ຄະນະກຳມະການກອງທຶນ ນັກສຶກສາ ມຊ ສຳພາດນັກສຶກສາຜູ້ທີ່ສະໝັກເອົາທຶນການສຶກສາໃນສົກຮຽນ 2018-2019
ຕອນເຊົ້າວັນທີ 23 ຕຸລາ 2018 ນີ້, ຄະນະກຳມະການກອງທຶນຫ້ອງການຄຸ້ມຄອງນັກສຶກສາ ຮ່ວມກັບ 3 ອົງການຈັດຕັ້ງ ມຊ ໄດ້ຈັດຕັ້ງການສຳພາດນັກສຶກສາເພື່ອຮັບທຶນການສຶກສາ ຈາກມູນນິທິຕ່າງໆ ຂຶ້ນທີຫ້ອງປະຊຸມຂອງຫ້ອງການຕົນ.
ການສຳພາດໃນຄັ້ງນີ້ ມີນັກສຶກສາປີທີ 2 ຈາກຄະນະວິຊາຕ່າງໆທົ່ວ ມຊ, ເຊິ່ງມີຜູ້ຍື່ນໃບສະໝັກເຂົ້າສຳພາດ 200 ກວ່າຄົນ; ໃນນັ້ນ ທຶນຂອງບໍລິສັດເບຍລາວ ແມ່ນໃຫ້ 50 ທຶນ, ທຶນຢາມາດະ(Yamada)ໃຫ້ 4 ທຶນ, ທະນາຄານໂລກ(Wccc) ໃຫ້ 8 ທຶນ ລວມທັງໝົດມີ 62 ທຶນ. ເງື່ອນໄຂຜູ້ທີ່ຈະໄດ້ຮັບທຶນ ຕ້ອງແມ່ນຜູ້ທີມີຄຸນສົມບັດດີ, ມີຄະແນນສະເລ່ຍ ໃນຊັ້ນຮຽນປີທີ 1 ຕາມຄະນະທີ່ນັກສຶກສາໄດ້ຮຽນ ຢູ່ ມະຫາວິທະຍາໄລແຫ່ງຊາດ 2,00 ຂຶ້ນໄປ, ມາຈາກຕ່າງແຂວງເຂດຫ່າງໄກສອກຫຼີກ, ຄອບຄົວທຸກຍາກຂາດເຂີນ ແລະຜູ້ທີເປັນລູກກຳພ້າ-ກໍາພອຍເປັນຕົ້ນ.
ສ່ວນຂັ້ນຕອນຂອງການຄັດເລືອກແມ່ນຄັດເລືອກເອກະສານ ແລະສຳພາດແຕ່ລະບຸກຄົນ ຫຼັງຈາກນັ້ນກໍຈັດພິທີປະກາດຜົນ, ຄາດວ່າຈະຈັດພິທີປະກາດຜົນໃນເດືອນ ພະຈິກ 2018 ນີ້.