ເພື່ອເປັນການສະແດງເຖິງຄວາມຮູ້ບຸນຄຸນ ແລະຈາລຶກ ຕໍ່ຜົນງານ ແລະ ຄຸນງາມຄວາມດີ ຂອງການນໍາຂັ້ນສູງ, ອະດີດການນໍາ ໃນການພັດທະນາປະເທດຊາດ ແລະ ຜູ້ທີ່ມີຜົນງານອັນດີຕໍ່ປະເທດຊາດ ແລະປະຊາຊົນ ໃນວັນທີ 04 ກັນຍາ 2026, ຢູ່ທີ່ສະໂມສອນ ສະຖາບັນຂົງຈື ມະຫາວິທະຍາໄລແຫ່ງຊາດ (ມຊ), ໄດ້ມີພິທີມອບ-ຮັບຕຳແໜ່ງວິຊາການຄູບໍ່ປະຈຳ ຂັ້ນສາດສະດາຈານກິດຕິມະສັກ, ຂັ້ນສາດສະດາຈານພິເສດ ແລະປະລິນຍາເອກກິດຕິມະສັກ ມຊ ປະຈຳປີ 2026 ຂຶ້ນຢ່າງສົມກຽດ. ໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ຮສ. ປອ. ທອງສະລິດ ມັງໜໍ່ເມກ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກີລາ, ທ່ານ ຮສ. ປອ. ລິນຄຳ ດວງສະຫວັນ, ກຳມະການສູນກາງພັກ, ລັດຖະມົນຕີກະຊວງກະສິກຳ ແລະ ສິ່ງແວດລ້ອມ, ປະທານສະພາ ມຊ, ມີບັນດາອະດີດການນໍາຂັ້ນສູງ, ມີຄະນະພັກ-ຄະນະນຳ, ບັນດາຄະນະກຳມະການສະພາ ມຊ, ພະນັກງານ, ຄູ-ອາຈານ, ນັກຄົ້ນຄວ້າ ແລະ ແຂກຜູ້ມີກຽດເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ຮສ. ປອ. ອຸ່ນຫຼ້າ ສີວັນເພັງ ຮອງຜູ້ອໍານວຍການໃຫຍ່, ເລຂາທິການສະພາ ມຊ ໄດ້ກ່າວລາຍງານກ່ຽວກັບການເຄື່ອນໄຫວ ແລະ ຂະບວນການກັ່ນຕອງ-ຄັດເລືອກ. ການພິຈາລະນາຕຳແໜ່ງວິຊາການຄູບໍ່ປະຈຳໃນຊຸດປີ 2026 ນີ້ ແມ່ນໄດ້ຈັດຕັ້ງປະຕິບັດຢ່າງເປັນລະບົບ, ເປີດເຜີຍ, ໂປ່ງໃສ ແລະ ຖືກຕ້ອງຕາມດຳລັດ ເລກທີ 503/ລບ ແລະ ຄຳແນະນຳ ເລກທີ 1054/ສສກ. ໂດຍຜ່ານການປະເມີນຈາກຄະນະກຳມະການວິຊາການແຕ່ລະຂັ້ນ ຕັ້ງແຕ່ຂັ້ນຄະນະວິຊາ, ຂັ້ນມະຫາວິທະຍາໄລ ຈົນເຖິງການຮັບຮອງໃນກອງປະຊຸມສະພາ ມຊ ສະໄໝສາມັນ ຄັ້ງທີ 1 ປະຈຳປີ 2026 (ມະຕິຕົກລົງ ເລກທີ 07/ສພມຊ, ລົງວັນທີ 15 ກໍລະກົດ 2026). ຈາກນັ້ນ, ໄດ້ອອກຂໍ້ຕົກລົງມອບຕຳແໜ່ງວິຊາການຄູບໍ່ປະຈຳ ແລະ ປະກາສະນີຍະບັດ ໃຫ້ແກ່ຜູ້ທີ່ມີຜົນງານໂດດເດັ່ນ ທັງໝົດ 06 ທ່ານ (ຂໍ້ຕົກລົງ ເລກທີ 2372/ມຊ, 2373/ມຊ ແລະ 01-02/ມຊ, ລົງວັນທີ 12 ສິງຫາ 2026) ເຊິ່ງປະກອບມີ: ຂັ້ນສາດສະດາຈານກິດຕິມະສັກ ຈຳນວນ 2 ທ່ານ, ຂັ້ນສາດສະດາຈານພິເສດ ຈຳນວນ 2 ທ່ານ ແລະ ປະລິນຍາເອກກິດຕິມະສັກ ຈຳນວນ 2 ທ່ານ, ເຊິ່ງລາຍລະອຽດດັ່ງນີ້: ໄດ້ຜ່ານຂໍ້ຕົກລົງ ຂອງສະພາມະຫາວິທະຍາໄລແຫ່ງຊາດ ສະບັບເລກທີ 01/ສພມຊ, ລົງວັນທີ 12 ສິງຫາ 2026 ຕົກລົງມອບຕໍາແໜ່ງວິຊາການຄູ ບໍ່ປະຈໍາ ຂັ້ນສາດສະດາຈານກິດຕິມະສັກ ສາຂາ ບໍລິຫານລັດ ແລະການພັດທະນາ ໃຫ້ແກ່ທ່ານ ສາດສະດາຈານກິດຕິມະສັກ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສ ປປ.ລາວ ແລະ ຜ່ານຂໍ້ຕົກລົງ ສະບັບເລກທີ 02/ສພມຊ, ລົງວັນທີ 12 ສິງຫາ 2026 ຕົກລົງມອບ ສາດສະດາຈານກິດຕິມະສັກ ສາຂາ ການຄຸ້ມຄອງຊັບພະຍາກອນທໍາມະຊາດ ແລະສິ່ງແວດລ້ອມແບບຍືນຍົງ ໃຫ້ແກ່ທ່ານ ສາດສະດາຈານກິດຕິມະສັກ ສົມມາດ ພົນເສນາ ເພື່ອຢັ້ງຢືນຜົນງານດີເດັ່ນຂອງທັງ 2 ທ່ານ ໃນການພັດທະນາ ປະເທດຊາດ, ຂະແໜງການສຶກສາ ແລະ ມຊ ແລະໃຫ້ກຽດມອບໂດຍ ທ່ານ ຮສ.