nuol.edu.la



ພິທີມອບ-ຮັບທຶນການສຶກສາໃຫ້ແກ່ນັກສຶກສາທີ່ທຸກຍາກ ແລະຮ່ວມລົງນາມເຊັນບົດບັນທຶກຄວາມເຂົ້າໃຈ

1492678112 tmp IMG 3448

            ໃນຕອນບ່າຍ ວັນທີ 19 ເມສາ 2017ນີ້, ທີ່ຫ້ອງປະຊຸມສະໂມສອນໃຫຍ່ ມະຫາໄລແຫ່ງຊາດ ໄດ້ຈັດພິທີມອບ-ຮັບທຶນການສຶກສາໃຫ້ແກ່ນັກສຶກສາທີ່ທຸກຍາກ ແລະຮ່ວມລົງນາມເຊັນບົດບັນທຶກຄວາມເຂົ້າໃຈ ລະຫວ່າງ ຄະນະວິທະຍາສາດສັງຄົມ, ສະຖາປັດຕະຍະກຳສາດ, ອັກສອນສາດ ແລະບໍລິສັດທີ່ປຶກສາການບັນຊີມະຫາຊົນ ສ.ເກົາຫຼີ, ໂດຍການໃຫ້ກຽດເປັນປະທານ ຂອງທ່ານ ຮສ.ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຄີມ ໂຮ່ ກ໋ອງ ປະທານບໍລິສັດ ທີ່ປຶກສາການບັນຊີມະຫາຊົນ ສ. ເກົາຫຼີ ພ້ອມດ້ວຍຄະນະ, ບັນດາທ່ານ ຄະນະບໍດີຈາກຄະນະ ວິທະຍາສາດສັງຄົມ, ສະຖາປັດຕະຍະກຳສາດ, ອັກສອນສາດ, ແຂກທີ່ຖືກເຊີນ, ພະນັກງານ-ຄູອາຈານ ແລະນັກສຶກສາ ທີ່ໄດ້ຮັບທຶນການສຶກສາເຂົ້າຮ່ວມ.

          ໃນໂອກາດນີ້, ທ່ານ ຮສ. ບຸກມາກ ອິນທິພອນ ຮັກສາການ ຄະນະບໍດີ ຄະນະວິທະຍາສາດສັງຄົມ ໄດ້ຂຶ້ນອ່ານບົດສະຫຼຸບການປະຕິບັດໂຄງການໃຫ້ທຶນສະໜັບສະໜູນການຈັດກິດຈະກຳອາສາສະໝັກ ແລະຮຽນຮູ້ນອກຫ້ອງຮຽນ ດ້ານການພັດທະນາຊຸມຊົນ-ຊົນນະບົດ ໃນໄລຍະ 6 ປີ (2011-2016) ເຊິ່ງມີເນື້ອໃນບາງຕອນວ່າ: ໂຄງການໃຫ້ທຶນສະໜັບສະໜູນການຈັດກິດຈະກຳອາສາສະໝັກ ແລະຮຽນຮູ້ນອກຫ້ອງຮຽນ ດ້ານການພັດທະນາຊຸມຊົນ-ຊົນນະບົດແມ່ນການຮ່ວມມືລະຫວ່າງ ມະຫາວິທະຍາໄລແຫ່ງຊາດ ໂດຍຄະນະ ວິທະຍາສາດສັງຄົມ ເປັນຕົວແທນ ແລະບໍລິສັດ ທີ່ປຶກສາການບັນຊີມະຫາຊົນ ສ.ເກົາຫຼີ ເຊິ່ງເປັນຕົວແທນໂດຍ ທ່ານ ຄີມ ໂຮ່ ກ໋ອງ (Mr. Kim Ho Kyung), ຜ່ານການຈັດຕັ້ງປະຕິບັດເຫັນວ່າໂຄງການນີ້ມີຄວາມສຳຄັນ ແລະເປັນປະໂຫຍດຫຼາຍຕໍ່ການຮຽນຮູ້ຂອງນັກສຶກສາ ເພາະວ່າການຈັດກິດຈະກຳຂອງໂຄງການໄດ້ຊ່ວຍໃຫ້ນັກສຶກສາໄດ້ຮຽນຮູ້ສະພາບການພັດທະນາຊຸມຊົນ-ຊົນນະບົດ ດ້ວຍການລົງເຮັດກິດຈະກຳຕົວຈິງ, ໄດ້ຮັບຟັງການບັນຍາຍ ແລະການລາຍງານຈາກບັນດານັກວິຊາການ, ຜູ້ວາງແຜນ ແລະຜູ້ຈັດຕັ້ງປະຕິບັດໂດຍກົງຂັ້ນທ້ອງຖິ່ນ. ນອກນັ້ນ, ຜ່ານການເຂົ້າຮ່ວມກິດຈະກຳກັບໂຄງການນັກສຶກສາຍັງສາມາດນຳເອົາຄວາມຮູ້ດັ່ງກ່າວມາຂຽນເປັນບົດລາຍງານບົດຈົບໄດ້ຢ່າງປະສິດທິພາບ.

