ກິດຈະກຳຈັດການແຂ່ງຂັນເວົ້າພາສາລາວສຳລັບນັກສຶກສາຕ່າງປະເທດ ຄັ້ງທີ XII ໄດ້ຈັດຂຶ້ນໃນວັນທີ 13 ພຶດສະພາ 2026 ທີ່ ສະໂມສອນໃຫຍ່ ມຊ ເຊິ່ງຈັດໂດຍພາກວິຊາພາສາ-ວັດທະນະທຳລາວ ຄະນະອັກສອນສາດ ມະຫາວິທະຍາໄລແຫ່ງຊາດ (ມຊ) ໂດຍການເຈົ້າຮ່ວມຂອງທ່ານ ປອ. ນາງ ມະໄລຄຳ ໄຊຍະກອນ ຮອງຫົວໜ້າຄະນະວິຊາຄະນະອັກສອນສາດ, ມີທ່ານຫົວຫນ້າ-ຮອງຫົວຫນ້າພາກວິຊາພາສາ-ວັດທະນະທໍາລາວ, ຫົວຫນ້າພະແນກ, ພະນັກງານ, ຄູ-ອາຈານ ແລະ ນັກສຶກສາຕ່າງປະເທດເຂົ້າຮ່ວມ.

ຈຸດປະສົງຂອງການຈັດກິດຈະກຳໃນຄັ້ງນີ້ແມ່ນເປັນເວທີສຳຄັນໃນການເປີດໂອກາດໃຫ້ນັກສຶກສາຕ່າງປະເທດທີ່ກຳລັງຮຽນພາສາລາວຢູ່ ມຊ ໄດ້ສະແດງຄວາມສາມາດດ້ານການຮຽນຮູ້ກ່ຽວກັບພາສາລາວເຊັ່ນ: ການອ່ານ ການຂຽນ ແລະ ການຟັງ ເຊິ່ງປີນີ້ຈັດຂຶ້ນພາຍໃຕ້ຫົວຂໍ້: "ເວົ້າດ້ວຍຮັກ ມັກດ້ວຍໃຈ ຝັກໄຝ່ໃນຄວາມຮູ້ ສູ້ດ້ວຍຄວາມອົດທົນ ເພື່ອຜົນສຳເລັດໃນການຮຽນ ຂອງພວກເຮົາ" ໂດຍນັກສຶກສາທີ່ເຂົ້າຮ່ວມແຂ່ງຂັນຈະເລືອກຫົວຂໍ້ມາຜູ້ລະ 1 ຫົວຂໍ້ທີ່ກ່ຽວຂ້ອງ ມານຳສະເໜີປາກເປົ່າພາຍໃນ 5 ນາທີ.

ນັກສຶກສາຕ່າງປະເທດທີ່ເຂົ້າຮ່ວມການແຂ່ງຂັນໃນຄັ້ງນີ້ ແມ່ນມາຈາກ 2 ຫຼັກສູດຄື: ຫຼັກສູດກຽມພາສາລາວ ແລະ ຫຼັກສູດບຳລຸງພາສາ-ວັດທະນະທຳລາວ ທີ່ຄະນະອັກສອນສາດ ມຊ ໃນສົກສຶກສາ 2025-2026 ມີນັກສຶກສາເຂົ້າຮ່ວມແຂ່ງຂັນທັງຫມົດຈໍານວນ 30 ຄົນ ທີ່ມາຈາກຫຼາຍປະເທດ ເຊັ່ນ: ປະເທດຈີນ, ມຽນມາ, ກຳປູເຈຍ ແລະ ສ. ເກົາຫຼີ.

ໃນວັນທີ 11 ພຶດສະພາ 2026 ຜ່ານມາ, ອະດີດນັກສຶກສາ ແລະຜູ້ປະກອບການທຸລະກິດໄດ້ມອບອຸປະກອນການສຶກສາປະເພດຊຸດໂຕະຕັ່ງມູນຄ່າ 180,000,000 ກີບ (ໜື່ງຮ້ອຍແປດສິບລ້ານກີບ) ໃຫ້ແກ່ກະຊວງສຶກສາທິການ ແລະກິລາ ເພື່ອມອບຕໍ່ໃຫ້ແກ່ ມະຫາວິທະຍາໄລແຫ່ງຊາດ, ໂດຍການໃຫ້ກຽດກ່າວມອບຂອງ ທ່ານ ນາງ ນິວັນນາ ປະທານບໍລິສັດສຽວເຊິ້ງເຄຫະສະຖານ ແລະສຳຫຼວດຂຸດຄົ້ນບໍ່ແຮ່ ຈຳກັດຜູ້ດຽວ ແລະໃຫ້ກຽດກ່າວຮັບໂດຍທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ໃຫ້ກຽດເຂົ້າຮ່ວມເປັນສັກຂີພິຍານໂດຍທ່ານ ຮສ. ປອ. ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະກິລາ ແລະມີບັນດາທ່ານຈາກພາກສ່ວນທີ່ກ່ຽວຂ້ອງເຂົ້າຮ່ວມດ້ວຍ.

