ໃນຕອນບ່າຍ ວັນທີ 13 ກໍລະກົດ 2026 ຜ່ານມານີ້, ຄະນະອາຈານ ຈາກມະຫາວິທະຍາໄລ ນາລັນດາ (Nalanda University) ປະເທດອິນເດຍ ນໍາໂດຍ ທ່ານ ຮສ. ດຣ. ກີ ດາວາລາ (Assoc. Prof. Dr. Kishore Dhavala), ຮອງຄະນະບໍດີ ຝ່າຍພົວພັນ ແລະ ການຮ່ວມມືສາກົນ, ຄະນະສິ່ງແວດລ້ອມ ແລະ ນິເວດສຶກສາ ທັງເປັນຫົວໜ້າສູນສຶກສາອາຊີຕາເວັນອອກສ່ຽງໃຕ້. ໄດ້ມາຢ້ຽມຢາມ ແລະ ປຶກສາຫາລືວຽກງານການຮ່ວມມືທາງດ້ານວິຊາການຮ່ວມກັບ ມະຫາວິທະຍາໄລແຫ່ງຊາດ(ມຊ). ການພົບປະດັ່ງກ່າວ ໄດ້ຈັດຂຶ້ນຢູ່ທີ່ຫ້ອງປະຊຸມ 205 ຕຶກສຳນັກງານຜູ້ອໍານວຍການໃຫຍ່ ມຊ ໂດຍມີ ທ່ານ ອໍາເຄັງ ເພັງລາສີ ຮອງຫົວໜ້າຫ້ອງການ ສັງລວມ ແລະພົວພັນຕ່າງປະເທດ ມຊ, ມີຫົວໜ້າຄະນະວິຊາ ແລະ ພະນັກງານທີ່ກ່ຽວຂ້ອງໃຫ້ການຕ້ອນຮັບ.
ຈຸດປະສົງການມາຢ້ຽມຢາມ ມຊ ຂອງຄະນະອາຈານ ມະຫາວິທະຍາໄລ ນາລັນດາ ປະເທດອິນເດຍ ໃນຄັ້ງນີ້, ແມ່ນເພື່ອປຶກສາຫາລື ແລະແລກປ່ຽນຄໍາຄິດເຫັນກຽວກັບການຮ່ວມມືດ້ານວິຊາການເຊິ່ງກັນ ແລະກັນ, ເຊິ່ງເປັນສ່ວນໜຶ່ງຂອງການສົ່ງເສີມການຮ່ວມມືພາຍໃຕ້ເຄືອຂ່າຍມະຫາວິທະຍາໄລອາຊຽນ-ອິນເດຍ (ASEAN-India Network of Universities ຫຼື AINU) ທີ່ ມຊ ເປັນສະມາຊິກ ແລະ ມະຫາວິທະຍາໄລນາລັນດາ ເປັນຜູ້ປະສານງານຫຼັກ; ໃນນັ້ນ
ຫົວຂໍ້ການປຶກສາຫາລືທີ່ສຳຄັນ ແມ່ນການແລກປ່ຽນຄູ-ອາຈານ ແລະ ນັກສຶກສາ ລະຫວ່າງສອງສະຖາບັນ, ການສະໜອງທຶນການສຶກສາ ແລະ ໂອກາດໃນການເຂົ້າສຶກສາຕໍ່ໃນລະດັບປະລິນຍາໂທ ແລະ ປະລິນຍາເອກ ໃຫ້ແກ່ນັກສຶກສາ ແລະ ບຸກຄະລາກອນຂອງ ມຊ. ນອກຈາກນີ້, ຍັງໄດ້ປຶກສາຫາລືກ່ຽວກັບການຈັດຕັ້ງປະຕິບັດໂຄງການແລກປ່ຽນອາຈານສອນໃນໄລຍະຕໍ່ໄປ (AINU-FEP), ການຮ່ວມມືກັບສູນສຶກສາອາຊີຕາເວັນອອກສ່ຽງໃຕ້ ທີ່ຫາກໍສ້າງຕັ້ງຂຶ້ນໃໝ່ ຂອງມະຫາວິທະຍາໄລນາລັນດາ, ການຮ່ວມມື ແລະ ການເຂົ້າຮ່ວມໃນການລິເລີ່ມດ້ານການສຶກສາຊັ້ນສູງ ຂອງກອງປະຊຸມສຸດຍອດອາຊຽນ-ອິນເດຍ ແລະ ເອເຊຍຕາເວັນອອກ (ASEAN-India and East Asia Summit Higher Education Initiatives) ໃນຄັ້ງຕໍ່ໄປ ທີ່ຄາດວ່າຈະຈັດຂຶ້ນຢູ່ປະເທດອິນເດຍ.
