ສະຖາບັນຂົງຈື ມະຫາວິທະຍາໄລແຫ່ງຊາດ ແລະ ມະຫາວິທະຍາໄລຊົນເຜົ່າກວາງຊີ ສປ ຈີນ ແລກປ່ຽນວັດທະນະທຳ ລາວ-ຈີນ ສະຫລອງ ຄົບຮອບ 10 ປີ.
ເພື່ອສ້າງຂະບວນການສະຫລອງວັນສ້າງຕັ້ງສະຖາບັນຂົງຈືໂລກ ຄົບຮອບ 10 ປີ ໃນຕອນຄໍ່າວັນທີ 25 ຕຸລາ 2014 ນີ້, ສະຖາບັນຂົງຈື ມຊ ໄດ້ຈັດງານສະແດງສິລະປະແລກປ່ຽນວັດທະນະທຳ ລະຫວ່າງ ສະຖາບັນຂົງຈື ມະຫາວິທະຍາໄລແຫ່ງຊາດ ແລະ ມະຫາວິທະຍາໄລຊົນເຜົ່າກວາງຊີ ສປ.ຈີນ ຂຶ້ນທີ່ສະໂມສອນໃຫຍ່ ມຊ, ໂດຍການເຂົ້າຮ່ວມເປັນປະທານຂອງ ທ່ານ ສຈ.ດຣ ສຸກກົງແສງ ໄຊຍະເລີດ ອະທິການບໍດີ ມຊ ພ້ອມດ້ວຍຄະນະນຳ ມຊ, ທ່ານ ສຈ.ດຣ ບາງກວາງເຮີ ຮອງຄະນະບໍດີ ຄະນະວັດທະນະທຳການສຶກສາສາກົນ ມະຫາວິທະຍາໄລສ້າງຄູກວາງຊີ, ມີບັນດາທ່ານຄະນະບໍດີ, ຫົວໜ້າ ຫ້ອງການ, ຫົວໜ້າພະແນກ ແລະຜູ້ອຳນວຍການສະຖາບັນຕ່າງໆ ເຂົ້າຮ່ວມຢ່າງຫຼວງຫຼາຍ.
ໂອກາດນີ້, ທ່ານ ສຈ.ດຣ ບາງກວາງເຮີ ກ່າວວ່າ: ສະຖາບັນຂົງຈືແຫ່ງທຳອິດແມ່ນໄດ້ສະຖາປະນາຂຶ້ນໃນວັນທີ 21 ພະຈິກ 2004 ທີ່ນະຄອນໂຊລ ເກົາຫຼີ ແລະມາຮອດເດືອນ ກັນຍາ 2014 ຫ້ອງການສົ່ງເສີມພາສາຈີນແຫ່ງຊາດຈີນ ກໍໄດ້ຮ່ວມມືກັບ 122 ປະເທດໃນທົ່ວໂລກ ແລະເປີດສະຖາບັນຂົງຈື ຈຳນວນ 457 ແຫ່ງ ແລະຫ້ອງຮຽນພາສາຈີນ ຈຳນວນ 707 ຫ້ອງ. ໃນ 10 ປີຜ່ານມາ ສະຖາບັນຂົງຈືແມ່ນໄດ້ກໍ່ສ້າງຂຶ້ນຢ່າງໄວວາ ແລະໄດ້ກາຍເປັນສະຖາບັນທີ່ຮຽນພາສາຈີນ ແລະຮຽນຮູ້ວັດທະນະທຳຈີນ ໃຫ້ແກ່ປະຊາຊົນປະເທດຕ່າງໆ ໃນທົ່ວໂລກ ເປັນເວທີແລກປ່ຽນວັດທະນະທຳ ລະຫວ່າງ ຈີນ ກັບຕ່າງປະເທດ ແລະຂົວຕໍ່ໃນການເພີ່ມທະວີ ມິດຕະພາບ ແລະການຮ່ວມມື ລະຫວ່າງປະຊາຊົນຈີນ ກັບຕ່າງປະເທດໃນທົ່ວໂລກ.
ທ່ານ ສຈ.ດຣ ບາງກວາງເຮີ ກ່າວຕື່ມວ່າ: ໃນການສະເຫຼີມສະຫລອງສະຖາບັນຂົງຈື ຄົບຮອບ 10 ປີ ໃນຄັ້ງນີ້ ສຳນັກງານໃຫຍ່ສະຖາບັນຂົງຈື ແຫ່ງ ສປ. ຈີນ ກໍ່ໄດ້ຈັດຕັ້ງຄະນະສິລະປະ 30 ຄະນະ ໄປສະແດງສິລະປະໃນຮູບການເຄື່ອນທີ່ຢູ່ສະຖາບັນຂົງຈືໃນທົ່ວໂລກ ໂດຍສະເພາະຢູ່ທີ່ ສປປ ລາວ. ລາຍການສະແດງປະກອບມີ ຟ້ອນລຳ, ຮ້ອງເພງ, ເສບດົນຕີທີ່ມີສີສັນວັດທະນະທຳຈີນ ແບບດັ້ງເດີມ ແລະສີສັນຊົນເຜົ່າຂອງກວາງຊີ ເພື່ອສະເຫຼີມສະຫລອງວັນທີ່ມີຄວາມໜາຍທາງປະຫວັດສາດດັ່ງກ່າວ.