ປອ ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ, ປະທານສະພາ ມຊ; ຜ່ານຂໍ້ຕົກລົງ ຂອງສະພາ ມຊ ສະບັບເລກທີ 01/ສພມຊ, ລົງວັນທີ 12 ສິງຫາ 2026 ຕົກລົງມອບຕໍາແໜ່ງວິຊາການຄູ ບໍ່ປະຈໍາ ຂັ້ນ ສາດສະດາຈານພິເສດ ສາຂາ ວິສະວະກໍາ ຊົນລະປະທານ ແກ່ທ່ານ ສາດສະດາຈານພິເສດ ປອ. ຄໍາຜາດ ສຸລິນພູມີ ແລະ ຜ່ານຂໍ້ຕົກລົງ ເລກທີ 02/ສພມຊ, ລົງວັນທີ 12 ສິງຫາ 2026 ຕົກລົງມອບຕໍາແໜ່ງວິຊາການຄູ ບໍ່ປະຈໍາ ຂັ້ນສາດສະດາຈານພິເສດ ແກ່ທ່ານ ສາດສະດາຈານພິເສດ ປອ. ວັນທອງ ສີຣິວັນ ເພື່ອຢັ້ງຢືນຜົນງານດີເດັ່ນຂອງທັງ 2 ທ່ານ ໃນການພັດທະນາ ປະເທດຊາດ, ຂະແໜງການສຶກສາ ແລະ ມຊ ເປັນກຽດມອບໂດຍທ່ານ ຮສ.ປອ ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະສິ່ງແວດລ້ອມ ປະທານສະພາ ມຊ. ຂະນະດຽວກັນ ກໍໄດ້ຜ່ານຂໍ້ຕົກລົງ ຂອງ ມຊ ທະບຽນເລກທີ 01/ມຊ 2026; ລົງວັນທີ 12 ສິງຫາ 2026 ເຫັນດີມອບ ປະລິນຍາເອກກິດຕິມະສັກ ໃຫ້ແກ່ ທ່ານ ວຽງທະວີສອນ ເທບພະຈັນ ເພື່ອເປັນການຈາລຶກ ຜົນງານດີເດັ່ນຕໍ່ການວາງແຜນນະໂຍບາຍລັດ ແລະ ຜ່ານຂໍ້ຕົກລົງ ຂອງ ມຊ ທະບຽນເລກທີ 02/ມຊ 2026, ລົງວັນທີ 12 ສິງຫາ 2026 ເຫັນດີມອບ ປະລິນຍາເອກກິດຕິມະສັກ ໃຫ້ແກ່ ທ່ານ ໂອ ມຽງ ຮວັນ ເພື່ອເປັນການຈາລຶກ ຜົນງານດີເດັ່ນ ຕໍ່ສັງຄົມສົງເຄາະ ແລະ ພັດທະນາ. ໂດຍການເປັນກຽດມອບ ຂອງທ່ານ ຮສ.ປອ ສິນທະວອນ ດາລາວົງ ຜູ້ອໍານວຍການໃຫຍ່ ມຊ.
ໂອກາດສໍາຄັນນີ້, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ເຊິ່ງເປັນໜຶ່ງໃນຜູ້ທີ່ໄດ້ຮັບຕຳແໜ່ງ ສາດສະດາຈານກິດຕິມະສັກ ໃນຄັ້ງນີ້ ໄດ້ໃຫ້ກຽດກ່າວຄຳເຫັນ ແລະ ໂອ້ລົມ. ທ່ານໄດ້ສະແດງຄວາມເປັນກຽດ ແລະ ຄວາມຮັບຜິດຊອບອັນສູງສົ່ງ, ພ້ອມທັງໄດ້ເນັ້ນໃສ່ 5 ທິດຊີ້ນຳສຳຄັນ ໃນການພັດທະນາ ມຊ ໃນໄລຍະໃໝ່ ເພື່ອຫ້າງຫາກະກຽມສະເຫຼີມ-ສະຫຼອງວັນສ້າງຕັ້ງ ມຊ ຄົບຮອບ 30 ປີ ໃນທ້າຍປີ 2026 ດັ່ງນີ້: ການປັບຕົວໃນຍຸກໂລກາພິວັດ: ມຊ ຕ້ອງຮັກສາໃຫ້ໄດ້ 3 ລັກສະນະ ແລະ 5 ຫຼັກມູນຂອງການສຶກສາລາວ, ສ້າງຄົນສັງຄົມນິຍົມທີ່ມີຄຸນສົມບັດສິນທຳປະຕິວັດ, ມີລະດັບຄວາມຮູ້ສູງ, ມີຫຼັກໝັ້ນການເມືອງໜັກແໜ້ນ ແລະ ເປັນເອກະພາບຕໍ່ແນວທາງຂອງພັກ-ລັດ. ການຍົກສູງຄຸນນະພາບການສຶກສາ ແລະ ປະຕິຮູບຫຼັກສູດ: ເນັ້ນໃສ່ການປັບປຸງຫຼັກສູດການຮຽນ-ການສອນໃຫ້ທັນສະໄໝ, ສອດຄ່ອງກັບຕະຫຼາດແຮງງານ, ຮອງຮັບການພັດທະນາເສດຖະກິດ-ສັງຄົມ ແລະ ປັນຍາປະດິດ (AI) ພ້ອມທັງເຊື່ອມໂຍງກັບພາກພື້ນ ແລະ ສາກົນ. ການຍົກບົດບາດວຽກງານຄົ້ນຄວ້າວິທະຍາສາດ ແລະ ນະວັດຕະກຳ: ໃຫ້ຫັນປ່ຽນຈາກ "ຄົ້ນຄວ້າເພື່ອມີຜົນງານ" ໄປສູ່ "ຄົ້ນຄວ້າເພື່ອສ້າງຜົນກະທົບ" ທີ່ສາມາດນຳໄປໃຊ້ໄດ້ຕົວຈິງ, ເປັນນະໂຍບາຍ, ຜະລິດຕະພັນ ຫຼື ມູນຄ່າທາງເສດຖະກິດ ເພື່ອຊຸກຍູ້ການຂ້າມຜ່ານຈາກປະເທດດ້ອຍພັດທະນາ (LDC) ໄປສູ່ປະເທດກຳລັງພັດທະນາ (2026-2029). ການປັບປຸງພື້ນຖານໂຄງລ່າງ ແລະ ເຕັກໂນໂລຊີ: ເລັ່ງສ້າງລະບົບ Digital University, ຫ້ອງຮຽນອັດສະລິຍະ, ຫ້ອງສະໝຸດດິຈິຕອນ, ລະບົບອິນເຕີເນັດຄວາມໄວສູງ ພ້ອມທັງປັບປຸງສະພາບແວດລ້ອມ ແລະ ສິ່ງອຳນວຍຄວາມສະດວກໃຫ້ຄົບຖ້ວນ. ການເສີມຂະຫຍາຍການຮ່ວມມືສາກົນ: ເພີ່ມພູນການພົວພັນ ແລະ ຍາດແຍ່ງການສະໜັບສະໜູນຈາກປະເທດເພື່ອນມິດ ແລະ ອົງການຈັດຕັ້ງສາກົນຢ່າງເປັນເຈົ້າການ.
ທ່ານ ຮສ. ປອ. ສິນທະວອນ ດາລາວົງ ເລຂາຄະນະພັກ, ຮອງປະທານສະພາ ມຊ, ຜູ້ອຳນວຍການໃຫຍ່ ມຊ ໄດ້ຕາງໜ້າໃຫ້ຄະນະພັກ-ຄະນະນຳ, ພະນັກງານ, ຄູ-ອາຈານ ແລະ ນັກສຶກສາ ກ່າວຮັບຄຳໂອວາດ. ໂດຍໄດ້ສະແດງຄວາມຊາບຊຶ້ງ ແລະ ໃຫ້ຄຳໝັ້ນສັນຍາວ່າ ຈະນຳເອົາທິດຊີ້ນຳອັນປະເສີດຂອງ ທ່ານ ນາຍົກລັດຖະມົນຕີໄປຈັດຕັ້ງຜັນຂະຫຍາຍເປັນແຜນການ, ແຜນງານ ແລະ ໂຄງການຈັດຕັ້ງປະຕິບັດຕົວຈິງໃຫ້ປະກົດຜົນເປັນຮູບປະທຳຢ່າງຈົບງາມ.
ໃນວັນທີ 1 ກັນຍາ 2026 ຜ່ານມານີ້, ທີ່ຫ້ອງຮັບແຂກ VIP ສຳນັກງານຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ) ນຳໂດຍ ທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມຊ, ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່, ຫົວໜ້າຫ້ອງການສັງລວມ ແລະ ພົວພັນຕ່າງປະເທດ, ຫົວໜ້າຄະນະວິຊາທີ່ກ່ຽວ ແລະພະນັກງານທີ່ກ່ຽວຂ້ອງ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນຈາກ ອົງການຮ່ວມມືສາກົນຍີ່ປຸ່ນ (JICA) ປະຈໍາ ສປປ ລາວ.
ໂອກາດດັ່ງກ່າວ, ສອງຝ່າຍໄດ້ພົບປະໂອ້ລົມ ແລະ ຕີລາຄາສູງຕໍ່ໝາກຜົນແຫ່ງການຮ່ວມມືໃນໄລຍະຜ່ານມາ; ເຊິ່ງອົງການ JICA ໄດ້ໃຫ້ການສະໜັບສະໜູນ ມຊ ຢ່າງຕໍ່ເນື່ອງ. ຈຸດເດັ່ນທີ່ສຳຄັນແມ່ນການສົ່ງຊ່ຽວຊານມາປະຈໍາຢູ່ ຄະນະວິສະວະກຳສາດ ພ້ອມທັງມອບທຶນຊ່ວຍເຫຼືອເພື່ອການພັດທະນາຢ່າງເປັນຮູບປະທຳ. ທ່ານຜູ້ອຳນວຍການໃຫຍ່ ມຊ ໄດ້ເນັ້ນໜັກປະໂຫຍກທີ່ມີຄວາມໝາຍເລິກເຊິ່ງວ່າ "ການລົງທຶນໃສ່ການສຶກສາ ແມ່ນການສະແດງອອກເຖິງຄວາມຮັກຊາດຢ່າງແທ້ຈິງ". ທ່ານ ກ່າວຕື່ມວ່າ: ຜ່ານມາ ໂຄງການຮ່ວມມືລະຫວ່າງ ອົງການ JICA, ສະຖາບັນລາວ-ຍີ່ປຸ່ນ (LJI) ແລະ ມຊ ສາມາດສ້າງບຸກຄະລາກອນລາວອອກຮັບໃຊ້ສັງຄົມໄດ້ແລ້ວຫຼາຍກວ່າ 20,000 ຄົນ. ນອກຈາກນີ້, ຍັງໄດ້ສົ່ງພະນັກງານລາວຈໍານວນ 250 ທ່ານ ໄປຝຶກອົບຮົມ ແລະ ແລກປ່ຽນວັດທະນະທຳຢູ່ປະເທດຍີ່ປຸ່ນ; ປະກອບສ່ວນສ້າງຊັບພະຍາກອນມະນຸດຂັ້ນສູງໂດຍການມອບທຶນການສຶກສາໃນລະດັບປະລິນຍາໂທ ແລະ ປະລິນຍາເອກ ລວມເຖິງການສົ່ງອາສາສະໝັກຍີ່ປຸ່ນ ເຂົ້າມາປະຕິບັດງານຢູ່ ມຊ ເຖິງ 43 ທ່ານ. ເປັນໜ້າພາກພູມໃຈທີ່ອາສາສະໝັກ JICA ໄດ້ດໍາເນີນງານຢູ່ ສປປ ລາວ ມາເປັນເວລາກວ່າ 60 ປີ ເຊິ່ງໄດ້ກາຍເປັນທັງຊ່ຽວຊານສະເພາະດ້ານ ແລະ ເປັນຂົວຕໍ່ແຫ່ງມິດຕະພາບອັນແໜ້ນແຟ້ນ ລະຫວ່າງ ລາວ ແລະ ຍີ່ປຸ່ນ.
