nuol.edu.la



ມະຫາວິທະຍາໄລແຫ່ງຊາດ ຈັດພິທີປາຖະກະຖາວັນສ້າງຕັ້ງສະຫະພັນນັກຮົບເກົ່າຄົບຮອບ 15 ປີ

1505372352 tmp IMG 0188

ໃນຕອນເຊົ້າວັນ 8 ກັນຍາ 2017ນີ້, ມະຫາວິທະຍາໄລແຫ່ງຊາດ ໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນນັກຮົບເກົ່າຂຶ້ນ ທີ່ຫ້ອງປະຊຸມສະໂມສອນໃຫຍ່ມະຫາວິທະຍາໄລແຫ່ງຊາດ, ໂດຍການປາຖະກະຖາຂອງທ່ານ ພັນເອກ ແສງທອງ ດວງບັນດິດ ຫົວໜ້າກົມໂຄສະນາອົບຮົມ ສະຫະພັນນັກຮົບເກົ່າແຫ່ງຊາດລາວ. ເຂົ້າຮ່ວມຮັບຟັງມີທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ມີຄະນະບໍດີ, ຫົວໜ້າຫ້ອງການ, ແຂກທີ່ຖືກເຊີນ, ພະນັກງານ,ຄູ-ອາຈານ ແລະນັກສຶກສາເຂົ້າຮ່ວມ.

ໃນການປາຖະກະຖາ ທ່ານ ພັນເອກ ແສງທອງ ດວງບັນດິດ ໄດ້ກ່າວເຖິງປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວຂອງວັນສ້າງຕັ້ງສະຫະພັນນັກຮົບເກົ່າວ່າ: ສະຫະພັນນັກຮົບເກົ່າຖືກສ້າງຕັ້ງຂຶ້ນ ໃນວັນທີ 9 ກັນຍາ 2002, ບັນດານັກຮົບປະຕິວັດເມື່ອສໍາເລັດໜ້າທີ່ການປະຈຳການ ແລະເຖິງອາຍຸກະສຽນແມ່ນໄດ້ຮັບນະໂຍບາຍພັກຜ່ອນບຳນານ; ຍາມໃດຖັນແຖວນັກຮົບເກົ່າ ກໍມີຄວາມເດັດດ່ຽວໜຽວແໜ້ນຮັກ ແລະເສີມຂະຫຍາຍມູນເຊື້ອທາດແທ້ປະຕິວັດ, ມີຄວາມຈົງຮັກພັກດີຕໍ່ພາລະກິດປະຕິວັດຂອງພັກຢ່າງບໍ່ມີຂອບເຂດ, ກຽມພ້ອມເສຍສະຫຼະເລືອດເນື້ອເພື່ອຜົນປະໂຫຍດລວມຂອງປະເທດຊາດ ແລະປະຊາຊົນ, ອັນນີ້ ແມ່ນມູນເຊື້ອ ແມ່ນຄຸນສົມບັັດ, ແມ່ນຈຸດພິເສດເອກະລັກອັນໂດດເດັ່ນຂອງນັກຮົບລາວທີ່ຕ້ອງໄດ້ຮັບການເສີມຂະຫຍາຍໃຫ້ເປັນແວ່ນແຍງແກ່ຄົນຮຸ່ນສືບທອດໄດ້ຮໍ່າຮຽນ ແລະປະຕິບັດຕາມ. ເພື່ອຕອບສະໜອງຄວາມຮຽກຮ້ອງຕ້ອງການ ແລະຄວາມມຸ່ງມາດປາຖະໜາໃນຖັນແຖວພະນັກງານນັກຮົບເກົ່າ ແລະເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ການຄຸ້ມຄອງ, ຄົ້ນຄວ້າປະຕິບັດນະໂຍບາຍ ແລະການສຶກສາອົບຮົມຖັນແຖວນັກຮົບເກົ່າໃຫ້ປົກປັກ-ຮັກສາ ແລະເສີມຂະຫຍາຍທາດແທ້ມູນເຊື້ອປະຕິວັດ; ປະກອບສ່ວນຢ່າງຕັ້ງໜ້າເຂົ້າໃນການຄຸ້ມຄອງລັດ, ຄຸ້ມຄອງສັງຄົມ ແລະສຶກສາອົບຮົມຄົນຮຸ່ນໜຸ່ມໃນໄລຍະສັ້ນ.

ໃນຕອນທ້າຍພິທີ ທ່ານ ຮສ. ປອ. ອຸດົມ ພອນຄຳເພັງ ກໍໄດ້ສະຄວາມຂອບໃຈ ແລະມອບກະຕ່າໝາກໄມ້ໃຫ້ແກ່ທ່ານ ພັນເອກ ແສງທອງ ດວງບັນດິດ ເພື່ອເປັນການສະແດງຄວາມຮູ້ບຸນຄຸນອີກດ້ວຍ.

ພາບບັນຍາກາດ

You are here: Home ຂ່າວ ມະຫາວິທະຍາໄລແຫ່ງຊາດ ຈັດພິທີປາຖະກະຖາວັນສ້າງຕັ້ງສະຫະພັນນັກຮົບເກົ່າຄົບຮອບ 15 ປີ