືທາງດ້ານວິຊາການ. ເຊິ່ງການປຶກສາຫາລື, ທັງສອງຝ່າຍໄດ້ທົບທວນຄືນຜົນການດຳເນີນງານຕາມຂອບການຮ່ວມມືໃນໄລຍະທີ່ຜ່ານມາ, ພ້ອມທັງແລກປ່ຽນທັດສະນະ ແລະ ທິດທາງໃນການຊຸກຍູ້ສົ່ງເສີມກິດຈະກຳການແລກປ່ຽນທາງວິຊາການໃຫ້ມີຄວາມເຂັ້ມແຂງຍິ່ງຂຶ້ນ ໂດຍໄດ້ມຸ່ງເນັ້ນໃສ່ການສົ່ງເສີມ: 1) ການແລກປ່ຽນນັກສຶກສາ, ຄູ-ອາຈານ ແລະ ພະນັກງານຄຸ້ມຄອງການສຶກສາລະຫວ່າງສອງສະຖາບັນ, 2) ການຮ່ວມມືທາງດ້ານການຄົ້ນຄວ້າ-ວິໄຈ ແລະ ການຈັດກິດຈະກຳທາງວິຊາການຮ່ວມກັນ ແລະ 3) ການກະກຽມຮ່າງ ແລະ ລົງນາມໃນຂໍ້ຕົກລົງຄວາມຮ່ວມມື (MOA / MOU) ສະບັບໃໝ່ ເພື່ອໃຫ້ສອດຄ່ອງກັບສະພາບການຂະຫຍາຍຕົວທາງດ້ານການສຶກສາໃນປັດຈຸບັນ.
ການຮ່ວມມືດ້ານວິຊາການ ລະຫວ່າງ ມຊ ແລະ ມະຫາວິທະຍາໄລແຫ່ງຊາດ ຄັງວອນ (KNU) ແມ່ນໄດ້ເລີ່ມຕົ້ນສ້າງສາຍພົວພັນ ແລະ ລົງນາມໃນສັນຍາຮ່ວມມື ເຊິ່ງກັນ ແລະກັນມາແຕ່ວັນທີ 14 ມີນາ 2003 ເປັນຕົ້ນມາ. ຕະຫຼອດໄລຍະເວລາທີ່ຜ່ານມາ, KNU ໄດ້ຈັດໃຫ້ ມຊ ເປັນໜຶ່ງໃນມະຫາວິທະຍາໄລຄູ່ຮ່ວມມື (Partner University) ທີ່ສຳຄັນໃນພາກພື້ນອາຊີ. ສະນັ້ນ, ການພົບປະ ແລະ ທົບທວນຄືນສັນຍາການຮ່ວມມືສະບັບໃໝ່ໃນຄັ້ງນີ້ ຖືເປັນບາດກ້າວອັນສຳຄັນໃນການຍົກລະດັບການຮ່ວມມືດ້ານການສຶກສາລະຫວ່າງ ລາວ ແລະ ສ.ເກົາຫຼີເວົ້າລວມ; ເວົ້າສະເພາະ ແມ່ນ ມຊ ລາວ ແລະມະຫາວິທະຍາໄລແຫ່ງຊາດຄັງວອນ ສ.ເກົາຫຼີ ໃຫ້ມີຄວາມແໜ້ນແຟ້ນຍິ່ງຂຶ້ນ, ທັງເປັນການເພີ່ມໂອກາດໃນການພັດທະນາທັກສະ ແລະ ຄວາມຮູ້ໃຫ້ແກ່ນັກສຶກສາ ລວມເຖິງບຸກຄະລາກອນຂອງທັງສອງສະຖາບັນຢ່າງຍືນຍົງ.
ໃນວັນທີ 05 ສິງຫາ 2026 ທີ່ຜ່ານມາ, ທີ່ຫ້ອງປະຊຸມຊັ້ນ 2 ອາຄານ ຫົວໜ້າຄະນະວິຊາ, ຄະນະວິສະວະກຳສາດ ມະຫາວິທະຍາໄລແຫ່ງຊາດ (ມຊ) ໄດ້ມີການຈັດພິທີມອບ-ຮັບການສະໜັບສະໜູນ ແລະ ໃບກຽດຕິຄຸນ ຂັ້ນກະຊວງສຶກສາທິການ ແລະ ກີລາ ຈາກບັນດາບໍລິສັດ ແລະ ອະດີດນັກສຶກສາ ເນື່ອງໃນໂອກາດສະເຫຼີມສະຫຼອງ ມຊ ຄົບຮອບ 30 ປີ. ໂດຍການໃຫ້ກຽດເຂົ້າຮ່ວມ ແລະ ມອບໃບກຽດຕິຄຸນໂດຍ ທ່ານ ຮສ ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມຊ, ໃນພິທີມີ ຫົວໜ້າຄະນະວິຊາ, ຫົວໜ້າພາກວິຊາ, ຕົວແທນຈາກ 7 ບໍລິສັດຜູ້ໃຫ້ການສະໜັບສະໜູນ, ບັນດາອະດີດນັກສຶກສາ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນພິທີ, ໄດ້ມີການຮັບຟັງການລາຍງານ ແລະ ນຳສະເໜີແຜນການພັດທະນາ ຄະນະວິສະວະກຳສາດ ຈາກ ທ່ານ ຮສ. ປອ. ຄຳປະເສີດ ເທບວົງສາ ຫົວໜ້າຄະນະວິຊາ. ຫຼັງຈາກນັ້ນ, ໄດ້ມີພິທີມອບ-ຮັບການສະໜັບສະໜູນທັງເປັນທຶນຮອນ ແລະ ອຸປະກອນການສຶກສາ ຈາກ 7 ບໍລິສັດ ເຊິ່ງເປັນຕົວແທນຂອງອະດີດນັກສຶກສາຈາກພາກວິຊາຕ່າງໆ ຂອງຄະນະວິສະວະກຳສາດ ມຊ, ລວມມູນຄ່າການສະໜັບສະໜູນທັງໝົດແມ່ນ 647,601,950 ກີບ(ຫົກຮ້ອຍສີ່ສິບເຈັດລ້ານ ຫົກແສນນຶ່ງພັນ ເກົ້າຮ້ອຍຫ້າສິບກີບ). ເຊິ່ງແບ່ງອອກເປັນ 3 ພາກສ່ວນຄື:
1. ພາກວິຊາວິສະວະກຳໄຟຟ້າ (ອະດີດນັກສຶກສາ ປ.ຕີ ຮຸ່ນທີ 13): ໄດ້ມອບອຸປະກອນໄຟຟ້າ ລວມມູນຄ່າ 372,601,950 ກີບ. ປະກອບມີ: ບໍລິສັດ Extra Link Sole Co., LTD (209,037,950 ກີບ) ແລະ ບໍລິສັດ Antech Co., LTD (163,564,000 ກີບ).
2. ພາກວິຊາວິສະວະກຳໂຍທາ (ອະດີດນັກສຶກສາ ປ.ຕີ ຮຸ່ນ 16 ແລະ ປ.ໂທ ຮຸ່ນ 4): ໄດ້ມອບທຶນສະໜັບສະໜູນ ລວມມູນຄ່າ 110,000,000 ກີບ. ປະກອບມີ: ບໍລິສັດ ບຸນທະວີ ຈຳກັດ (40 ລ້ານກີບ), ບໍລິສັດ ຊີວີເຄ ກໍ່ສ້າງ ຈຳກັດຜູ້ດຽວ 25 ລ້ານກີບ, ບໍລິສັດ LN ອະສັງຫາລິມະຊັບ ແລະ ອອກແບບຕົກແຕ່ງ ຈຳກັດຜູ້ດຽວ 25 ລ້ານກີບ ແລະ ບໍລິສັດ ພອນປະເສີດ ອອກແບບກໍ່ສ້າງ ຈຳກັດຜູ້ດຽວ 20 ລ້ານກີບ.
3. ພາກວິຊາວິສະວະກຳຄອມພິວເຕີ ແລະ ເຕັກໂນໂລຊີຂໍ້ມູນຂ່າວສານ: ໄດ້ມອບອຸປະກອນ SSN32 Dev Kit (10 ຊຸດ) ແລະ Sensorcloud AIoT Platform ໄລຍະ 3 ປີ ຈາກ ບໍລິສັດ ເຊັນເຊີໂໝດ ໄອໂອທີ ເຕັກໂນໂລຊີ ຈຳກັດຜູ້ດຽວ (Sensormode IoT Technology Sole Co., Ltd) ລວມມູນຄ່າ 165,000,000 ກີບ.
ເພື່ອເປັນການສະແດງຄວາມຮູ້ບຸນຄຸນ ແລະ ຍ້ອງຍໍຊົມເຊີຍຕໍ່ຜົນງານການປະກອບສ່ວນດັ່ງກ່າວ, ທ່ານ ຮສ. ປອ ສິນທະວອນ ດາລາວົງ ຜູ້ອຳນວຍການໃຫຍ່ ມຊ ໄດ້ໃຫ້ກຽດມອບໃບກຽດຕິຄຸນ ຂັ້ນກະຊວງສຶກສາທິການ ແລະ ກີລາ ໃຫ້ແກ່ທັງ 7 ບໍລິສັດ ແລະ ຕົວແທນອະດີດນັກສຶກສາ ແລະ ໃນໂອກາດສໍາຄັນ, ທ່ານ ຮສ. ປອ ສິນທະວອນ ດາລາວົງ ຍັງໄດ້ມີຄຳເຫັນໂອ້ລົມ ແລະ ຊີ້ນຳ ໂດຍທ່ານໄດ້ສະແດງຄວາມຂອບໃຈ ແລະ ຕີລາຄາສູງຕໍ່ນໍ້າໃຈອັນປະເສີດຂອງບັນດາອະດີດນັກສຶກສາ ແລະ ພາກສ່ວນທຸລະກິດ ທີ່ຍາມໃດກໍມີຄວາມຜູກພັນ, ໃຫ້ຄວາມສຳຄັນ ແລະ ກັບຄືນມາປະກອບສ່ວນຢ່າງຕັ້ງໜ້າ ເຂົ້າໃນການພັດທະນາການຮຽນ-ການສອນ ແລະ ພື້ນຖານໂຄງລ່າງຂອງ ມຊ ໃຫ້ມີຄວາມກ້າວໜ້າ ແລະ ເຂັ້ມແຂງຍິ່ງຂຶ້ນເລື້ອຍໆ.