          ໃນໂອກາດດຽວກັນ, ທ່ານ ຮສ. ປອ. ພຸດ ສິມມາລາວົງ ກໍໄດ້ຂຶ້ນມອບໃບຍ້ອງຍໍໃຫ້ແກ່ທ່ານ ຄີມ ໂຮ່ ກ໋ອງ ທີ່ໄດ້ປະກອບສ່ວນທຶນຮອນໃນການພັດທະນາການສຶກສາໃຫ້ດີຂຶ້ນ, ຫຼັງຈາກນັ້ນ ໃນພິທີກໍໄດ້ມີການລົງນາມເຊັນບົດບັນທຶກຄວາມເຂົ້າໃຈລະຫວ່າງ 4 ຝ່າຍຄື: ຄະນະ ວິທະຍາສາດສັງຄົມ ລົງນາມໂດຍທ່ານ ຮສ. ບຸນມາກ ອິນທິພອນ ຮັກສາການຄະນະບໍດີ, ຄະນະ ສະຖາປັດຕະຍະກຳສາດ ລົງນາມໂດຍທ່ານ ຮສ. ດາສັກ ອຸເທນທະປັນຍາ ຄະນະບໍດີ, ຄະນະ ອັກສອນສາດ ລົງນາມໂດຍທ່ານ ຮສ. ອາລຸນ ສີລັດຕະນະກຸນ ຮັກສາການຄະນະບໍດີ ແລະຝ່າຍບໍລິສັດ ທີປຶກສາການບັນຊີມະຫາຊົນ ສ. ເກົາຫຼີ ໂດຍທ່ານ ຄີມ ໂຮ່ ກ໋ອງ ປະທານບໍລິສັດ, ໃນການລົງນາມຄັ້ງນີ້ ເປັນການເຊັນບົດບັນທຶກການຮ່ວມມືພາຍໃຕ້ໂຄງການ “ເສີມສ້າງຂີດຄວາມສາມາດດ້ານການພັດທະນາຊຸມຊົນ-ຊົນນະບົດຕາມທິດທາງສາມສ້າງ ແລະແຊມາອືນ ອຸນດົງ” ເຊິ່ງມີຈຸດປະສົງເພື່ອສະໜັບສະໜູນທຶນການສຶກສາໃຫ້ແກ່ນັກສຶກສາຜູ້ທີ່ທຸກຍາກ ແຕ່ມີຜົນການຮຽນດີ ແລະຫ້າວຫັນ; ຍົກລະດັບດ້ານທັກສະການຮຽນ ແລະແປພາສາຕ່າງປະເທດ (ພາສາອັງກິດ ແລະພາສາເກົາຫຼີ) ໃຫ້ແກ່ພະນັກງານ-ຄູອາຈານ; ສະໜັບສະໜູນການຮຽນຮູ້ນອກຫ້ອງຮຽນດ້ານການພັດທະນາຊຸມຊົນ-ຊົນນະບົດ; ສະໜັບສະໜູບທຶນການຄົ້ນຄວ້າວິໄຈ ດ້ານການພັດທະນາຊຸມຊົນ-ຊົນນະບົດ; ເບື້ອງຕົ້ນການໃຫ້ທຶນການສຶກສາແມ່ນມີທັງໝົດ 50 ທຶນໃນມູນຄ່າ 50,000,000 ລ້ານກີບ ສະເພາະປີ 2017, ສໍາລັບການໃຫ້ທຶນແມ່ນກໍານົດເປັນອັດຕາເງິນເດືອນ 200,000 ກີບ/ຄົນ/ເດືອນ, ສະເພາະນັກສຶກສາທີ່ສຶກສາໃນສົກຮຽນ 2016-2017 ແມ່ນ 5 ເດືອນ (4-8/2017), ສຳລັບ ນັກສຶກສາໃນສົກຮຽນ 2017-2018 ແມ່ນຈຳນວນ 12 ເດືອນ (9/2017-8/2018), ນັກສຶກສາ ທີ່ໄດ້ຮັບທຶນແມ່ນນັກສຶກສາມາຈາກ ຄະນະ ວິທະຍາສາດສັງຄົມຈຳນວນ 30 ທຶນ (ນັກສຶກສາຈາກພາກວິຊາ ສັງຄົມສົງເຄາະ ແລະການພັດທະນາ), ຄະນະ ສະຖາປັດຕະຍະກຳສາດ ແມ່ນໄດ້ຮັບຈຳນວນ 20 ທຶນ (ນັກສຶກສາຈາກ ພາກວິຊາ ສະພາບແວດລ້ອມຜັງເມືອງ ແລະພາກວິຊາ ອອກແບບຜະລິດຕະພັນ ແລະຕົບແຕ່ງ), ສ່ວນຄະນະ ອັກສອນ ສາດແມ່ນຈະໄດ້ຮ່ວມມືໃນການເຄື່ອນໄຫວກິດຈະກຳຕ່າງໆ.

ພາບບັນຍາກາດ

You are here: Home ຂ່າວ ພິທີມອບ-ຮັບທຶນການສຶກສາໃຫ້ແກ່ນັກສຶກສາທີ່ທຸກຍາກ ແລະຮ່ວມລົງນາມເຊັນບົດບັນທຶກຄວາມເຂົ້າໃຈ