nuol.edu.la



ມຊ ຈັດກອງປະຊຸມ ເສີມສ້າງຄວາມຮູ້ວຽກງານກໍ່ສ້າງພັກ-ກໍ່ສ້າງພະນັກງານ

 

ເມື່ອວັນທີ 25 ກັນຍາ 2017 ທີ່ຜ່ານມາ, ມະຫາວິທະຍາໄລແຫ່ງຊາດ ໄດ້ຈັດກອງປະຊຸມເຝິກອົບຮົມວຽກງານພັກ ປະຈຳປີ 2017 ຂຶ້ນທີ່ຫ້ອງປະຊຸມສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການໃຫ້ກຽດເປັນວິທະຍາກອນ ຂອງ ສະຫາຍ ສູນທອນ ຈິດປັນຍາ ຄະນະພັກ ຫົວໜ້າກົມກໍ່ສ້າງພັກຈັດຕັ້ງສູນກາງ, ມີສະຫາຍ ສຈ. ປອ. ສົມສີ ຍໍພັນໄຊ ຄະນະປະຈຳພັກ ກະຊວງສຶກສາທິການ ແລະກີລາ, ເລຂາຄະນະພັກ, ວ່າການອະທິການບໍດີ ມະຫາວິທະຍາໄລແຫ່ງຊາດ, ມີສະຫາຍ ຮສ. ປອ. ພຸດ ສິມມາລາວົງ ຮອງເລຂາຄະນະພັກ, ຮອງອະທິການບໍດີ, ມີບັນດາສະຫາຍຄະນະພັກ ມະຫາວິທະຍາໄລແຫ່ງຊາດ, ບັນດາສະຫາຍສະມາຊິກພັກ ທີ່ເປັນການນໍາ, ພະນັກງານຫຼັກແຫຼ່ງຈາກ 13 ຮາກຖານຈຳນວນ 180 ສະຫາຍ ເຂົ້າຮ່ວມ.

 

ໂອກາດດັ່ງກ່າວ, ສະຫາຍ ສູນທອນ ຈິດປັນຍາ ໄດ້ກ່າວເຖິງຄວາມໝາຍຄວາມສຳຄັນຂອງການຍົກສູງຄຸນະພາບຂອງສະມາຊິກພັກ, ແມ່ນເພື່ອປົກປັກຮັກສາ ສະຖານະນາມ ແລະບົດບາດຂອງສະມາຊິກພັກ, ເຮັດໃຫ້ສະມາຊິກພັກແຕ່ລະສະຫາຍເປັນແກນນຳໃນລະບົບການເມືອງຢ່າງແທ້ຈິງ; ການປັບປຸງຄຸນະພາບຂອງສະມາຊິກພັກ ແມ່ນເພື່ອກໍ່ສ້າງບຸກຄົນໃນຖັນແຖວສະມາຊິກພັກໃຫ້ໜັກແໜ້ນ-ເຂັ້ມແຂງທາງດ້ານການເມືອງແນວຄິດ, ການຈັດຕັ້ງ ແລະແບບແຜນນຳພາທີ່ຖືກຕ້ອງ ອັນນີ້ ແມ່ນເນື້ອໃນຕົ້ນຕໍວຽກງານການກໍ່ສ້າງພັກ, ພ້ອມທັງເຮັດໃຫ້ຄຸນະພາບຂອງສະມາຊິກພັກ ນັບມື້ນັບສູງຂຶ້ນ, ມະຫາຊົນຈຶ່ງມີຄວາມເຊື່ອໝັ້ນ ແລະສະໜັບສະໜູນພັກ; ການປັບປຸງຄຸນະພາບຂອງຖັນແຖວສະມາຊິກພັກແມ່ນແນໃສ່ຮັບປະກັນເຮັດສໍາເລັດໜ້າທີ່ການເມືອງ ແລະວຽກງານທີ່ໄດ້ຮັບມອບໝາຍໃຫ້ມີປະສິດທິຜົນສູງ, ທັງຮັບປະກັນໃຫ້ ພາຍໃນພັກມີຄວາມເຂັ້ມແຂງຄືດັ່ງ ປະທານ ຄຳໄຕ ສີພັນດອນ ໄດ້ກ່າວວ່າ: “ພັກເຂັ້ມແຂງກໍເນື່ອງມາຈາກໜ່ວຍພັກແຂງ, ໜ່ວຍພັກແຂງກໍເນື່ອງມາຈາກຖັນແຖວສະມາຊິກພັກເຂັ້ມແຂງ”.