ໃນໂອກາດນີ້, ທ່ານ ຮສ. ປອ. ທອງສະລິດ ມັງໜໍ່ເມກ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການມອບເຄື່ອງຊ່ວຍເຫຼືອໃນຄັ້ງນີ້, ຊື່ງເປັນການປະກອບສ່ວນທີ່ມີປະໂຫຍດສູງເຂົ້າໃນການພັດທະນາພື້ນຖານໂຄງລ່າງການສຶກສາໃຫ້ມີຄຸນະພາບສູງຂຶ້ນກວ່າເກົ່າ ແລະຍັງມີຄວາມໝາຍຄວາມສຳຄັນຕໍ່ການສ້າງປະຖົມປັດໄຈໃນການຍົກສູງຄຸນະພາບຂອງການສຶກສາມະຫາວິທະຍາໄລແຫ່ງຊາດ ໃຫ້ສາມາດຕອບສະໜອງຕໍ່ຄວາມຮຽກຮ້ອງຕ້ອງການຂອງສັງຄົມກໍ່ຄືຂອງປະເທດຊາດໃນໄລຍະໃໝ່ ແລະ ສ້າງບາດກ້າວການເຊື່ອມໂຍງສູ່ສາກົນໃຫ້ສູງຂຶ້ນ.

ໂອກາດດຽວກັນນີ້, ທ່ານ ສຈ. ປອ. ເດຊານຸລາດ ແສນດວງເດດ ກໍໄດ້ກ່າວສະແດງຄວາມຂອບໃຈຢ່າງສູງມາຍັງຜູ້ທີ່ໃຫ້ການສະໜັບສະໜູນໃນຄັ້ງນີ້. ຊຶ່ງນອກຈາກຈະເປັນການປະກອບສ່ວນທີ່ສຳຄັນຕໍ່ການພັດທະນາວຽກງານການສຶກສາແລ້ວຍັງເປັນການປະກອບສ່ວນເຂົ້າໃນຂະບວນການສະເຫຼີມສະຫຼອງວັນສ້າງຕັ້ງ ມະຫາວິທະຍາໄລແຫ່ງຊາດ ຄົບຮອບ 30 ປີ ໃຫ້ມີຄວາມໝາຍ ແລະມີຂະບວນການທີ່ຟົດຟື້ນ ແລະທ່ານຍັງສະແດງຄວາມຂອບໃຈ ແລະຮູ້ບຸນຄຸນເປັນຢ່າງສູງມາຍັງທ່ານ ຮສ. ປອ. ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະກິລາ ຊື່ງຍາມໃດກໍມີຄວາມເປັນຫ່ວງເປັນໄຍ ແລະໃຫ້ຄວາມເອົາໃຈໃສ່ຊີ້ນຳ ມະຫາວິທະຍາໄລແຫ່ງຊາດ ໃຫ້ໄດ້ມີການພັດທະນາດ້ວຍບາດກ້າວໃໝ່ເຕີບໃຫຍ່ຂຶ້ນໄປຢ່າງບໍ່ຢຸດຢັ້ງ.