ໃນຕອນທ້າຍ, ທ່ານ ຮສ. ປອ. ສິນທະວອນ ດາລາວົງ ໄດ້ກ່າວສະແດງຄວາມຂອບໃຈຢ່າງເລິກເຊິ່ງຕໍ່ອົງການ JICA ທີ່ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການພັດທະນາການສຶກສາຂອງລາວ ໂດຍສະເພາະແມ່ນການຊ່ວຍເຫຼືອຫຼາຍໆຄະນະວິຊາພາຍໃນ ມຊ. ພ້ອມກັນນັ້ນ, ທ່ານຍັງໄດ້ເປີດເຜີຍວິໄສທັດວ່າ ໃນອະນາຄົດອັນໃກ້ນີ້ ມຊ ມີແຜນຈະນໍາໃຊ້ລະບົບປັນຍາປະດິດ (AI) ເຂົ້າໃນການຮຽນ-ການສອນ ເພື່ອຍົກລະດັບຄຸນນະພາບການສຶກສາ. ດັ່ງນັ້ນ, ຈຶ່ງໄດ້ສະ
ເໜີມາຍັງອົງການ JICA ໃຫ້ສືບຕໍ່ໃຫ້ການຊ່ວຍເຫຼືອໃນການສ້າງຫ້ອງຄົ້ນຄວ້າທີ່ທັນສະໄໝ, ການຫັນປ່ຽນລະບົບການສຶກສາໄປສູ່ຍຸກດິຈິຕອລ (Digital Transformation), ພ້ອມທັງສະໜັບສະໜູນການປັບປຸງຫຼັກສູດການຮຽນ-ການສອນໃຫ້ທັນສະໄໝ ສອດຄ່ອງກັບແຜນພັດທະນາແຫ່ງຊາດ ແລະ ສະພາບຄວາມເປັນຈິງໃນປັດຈຸບັນ.
ໃນວັນທີ 27 ສິງຫາ 2026, ທີ່ຫ້ອງປະຊຸມ 213 ຕຶກຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ), ໄດ້ຕ້ອນຮັບການຢ້ຽມຢາມ ແລະ ພົບປະຂອງຄະນະຜູ້ແທນຈາກກະຊວງສຶກສາທິການ ແລະ ກໍ່ສ້າງ ແລະ ບັນດາມະຫາວິທະຍາໄລ ຈາກ ສສ. ຫວຽດນາມນີ້ ນຳໂດຍ ທ່ານ ຮອງຫົວໜ້າກົມຊັ້ນສູງ ກະຊວງສຶກສາທິການ ແລະ ກິລາ ພ້ອມດ້ວຍຜູ້ອຳນວຍການ ແລະ ຕົວແທນຈາກ 10 ມະຫາວິທະຍາໄລຊັ້ນນຳຂອງ ສສ. ຫວຽດນາມ ເຊັ່ນ: ມະຫາວິທະຍາໄລ ເຕບັກ (Trường Đại học Tây Bắc - TBU), ມະຫາວິທະຍາໄລ ກັ້ນເທີ (Trường Đại học Cần Thơ - CTU), ມະຫາວິທະຍາໄລ ໄທງວຽນ (Trường Đại học Thái Nguyên - TNU), ມະຫາວິທະຍາໄລ ສ້າງຄູຮ່າໂນ້ຍ (Trường Đại học Sư phạm Hà Nội - HNUE), ມະຫາວິທະຍາໄລ ກໍ່ສ້າງຮ່າໂນ້ຍ (Trường Đại học Xây dựng Hà Nội - HUCE), ມະຫາວິທະຍາໄລ ພາສາຕ່າງປະເທດ - ມະຫາວິທະຍາໄລ ດານັງ (Trường Đại học Ngoại ngữ - Đại học Đà Nẵng - UFLS), ມະຫາວິທະຍາໄລ ຄົມມະນາຄົມ ແລະ ຂົນສົ່ງ (Trường Đại học Giao thông Vận tải - UTC), ແລະ ສະຖາບັນວິທະຍາສາດກະສິກຳຫວຽດນາມ (Viện Khoa học Nông nghiệp Việt Nam - VAAS). ໃຫ້ກຽດຕ້ອນຮັບໂດຍ ທ່ານ ຮສ. ປອ. ອຸ່ນຫຼ້າ ສີວັນເພັງ ຮອງຜູ້ອຳນວຍການໃຫຍ່ ມຊ, ພ້ອມດ້ວຍບັນດາຫົວໜ້າຄະນະວິຊາ ແລະພະນັກງານທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງການພົບປະ ແລະຢ້ຽມຢາມ ມຊ ຂອງຄະນະຜູ້ແທນດັ່ງກ່າວຄັ້ງນີ້, ແມ່ນເພື່ອສືບຕໍ່ຮັດແໜ້ນສາຍພົວພັນຮ່ວມມືແບບອ້າຍນ້ອງທີ່ສະໜິດແໜ້ນ ລະຫວ່າງສອງຊາດ, ພ້ອມທັງປຶກສາຫາລື