ມະຫາວິທະຍາໄລນາລັນດາ ເປັນສະຖາບັນການສຶກສາ ແລະ ວິໄຈຊັ້ນນຳລະດັບສາກົນ ທີ່ມີຄວາມສຳຄັນລະດັບຊາດ ພາຍໃຕ້ການຊີ້ນຳຂອງກະຊວງການຕ່າງປະເທດ ປະເທດອິນເດຍ ໂດຍໄດ້ຮັບການສະໜັບສະໜູນຈາກ 18 ປະເທດ ຜ່ານການລົງນາມໃນບົດບັນທຶກຄວາມເຂົ້າໃຈ. ການຢ້ຽມຢາມ ແລະ ການຮ່ວມມືໃນຄັ້ງນີ້ ຖືເປັນບາດກ້າວສຳຄັນໃນການຍົກລະດັບຄຸນນະພາບການສຶກສາ, ຮັດແໜ້ນສາຍພົວພັນ ທາງການທູດດ້ານການສຶກສາ ແລະ ເປີດໂອກາດໃຫ້ແກ່ນັກສຶກສາ ມຊ ໄດ້ເຂົ້າເຖິງແຫຼ່ງທຶນການສຶກສາ ແລະ ການຄົ້ນຄວ້າໃນລະດັບສາກົນຫຼາຍຂຶ້ນ.
ພິທີປະກາດຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ) ອອກພັກການ-ຮັບອຸດໜູນບໍານານ ແລະ ແຕ່ງຕັ້ງຜູ້ອຳນວຍການໃຫຍ່ ຜູ້ໃໝ່ ໄດ້ຈັດຂຶ້ນເມື່ອວັນທີ 15 ກໍລະກົດ 2026 ທີ່ສະໂມສອນ ຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ (ມຊ) ໂດຍພາຍໃຕ້ການເປັນປະທານຂອງ ທ່ານ ຮສ.ປອ. ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີ ກະຊວງສຶກສາທິການ ແລະ ກິລາ, ມີຮອງລັດຖະມົນຕີ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຫົວໜ້າຫ້ອງການ, ຫົວໜ້າກົມ, ຜູ້ອຳນວຍການໃຫຍ່ ມຊ, ຫົວໜ້າຄະນະວິຊາ, ຄູ-ອາຈານ ແລະ ພະນັກງານພາຍໃນ ມຊ ເຂົ້າຮ່ວມຢ່າງພ້ອມພຽງ.
ໃນໂອກາດນີ້, ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານດຳລັດຂອງນາຍົກລັດຖະມົນຕີ ສະບັບເລກທີ 177/ນຍ, ລົງວັນທີ 05 ມິຖຸນາ 2026 ວ່າດ້ວຍການອະນຸມັດໃຫ້ພະນັກງານການນຳ ອອກພັກການ-ຮັບອຸດໜູນບໍານານ, ນາຍົກລັດຖະມົນຕີ ໄດ້ອະນຸມັດໃຫ້ ທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ກະຊວງສຶກສາທິການ ແລະ ກິລາ ລວມອາຍຸກະສຽນ 60 ປີ, ລວມອາຍຸການ 37 ປີ ອອກພັກການ-ຮັບອຸດໜູນບໍານານ; ຜ່ານດໍາລັດຂອງທ່ານນາຍົກລັດຖະມົນຕີ ສະບັບເລກທີ 222/ນຍ, ລົງວັນທີ 07 ກໍລະກົດ 2026 ວ່າດ້ວຍການແຕ່ງຕັ້ງຜູ້ອໍານວຍການໃຫຍ່ ມຊ ໂດຍແຕ່ງຕັ້ງ ທ່ານ ຮສ. ປອ. ສິນທະວອນ ດາລາວົງ ເປັນຜູ້ອຳນວຍການໃຫຍ່ ມຊ.
ຈາກນັ້ນ, ທ່ານ ສຈ. ປອ. ເດຊານຸລາດ ແສນດວງເດດ ໄດ້ຂຶ້ນກ່າວສະແດງຄວາມຮູ້ສຶກ, ໂດຍທ່ານໄດ້ຫວນຄືນເສັ້ນທາງການເຮັດວຽກຕະຫຼອດໄລຍະ 41 ປີ (ນັບແຕ່ເປັນນັກສຶກສາ 4 ປີ, ເປັນຄູສອນ 7 ປີ ແລະ ເປັນຄູສອນພ້ອມທັງຜູ້ບໍລິຫານ ມຊ 30 ປີ). ທ່ານໄດ້ຜ່ານຜ່າຄວາມຫຍຸ້ງຍາກຫຼາຍປະການ ແລະ ມີສ່ວນຮ່ວມໃນການພັດທະນາ ມຊ ໃຫ້ເຕີບໃຫຍ່ຂະຫຍາຍຕົວ, ທ່ານຍັງໄດ້ຝາກຄວາມຫວັງ ແລະ ຄວາມເຊື່ອໝັ້ນຕໍ່ຄະນະບໍລິຫານງານຊຸດໃໝ່ ທີ່ຈະມາສືບຕໍ່ນຳພາ ມຊ ໃຫ້ກ້າວຂຶ້ນສູ່ຜົນສຳເລັດໃໝ່ທີ່ຍິ່ງໃຫຍ່ກວ່າເກົ່າ.
