nuol.edu.la



ຄກສ ຈັດງານປ່ອຍປາຄືນສູ່ທຳມະຊາດ ເນື່ອງໃນວັນອະນຸລັກຮັກສາສັດນໍ້າ-ສັດປ່າ

1500276315 tmp IMG-20170714-WA0008

   ຍ້ອນເຫັນໄດ້ຄວາມສຳຄັນຂອງວຽກງານການອະນຸລັກຮັກສາປ່າ ແລະສັດນໍ້າ, ເພື່ອເປັນການເພີ່ມພູນສັດນໍ້າຄືນສູ່ທຳມະຊາດໃຫ້ຫຼາຍຂຶ້ນ, ມາໃນຕອນບ່າຍ ວັນທີ 12 ກໍລະກົດ 2017 ນີ້ຈຶ່ງໄດ້ພິທີການປ່ອຍປາຂຶ້ນ ທີ່ພາກວິຊາການປະມົງ (ຕັ້ງຢູ່ ວິທະຍາເຂດດົງໂດກ) ຄະນະ ກະເສດສາດ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ຟອງສະໝຸດ ສຸທຳມະວົງ ຄະນະບໍດີ ຄະນະກະເສດສາດ ມີບັນດາພະນັກງານ-ຄູອາຈານ ແລະນັກສຶກສາ ເຂົ້າຮ່ວມຢ່າງພ້ອມພຽງ.

           ໃນໂອກາດນີ້, ທ່ານ ຮສ. ຟອງສະໝຸດ ສຸທຳມະວົງ ຄະນະບໍດີ ຄະນະກະເສດສາດໄດ້ກ່າວບົດສະຫຼຸບໂດຍຫຍໍ້ກ່ຽວກັບວັນອະນຸລັກສັດນໍ້າສັດປ່າວ່າ: ຜ່ານການຈັດຕັ້ງປະຕິບັດມາແຕ່ປີ 1997 ໄດ້ມີກົດໝາຍວ່າດ້ວຍການຈັດຕັ້ງຄຸ້ມຄອງ ແລະອະນຸຮັກສັດນໍ້າສັດປ່າທີ່ຖືກນຳໃຊ້ ໃນ ສປປ ລາວ ແລະຍ້ອນເຫັນໄດ້ຄວາມສຳຄັນໃນແຕ່ລະປີ ພັກ-ລັດ ໄດ້ຈັດຕັ້ງສົ່ງເສີມໃຫ້ປະຊາຊົນບັນດາເຜົ່າມີສ່ວນຮ່ວມ ເປັນເຈົ້າການໃນການອະນຸລັກສັດນໍ້າ-ສັດປ່າ; ການປ່ອຍປາຄືນສູ່ທຳມະຊາດຢ່າງເປັນຂະບວນຟົດຟື້ນ, ຜ່ານການປະຕິບັດວຽກງານດັ່ງກ່າວ ເຫັນໄດ້ວ່າຈຳນວນສັດນໍ້າທີ່ປ່ອຍຄືນສູ່ທຳມະຊາດ ມີທ່າອ່ຽງເພີ່ມຂຶ້ນໃນແຕ່ປີ ໃນທົ່ວປະເທດມີຈຳນວນປາປະມານ 500 ກວ່າຊະນິດທີ່ອາໄສຢູ່ຕາມແມ່ນໍ້າຂອງ ແລະສາຂາຕ່າງໆ, ໃນນີ້ມີ 50 ຊະນິດທີ່ສາມາດວາງໄຂ່ໄດ້ຕາມສະພາບແວດລ້ອມ, ນອກນັ້ນ ທ່ານຍັງໄດ້ກ່າວຕື່ມອີກວ່າ ວຽກງານການປະມົງກໍມີການຂະຫຍາຍຕົວເພີ່ມຂຶ້ນໃນແຕ່ລະປີ ທັງພາກລັດ ແລະເອກະຊົນໄດ້ສ້າງວັງສະງວນ (ລ້ຽງປາ) ເພື່ອຜະລິດເປັນອາຫານ ແລະຈຳໜ່າຍໃຫ້ແກ່ຜູ້ບໍລິໂພກ ເຊິ່ງກະຊວງກະສິກຳ ແລະປ່າໄມ້ໄດ້ວາງຄາດໝາຍໄວ້ວ່າ ຮອດປີ 2020 ຕ້ອງສູ້ຊົນຜະລິດປາໃຫ້ໄດ້ 225,000 ໂຕນ/ປີ ແລະໃນປີ 2025 ຕ້ອງຜະລິດປາໃຫ້ໄດ້ 300,000 ໂຕນ/ປີ (ທັງປາລ້ຽງ ແລະທຳມະຊາດ).

           ສຳລັບປາທີ່ນຳມາປ່ອຍໃນຄັ້ງນີ້ ມີຈຳນວນທັງໝົດ 55,000 ໂຕຈາກ 8 ຊະນິດ ເປັນຕົ້ນແມ່ນ: ປາກົດໝໍ້, ປາດຸກເຫຼືອງ, ປາປາກ, ປານິນ, ປາມະນິກາບ ແລະພິເສດແມ່ນປາກະໂຫທີ່ມີຄຸນສົມບັດລັກສະນະໃຫ່ຍໃກ້ຄຽງກັບປາມຶກທີ່ມີທ່າອ່ຽງທີ່ຈະສູນພັນໃນປັດຈຸບັນ. ກິດຈະກຳຄັ້ງນີ້ເປັນກິດຈະກຳທີ່ສອງຂອງຄະນະກະເສດສາດ ຖັດຈາກການແຂ່ງຂັນການດຳນາ ເພື່ອເປັນການສືບສານວິຖີຊີວິດການເປັນຢູ່ຂອງປະຊາຊົນລາວ.

ພາບບັນຍາກາດ

You are here: Home ຂ່າວ ຄກສ ຈັດງານປ່ອຍປາຄືນສູ່ທຳມະຊາດ ເນື່ອງໃນວັນອະນຸລັກຮັກສາສັດນໍ້າ-ສັດປ່າ