nuol.edu.la



ຄສບ ຈັດກິດຈະກຳເປີດກວ້າງການສຶກສາຄັ້ງທີ 1

1499671079 tmp IMG 7898

           ຄະນະເສດຖະສາດ ແລະບໍລິຫານທຸລະກິດ ມະຫາວິທະຍາໄລແຫ່ງຊາດ ໄດ້ຈັດງານມະຫາກຳເປີດການສຶກສາຄັ້ງທີ 1 ໃນວັນທີ 7 ກໍລະກົດ 2017 ຜ່ານມາ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເປັນກຽດເຂົ້າຮ່ວມຂອງທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ນາງ ຣີນາ ບິດເຕີ ເອກອັກຄະລັດຖະທູດສະຫະລັດອາເມຣິກາ ປະຈຳ ສປປ ລາວ, ທ່ານ ເພັດສະໝອນ ພົມມະວົງ ວ່າການຄະນະບໍດີ ຄະນະເສດຖະສາດ ແລະບໍລິຫານທຸລະກິດ, ພ້ອມດ້ວຍພະນັກງານ-ຄູອາຈານຈາກຄະນະວິຊາຕ່າງໆ, ສະຖາບັນການສຶກສາ, ສະຖານທູດທີ່ໃຫ້ທຶນການສຶກສາທັງພາຍໃນ ແລະຕ່າງປະເທດ ແລະນັກສຶກສາເຂົ້າຮ່ວມຢ່າງພ້ອມພຽງ.

          ກິດຈະກຳໃນຄັ້ງນີ້, ຈັດຂຶ້ນໂດຍກຸ່ມອະດີດນັກສຶກສາທຶນສະຫະລັດອາເມຣິກາພ້ອມດ້ວຍທີມງານປື້ນແນະນຳສາຍການຮຽນ ແລະໜ່ວຍງານໃຫ້ຄຳປຶກສາດ້ານອາຊີບ ຮ່ວມກັບ ຄະນະເສດຖະສາດ ແລະບໍລິຫານທຸລະກິດ ມະຫາວິທະຍາໄລແຫ່ງຊາດ, ເພື່ອໃຫ້ຜູ້ເຂົ້າຮ່ວມງານ ເປັນຕົ້ນແມ່ນນັກສຶກສາໄດ້ຮັບຂໍ້ມູນຂ່າວສານກ່ຽວກັບສາຂາວິຊາຮຽນຕ່າງໆຈາກບັນດາສະຖາບັນການສຶກສາ ທັງພາກລັດ ແລະເອກະຊົນ, ທັງພາຍໃນ ແລະຕ່າງປະເທດ, ຕະຫຼອດຮອດການຕັດສິນໃຈເລືອກສາຂາວິຊາຮຽນໃນສາຂາທີ່ຕົນເອງມີຄວາມສົນໃຈ, ມີຄວາມຮູ້ ແລະຄວາມພ້ອມທີ່ແທ້ຈິງ ເພື່ອກະກຽມຊັບພະຍາກອນມະນຸດທີ່ມີຄຸນນະພາາບອອກມາຮັບໃຊ້ສັງຄົມ, ພ້ອມທັງເປັນການເປີດໂອກາດໃນການປະຊາສຳພັນກ່ຽວກັບບໍລິສັດຕ່າງໆທີ່ເຂົ້າຮ່ວມອີກດ້ວຍ.

          ງານມະຫາກຳເປີດກວ້າງການສຶກສາໄດ້ດຳເນີນເປັນເວລາ 3 ວັນ (7-9 ກໍລະກົດ 2017) ໂດຍໄດ້ມີການແລກປ່ຽນປະສົບການໃນການເລືອກສາຍຮຽນ ແລະປະກອບອາຊີບ. ນອກຈາກນີ້ ຍັງມີການວາງສະແດງຜົນງານການຄົ້ນຄວ້າ, ແນະນຳການເລືອກສາຍການຮຽນ ຈາກບັນດາຄະນະວິຊາຕ່າງໆໃນມະຫາວິທະຍາໄລແຫ່ງຊາດ, ໂຮງຮຽນເຕັກນິກລາວ-ເຢຍລະມັນ, ສະຖາບັນວິຈິດສິນແຫ່ງຊາດ, ວິທະຍາໄລເຕັກນິກປາກປ່າສັກ, ວິທະຍາໄລເຕັກນິກວິຊາຊີບມິດຕະພາບວຽງຈັນ-ຮ່າໂນ້ຍ, ວິທະຍາໄລເຕັກນິກຊັບພະວິຊາ, ວິທະຍາໄລວິທະຍາສາດ-ສຸຂະພາບ, ສະຖາບັນການເງິນການທະນາຄານ ແລະບັນດາສະຖານທູດທີ່ໃຫ້ທຶນການສຶກສາ ຈຳນວນ 29 ບູດເຂົ້າຮ່ວມ.

ພາບບັນຍາກາດ

You are here: Home ຂ່າວ ຄສບ ຈັດກິດຈະກຳເປີດກວ້າງການສຶກສາຄັ້ງທີ 1