ໂອກາດດັ່ງກ່າວ, ທ່ານ ຮສ. ປອ. ທອງສະລິດ ມັງໜໍ່ເມກ ໃຫ້ມີຄຳເຫັນໂອ້ລົມ ແລະ ສະແດງຄວາມຍ້ອງຍໍຊົມເຊີຍ ຕໍ່ ທ່ານ ສຈ.ປອ. ເດຊານຸລາດ ແສນດວງເດດ ທີ່ໄດ້ທຸ່ມເທສະຕິປັນຍາ ແລະ ເຫື່ອແຮງເຂົ້າໃນການພັດທະນາການສຶກສາຊັ້ນສູງຕະຫຼອດໄລຍະການເຮັດວຽກທີ່ຜ່ານມາ. ພ້ອມດຽວກັນນັ້ນ, ທ່ານຮອງນາຍົກລັດຖະມົນຕີ ຍັງໄດ້ເນັ້ນໜັກໃຫ້ ທ່ານຜູ້ອຳນວຍການໃຫຍ່ ມຊ ຄົນໃໝ່ ຈົ່ງສືບຕໍ່ຮັກສາມູນເຊື້ອອັນດີງາມ, ເພີ່ມທະວີຄວາມສາມັກຄີເປັນເອກະພາບພາຍໃນຄະນະນຳ, ເອົາໃຈໃສ່ປັບປຸງຄຸນນະພາບການຮຽນ-ການສອນ, ການຄົ້ນຄວ້າວິທະຍາສາດ ແລະ ຫັນການຄຸ້ມຄອງບໍລິຫານ ມຊ ໃຫ້ກ້າວໄປສູ່ຄວາມທັນສະໄໝ ແລະ ມີຄຸນນະພາບໃນລະດັບສາກົນ ເພື່ອປະກອບສ່ວນເຂົ້າໃນການພັດທະນາຊັບພະຍາກອນມະນຸດຂອງຊາດຢ່າງແທ້ຈິງ.
ພ້ອມນັ້ນ, ທ່ານຍັງໄດ້ມີຄໍາເຫັນຊີ້ນໍາ ຄື: ບັນຫາດ້ານແນວຄິດການເມືອງ ແລະ ລະບຽບການ ຕ້ອງມີການຕັກເຕືອນບຸກຄະລາກອນ ບາງສ່ວນ ທີ່ຍັງຂາດຄວາມເປັນແບບຢ່າງ, ບໍ່ເຄົາລົບລະບຽບກາຕິກາ, ຂາດຄວາມສາມັກຄີ ແລະ ມັກແລ່ນຊັ້ນແລ່ນຕຳແໜ່ງ ແຕ່ບາດເຮັດວຽກຕົວຈິງພັດບໍ່ໄດ້ຕາມຄາດໝາຍ; ການຍົກລະດັບມາດຕະຖານການສຶກສາ ເນັ້ນໃສ່ການເພີ່ມວຸດທິການສຶກສາ (ປອ, ຮສ, ສຈ) ຂອງຄູ-ອາຈານ ໃຫ້ໄດ້ມາດຕະຖານສາກົນ ເພື່ອໃຫ້ເປັນທີ່ຍອມຮັບ ແລະ ເຊື່ອມໂຍງກັບພາກພື້ນ ໂດຍສະເພາະຢູ່ ມຊ ແລະ ມະຫາວິທະຍາໄລສ່ວນພາກ (ຈຳປາສັກ, ສະຫວັນນະເຂດ, ຫຼວງພະບາງ); ການໂຄສະນາ ແລະ ດຶງດູດນັກສຶກສາຊົມເຊີຍການເຮັດວຽກດ້ານການໂຄສະນາຜ່ານສື່ຕ່າງໆ, ພ້ອມທັງເນັ້ນການຖອດຖອນບົດຮຽນຈາກກົນໄກເກົ່າ ແລະ ສ້າງສິ່ງອຳນວຍຄວາມສະດວກໃຫ້ແກ່ຜູ້ຮຽນ-ຜູ້ສອນ; ການປັບປຸງການບໍລິຫານຮ່ວມກັນ ປຸກລະດົມໃຫ້ທຸກຄະນະວິຊາຫັນ "ວິກິດໃຫ້ເປັນໂອກາດ" ໂດຍການປັບປຸງທັງວຽກງານພັກ ແລະ ການບໍລິຫານຈັດການໃຫ້ຖືກຕ້ອງຕາມກົດລະບຽບ ເພື່ອລຶບລ້າງຄຳນິນທາ ແລະ ກອບກູ້ຊື່ສຽງ, ກຽດສັກສີຂອງຂົງເຂດການສຶກສາຄືນມາ ເພື່ອໃຫ້ພັກ, ລັດ ແລະ ປະຊາຊົນເກີດຄວາມເຊື່ອໝັ້ນ.
ໃນຕອນບ່າຍ ວັນທີ 14 ກໍລະກົດ 2026, ທີ່ຜ່ານມາ ທີ່ຫ້ອງຮັບແຂກ VIP ຕຶກສຳນັກງານ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ສຈ.ປອ. ພູເພັດ ກ່ຽວພິລາວົງ, ຮອງຜູ້ອໍານວຍການໃຫຍ່ ມຊ ພ້ອມດ້ວຍ ພະນັກງານທີ່ກ່ຽວຂ້ອງ ໄດ້ຕ້ອນຮັບການມາຢ້ຽມຢາມ ຂອງຄະນະຜູ້ແທນ ມະຫາວິທະຍາໄລ Southwest Forestry University ຈາກສາທາລະນະລັດ ປະຊາຊົນຈີນ.
