CALOHEA PROJECT: REGIONAL SUBJECT-SPECIFIC QUALIFICATIONS AND ASSESSMENT REFERENCE FRAMEWORKS (TEACHER EDUCATION SUBJECT AREA, SAG)

After a long and collaborative effort in drafting, consulting, and revising, the Regional Subject-Specific Qualifications and Assessment Reference Frameworks was finally finalized. The framework is on of the key mechanisms of the project because it provides insights and key information regarding dimensions, subdimensions and explanation useful for higher education institutions to consider and apply as a guide or reference in developing teacher education programme in their respected institutions. This framework plays a crucial role in upgrading teacher education in the era of digitalization. Navigate and access the link below for detail information of the framework.

Teacher Education RM1 Result

ໂຄງການຄາໂລແຮ (CALOHEA Project): ຂອບວຸດທິການສຶກສາໃນລະດັບພາກພື້ນ ແລະ ການປະເມີນ (ສາຂາການສຶກສາຄູ).

ພາຍຫຼັງໄດ້ມີການຮ່າງຂອບວຸດທິ, ມີການປຶກສາຫາລືກັບນັກວິຊາການ, ຄູສອນ, ຜູ້ຈ້າງງານ ແລະ ນັກສຶກສາຫຼາຍຄັ້ງ ໃນທີ່ສຸດຂອບວຸດທິການສຶກສາດັ່ງກ່າວກໍສຳເລັດ. ຂອບວຸດທິນີ້ແມ່ນກິດຈະກຳໜຶ່ງໃນກິດຈະກຳຫຼັກຂອງໂຄງການ ເນື່ອງຈາກເປັນຂໍ້ມູນທີ່ສຳຄັນກ່ຽວກັບອົງປະກອບຫຼັກ ແລະ ອົງປະກອບຮອງຂອງການສຶກສາຄູເຊິ່ງເປັນປະໂຫຍດຕໍ່ສະ ຖານການສຶກສາຊັ້ນສູງຕ່າງໆ. ຂອບວຸດທິການສຶກສານີ້ຍັງມີບົດບາດສຳຄັນໃນການຊ່ວຍຍົກລະດັບການສຶກສາຄູໃນ ຍຸກດີຈີຕອນ. ທ່ານສາມາດເຂົ້າອ່ານຕາມລິ້ງ: ຂອບວຸດທິການສຶກສາ_Teacher Education RM1_Lao Version

ໃນວັນທີ 5 ເມສາ 2024 ຜ່ານມານີ້, ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມເສີມສ້າງຄວາມເຂັ້ມແຂງການຄຸ້ມຄອງ ແລະການນຳພາໃນດ້ານການເງິນ ຂອງພາກການສຶກສາຊັ້ນສູງໃນອາຊີ (Advancing Strategic Management, Leadership and Fundraising in Higher Education in Asia) ຫຼື ASTRA ແລະ ສູນ Research and Development (R&D) Innovation Center ທີ່ໂຮງແຮມ Crowne Plaza, ໂດຍການເປັນປະທານ ຂອງທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ ແລະທ່ານ Vincent Vire ຫົວໜ້າຫ້ອງການ ການຮ່ວມມືຈາກສະຫະພາບ ອີຍູ, ມີທ່ານຮອງຄະນະບໍດີ, ຫົວໜ້າຫ້ອງການ, ແຂກຖືກເຊີນຈາກພາກສ່ວນທີ່ກ່ຽວຂ້ອງ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