ແລກປ່ຽນຄວາມຄິດເຫັນກ່ຽວກັບ ພາລະບົດບາດ ແລະ ຄວາມສຳຄັນ ລະຫວ່າງ ມຊ ກັບ ມະຫາວິທະຍາໄລມິດຕະພາບ ລາວ-ຫວຽດນາມ. ໃນທີ່ປະຊຸມ ໄດ້ເປີດໂອກາດໃຫ້ມະຫາວິທະຍາໄລມິດຕະພາບ ລາວ-ຫວຽດນາມ ໄດ້ແລກປ່ຽນບົດຮຽນການຈັດຕັ້ງປະຕິບັດຕົວຈິງກັບ ມຊ, ໂດຍສະເພາະແມ່ນການສົ່ງເສີມການຮ່ວມມືດ້ານການສິດສອນລະຫວ່າງຄູລາວ ແລະ ຄູຫວຽດນາມ. ທັງທາງດ້ານຮູບແບບການຄຸ້ມຄອງບໍລິຫານ ໂດຍມີທິດທາງໃຫ້ໂຄງສ້າງການບໍລິຫານປະກອບມີ ຜູ້ອຳນວຍການລາວ ແລະ ຜູ້ອຳນວຍການ ຝ່າຍຫວຽດນາມ ເຮັດວຽກຮ່ວມກັນຢ່າງໃກ້ຊິດ. ສຳລັບວຽກງານເນື້ອໃນວິຊາການນັ້ນ, ທີ່ປະຊຸມໄດ້ເຫັນດີເປັນເອກະພາບກັນວ່າ ຕ້ອງມີການສ້າງຕັ້ງໜ່ວຍງານສະເພາະຂຶ້ນມາ ເພື່ອຮັບຜິດຊອບໃນການພັດທະນາຫຼັກສູດຮ່ວມກັນໂດຍກົງ, ແນໃສ່ຮັບປະກັນຄຸນນະພາບການສຶກສາ ແລະ ຕອບສະໜອງໄດ້ຕາມມາດຕະຖານການສຶກສາຊັ້ນສູງ ໃນການສ້າງຊັບພະຍາກອນມະນຸດຂອງທັງສອງປະເທດໃນອະນາຄົດ.
ໃນຕອນບ່າຍຂອງວັນທີ 26 ສິງຫາ 2026, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີເປີດ “ສູນການຮຽນຮູ້ຕະຫຼອດຊີວິດ” ຂຶ້ນຢ່າງເປັນທາງການ ທີ່ ຄະນະສຶກສາສາດ. ພິທີດັ່ງກ່າວໄດ້ຮັບກຽດເຂົ້າຮ່ວມໂດຍ ທ່ານ ຮສ. ປອ. ຫຼ້າວັນ ວົງຄໍາສານ ຫົວໜ້າຫ້ອງການ ກະຊວງສຶກສາທິການ ແລະ ກິລາ (ສສກ), ພ້ອມດ້ວຍ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ທ່ານ Uwe Gartenschlaeger ຜູ້ອໍານວຍການໃຫຍ່ ຫ້ອງການປະຈໍາພາກພື້ນ ເພື່ອການສຶກສາຜູ້ໃຫຍ່ຂອງເຢຍລະມັນ (DVVI), ນອກຈາກນີ້, ຍັງມີບັນດາຫົວໜ້າກົມ-ຮອງຫົວໜ້າກົມ, ຫົວໜ້າຄະນະວິຊາ, ຫົວໜ້າຫ້ອງການ, ຜູ້ອຳນວຍການວິທະຍາໄລຄູທົ່ວປະເທດ ພ້ອມດ້ວຍພະນັກງານ, ຄູ-ອາຈານ ເຂົ້າຮ່ວມຢ່າງພ້ອມພຽງ.
ຈຸດປະສົງຫຼັກຂອງການຈັດພິທີໃນຄັ້ງນີ້ ແມ່ນເພື່ອປະກາດແຕ່ງຕັ້ງຄະນະຜູ້ບໍລິຫານງານ ແລະ ປະກາດເປີດສູນການຮຽນຮູ້ຕະຫຼອດຊີວິດ ຄະນະສຶກສາສາດ ມຊ. ຄວາມເປັນມາຂອງການສ້າງຕັ້ງສູນນີ້ ແມ່ນເກີດຈາກໝາກຜົນຂອງການຮ່ວມມືລະຫວ່າງ ຄະນະສຶກສາສາດ ມຊ ແລະ ອົງການ DVVI ທີ່ໄດ້ຮ່ວມກັນສົ່ງເສີມກິດຈະກຳການຮຽນຮູ້ຕະຫຼອດຊີວິດ ມາຕັ້ງແຕ່ປີ 2016 ເປັນຕົ້ນມາ. ສຳລັບ ອົງການ DVVI ແມ່ນສະມາຄົມເພື່ອການສຶກສາຜູ້ໃຫຍ່ຂອງປະເທດເຢຍລະມັນ ທີ່ມີປະຫວັດການກໍ່ຕັ້ງຍາວນານເຖິງ 103 ປີ ໃນປະເທດເຢຍລະມັນ, ເຊິ່ງເປັນອົງການສາກົນທີ່ມີຊື່ສຽງໃນການສົ່ງເສີມການສຶກສາຜູ້ໃຫຍ່ ແລະ ການຮຽນຮູ້ຕະຫຼອດຊີວິດ ມາຫຼາຍກວ່າ 50 ປີ ໂດຍມີຄູ່ຮ່ວມງານຫຼາຍກວ່າ 200 ພາກສ່ວນ ໃນ 30 ກວ່າປະເທດທົ່ວໂລກ.