ການພົບປະກັນຄັ້ງນີ້, ທັງສອງຝ່າຍໄດ້ ປຶກສາຫາລື ແລະ ແລກປ່ຽນຄວາມຄິດເຫັນ ແລະ ກໍານົດທິດທາງການຮ່ວມມືໃນຫຼາຍປະເດັນສໍາຄັນ ໂດຍສະເພາະແມ່ນການຮ່ວມມືດ້ານວຽກງານວິຊາການ; ເຊິ່ງປະກອບດ້ວຍ ການເຮັດບົດໂຄງການວິໄຈຮ່ວມກັນ, ການພັດທະນາຫຼັກສູດການສຶກສາໃນລະດັບປະລິນຍາເອກ ແລະ ການສົ່ງເສີມການແລກປ່ຽນນັກສຶກສາລະຫວ່າງສອງສະຖາບັນ. ນອກຈາກນີ້, ທັງສອງຝ່າຍຍັງໄດ້ເນັ້ນໜັກໃສ່ການຮ່ວມມືໃນຂະແໜງການສິ່ງແວດລ້ອມ ເຊິ່ງເປັນປັດໄຈທີ່ມີຄວາມສຳຄັນ ແລະ ເປັນຈຸດສຸມໃນການພັດທະນາແບບຍືນຍົງ ໂດຍອາໄສຄວາມຊ່ຽວຊານ ແລະ ບົດຮຽນຈາກ ມະຫາວິທະຍາໄລ Southwest Forestry University ເພື່ອສ້າງບຸກຄະລາກອນທີ່ມີຄຸນນະພາບ ແລະ ຮອງຮັບການພັດທະນາໃນອະນາຄົດ; ເຊິ່ງການຮ່ວມມືດັ່ງກ່າວ ຫາກປະກົດຜົນເປັນຈິງ ຖືເປັນຂີດ
ໝາຍອັນດີໃນການຮັດແໜ້ນຄວາມສາຍພົວພັນທາງດ້ານວິຊາການ ແລະ ການຮ່ວມມື ສາກົນ ຂອງ ມະຫາວິທະຍາໄລແຫ່ງຊາດ ລາວ ໃຫ້ໄດ້ຮັບການພັດທະນາ ແລະ ກ້າວໜ້າຢ່າງບໍ່ຢຸດຢັ້ງ.
ໃນວັນທີ 15 ກໍລະກົດ 2026 , ຢູ່ທີ່ຫ້ອງປະຊຸມ 213 ຕຶກສຳນັກງານຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ ພ້ອມດ້ວຍຫົວໜ້າຫ້ອງການ ແລະພະນັກງານທີ່ກ່ຽວຂ້ອງ ໄດ້ໃຫ້ກຽດຕ້ອນຮັບການມາຢ້ຽມຢາມ ຂອງຄະນະຜູ້ແທນ ຈາກສະພາອຸດສະຫະກຳ ແລະ ການຄ້ານະຄອນສົງຊີ້ງ ສປ ຈີນ,ນຳໂດຍ ທ່ານ Gui Xiangyou ຮອງເລຂາຄະນະພັກ ພ້ອມດ້ວຍຄະນະຜູ້ແທນ ແລະ ອາຈານ.
ໃນໂອກາດນີ້, ທ່ານ ສຈ. ປອ. ພູເພັດ ກ້ຽວພິລາວົງ ໄດ້ກ່າວຕ້ອນຮັບ ແລະສະແດງຄວາມຍິນດີ ຕໍ່ການມາຢ້ຽມຢາມ ຂອງຄະນະຜູ້ແທນດັ່ງກ່າວຢ່າງອົບອຸ່ນ ພ້ອມມີຄຳເຫັນບາງຕອນວ່າ: ການພົບປະໃນຄັ້ງນີ້ ເປັນນິມິດໝາຍອັນດີໃນການຮ່ວມມືສົ່ງເສີມການລົງທຶນ ແລະ ການຄ້າ, ທັງເປັນການດຶງດູດນັກລົງທຶນຈາກ ສປ. ຈີນ ເຂົ້າມາລົງທຶນຢູ່ ສປປ ລາວ ນັບມື້ນັບຫຼາຍຂຶ້ນ. ປັດຈຸບັນ, ມຊ ມີບົດບາດສຳຄັນໃນການຜະລິດນັກສຶກສາຫຼາຍພັນຄົນອອກຮັບໃຊ້ສັງຄົມໃນແຕ່ລະປີ, ພ້ອມທັງມີຄະນະຄູອາຈານທີ່ມີເຄືອຂ່າຍກວ້າງຂວາງ ທາງດ້ານວິຊາການ ແລະ ສັງຄົມ. ດັ່ງນັ້ນ, ຈຶ່ງຫວັງຢ່າງຍິ່ງວ່າ ຄະນະຜູ້ແທນສະພາອູດສາຫະກໍາ ແລະການຄ້າ ສົງຊິ້ງ ທີ່ໄດ້ມາຢ້ຽມຢາມ ມຊ ໃນຄັ້ງນີ້ ຈະຊ່ວຍເປັນຂົວຕໍ່ໃນການຊຸກຍູ້ ແລະ ສົ່ງເສີມການລົງທຶນລະຫວ່າງສອງຝ່າຍໃຫ້ເປັນຮູບປະທຳ. ພ້ອມກັນນັ້ນ, ທ່ານຮອງຜູ້ອຳນວຍການໃຫຍ່ ມຊ ຍັງໄດ້ກ່າວຄຳຂອບໃຈມາຍັງຄະນະຜູ້ແທນ ທີ່ໄດ້ມາຢ້ຽມຢາມ ແລະ ແລກປ່ຽນບົດຮຽນໃນຄັ້ງນີ້.