ພິທີລົງນາມສືບຕໍ່ການຮ່ວມມືທາງດ້ານວິຊາການລະຫວ່າງ ມະຫາວິທະຍາໄລແຫ່ງຊາດ(ມຊ) ແລະ ມະຫາວິທະຍາໄລນະເຣສວນ ປະເທດໄທ ໄດ້ຈັດຂຶ້ນໃນວັນທີ 8 ພຶດສະພາ 2026 ທີ່ຫ້ອງປະຊຸມສຳນັກງານອະທິການບໍດີ ມຊ, ຝ່າຍ ມຊ ລົງນາມ ໂດຍທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ ແລະ ຝ່າຍ ມະຫາວິທະຍາໄລນະເຣສວນ ລົງນາມ ໂດຍທ່ານ ສຈ. ດຣ ນາງ ສິລິນທິບ ຕັນຕະນີ ອະທິການບໍດີ ມະຫາວິທະຍາໄລນະເຣສວນ, ມີທ່ານຫົວໜ້າຄະນະວິຊາ, ຫົວໜ້າຫ້ອງການ ແລະ ພະນັກງານທີ່ກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ໂອກາດນີ້, ທ່ານ ສຈ. ປອ. ເດຊານຸລາດ ແສນດວງເດດ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງລາຍງານສະພາບລວມໂດຍຫຍໍ້ ຂອງ ມຊ ການຮ່ວມມືຂອງ ມຊ ກັບບັນດາສະຖາບັນ, ມະຫາວິທະຍາໄລແຫ່ງຕ່າງໆ ຂອງ ໃນປະເທດໄທ; ຊຶ່ງການຮ່ວມແມ່ນເນັ້ນໃສ່ການພັດທະນາຊັບພະຍາກອນມະນຸດ, ການຄົ້ນຄວ້າວິໄຈ, ດ້ານວິຊາການ ໂດຍສະເພາະແມ່ນການແລກປ່ຽນການຮຽນ-ການສອນ, ແລກປ່ຽນພະນັກງານ ຄູ-ອາຈານ ແລະນັກສຶກສາ ບົນພື້ນຖານການສ້າງຄວາມໄວ້ເນື້ອເຊື່ອໃຈ ແລະ ສ້າງສາຍພົວພັນມິດຕະພາບ ແລະຄວາມຮັບຜິດຊອບໃນການຮ່ວມມືທາງດ້ານວິຊາການ.

ພາຍຫຼັງການລົງນາມຮ່ວມມື ຄະນະແຂກທີ່ເຂົ້າຮ່ວມປະຊຸມ ຍັງໄດ້ເດີນທາງໄປຢ້ຽມຊົມຄະນະວິສະວະກຳສາດ, ຄະນະວິທະຍາສາດປ່າໄມ້, ຄະນະວິທະຍາສາດທຳມະຊາດ ແລະ ຄະນະເສດຖະສາດ ແລະ ບໍຫານທຸລະກິດ ອີກດ້ວຍ.

ໃນຕອນເຊົ້າວັນທີ 7 ພຶດສະພາ 2026 ຜ່ານມານີ້, ຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ (ມຊ). ຈັດກອງປະຊຸມສຳມະນາວິຊາການຂຶ້ນທີ່ຫ້ອງປະຊຸມສະໂມສອນໃຫຍ່ ມຊ. ໂດຍການເປັນປະທ່ານຂອງສະຫາຍ ປອ. ຊາຍຄໍາ ວັນນະໄຊ ຄະນະພັກ ມຊ, ເລຂາຄະນະພັກຮາກຖານ, ຫົວໜ້າຫ້ອງການຫ້ອງການຈັດຕັ້ງ ແລະ ກວດກາ, , ສະຫາຍ ນ ເພັດສະໜອນ ແກ້ວໂສພາ ກຳມະການສູນກາງຊາວໝຸ່ມ ປະຊາຊົນ ປະຕິວັດລາວ, ຮອງເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະກີລາ, ເລຂາຄະນະບໍລິຫານງານຊາວໜຸ່ມ ມຊ, ເຂົ້າຮ່ວມມີບັນດາຄະນະບໍລິຫານງານຊາວໜຸ່ມຮາກຖານ ແລະ ຕົວແທນຊາວໜຸ່ມທົ່ວ ມຊ. ເຂົ້າຮ່ວມ.

