nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ພິທີພົບປະ-ໂອ້ລົມຂອງສະຫາຍ ເລຂາພັກມະຫາວິທະຍາໄລແຫ່ງຊາດຕໍ່ຄະນະນຳ, ສະມາຊິກ 3 ອົງການຈັດຕັ້ງມະຫາຊົນ ແລະເຍົາວະຊົນ ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 62 ປີ (22 ມີນາ 1955 ຫາ 22 ມີນາ 2017)

IMG 2287

           ໃນຕອນບ່າຍ ວັນທີ 16 ມີນາ 2017, ຄະນະບໍລິຫານງານ 3 ອົງການຈັດຕັ້ງມະຫາຊົນ (ຊາວໜຸ່ມ, ກຳມະບານ, ແມ່ຍິງ) ຂອງ ມະຫາວິທະຍາໄລແຫ່ງຊາດ ໄດ້ຈັດພິທີ ພົບປະ-ໂອ້ລົມສະຫາຍ ເລຂາພັກມະຫາວິທະຍາໄລແຫ່ງຊາດຕໍ່ຄະນະນຳ, ສະມາຊິກ 3 ອົງການຈັດຕັ້ງມະຫາຊົນ ແລະເຍົາວະຊົນ ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 62 ປີ (22 ມີນາ 1955 ຫາ 22 ມີນາ 2017) ໂດຍເປັນກຽດເຂົ້າຮ່ວມຂອງສະຫາຍ ສຈ. ປອ. ສົມສີ ຍໍພັນໄຊ ຄະນະປະຈຳພັກກະຊວງສຶກສາທິການ ແລະກີລາ, ເລຂາຄະນະພັກມະຫາວິທະຍາໄລແຫ່ງຊາດ, ວ່າການອະທິການບໍດີ ມະຫາວິທະຍາໄລແຫ່ງຊາດ, ພ້ອມດ້ວຍ ຄະນະບໍລິຫານງານ, ສະມາຊິກ 3 ອົງການຈັດຕັ້ງມະຫາຊົນ (ຊາວໜຸ່ມ, ກໍາມະບານ, ແມ່ຍິງ) ແລະນ້ອງນ້ອຍເຍົາວະຊົນ ຈາກໂຮງຮຽນປະຖົມສົມບູນສາທິດ, ມັດທະຍົມສົມບູນສາທິດ ກໍ່ເຂົ້າຮ່ວມ.

          ໃນການຈັດ ພິທີພົບປະ-ໂອ້ລົມ ຄັ້ງນີ້ກໍໍແມ່ນເພື່ອໃຫ້ຄະນະນຳ, ສະມາຊິກຂອງ 3 ອົງການຈັດຕັ້ງມະຫາຊົນ​ (ຊາວໜຸ່ມ, ແມ່ຍິງ, ກໍາມະບານ) ແລະເຍົາວະຊົນ ມະຫາວິທະຍາໄລແຫ່ງຊາດ ກຳໄດ້ມູນເຊື້ອອັນອົງອາດກ້າຫານ ແລະຄວາມສະຫຼາດສ່ອງໃສຂອງສະມາຊິກພັກກໍ່ຄື ພັກປະຊາຊົນປະຕິວັດລາວ ໃນພາລະກິດປົດປ່ອຍປະເທດຊາດ ແລະພາລະກິດປົກປັກຮັກສາ ແລະສ້າງສາພັດທະນາປະເທດຊາດໃນໄລຍະໃໝ່ເວົ້າລວມ ເວົ້າສະເພາະແມ່ນການຊີ້ນຳໆພາຂອງພັກ ຕໍ່ 3 ອົງການຈັດຕັ້ງ ມະຫາຊົນຂອງມະຫາວິທະຍາໄລແຫ່ງຊາດໃນໄລຍະຜ່ານມາ, ພ້ອມທັງເປັນການສ້າງຂະບວນການຂໍ່ານັບຮັບຕ້ອນວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 62 ປີ.