ໃນຕອນທ້າຍ, ຝ່າຍຄະນະຜູ້ແທນ ສປ.ຈີນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງຢືນຢັນຄວາມມຸ່ງໝັ້ນທີ່ຈະປະຕິບັດຕາມກົດໝາຍ ແລະ ລະບຽບການຂອງ ສປປ ລາວ ຢ່າງເຄັ່ງຄັດ, ເພື່ອຮ່ວມກັນຊຸກຍູ້ການແລກປ່ຽນທາງດ້ານວິຊາການ, ການຄ້າ ແລະ ການລົງທຶນ ໃຫ້ປາກົດຜົນເປັນຈິງ ແລະ ສ້າງປະໂຫຍດຮ່ວມກັນໃນອະນາຄົດ.
ໃນວັນທີ 9 ກໍລະກົດ 2026 ຜ່ານມາ, ຄະນະອັກສອນສາດ ມະຫາວິທະຍາໄລແຫ່ງຊາດ ໄດ້ຈັດພິທີ ເປີດນຳໃຊ້ຫ້ອງຮຽນປະລິນຍາໂທພາສາອັງກິດ ຂຶ້ນຢ່າງເປັນທາງການ ທີ່ຕຶກສຳນັກງານຂອງຄະນະອັກສອນສາດ. ພິທີດັ່ງກ່າວເປັນກຽດເຂົ້າຮ່ວມໂດຍ ທ່ານ ຮສ. ປອ. ສິນທະວອນ ດາລາວົງ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ທ່ານ ປອ. ນາງ ທອງມາລາ ໂພສີຄໍາ ຫົວໜ້າຄະນະວິຊາ ຄະນະອັກສອນສາດ. ໂດຍມີບັນດາທ່ານຮອງຫົວໜ້າຄະນະວິຊາ, ຫົວໜ້າພາກວິຊາ, ຫົວໜ້າພະແນກ, ພະນັກງານ, ຄູ-ອາຈານ ແລະ ນັກສຶກສາ ເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ປອ. ນາງ ທອງມາລາ ໂພສີຄຳ ໄດ້ຂຶ້ນລາຍງານກ່ຽວກັບໂຄງການການປັບປຸງ-ສ້ອມແປງ ແລະ ຕິດຕັ້ງອຸປະກອນການຮຽນ-ການສອນ ໂດຍໃຫ້ຮູ້ວ່າ: ໂຄງການດັ່ງກ່າວແມ່ນໄດ້ຮັບທຶນຊ່ວຍເຫຼືອລ້າຈາກ ບໍລິສັດ ລາວກຣີນດີວີລົບເມັ້ນ ຈຳກັດຜູ້ດຽວ (ໂດຍຜ່ານມະຫາວິທະຍາໄລແຫ່ງຊາດ). ໂຄງການນີ້ມີມູນຄ່າລວມທັງໝົດ 341,400,400 ກີບ (ສາມຮ້ອຍສີ່ສິບເອັດລ້ານສີ່ແສນສີ່ຮ້ອຍກີບ), ເຊິ່ງໄດ້ນຳມາປັບປຸງ-ສ້ອມແປງຫ້ອງຮຽນ ແລະ ຕິດຕັ້ງອຸປະກອນຕ່າງໆຈົນສຳເລັດ 100%.
ຫ້ອງຮຽນທີ່ໄດ້ຮັບການປັບປຸງໃນຄັ້ງນີ້ມີຈຳນວນ 2 ຫ້ອງ ໂດຍແບ່ງການປັບປຸງ-ສ້ອມແປງອອກເປັນ 2 ພາກສ່ວນຄື: 1.) ການປັບປຸງສ້ອມແປງ ແລະ ປ່ຽນຖ່າຍອຸປະກອນ ປະກອບມີ: ການທາສີພາຍໃນ, ປ່ຽນລະບົບສາຍໄຟ, ດອກໄຟ LED, ໃສ່ປະຕູໃໝ່ 4 ປ່ອງ, ອະນາໄມພັດລົມເພດານເກົ່າ ແລະ ປ່ຽນພັດລົມໂຄຈອນ 2 ໜ່ວຍ, ສ້ອມແປງ ແລະ ອະນາໄມເຄື່ອງປັບອາກາດ ແລະ ໃສ່ຜ້າກັ້ງໃໝ່, 2.) ການສະໜອງອຸປະກອນ ປະກອບມີ: ໂຕະ-ຕັ່ງນັກຮຽນ ຈຳນວນ 50 ຊຸດ, ໂຕະ-ຕັ່ງຄູ 2 ຊຸດ, ເຄື່ອງສາຍໂປຣເຈັກເຕີ 2 ຊຸດ, ຄອມພິວເຕີຕັ້ງໂຕະ 2 ຊຸດ, ຕູ້ເອກະສານ 4 ໜ່ວຍ ແລະ ກະດານແກ້ວ 2 ແຜ່ນ. ອຸປະກອນທັງໝົດນີ້ຈະໄດ້ເປີດນໍາໃຊ້ ເພື່ອອຳນວຍຄວາມສະດວກເຂົ້າໃນການຮຽນ-ການສອນຂອງຄະນະອັກສອນສາດ.
