ເນື່ອງໃນໂອກາດທີ່ ພະນະທ່ານ ໂຈເຊ ຣາໂມສ ອໍຕ້າ ປະທານາທິບໍດີ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ແລະຄະນະ ໄດ້ເດີນທາງມາຢ້ຽມຢາມ ທາງລັດະກິດຢູ່ ສປປ ລາວ. ໃນລະຫວ່າງ ວັນທີ 27 ກຸມພາ ຫາ ວັນທີ 2 ມີນາ 2024; ໃນວັນທີ 1 ມີນາ 2024 ນີ້, ພະນະທ່ານ ໂຈເຊ ຣາໂມສ ອໍຕ້າ ແລະຄະນະໄດ້ຢ້ຽມຢາມ ພະນັກງານ, ຄູ-ອາຈານ, ນັກຮຽນ-ນັກສຶກສາ ມະຫາວິທະຍາໄລແຫ່ງຊາດ(ມຊ), ໂດຍມີ ທ່ານ ຮສ. ປອ ພຸດ ສິມມາລາວົງ, ລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ນາງ ເຂັມມະນີ ພົນເສນາ ລັດຖະມົນຕີ, ຫົວໜ້າຫ້ອງວ່າການປະທານປະເທດ, ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ. ພ້ອມດ້ວຍຄະນະ ທ່ານ ເອກອັກຄະລັດຖະທູດລາວ ປະຈໍາ ຕີມໍ-ເລສເຕ, ຕີມໍ-ເລສເຕ ປະຈຳລາວ, ພ້ອມດ້ວຍພະນັກງານ, ຄູ-ອາຈານ, ນັກຮຽນ-ນັກສຶກສາຮ່ວມຕ້ອນຮັບຢ່າງອົບອຸ່ນ ທີ່ສະໂມສອນ ຄະນະເສດຖະສາດ ແລະບໍລິຫານທຸລະກິດ ມຊ.
ໃນໂອກາດສໍາຄັນນີ້, ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນຕໍ່ພະນະທ່ານ ໂຈເຊ ຣາໂມສ-ອໍຕາ, ປະທານາທະບໍດີ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ, ພ້ອມດ້ວຍຄະນະ ທີ່ມາຢ້ຽມຢາມ ມຊ ຄັ້ງນີ້, ເພື່ອປາຖະກະຖາກ່ຽວກັບການພັດທະນາເສດຖະກິດ-ສັງຄົມ ຢູ່ ຕີມໍ-ເລສເຕ ພ້ອມທັງໄດ້ລາຍງານໂດຍຫຍໍ້ກ່ຽວກັບ ມຊ, ທ່ານກ່າວບາງຕອນວ່າ ມຊ ມີຊື່ຫຍໍ້ວ່າ "ມຊ" ເປັນມະຫາວິທະຍາໄລທີ່ມີການຮຽນ-ການສອນຫຼາຍສາຂາວິຊາ, ເຊິ່ງໄດ້ຮັບການ ສ້າງຕັ້ງຂຶ້ນໃນປີ 1996 ໂດຍການລວມເອົາ 3 ມະຫາວິທະຍາໄລ ແລະ7 ວິທະຍາໄລ ແລະບັນດາສະຖາບັນການສຶກສາຊັ້ນສູງ ເຂົ້າເປັນ ມຊ; ມຊ. ໄດ້ຈັດຕັ້ງການຮຽນ-ການສອນພາຍໃຕ້ການຊີ້ນໍາຂອງກະຊວງສຶກສາທິການ ແລະ ກີລາ ໂດຍການອອກແບບຫຼັກສູດ, ການສະໜອງການສຶກສາ ແລະການບໍລິການວິຊາການໃຫ້ແກ່ສັງຄົມເພື່ອບັນລຸວິໄສທັດໃຫ້ກາຍເປັນສູນກາງການສຶກສາ ແລະການຄົ້ນຄວ້າວິທະຍາສາດ, ທີ່ມີຄຸນະພາບມາດຕະຖານທຽບທັນກັບລະດັບພາກພື້ນ ແລະສາກົນ.
ມຊ. ເປັນສະຖາບັນການສຶກສາຊັ້ນສູງແຫ່ງດຽວໃນ ສປປ ລາວ ທີ່ຖືກຮັບເຂົ້າເປັນສະມາຊິກຂອງເຄືອຂ່າຍມະຫາວິທະຍາໄລອາຊຽນ. ປັດຈຸບັນ, ມຊ. ປະກອບດ້ວຍ 13 ຄະນະວິຊາ ແລະ 2 ສະຖາບັນ ແລະ ມີ 11 ຫ້ອງການ; ມີການຈັດຕັ້ງການຮຽນ-ການສອນລວມທັງໝົດ 239 ສາຂາວິຊາ, ເຊິ່ງມີຫຼັກສູດເລີ່ມແຕ່ລະດັບ ອະນຸປະລິນຍາ, ປະລິນຍາຕີ ເຖິງ ປະລິນຍາເອກ. ໃນສົກສຶກສາ 2023-2024, ມຊ ມີພະນັກງານທັງໝົດ 1,704 ຄົນ ແລະນັກສຶກສາ 19,773 ຄົນ,ໃນນັ້ນມີນັກສຶກສາຕ່າງປະເທດ 800 ກວ່າຄົນ.
ມຊ.ໃຫ້ບຸລິມະສິດການຮ່ວມມືດ້ານວິຊາການກັບຕ່າງປະເທດເປັນໜຶ່ງໃນຍຸດທະສາດ ເພື່ອຍົກສູງຄຸນນະພາບການສະໜອງການສຶກສາ ແລະ ຜົນໄດ້ຮັບການຮຽນຮູ້ຂອງນັກສຶກສາ. ມາຮອດປັດຈຸບັນ, ມຊ ໄດ້ສ້າງການພົວພັນຮ່ວມມືດ້ານວິຊາການ 300 ກວ່າ ສະຖາບັນການສຶກສາຊັ້ນສູງ ໃນ 32 ປະເທດທົ່ວໂລກ; ໂດຍສະເພາະແມ່ນໃນຂົງເຂດອາຊີ ແລະເອີຣົບ. ການຮ່ວມມືຕ່າງປະເທດຂອງ ມຊ. ແມ່ນເນັ້ນໃສ່ 5 ຂົງເຂດຄື: ການແລກປ່ຽນນັກສຶກສາ ແລະອາຈານ, ການຮ່ວມມືຄົ້ນຄວ້າວິທະຍາສາດ, ແລກປ່ຽນສື່ສິ່ງພິມທາງວິຊາການ, ສົ່ງເສີມກິດຈະກໍາແລກປ່ຽນວິຊາການ ແລະວັດທະນະທຳ ແລະຊ່ວຍເຫຼືອດ້ານທຶນສຶກສາເພື່ອພັດທະນາຊັບພະຍາກອນມະນຸດ.
ໃນວັນດຽວກັນ, ພະນະທ່ານ ໂຈເຊ ຣາໂມສ ອໍຕ້າ ປະທານາທິບໍດີ ພ້ອມຄະນະ ຍັງໄດ້ຢ້ຽມຢາມ ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ແລະໄດ້ຢ້ຽມຢາມ ດ່ານສາກົນສິນຄ້າ ທ່າບົກ-ທ່ານາແລ້ງ ແລະ ເຂດໂລຈິສຕິກ ນະຄອນຫຼວງວຽງຈັນ ຕື່ມອີກ.