ພາຍໃນງານ ຍັງໄດ້ມີການຈັດກິດຈະກຳສົນທະນາວິຊາການ (Panel Discussion) ໃນຫົວຂໍ້: “ການຮຽນຮູ້ຕະຫຼອດຊີວິດເພື່ອອະນາຄົດ: ໂອກາດ, ສິ່ງທ້າທາຍ ແລະ ບົດບາດຂອງມະຫາວິທະຍາໄລ”. ໂດຍມີຜູ້ຊົງຄຸນວຸດທິຈາກຫຼາຍພາກສ່ວນຂຶ້ນຮ່ວມສົນທະນາ ແລກປ່ຽນບົດຮຽນ ເປັນຕົ້ນແມ່ນ: ທ່ານ ປອ. ນາງ ວັນມະນີ ວັນນະສີ, ທ່ານ ປອ. ໄຊ ພອນແກ້ວ, ທ່ານ ປອ. ສາຍສະໝອນ ງາມສີ, ທ່ານ ສຸພາບ ຄຸນວິໄຊ, ທ່ານ ປອ. ລຳພູນ ຫຼວງໄຊ ແລະ ທ່ານ Uwe Gartenschlaeger ໂດຍການດຳເນີນລາຍການຂອງ ທ່ານ Sam Lansdown. ຫຼັງຈາກນັ້ນ, ທ່ານ ປອ. ຊາຍຄໍາ ວັນນະໄຊ, ຫົວໜ້າຫ້ອງການຈັດຕັ້ງ-ພະນັກງານ ແລະ ກວດກາ ມຊ ໄດ້ຂຶ້ນຜ່ານຂໍ້ຕົກລົງຂອງຜູ້ອຳນວຍການໃຫຍ່ ມຊ ວ່າດ້ວຍການອະນຸມັດເປີດສູນການຮຽນຮູ້ຕະຫຼອດຊີວິດ ແລະ ຂໍ້ຕົກລົງແຕ່ງຕັ້ງຮອງຜູ້ອຳນວຍການສູນດັ່ງກ່າວ ພ້ອມທັງມີການມອບ-ຮັບຂໍ້ຕົກລົງຢ່າງເປັນທາງການ, ໃນພິທີໄດ້ແຕ່ງຕັ້ງ ທ່ານ ສຸກສັນ ໄຊຍະວົງ ເປັນຜູ້ຮັບຜິດຊອບວຽກງານຫົວໜ້າສູນການຮຽນຮູ້ຕະຫຼອດຊິວີດ,ທ່ານ ປອ ສຸກສາຄອນ ແສງສຸລິຍາ ເປັນຮອງຫົວໜ້າສູນ ການຮຽນຮູ້ຕະຫຼອດຊິວີດ,ທ່ານ ນາງ ຕຸລາວັນ ສີສະຫັວດ ເປັນຮອງຫົວໜ້າສູນການຮຽນຮູ້ຕະຫຼອດຊິວີດ
ການເປີດສູນໃນຄັ້ງນີ້ ບໍ່ພຽງແຕ່ເປັນການຍົກລະດັບພື້ນຖານໂຄງລ່າງທາງດ້ານການສຶກສາເທົ່ານັ້ນ, ແຕ່ຍັງເປັນການຕອກຢໍ້າອຸດົມການອັນໜັກແໜ້ນທີ່ວ່າ "ຄູແມ່ນຄົນຂອງພັກ ຄູແມ່ນຄົນຂອງປະຊາຊົນ". ປະໂຫຍກດັ່ງກ່າວມີຄວາມໝາຍເລິກເຊິ່ງ ເຊິ່ງສະທ້ອນໃຫ້ເຫັນວ່າ ຄູ-ອາຈານ ແມ່ນກຳລັງແຮງທີ່ສຳຄັນຂອງພັກ ໃນການຈັດຕັ້ງປະຕິບັດແນວທາງນະໂຍບາຍດ້ານການສຶກສາໃຫ້ປາກົດຜົນເປັນຈິງ, ເປັນຜູ້ເຜີຍແຜ່ແນວຄິດ ແລະ ສ້າງຄົນຮຸ່ນໃໝ່ໃຫ້ກາຍເປັນພົນລະເມືອງດີຂອງຊາດ. ໃນຂະນະດຽວກັນ, ຄູຍັງເປັນລູກຫຼານ ແລະ ເປັນຜູ້ຮັບໃຊ້ປະຊາຊົນຢ່າງແທ້ຈິງ ໂດຍການມອບຄວາມຮູ້, ແສງສະຫວ່າງທາງປັນຍາ ແລະ ຫຼໍ່ຫຼອມສິນທຳປະຈຳໃຈໃຫ້ແກ່ລູກຫຼານປະຊາຊົນບັນດາເຜົ່າ. ດັ່ງນັ້ນ, ສູນການຮຽນຮູ້ຕະຫຼອດຊີວິດແຫ່ງນີ້ ຈຶ່ງປຽບເໝືອນແຫຼ່ງພະລັງງານທີ່ຈະຊ່ວຍພັດທະນາຊັບພະຍາກອນຄູ ໃຫ້ມີການພັດທະນາຕົນເອງຢ່າງຕໍ່ເນື່ອງ, ມີຄວາມຮູ້ຄວາມສາມາດທີ່ທັນຍຸກທັນສະໄໝຢູ່ສະເໝີ ເພື່ອສາມາດປະຕິບັດໜ້າທີ່ອັນມີກຽດນີ້ໄດ້ຢ່າງສົມບູນແບບ.