ພ້ອມນັ້ນ, ໃນພິທີຍັງໄດ້ຮັບຟັງການໂອ້ລົມຂອງ ທ່ານ ຮສ. ປອ. ສິນທະວອນ ດາລາວົງ ໂດຍທ່ານໄດ້ກ່າວສະແດງຄວາມຂອບໃຈຕໍ່ກັບການຊ່ວຍເຫຼືອໃນຄັ້ງນີ້ຂອງ ບໍລິສັດ ລາວກຣີນດີວີລົບເມັ້ນ ຈຳກັດຜູ້ດຽວ (ເຊິ່ງເປັນອະດີດນັກສຶກສາຂອງ ມະຫາວິທະຍາໄລແຫ່ງຊາດ) ທີ່ໄດ້ປະກອບສ່ວນສຳຄັນເຂົ້າໃນການພັດທະນາພື້ນຖານໂຄງລ່າງດ້ານການສຶກສາ. ພ້ອມທັງເນັ້ນຢໍ້າໃຫ້ຄະນະນຳ, ຄູ-ອາຈານ ຄະນະອັກສອນສາດ ເອົາໃຈໃສ່ຄຸ້ມຄອງ ແລະ ນຳໃຊ້ອຸປະກອນຕ່າງໆທີ່ໄດ້ຮັບໃນຄັ້ງນີ້ໃຫ້ເກີດຜົນປະໂຫຍດສູງສຸດ ເພື່ອຮັບໃຊ້ການຮຽນ-ການສອນໃຫ້ມີຄຸນນະພາບ ແລະ ຍົກລະດັບໃຫ້ທຽບເທົ່າກັບພາກພື້ນ ແລະ ສາກົນ. ນອກນັ້ນ, ກໍຍັງຮຽກຮ້ອງໃຫ້ເອົາໃຈໃສ່ໃນການພັດທະນາຫຼັກສູດທີ່ສັງຄົມກຳລັງໃຫ້ຄວາມສົນໃຈ ລວມເຖິງການຂະຫຍາຍຈຳນວນການຮັບນັກສຶກສາອີກດ້ວຍ.
ໃນຕອນບ່າຍວັນທີ 6 ກໍລະກົດ 2026 ນີ້, ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີຖະແຫຼງຂ່າວກ່ຽວກັບການລົງທະບຽນສອບເສັງເຂົ້າຮຽນ ມຊ. ໂດຍ ທ່ານ ສຈ. ປອ. ເດຊານຸລາດ ແສນດວງເດດ ຜູ້ອໍານວຍການໃຫຍ່ ມຊ ໄດ້ໃຫ້ສຳພາດຕໍ່ສືມ່ວນຊົນວ່າ: ປັດຈຸບັນ ມຊ ໄດ້ກະກຽມຄວາມພ້ອມຢ່າງຮອບດ້ານສຳລັບການເປີດຮັບລົງທະບຽນສອບເສັງ ເຂົ້າຮຽນ ມຊ ໃນສົກສຶກສາ 2026-2027 ນີ້. ໂດຍໄດ້ ແຕ່ງຕັ້ງຄະນະຊີ້ນໍາ ແລະ ຄະນະຮັບຜິດຊອບການສອບເສັງ ກໍຄື ບຸກຄະລາກອນໃຫ້ພ້ອມຮັບບໍລິການນັກສອບເສັງຢ່າງເຕັມທີ່; ໄດ້ປັບປຸງລະບົບການລົງທະບຽນແບບ Online ໃຫ້ທັນສະໄໝ, ງ່າຍດາຍຫຼາຍຂຶ້ນ ແລະ ມີປະສິດທິພາບ; ໄດ້ຈັດສະຖານທີ່ໃຫ້ບໍລິການດ້ານຂໍ້ມູນຂ່າວສານ ແລະ ການຊີ້ນຳຕ່າງໆ ເພື່ອອຳນວຍຄວາມສະດວກ ໃຫ້ນັກຮຽນ ແລະ ຜູ້ປົກຄອງ; ເຊິ່ງວັນທີ 6 ກໍລະກົດ 2026 ນີ້ ເປັນມື້ເລີ່ມຕົ້ນ ເປີດລະບົບອອນລາຍໃຫ້ຜູ້ສະໝັກ ເຂົ້າສະໝັກລົງທະບຽນສອບເສັງຜ່ານທາງອອນລາຍ ແລະ ໃນວັນທີ 13 ກໍລະກົດນີ້ ຈະໄດ້ເປີດສູນຮັບລົງທະບຽນໃຫ້ຜູ້ສະໝັກມາເອົາບັດເຂົ້າຫ້ອງສອບເສັງໄດ້ຢູ່ທີ່ສະໂມສອນໃຫຍ່ ມຊ; ໃນວັນທີ 5 ສິງຫາ ຈະໄດ້ປິດລະບົບ ການລົງທະບຽນຜ່ານທາງອອນລາຍ ແລະ ໃນວັນທີ 8 ສິງຫາ ເປັນມື້ຈັດ ຕັ້ງການສອບເສັງ.