ໃນທີ່ປະຊຸມ ທ່ານ ຮສ. ນາງ ພັນພະສາ ຫຼອມຈັນທະລາ ຫົວໜ້າສູນ Research and Development (R&D) Innovation Center ໄດ້ນຳສະເໜີກ່ຽວກັບໂຄງການ ASTRA ເຊິ່ງໄດ້ເລີ່ມເປີດຢ່າງເປັນທາງການໃນວັນທີ 4 ເມສາ 2023 ຜ່ານມາ, ເຊິ່ງຕັ້ງຢູ່ຄະນະເສດຖະສາດ ແລະບໍລິຫານທຸລະກິດ (ຄສບ) ມຊ ໂດຍມີຈຸດປະສົງ ເພື່ອສະໜັບສະໜູນການດຳເນີນງານຂອງສະຖາບັນການສຶກສາຊັ້ນສູງໃນປະເທດລາວ ແລະ ໄທ ໂດຍການເພີ່ມຂີດຄວາມສາມາດ ຂອງບຸກຄະລາກອນໃນການເຂົ້າເຖິງແຫຼ່ງທຶນ ຜ່ານການໃຊ້ປະໂຫຍດຈາກໂປຣແກຣມການຄົ້ນຄວ້າ ແລະ ພັດທະນາ ທີ່ໄດ້ຮັບທຶນຈາກຜູ້ໃຫ້ທຶນທີ່ກ່ຽວຂ້ອງ ແລະ ຜ່ານການສະໜອງການບໍລິການໃຫ້ຄໍາປຶກສາທີ່ທັນສະໄໝ ແກ່ລູກຄ້າເອກະຊົນ.  ຕະຫຼອດໄຍລະຂອງການຈັດຕັ້ງປະຕິບັດໂຄງການແມ່ນໄດ້ດໍາເນີນການຄົ້ນຄວ້າຢ່າງ​ເລິກເຊິ່ງ ​ແລະ ລົງພາກ​ສະໜາມຕົວຈິງ​ກ່ຽວ​ກັບ​ຄວາມ​ຕ້ອງການສະເພາະຂອງ​ການປົກຄອງ, ຮູບແບບ​ການ​ເງິນ ​ແລະ ​ໂອກາດ​ການ​ລະດົມໃນ​ຂົງ​ເຂດ ICT ​ແລະ ວິທະຍາສາດ​ສັງຄົມ ​ໃນ​ສະພາບ​ແວດ​ລ້ອມ​ການ​ສຶກສາ​ຊັ້ນ​ສູງ​ຂອງ​ປະເທດລາວ ​ແລະ ​ໄທ; ພັດທະນາ ແລະ ວາງແຜນໂປຣແກຣມການເຝິກອົບຮົມແບບປະສົມປະສານ ເພື່ອຮັບປະກັນວ່າ HEIs ແລະ ບຸກຄະລາກອນທີ່ມີຄວາມສາມາດຂອງເຂົາເຈົ້າມີຄວາມພ້ອມທາງດ້ານຄວາມຮູ້, ທັກສະ ແລະ ຊັບພະຍາກອນທີ່ຈໍາເປັນເພື່ອຄຸ້ມຄອງ ແລະຈັດຕັ້ງປະຕິບັດຍຸດທະສາດການລະດົມທຶນ ແລະ ຈັດ​ຕັ້ງ​ໂປຣແກຣມ​ສ້າງ​ຄວາມ​ສາມາດ​ຂະໜາດ​ໃຫຍ່, ​ໂດຍ​ຈະ​ສຸມ​ໃສ່​ການ​ຖ່າຍ​ທອດ​ຄວາມ​ຮູ້ ​ແລະ ຄວາມ​ຊຳນານ​ຈາກ​ບັນດາ​ຜູ້​ຊ່ຽວຊານ EU ​ໃຫ້​ແກ່​ຄູ​ເຝິກ​ຂອງ 4 ມະຫາວິທະຍາ​ໄລ ​ຈາກ​ອາຊີ​ຕາ​ເວັນ​ອອກສຽງ​ໃຕ້ ພ້ອມທັງສ້າງຕັ້ງສູນຄົ້ນຄວ້າ ແລະ ພັດທະນານະວັດຕະກຳໃໝ່ 4 ແຫ່ງ (ໜຶ່ງໃນມະຫາວິທະຍາໄລຈາກປະເທດລາວ ແລະ ໄທ), ຮັບປະກັນການດຳເນີນງານແບບຍືນຍົງ ແລະ ການເຂົ້າເຖິງ​ໂປຣແກຣມທີ່ໄດ້ຮັບທຶນຈາກຜູ້ໃຫ້ທຶນ.

ໂດຍມີການຮ່ວມມືກັບມະຫາວິທະຍາໄລສະຫວັນນະເຂດ, ມະຫາວິທະຍາໄລສົງຂາ (ປະເທດໄທ), ມະຫາວິທະຍາໄລຊຽງໄໝ່ (ປະເທດໄທ) ແລະໄດ້ຮັບການສະໜັບສະໜູນທາງດ້ານວິຊາການຈາກມະຫາວິທະຍາໄລ Degli Studi Firenze (ປະເທດອີຕາລີ); ໄດ້ຮັບການສະໜັບສະໜູນດ້ານ ICT ຈາກມະຫາວິທະຍາໄລບໍລິຫານທຸລະກິດ Athens (ປະເທດເກຼັກ) ພ້ອມນັ້ນກໍໄດ້ຮັບທຶນການສະໜັບສະໜູນຈາກ Symplexis (Greece) ແລະ BK Consult (Germany) ໂດຍພາຍໃຕ້ການຮ່ວມມືໂຄງການ Erasmus+ 

ໃນທີ່ປະຊຸມຜູ້ເຂົ້າຮ່ວມ ໄດ້ຮັບຟັງການເຜີຍແຜ່ໂຄງການ, ການໃຫ້ຄຳປຶກສາ ແລະເຝິກອົບຮົມຂອງສູນ (R&D) Innovation Center ໂດຍທ່ານ ຮສ. ປອ. ວິຣິຍະສັກ ສີສຸພັນທອງ ຈາກ ຄສບ; ຮັບຟັງການບັນຍາຍໃນຫົວຂໍ້ ຜົນກະທົບຂອງໂຄງການ Erasmus+  ຕໍ່ກັບການສ້າງຄວາມເຂັ້ມແຂງຂອງການສຶກສາຊັ້ນສູງຂອງ ສປປ ລາວ ໂດຍທ່ານ ປອ. ສຸບິນ ສີສະຫວັດ ຈາກຫ້ອງການພົວພັນຕ່າງປະເທດ ມຊ ແລະຫົວຂໍ້ເສວະນາກ່ຽວກັບ “ກໍ່ສ້າງການເຊື່ອມໂຍງ” ສູ່ຄວາມເຂັ້ມແຂງໃຫ້ສະຖາບັນການສຶກສາຊັ້ນສູງໂດຍຜ່ານການໃຫ້ບໍລິການດ້ານວິຊາການ ແລະການເຝິກອົບຮົມ ICT ແລະວິທະຍາສາດສັງຄົມ.