ໃນຕອນທ້າຍຂອງພິທີ ໄດ້ມີການຕັດແຖບຜ້າເປີດສູນຢ່າງເປັນທາງການ ໂດຍໄດ້ຮັບກຽດຕັດແຖບຜ້າຈາກ ທ່ານ ຫົວໜ້າຫ້ອງການ ລັດຖະມົນຕີ ກະຊວງສຶກສາທິການ ແລະ ກິລາ (ສສກ), ຜູ້ອຳນວຍການ ຫ້ອງການປະຈຳພາກພື້ນ DVVI ແລະ ຮອງຜູ້ອຳນວຍການໃຫຍ່ ມຊ. ພາຍຫຼັງສຳເລັດພິທີຕັດແຖບຜ້າ, ບັນດາແຂກທີ່ເຂົ້າຮ່ວມ ຍັງໄດ້ຍ່າງເລາະຊົມການວາງສະແດງຜົນງານ ແລະ ຜົນຜະລິດຈາກກິດຈະກຳສົ່ງເສີມການຮຽນຮູ້ຕະຫຼອດຊີວິດຂອງຄະນະສຶກສາສາດ ຕື່ມອີກ.
ໃນວັນທີ 21 ສິງຫາ 2026 ຜ່ານມາ, ທີ່ຫ້ອງຮັບແຂກ ຕຶກສຳນັກງານ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມຊ ແລະ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອໍານວຍການໃຫຍ່ ມຊ ພ້ອມດ້ວຍ ພະນັກງານທີ່ກ່ຽວຂ້ອງ ໄດ້ຕ້ອນຮັບການມາຢ້ຽມຢາມ ຂອງທ່ານ ສຈ. Keiichi Ogawa ຮອງຄະນະບໍດີ ວິທະຍາໄລການສຶກສາການຮ່ວມມືສາກົນ (GSICS), ມະຫາວິທະຍາໄລໂກເບ ປະເທດຍີ່ປຸ່ນ ພ້ອມດ້ວຍຄະນະຄູອາຈານ-ນັກສຶກສາ.
ການພົບປະກັນຄັ້ງນີ້, ທັງສອງຝ່າຍໄດ້ ປຶກສາຫາລື ແລະ ແລກປ່ຽນຄວາມຄິດເຫັນ ແລະ ກໍານົດທິດທາງໃນການຮ່ວມມືໃນຫຼາຍປະເດັນສໍາຄັນ ໂດຍສະເພາະແມ່ນການຮ່ວມມືດ້ານວຽກງານວິຊາການ; ການແລກປ່ຽນນັກສຶກສາ, ພະນັກງານ, ຄູ-ອາຈານ ແລະຮ່ວມກັນໃນໂຄງການຄົ້ນຄວ້າວິໄຈຕ່າງໆ.
ໃນໂອກາດນີ້, ທ່ານ ສຈ. Keiichi Ogawa ກໍໄດ້ກ່າວສະແດງຄວາມດີໃຈ ຕໍ່ການຕ້ອນຮັບ ພ້ອມທັງໄດ້ກ່າວວ່າ: ມະຫາວິທະຍາໄລໂກເບ ປະເທດຍີ່ປຸ່ນ ໄດ້ມີການຮ່ວມມືກັບ ມະຫາວິທະຍາໄລແຫ່ງຊາດ (ຄະນະເສດຖະສາດ ແລະ ບໍລິຫານທຸລະກິດ) ໃນການຮ່ວມມືທາງດ້ານວິຊາການ ໂດຍສະເພາະແມ່ນການສົ່ງຄູ-ອາຈານ ໄປຍົກລະດັບການສຶກສາໃນລະດັບປະລິນຍາໂທ ແລະ ປະລິນຍາເອກ, ແລກປ່ຽນນັກສຶກສາເຊິ່ງແຕ່ລະປີຈະມີການສອບເສັງຄັດເລືອກເອົານັກສຶກສາຂອງຄະນະເສດຖະສາດ ແລະ ບໍລິຫານທຸລະກິດ ໄປສຶກສາຕໍ່ໃນຫຼັກສູດປະລິນຍາຕີ 2+2 ແລະຫຼາຍໂຄງການທີ່ໄດ້ຮັບການຮ່ວມມືຈາກ ມະຫາວິທະຍາໄລແຫ່ງຊາດ.
ພ້ອມນັ້ນ, ທ່ານ ຮສ. ປອ. ສິນທະວອນ ດາລາວົງ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ໄດ້ລາຍງານໂດຍຫຍໍ້ກ່ຽວກັບການພົວພັນຮ່ວມມືຂອງສອງຝ່າຍ ເຊິ່ງໄດ້ໃຫ້ຮູ້ວ່າ: ການຢ້ຽມຢາມໃນຄັ້ງນີ້ຖືເປັນຂີດໝາຍສຳຄັນໃນການພົວພັນຮ່ວມມືລະຫວ່າງສອງຝ່າຍທີ່ມີມາຢ່າງຍາວນານກວ່າ 30 ປີ ເຊິ່ງຕະຫຼອດໄລຍະການຮ່ວມມື ມະຫາວິທະຍາໄລແຫ່ງຊາດ ຕີລາຄາສູງ ແລະ ເປັນໝາກຜົນສຳເລັດອັນຍິ່ງໃຫຍ່, ໂດຍສະເພາະ ຄະນະເສດຖະສາດ ແລະ ບໍລິຫານທຸລະກິດ ທີ່ໄດ້ຮັບການຊ່ວຍເຫຼືອໂດຍກົງຈາກລັດຖະບານຍີ່ປຸ່ນ ໂດຍຜ່ານການປະສານງານ ແລະອຳນວຍຄວາມສະດວກຈາກ ມະຫາວິທະຍາໂກເບ; ການຊ່ວຍເຫຼືອທີ່ສຳຄັນນັ້ນ ປະກອບມີດ້ານການສ້າງບຸກຄະລາກອນທາງດ້ານເສດຖະສາດ ເພື່ອຕອບສະໜອງໃຫ້ກັບການພັດທະນາ ແລະ ສ້າງສາປະເທດຊາດ, ດ້ານພື້ນຖານໂຄງລ່າງອາຄານຮຽນ ແລະ ດ້ານວິຊາການໃຫ້ແກ່ ມຊ ເປັນຕົ້ນ.