ການສອບເສັງໃນສົກຮຽນນີ້ ໄດ້ແບ່ງອອກເປັນ 2 ກຸ່ມຄື: ກຸ່ມ A ແລະ ກຸ່ມ B, ກຸ່ມ A (ກຸ່ມວິທະຍາສາດ ແລະ ເຕັກ ໂນໂລຊີ ຫຼື STEM); ກຸ່ມ B (ກຸ່ມສັງຄົມສາດ ແລະ ມະນຸດສາດ ຫຼື Non-STEM); ກຸ່ມ A ຄະນິດສາດ A + ຟີຊິກສາດ; ພາສາລາວ-ວັນ ນະຄະດີ + ເຄມີສາດ + ຊີວະສາດ + ພາສາອັງກິດ ແລະ ກຸ່ມ B ຄະນິດສາດ B + ພາສາລາວ-ວັນນະຄະດີ; ພູມີສາດ + ປະຫວັດສາດ + ພາສາ ອັງກິດ. ສໍາລັບການເປີດຮັບສະໝັກສອບເສັງ ໃນສົກສຶກສາ 2026-2027 ນີ້, ມຊ ມີຫຼັກສູດທີ່ເປີດໃຫ້ລົງທະບຽນທັງໝົດດັ່ງນີ້: ລະດັບປະລິນຍາຕີມີທັງໝົດ 125 ຫຼັກສູດ; ໃນນັ້ນປະກອບມີຫຼັກສູດນາໆຊາດ 2 ຫຼັກສູດ, ຫຼັກສູດທີ່ເປີດໃຫ້ສະໝັກສອບເສັງມີທັງໝົດ 115 ຫຼັກສູດ, ແບ່ງອອກເປັນ: ສາຍ A (ວິທະຍາສາດ ແລະ ເຕັກໂນ ໂລຊີ): 65 ຫຼັກສູດ ແລະ ສາຍ B (ສັງຄົມສາດ ແລະ ມະນຸດສາດ): 50 ຫຼັກສູດ. ສຳລັບລະດັບອະນຸປະລິນຍາ: ຍັງມີຫຼັກສູດອື່ນໆ ທີ່ເປີດຮັບສະໝັກ ຊຶ່ງສາມາດຕິດຕາມລາຍລະອຽດເພີ່ມເຕີມໄດ້ທີ່ ເຟສບຸກ ແລະ ກະດານຂ່າວ ຂອງ ມຊ. ເຊິ່ງຫຼາຍປີຜ່ານມາ ມຊ ໄດ້ມີການພັດທະນາຫຼັກສູດການຮຽນ-ການສອນຢ່າງຕໍ່ເນື່ອງ ເພື່ອຕອບສະໜອງຕໍ່ຄວາມຕ້ອງການຂອງຕະຫຼາດແຮງງານທັງພາຍໃນ ແລະ ສາກົນ, ຊຶ່ງປັດຈຸບັນມີເຖິງ 260 ກວ່າຫຼັກສູດ ໃນນັ້ນ ເປັນຫຼັກສູດປະລິນຍາຕີ 125 ຫຼັກສູດ ແຕ່ເປີດໃຫ້ສອບເສັງ 115 ຫຼັກສູດ ຊຶ່ງແຕ່ລະສາຂາວິຊາ ກໍລ້ວນແຕ່ມີຄວາມສໍາຄັນ ສາມາດປະກອບອາຊີບໄດ້ ທັງຮູບແບບລັດຖະກອນຂອງລັດ ແລະ ນໍາພາກເອກະຊົນ. ຖ້າຫາກສົນໃຈສາຂາອາຊີບໃດກໍເລືອກຮຽນສາຂາວິຊາກ່ຽວຂ້ອງ ແຕ່ຢາກແນະນໍາວ່າ ບາງເທື່ອເລືອກເສັງໃນສາຂາວິຊາທີ່ສັງຄົມນິຍົມແຂ່ງຂັນກັນເຂົ້າຮຽນ ກໍມີ ຄວາມສ່ຽງເພາະມີການແຂ່ງຂັນສູງ, ປີຜ່ານມາ ບາງວິຊາ ເຊັ່ນ: ພາສາ ຈີນ ສະໝັກເຖິງ 1,000 ກວ່າຄົນ ແຕ່ ມຊ ສາມາດຮັບໄດ້ພຽງແຕ່ 100 ກວ່າຄົນ; ສະນັ້ນຜູ້ສະໝັກຕ້ອງໄດ້ ພິຈາລະນາໃຫ້ຖີ່ຖ້ວນ ບໍ່ຄວນແລ່ນຕາມກະແສສັງຄົມເກີນໄປ ຍິ່ງແຂ່ງຂັນຫຼາຍ ກໍສ່ຽງຫຼາຍເທົ່ານັ້ນ ນັບທັງ ການແຂ່ງຂັນເສັງເຂົ້າ ແລະ ແຂ່ງຂັນປະກອບອາຊີບ.
