nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ສະຫຼຸບຜົນງານການເຄື່ອນໄຫວວຽກງານລະຫວ່າງ 4 ສ່ຽວຂອງຄະນະບໍລິຫານງານຊາວໜຸ່ມ ຄສວ,ເມືອງເຟືອງ, ເມືອງ ກາສີ ແລະເມືອງ ວັງວຽງ ໃນໄລຍະປີ 2016

1489549309 tmp IMG 2038

           ໃນຕອນບ່າຍ ວັນທີ 10 ມີນາ 2017, ຄະນະຊາວໜຸ່ມຮາກຖານ ຄະນະວິທະຍາສາດສິ່ງແວດລ້ອມ ໄດ້ຈັດກອງປະຊຸມສຳມະນາ ສະຫຼຸບການເຄື່ອນໄຫວວຽກງານລະຫວ່າງ 4 ສ່ຽວຂອງຄະນະບໍລິຫານງານຊາວໜຸ່ມ ຄສວ, ເມືອງເຟືອງ, ເມືອງ ກາສີ ແລະເມືອງ ວັງວຽງ ໃນໄລຍະປີ 2016, ໂດຍເປັນກຽດເຂົ້າຮ່ວມຂອງສະຫາຍ ປອ. ສຳລານ ພັນຄະວົງ ຄະນະເລຂາສູນກາງ ຊາວໜຸ່ມປະຊາຊົນປະຕິວັດລາວ, ເລຂາຊາວໜຸ່ມກະຊວງສຶກສາທິການ ແລະກິລາ, ສະຫາຍ ຄຳສົດ ເພັດລາວັນ ຄະນະບໍລິຫານງານພັກແຂວງ, ເລຂາພັກເມືອງ ເຈົ້າເມືອງ ເມືອງກາສີ, ສະຫາຍ ຮສ. ແກ່ນຈັນ ສິນສຳພັນ ຄະນະບໍດີ ຄະນະວິທະຍາສາດສິ່ງແວດລ້ອມ ພ້ອມດ້ວຍເລຂາຊາວໜຸ່ມ ມະຫາວິທະຍາໄລແຫ່ງຊາດ, ເມືອງ ເຟືອງ, ເມືອງກາສີ ແລະເມືອງ ວັງວຽງ, ແຂກທີ່ຖືກເຊີນ, ພະນັກງານ-ຄູອາຈານ ແລະນັກສຶກສາເຂົ້າຮ່ວມ.

          ຈຸດປະສົງຂອງພິທີດັ່ງກ່າວແມ່ນເພື່ອເປັນການສະຫຼຸບວຽກງານ ແລະຖອດຖອນບົດຮຽນຂອງຊາວໜຸ່ມແຮກສ່ຽວ 4 ພາກສ່ວນໃນໄລຍະ 1 ປີຜ່ານມາ, ເພື່ອເປັນການພົບປະສັງສັນຂອງຊາວໜຸ່ມ 4 ພາກສ່ວນ, ເປັນການວາງທິດທາງແຜນການຮ່ວມມືການຈັດຕັ້ງປະຕິບັດໃນປີຕໍ່ໄປ.

          ໃນໂອກາດນີ້, ສະຫາຍ ນາງ ເພັດສະໜອນ ແກ້ວໂສພາ ເລຂາຊາວໜຸ່ມຄະນະວິທະຍາສາດສິ່ງແວດລ້ອມ ກໍໄດ້ຂຶ້ນອ່ານບົດສະຫຼຸບຖອດຖອນບົດຮຽນໃນໄລຍະ 1 ປີຂອງການແຮກສ່ຽວທີ່ຜ່ານມາວ່າ: ຄະນະບໍລິຫານຊາວໜຸ່ມ ຄະນະ ຄະນະວິທະຍາສາດສິ່ງແວດລ້ອມໄດ້ມີການຮ່ວມມືແຮກສ່ຽວກັບ ຄະນະບໍລິຫານງານຊາວໜຸ່ມເມືອງເຟືອງໃນປີ 2006 ແລະໄດ້ມີການເຮັດບົດບັນທຶກຊ່ວຍຈໍາຮ່ວມກັນລະຫວ່າງ 2 ພາກສ່ວນ ພ້ອມທັງມີການພົວພັນ, ຮ່ວມມືກັນໃນການຊ່ວຍເຫຼືອສັງຄົມ, ຕົກມາປີ 2014 ຄະນະບໍລິຫານງານຊາວໜຸ່ມເມືອງເຟືອງ ໄດ້ເປັນເຈົ້າພາບໃນການຈັດກອງປະຊຸມສັນຈອນຄັ້ງທີ່ 1 ແລະໄດ້ຮັບເອົາຄະນະບໍລິຫານງານຊາວໜຸ່ມເມືອງ ກາສີ ແລະເມືອງ ວັງວຽງ ເຂົ້າມາເປັນສ່ຽວ, ຫຼັງຈາກນັ້ນຈຶ່ງກາຍມາເປັນ ຊາວໜຸ່ມແຮກສ່ຽວ 4 ພາກສ່ວນ. ສຳລັບຂະບວນການຮ່ວມມືຂອງ ຄະນະບໍລິຫານງານຊາວໜຸ່ມ 4 ພາກສ່ວນໃນປີ 2016 ໄດ້ຈັດກອງປະຊຸມປຶກສາຫາລືແລກປ່ຽນ ວິຊາການ ແລະວຽກງານຊາວໜຸ່ມ, ຮ່ວມກັນປູກຕົ້ນໄມ້ ຈຳນວນ 40 ຕົ້ນທີ່ເດີນຄະນະວິທະຍາສາດສິ່ງແວດລ້ອມ, ຈັດການແຂ່ງຂັນກິລາກິລາມິດຕະພາບເປຕັງ 1 ຄັ້ງ ແລະຮ່ວມກັນສ້າງໂຮງຮຽນປະຖົມບ້ານຄອນເລືອງ ເມືອງ ເຟືອງ, ແຂວງ ວຽງຈັນ (ປັດຈຸບັນແມ່ນກໍ່ສ້າງສໍາເລັດແລ້ວ ແລະເປີດນຳໃຊ້ໃນວັນທີ 26 ທັນວາ 2016 ທີ່ຜ່ານມາ). ໃນຂະນະດຽວກັນ ໃນພິທີຍັງໄດ້ມີການມອບໃບຍ້ອງຍໍໃຫ້ແກ່ສະມາຊິກຊາວໜຸ່ມ ຜູ້ທີ່ມີຜົນງານດີເດັ່ນໃນການເຂົ້າຮ່ວມການເຄື່ອນໄຫວວຽກງານການຮ່ວມມືຮອບດ້ານຂອງ ຄຊປປລ 4 ພາກສ່ວນ ຄັ້ງ III ຈຳນວນ 25 ສະຫາຍ (ຍິງ 7 ສະຫາຍ).

ພາບບັນຍາກາດ

You are here: Home ຂ່າວ ສະຫຼຸບຜົນງານການເຄື່ອນໄຫວວຽກງານລະຫວ່າງ 4 ສ່ຽວຂອງຄະນະບໍລິຫານງານຊາວໜຸ່ມ ຄສວ,ເມືອງເຟືອງ, ເມືອງ ກາສີ ແລະເມືອງ ວັງວຽງ ໃນໄລຍະປີ 2016