ໃນວັນທີ 25 ສິງຫາ 2026 ທີ່ຄະນະວິສະວະກຳສາດ ມະຫາວິທະຍາໄລແຫ່ງຊາດ, ທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ໄດ້ໃຫ້ກຽດຕ້ອນຮັບການຢ້ຽມຢາມຂອງທ່ານ ນາງ ມິດຊູ ຍູໂກະ (MITSUI Yuko) ຮອງປະທານອາວຸໂສ ອົງການໄຈກາ ສຳນັກງານໃຫຍ່ ປະເທດຍີ່ປຸ່ນພ້ອມດ້ວຍຄະນະ ໃນໂອກາດທີ່ໄດ້ເດີນທາງມາຢ້ຽມຢາມ ຄະນະວິສະວະກຳສາດ ມະຫາວິທະຍາໄລແຫ່ງຊາດ ເພື່ອຕິດຕາມ ແລະ ເສີມສ້າງການຮ່ວມມືດ້ານການສຶກສາວິສະວະກຳສາດ ຢູ່ ສປປ ລາວ, ໂດຍມີທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ຫົວໜ້າຄະນະວິຊາ ຄະນະວິສະວະກຳສາດ, ພະນັກງານ, ຄູ-ອາຈານ ແລະ ນັກສຶກສາ ເຂົ້າຮ່ວມ.
ໃນໂອກາດນີ້, ທ່ານ ຮສ. ປອ. ສິນທະວອນ ດາລາວົງ ກໍໄດ້ສະແດງຄວາມຂອບໃຈຢ່າງສູງຕໍ່ລັດຖະບານຍີ່ປຸ່ນ ແລະ ອົງການໄຈກາ ທີ່ໃຫ້ການສະໜັບສະໜູນຢ່າງຕໍ່ເນື່ອງ ເຊິ່ງຜົນສຳເລັດທີ່ສຳຄັນແມ່ນການພັດທະນາຫຼັກສູດການຮຽນ-ການສອນ ທີ່ຄຽງຄູ່ກັບພາກປະຕິບັດຕົວຈິງ, ການພັດທະນາທາງດ້ານບຸກຄະລາກອນຄູ ແລະ ການສ້າງໂຄງລ່າງພື້ນຖານທີ່ອຳນວຍຄວາມສະດວກໃຫ້ແກ່ການຮຽນ-ການສອນ ເປັນຕົ້ນແມ່ນໂຄງການ HUGETECH ເປັນໂຄງການຮ່ວມມືກັນໃນດ້ານວິຊາການເພື່ອເສີມສ້າງການພັດທະນາຊັບພະຍາກອນມະນຸດ ໂດຍສະເພາະແມ່ນຄູ-ອາຈານ ທີ່ກວມເອົາ 6 ພາກວິຊາໃນຄະນະວິສະວະກຳສາດ; ໂຄງການ Grant Aid ປັບປຸງໂຄງລ່າງພື້ນຖານອາຄານ ແລະ ສະໜອງອຸປະກອນຫ້ອງທົດລອງທີ່ທັນສະໄໝ, ສູນວິສະວະກຳເພື່ອການພັດທະນາແບບຍືນຍົງ ຫຼື CESD; ໂຄງການ Enhanced Engineering Education ເສີມສ້າງການນຳໃຊ້ ແລະ ບຳລຸງຮັກສາອຸປະກອນ, ເຄື່ອຂ່າຍມະຫາວິທະຍາໄລໃນຍີ່ປຸ່ນ/ອາຊຽນ ແລະກິດຈະກຳການຮ່ວມມືກັບພາກອຸດສະຫະກຳ. ພ້ອມນັ້ນ, ຍັງໄດ້ສະເໜີມາຍັງອົງການໄຈກາ ສຳລັບແຜນການການຮ່ວມມືໃນໄລຍະໃໝ່ ແຕ່ປີ 2027-2032 ເພື່ອຂະຫຍາຍຜົນສຳເລັດ ແລະ ຍົກລະດັບຄະນະວິສະວະກຳສາດໃຫ້ກາຍເປັນສູນກາງການສຶກສາທາງດ້ານວິສະວະກຳສາດ.
ພ້ອມດຽວກັນນັ້ນ, ທ່ານ ນາງ ມິດຊູ ຍູໂກະ ກໍໄດ້ກ່າວສະແດງຄວາມຍິນດີທີ່ໄດ້ຮ່ວມມືກັບ ມະຫາວິທະຍາໄລແຫ່ງຊາດ ແລະ ຍິນດີໃນການສະໜັບສະໜູນການຮ່ວມມືໃນໄລຍະໃໝ່ໃຫ້ມີຜົນສຳເລັດຕາມຄາດໝາຍທີ່ໄດ້ວາງໄວ້. ໃນພິທີ, ທ່ານ ຮສ. ປອ. ຄຳປະເສີດ ເທບວົງສາ ຫົວໜ້າຄະນະວິຊາຄະນະວິສະວະກຳສາດ ກໍໄດ້ລາຍງານຜົນການດຳເນີນງານໂຄງການ JICA ທີ່ຄະນະວິສະວະກຳສາດ ແລະ ແຜນດຳເນີນງານການຮ່ວມມືໃນ 5 ປີຕໍ່ໜ້າ 2027-2032.
ພ້ອມນັ້ນ ບັນດາແຂກທີ່ເຂົ້າຮ່ວມຍັງໄດ້ຢ້ຽມຊົມຫ້ອງທົດລອງ (Laboratory block) ແລະ ສູນວິສະວະກຳເພື່ອການພັດທະນາແບບຍືນຍົງ (Center of Engineering for Sustainable Development) ອີກດ້ວຍ.