 

ນອກຈາກນັ້ນ ສະພາບການຂະຫຍາຍຕົວຂອງພັກໃນໄລຍະຜ່ານມາເຫັນວ່າ ມີການເຕີບໃຫຍ່ຂະຫຍາຍຕົວພໍສົມຄວນ; ການເພີ່ມຂຶ້ນຂອງສະມາຊິກພັກ ແມ່ນເພີ່ມກຳລັງແຮງຂອງພັກ, ເຮັດໃຫ້ການຈັດຕັ້ງພັກມີຄວາມປອດໃສ, ເຂັ້ມແຂງ, ໜັກແໜ້ນ ຕາມສະຖິຕິ 6 ເດືອນຕົ້ນປີ 2017, ຈຳນວນສະມາຊິກພັກໃນທົ່ວປະເທດມີທັງໝົດ 296,098 ສະຫາຍ, ຍິງ 69,029 ສະຫາຍ, ໃນຈຳນວນສະມາຊິກພັກທຸກສະຫາຍແມ່ນໄດ້ແຈກຢາຍໃນທຸກຂົງເຂດວຽກງານແຕ່ສູນກາງ ຈົນຮອດທ້ອງຖິ່ນ ແລະໄດ້ບັນຈຸຢູ່ໃນ 18,511 ຮາກຖານພັກ ແລະໃນເງື່ອນໄຂແມ່ນໄດ້ເປີດກວ້າງການພົວພັນຮ່ວມເຊື່ອມໂຍງກັບ ພາກພື້ນ ແລະສາກົນ ເພື່ອພັດທະນາປະເທດຊາດ ໂດຍສະເພາະການຮ່ວມມືດ້ານເສດຖະກິດ-ການຕະຫຼາດ ເຮັດໃຫ້ສະມາຊິກພັກຈຳນວນໜຶ່ງທີ່ເຄື່ອນໄຫວເຮັດຜິດລະບຽບກົດໝາຍໃນແຕ່ລະປີ ໂດຍອີງຕາມຈຳນວນຕົວເລກປີ 2017 ມີຜູ້ຖືກວິໄນທັງໝົດ 201 ສະຫາຍ, ຍິງ 31 ສະຫາຍ. ສຳລັບກອງປະຊຸມດັ່ງກ່າວີນີ້ ແມ່ນໄດ້ດຳເນີນເປັນເວລາ 3 ວັນ (ວັນທີ 25-27 ກັນຍາ 2017), ເຊິ່ງຜູ້ເຂົ້າຮ່ວມໄດ້ຮັບຟັງການເຜີຍແຜ່ວຽກງານກໍ່ສ້າງພັກ-ກໍ່ສ້າງພະນັກງານ, ແບບແຜນວິທີເຮັດວຽກຂອງຄະນະພັກ ກະຊວງສຶກສາທິການ ແລະກີລາ, ວຽກງານຂະຫຍາຍພັກ, ການຍົກຍ້າຍ ແລະການຮ່ວມຊີວິດພັກ.

 

 

ພາບບັນຍາກາດ

 

 

 

 

 

 

 

You are here: Home ຂ່າວ ມຊ ຈັດກອງປະຊຸມ ເສີມສ້າງຄວາມຮູ້ວຽກງານກໍ່ສ້າງພັກ-ກໍ່ສ້າງພະນັກງານ