ທ່ານກ່າວຕື່ມວ່າ ມຊ ຍັງມີສາຂາວິຊາໃໝ່ທີ່ຫາກໍໄດ້ຮັບອະນຸມັດ ແລະ ຈະເປີດໃນສົກສຶກສານີ້: ຄະນະວິຊາ ວິທະຍາສາດທໍາມະຊາດມີ 2 ຫຼັກສູດ ຄື: ຄະນິດສາດ ແລະ ຄອມພິວເຕີສໍາລັບທຸລະກິດ ແລະ ຄະນິດສາດສໍາລັບການເງິນ ແລະ ການປະກັນໄພລະດັບປະລິນຍາຕີ; ຄະນະ ກະເສດສາດ ມີ 2 ຫຼັກສູດ ຄື: ເຕັກໂນໂລຊີການຜະລິດງົວນົມ ແລະ ການຈັດການທີ່ດິນກະສິກໍາແບບຍືນຍົງ ລະດັບປະລິນຍາຕີ ແລະ ຄະນະ ອັກສອນສາດ ມີ 1 ຫຼັກສູດ ຄື: ພາສາຈີນສໍາລັບການທ່ອງທ່ຽວລະດັບປະລິນຍາຕີ ພ້ອມດຽວກັນ, ມຊ ກໍໄດ້ໂຈະບາງຫຼັກສູດທີ່ບໍ່ມີຜູ້ສະໝັກເຂົ້າຮຽນຈຳນວນ 21 ຫຼັກສູດຄື: ຫຼັກສູດປະລິນຍາຕີ 5 ຫຼັກສູດ, ຫຼັກສູດຕໍ່ເນື່ອງປະລິນຍາຕີ 11 ຫຼັກສູດ ແລະ ຫຼັກສູດອະນຸປະລິນ ຍາ 5 ຫຼັກສູດ. ສຳລັບສົກສຶກສາ 2026-2027 ມຊ ມີແຜນຮັບນັກສຶກສາໃໝ່ເຂົ້າຮຽນໃນທຸກໆຫຼັກສູດປະລິນຍາຕີ ແມ່ນ 5,570 ຄົນ. ນອກຈາກນັ້ນຍັງຈະມີການສອບເສັງເອົານັກສຶກສາເຂົ້າຮຽນຫຼັກສູດນາໆຊາດ, ຫຼັກສູດຕໍ່ເນື່ອງ ປ.ຕີ ແລະ ຫຼັກສູດຫຼາຍທາງເລືອກ (ຈັດການ ສອນໃນວັນເສົາ, ວັນອາທິດ ແລະ ພາກຄໍ່າ) ຊຶ່ງໄດ້ຈັດສອບເສັງຕ່າງຫາກ.
ສໍາລັບວັນເວລາຈັດການສອບເສັງແມ່ນ ວັນທີ 8 ສິງຫາ 2026 ນີ້ ແລະ ຈະປະກາດຜົນໃຫ້ໄວຂຶ້ນກວ່າປີຜ່ານມາ, ຄາດວ່າຈະປະກາດໃນວັນທີ 24 ສິງຫາ 2026 ແລະ ຈະເປີດຮັບລົງທະບຽນ ວັນທີ 31 ສິງຫາ 2026 ເປັນຕົ້ນໄປ. ມຊ ເປີດຊ່ອງທາງຫຼາຍດ້ານໃຫ້ຜູ້ທີ່ສົນໃຈ ໄດ້ສອບຖາມຂໍ້ມູນສະເພາະ ກ່ຽວກັບການລົງທະບຽນສອບເສັງ, ຊຶ່ງປະກອບມີ: Facebook: ກໍສາມາດຕິດຕາມ ແລະ ສົ່ງຂໍ້ຄວາມສອບຖາມໄດ້ທີ່ ເຟສບຸກ Fanpage: ຂ່າວສານ ມຊ; ເວັບໄຊ: ສາມາດເຂົ້າເບິ່ງຂໍ້ມູນ ແລະ ດາວໂຫຼດເອກະສານໄດ້ທີ່ www.nuol.edu.la. ສໍາລັບການກະກຽມຈະມາລົງທະບຽນ ສະໝັກສອບເສັງແມ່ນໃຫ້ກະກຽມ ດັ່ງນີ້: 1) ກ່ອນອື່ນໝົດແມ່ນໃຫ້ຄົ້ນຄິດຕັດສິນໃຈເລືອກສາຂາວິຊາທີ່ຈະເຂົ້າສະໝັກສອບເສັງ ເພາະນັ້ນຄືອາຊີບໃນອະນາຄົດຂອງຜູ້ຈະສອບເສັງ. 2) ກະກຽມເອກະສານໃຫ້ ຄົບຖ້ວນ: ກະລຸນາກຽມໃບຢັ້ງຢືນການສຶກສາ ຈົບ ມ7, ຮູບຖ່າຍ ແລະ ເອກະສານອື່ນໆ ທີ່ກ່ຽວຂ້ອງໃຫ້ຖືກຕ້ອງຕາມລາຍການທີ່ປະກາດໄວ້ ເພື່ອການຢັ້ງຢືນ. 3) ກະກຽມເງິນຄ່າທຳນຽມການສອບເສັງ ແລະ ວິທີການຊຳລະຕາມທີ່ກຳນົດໄວ້. 4) ສຶກສາຂໍ້ມູນການສອບເສັງລ່ວງໜ້າ: ຄວນສຶກສາຮູບແບບຂໍ້ສອບເສັງ, ກົດລະບຽບ ແລະ ເວລາສອບເສັງຈາກປະກາດ ຂອງ ມຊ. 5) ກະກຽມສຸຂະພາບ: ລະມັດລະວັງອາຫານການກິນ, ພັກຜ່ອນໃຫ້ພຽງພໍ ແລະ ກຽມ ສະຕິໃຫ້ມີສະມາທິທີ່ດີ ເພື່ອກຽມຕົວສອບເສັງຢ່າງເຕັມທີ່ ແລະ 6) ຕິດຕາມຂ່າວສານຢ່າງສະໝໍ່າສະເໝີ: ຕິດຕາມການປ່ຽນແປງ ແລະ ຂໍ້ມູນໃໝ່ໆ ຜ່ານທາງຊ່ອງທາງ ທາງການຂອງ ມຊ.