ພາບບັນຍາກາດ

ໃນວັນທີ 5 ເມສາ 2024 ຜ່ານມາ, ຄະນະວິທະຍາສາດທຳມະຊາດ (ຄວທ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບຊຸດຮຽນການສຶກສາຫຼັງປະລິນຍາຕີ ປະຈຳຊຸດການສຶກສາ 2022-2024 ທີ່ຄະນະຂອງຕົນ, ໂດຍການເຂົ້າຮ່ວມຂອງທ່ານ ຮສ. ສິນທະວອນ ດາລາວົງ ຮອງອະທິການບໍດີ ມຊ, ທ່ານ ຮສ. ປອ. ແຫຼມທອງ ລັດດາວົງ ຄະນະບໍດີ ຄວທ,  ມີບັນດາແຂກຖືກເຊີນ, ຄູ-ອາຈານ, ພະນັກງານ ແລະນັກສຶກສາເຂົ້າຮ່ວມ.

          ໃນພິທີ, ທ່ານ ນາງ ພູວັນ ສຸກສົມຫວັງ ຫົວໜ້າພະແນກການສຶກສາຫຼັງປະລິນຍາຕີ ຄວທ ໄດ້ຂຶ້ນລາຍງານຫຍໍ້ກ່ຽວກັບການຮຽນ-ການສອນ ແລະຜົນສຳເລັດການສຶກສາ ລະດັບປະລິນຍາໂທວິທະຍາສາດ ປະຈຳຊຸດຮຽນ 2022-2024 ເຊິ່ງທ່ານໄດ້ໃຫ້ຮູ້ວ່າ: ຄວທ ເປີດສອນຫຼັກສູດໃນລະດັບປະລິນຍາໂທ ມາແຕ່ປີ 2007 ເປັນຕົ້ນມາ, ສາຂາທີ່ເປີດການຮຽນ-ການສອນເປັນສາຂາທຳອິດແມ່ນປະລິນຍາໂທ ສາຂາ ຄະນິດສາດ; ໃນປັດຈຸບັນ ຄວທ ມີຫຼັກສູດປະລິນຍາໂທທັງໝົດ 9 ສາຂາ (ຫຼັກສູດແບບທົ່ວໄປ 6 ສາຂາ ແລະ ຫຼັກສູດແບບຄົ້ນຄວ້າ 3 ສາຂາຄື: ສາຂາ ຊີວະວິທະຍາສາດ, ສາຂາ ເຄມີ ແລະຟີຊິກສາດນຳໃຊ້); ມີຫຼັກສູດປະລິນຍາເອກ 2 ສາຂາຄື: ສາຂາ ຟີຊິກນຳໃຊ້ ແລະສາຂາຊີວະວິທະຍາ ແລະມີນັກສຶກສາທັງໝົດ 83 ຄົນ. ໃນນັ້ນ ເປັນນັກສຶກສາໃນລະດັບປະລິນຍາໂທ 79 ຄົນ ຍິງ 17 ຄົນ ແລະນັກສຶກສາປະລິນຍາເອກ 4 ຄົນ. ສຳລັບຊູດສຶກສາ 2022-2024 ມີນັກສຶກສາທີ່ສຳເລັດການສຶກສາທັງໝົດ 31 ຄົນ ຍິງ 10 ຄົນ ຈາກ 5 ສາຂາ ວິຊາຄື: ສາຂາ ຊີວະວິທະຍາ, ວິທະຍາສາດຄອມພີວເຕີ, ຟີຊິກນຳໃຊ້ຮູບແບບຄົ້ນຄວ້າ, ສາຂາ ຊີວະແບບຄົ້ນຄວ້າ, ສາຂາ ເຄມີແບບຄົ້ນຄວ້າ.

          ພ້ອມນັ້ນ, ໃນທີ່ປະຊຸມຍັງໄດ້ມອບປະກາສະນີຍະບັດ ໃຫ້ແກ່ນັກສຶກສາ ຜູ້ສໍາເລັດການສຶກສາ ດັ່ງກ່າວ ໂດຍການມອບຂອງທ່ານ ຮສ. ສິນທະວອນ ດາລາວົງ ແລະພ້ອມທັງມອບໃບຍ້ອງຍໍໃຫ້ແກ່ນັກສຶກສາຜູ້ທີ່ມີຜົນງານດີເດັ່ນຕະຫຼອດຊູດການສຶກສາຜ່ານມາທັງໝົດ 8 ຄົນ ຍິງ 2 ຄົນ.

ພາບບັນຍາກາດ