ໃນພິທີ ສະຫາຍ ນາງ ເພັດສະໜອນ ແກ້ວໂສພາ ໄດ້ນໍາສະເໜີເນື້ອໃນ ຂອງ 2 ເອກະສານຄື: ແຜນການເຄື່ອນໄຫວວຽກງານຂອງ ຄະນະຊາວໜຸ່ມ ປະຊາຊົນ ປະຕິວັດລາວ ມຊ. ປະຈໍາປີ 2026 ເຊິ່ງວຽກງານຈຸດສຸມໃນປີ2026 ເຊັ່ນ ວຽກງານສຶກສາອົບຮົມການເມືອງ - ແນວຄິດ, ວຽກງານປັບປຸງ ແລະ ກໍ່ສ້າງການຈັດຕັ້ງ, ວຽກງານວິຊາສະເພາະ, ວຽກງານຂະບວນການ, ວຽກງານກວດກາ, ວຽກງານເຍົາວະຊົນ, ວຽກງານການເງິນ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານກອງອາສາສະໜັກ ແລະ ວຽກງານພົວພັນຮ່ວມມື ພາຍໃນ ແລະ ກັບຕ່າງປະເທດ ແລະໄດ້ນໍາສະເໜີເອກະສານ ແຜນພັດທະນາຊາວໜຸ່ມ, ເຍົາວະຊົນ 5 ປີ ຄັ້ງທີ III (2026-2030) ເຊິ່ງປະກອບມີ 4 ພາກຄື: 1 ພາກສະເໜີ, 2 ສະພາບສາກົນ, ພາກພື້ນ ແລະ ພາຍໃນປະເທດເຮົາ, 3 ວິໄສທັດປີ 2040, ຍຸດທະສາດ 2030 ແລະ ແຜນພັດທະນາຊາວໜຸ່ມ-ເຍົາວະຊົນ 5 ປີ ຄັ້ງທີ III ແລະ 4 ການຕິດຕາມ ແລະ ປະເມີນຜົນ. ສຳລັບເປົ້າໝາຍຂອງແຜນພັດທະນາຊາວໜຸ່ມ, ເຍົາວະຊົນ 5 ປີ ຄັ້ງທີ III (2026-2030) ແມ່ນຍົກສູງຄຸນນະພາບທາງດ້ານເນື້ອໃນ, ວິທີການ, ຮູບການປູກຈິດສໍານຶກໃຫ້ຊາວໜຸ່ມ, ເຍົາວະຊົນ; ປັບປຸງການຈັດຕັ້ງ, ກໍ່ສ້າງ ແລະ ຂະຫຍາຍສະມາຊິກຊາວໜຸ່ມ, ເຍົາວະຊົນ ໃຫ້ມີຄວາມໜັກເເໜ້ນ ແລະເຂັ້ມເເຂງ; ປັບປຸງກົດໝາຍວ່າດ້ວຍຄະນະຊາວໜຸ່ມປະຊາຊົນ ປະຕິວັດລາວ ແລະ ບັນດານິຕິກໍາຕ່າງໆ ກ່ຽວກັບວຽກງານຊາວໜຸ່ມ, ເຍົາວະຊົນໃຫ້ສອດຄ່ອງ; ພັດທະນາຄວາມຮູ້, ຄວາມສາມາດດ້ານວິທະຍາສາດ, ເຕັກໂນໂລຊີ, ປັນຍາປະດິດ, ນະວັດຕະກໍາໃໝ່ເຂົ້າໃນວຽກງານສົ່ງເສີມວິຊາຊີບ ແລະ ສ້າງວຽກເຮັດງານທໍາ; ສົ່ງເສີມພອນສະຫວັນ, ທັກສະຂອງຊາວໜຸ່ມ, ເຍົາວະຊົນ ແລະ ອະນຸຊົນ;ປັບປຸງພື້ນຖານໂຄງລ່າງ ຂອງ ຄຊປປລ ເເຕ່ລະຂັ້ນ; ຄົ້ນຄວ້າບຸກຄະລາກອນປະກອບເຂົ້າໃນກົງຈັກຄະນະບໍລິຫານງານສະຫະພັນຊາວໜຸ່ມລາວ ແລະ ສ້າງຕັ້ງ ສະຫະພັນຊາວໜຸ່ມລາວຂັ້ນເເຂວງ; ຫັນເອົາພະນັກງານຊາວໜຸ່ມ ແຕ່ລະຂັ້ນລົງກໍ່ສ້າງຮາກຖານການເມືອງ; ຍົກສູງປະສິດທິພາບຂະບວນການຕະລຸມບອນຂອງຊາວໜຸ່ມເຂົ້າໃນວຽກງານຕ່າງໆ; ປົກປ້ອງສິດຜົນປະໂຫຍດອັນຊອບທໍາຂອງຊາວໜຸ່ມ, ເຍົາວະຊົນ; ເພີ່ມທະວີວຽກງານພົວພັນຮ່ວມມືຕ່າງປະເທດໃຫ້ມີປະສິດທິຜົນ ແລະຍົກສູງບົດບາດການຕິດຕາມ, ກວດກາ ການເຄື່ອນໄຫວວຽກງານຊາວໜຸ່ມແຕ່ລະຂັ້ນ.

ຫຼັງຈາກການນຳສະໜີເອກະສານແລ້ວ ໃນກອງປະຊຸມໄດ້ມີການສົນທະນາແລກປ່ຽນຄໍາຄິດເຫັນເຊິ່ງກັນ ແລະກັນ ເພື່ອຄວາມເຂົ້າໃຈກ່ຽວກັບເອກະສານດັ່ງກ່າວ ພ້ອມນັ້ນກໍໄດ້ມີພິທີມອບ-ຮັບໃບຮັບຮອງເປັນຄະນະຊາວໜຸ່ມຮາກຖານ 4 ບຸກ ປະຈໍາປີ 2025 ໃຫ້ແກ່ 18 ຖາກຮາກທີ່ຂຶ້ນກັບ ມຊ. ຢ່າງສົມກຽດ.