          ໃນໂອກາດນີ້ ສະຫາຍ ສຈ. ປອ. ສົມສີ ຍໍພັນໄຊ ຄະນະປະຈຳພັກກະຊວງສຶກສາທິການ ແລະກີລາ, ເລຂາຄະນະພັກມະຫາວິທະຍາໄລແຫ່ງຊາດ, ວ່າການອະທິການບໍດີ ມະຫາວິທະຍາໄລແຫ່ງຊາດ ກໍໄດ້ໃຫ້ກຽດຂຶ້ນບັນຍາຍເລົ່າຄືນມູເຊື້້ອ ການສ້າງຕັ້ງພັກປະຊາຊົນປະຕິວັດລາວ ເຊິ່ງມີເນື້ອໃນບາງຕອນວ່າ: ພາຍຫຼັງກອງປະຊຸມໃຫ່ຍຄັ້ງທີ II ຂອງພັກກອມມູນິດອິນດູຈີນໄດ້ໄຂຂຶ້ນໃນປີ 1951 ໄດ້ມີມະຕິຕົກລົງໃຫ້ແຕ່ລະປະເທດສ້າງຕັ້ງພັກຂອງໃຜມັນຂຶ້ນ. ສະນັ້ນ, ບັນດາສະຫາຍພັກກອມມູນິດອິນດູຈີນທີ່ເປັນຄົນລາວໄດ້ຈັດຕັ້ງ “ຄະນະກຳມະການປະຊາຊົນລາວ” ຂຶ້ນເພື່ອສືບຕໍ່ນຳພາການປະຕິວັດຢູ່ລາວ ແລະໄດ້ກະກຽມຄວາມພ້ອມດ້ານຕ່າງໆຢ່າງລະອຽດເປັນເວລາ 4 ປີ ຈິ່ງໄດ້ດຳເນີນກອງປະຊຸມຄັ້ງທຳອິດ (ຄັ້ງທີ I ) ຂອງຕົນຂຶ້ນໃນວັນທີ 22 ມີນາ 1955 ທີ່ບ້ານນາແມວ, ເມືອງ ວຽງໄຊ, ແຂວງຫົວພັນ ເຊິ່ງເປັນເຂດທີ່ໝັ້ນຂອງການປະຕິວັດລາວໃນເວລານັ້ນ ແລະໄດ້ເອີນຊື່ວ່າ “ພັກປະຊາຊົນລາວ” ໂດຍແມ່ນທ່ານປະທານ ໄກສອນ ພົມວິຫານ ເປັນເລຂາທິການຄະນະບໍລິຫານສູນກາງພັກ ເຂົ້າຮ່ວມປະຊຸມຄັ້ງປະຫວັດສາດນີ້ມີຜູ້ແທນສົມບູນ 20 ສະຫາຍ ຕາງໜ້າໃຫ້ສະມາຊິກພັກເກືອບ 400 ສະຫາຍໃນທົ່ວປະເທດ. ຕະຫຼອດໄລຍະເວລາ 60 ກວ່າປີ ແຫ່ງການນຳພາ ພັກເຮົາໄດ້ແບກຫາບພາລະກິດປະຫວັດສາດອັນຍິ່ງໃຫຍ່ໃນແຕ່ລະໄລຍະທີ່ແຕກຕ່າງກັນ ແລະສາມາດປະຕິບັດພາລະກິດປະຫວັດສາດເຫຼົ່ານັ້ນໄດ້ຢ່າງສະຫງ່າງາມ, ໃນຊຸມປີຕໍ່ໜ້າພັກເຮົາຍິ່ງມີຄວາມຮັບຜິດຊອບໃນການນຳພາປວງຊົນລາວທັງຊາດ ປົກປັກຮັກສາປະເທດຊາດໄວ້ໃຫ້ໝັ້ນຄົງ, ນຳພາສ້າງສາພັດທະນາປະເທດຊາດໃຫ້ຫຼຸດພົ້ນອອກຈາກຄວາມທຸກຍາກ ແລະສະຖານະພາບປະເທດດ້ວຍພັດທະນາຕາມແຜນທີ່ກຳນົດໄວ້, ກາຍເປັນປະເທດພັດທະນາ ແລະກ້າວສູ່ສັງຄົມນິຍົມ.

          ນອກນັ້ນ, ໃນທ້າຍພິທີ ທ່ານ ຮສ. ປອ. ອານຸລົມ ວິໄລພອນ ປະທານສະຫະພັນກຳມະບານ ມະຫາວິທະຍາໄລແຫ່ງຊາດ ວ່າການຄະນະບໍດີ ຄະນະວິທະຍາສາດການກີລາ ໄດ້ຕາງໜ້າໃຫ້ແກ່ 3 ອົງການຈັດຕັ້ງມະຫາຊົນ (ຊາວໜຸ່ມ, ແມ່ຍິງ, ກຳມະບານ) ຂຶ້ນກ່າວຄຳອວຍພອນ ແລະມອບກະດອກໄມ້ແກ່ ສະຫາຍ ສຈ. ປອ. ສົມສີ ຍໍພັນໄຊ ຄະນະປະຈຳພັກກະຊວງສຶກສາທິການ ແລະກີລາ, ເລຂາຄະນະພັກມະຫາວິທະຍາໄລແຫ່ງຊາດ, ວ່າການອະທິການບໍດີ ມະຫາວິທະຍາໄລແຫ່ງຊາດ ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວຄົບຮອບ 62 ປີ.

ພາບບັນຍາກາດ

You are here: Home ຂ່າວ ພິທີພົບປະ-ໂອ້ລົມຂອງສະຫາຍ ເລຂາພັກມະຫາວິທະຍາໄລແຫ່ງຊາດຕໍ່ຄະນະນຳ, ສະມາຊິກ 3 ອົງການຈັດຕັ້ງມະຫາຊົນ ແລະເຍົາວະຊົນ ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 62 ປີ (22 ມີນາ 1955 ຫາ 22 ມີນາ 2017)