nuol.edu.la



ສະດຸດີປີໃໝ່ລາວ

  ປີເກົ່າ ຄະເຄື່ອນຍ້າຍ         ໝູນປ່ຽນລາໄລ

ສີໃໝ່ ສີໃສງາມ               ເຄື່ອນຄອງຄອຍເຂົ້າ

ເປັນວັນເນົານໍາຊີ້               ປະຈໍາປີຊ້ອຍຊື່ນ

ຍົກຍື່ນ ຮອຍຮັກໃຫ້             ຊາວລາວໄດ້ມ່ວນລະໄມ   ແທ້ແລ້ວ

   ພໍເມື່ອປີໃໝ່ກ້າວ           ສັງຂານຂວບວຽນມາ

ປະຊາລາວທົ່ວແດນ             ແຕ່ເໜືອເຖິງໃຕ້

ໃຈກະສັນດີດ້ວຍ               ດາດອມຮັກໄຄ່

ລາໄລຄວາມທຸກຮ້ອນ           ໂຮງເຕົ້າແຕ່ສິ່ງດີ       ມາແລ້ວ

   ຫຼາຍຄົນໜີຫ່າງບ້ານ         ພັດພາກຈາກໄປໄກ

ໄປຮໍ່າຮຽນ ຫາງານ           ກໍ່ຕ່າວມາຢາມຢື້

ມືຖືຂອງຂວັນຕ້ອນ             ຕາມເຕີມຄວາມຄິດຮອດ

ໂອບກອດ ຍໍຍົກໃຫ້           ຜູ້ຕົນໄດ້ຫ່າງລາ       ວ່າເດ

   ປີໃໝ່ ໃສສ່ອງແຈ້ງ       ຈູງຈ່ອງຂານໄຂ

ເປັນວັນນໍາພອນໄຊ             ສູ່ພົງພັນເຊື້ອ

ແມ້ງເມື່ອ ຍາມເຫງົາເສົ້າ         ໃຫ້ຫາຍເບົາບາງສວ່າງ

ລຸລ່ວງໃຈ ໃສສະອາດກ້າ         ບານແຍ້ມດັ່ງພະຈັນ   ພຸ້ນແລ້ວ

  

   ສຸກສັນ ວັນປີໃໝ່ເຕົ້າ       ເຕີມຕໍ່ສະດຸດີ

ບາງຄົນມີນໍ້າໃສ, ນໍ້າໃຈ         ໂອບສີສວຍລ້າງ

ບາງຄົນມີມະໄລເອ້             ຈໍາປາຫອມຮ້ອຍຮວດ

ດາວເຮືອງສານສອດຊ້ອນ         ອວຍພອນໃຫ້ແກ່ກັນ   ງາມເດ

   ປີໃໝ່ລາວ ຍັງຕໍ່ຕຸ້ມ         ໂຮມຫໍ່ສາມັກຄີ

ປະເພນີລາວເຮົາ               ຕັ້ງແຕ່ເດີມດາເຄົ້າ

ຖືເອົາເປັນວັນຕັ້ງ               ສະຫຼອງໄຊໃຈຊ້ອຍຊື່ນ

ຄວາມຂົມຂື່ນທຸກຮ້ອນ           ໄຫຼເວັ້ນຫ່າງໜີ       ແທ້ແລ້ວ

ບັດນີ້, ຮຽມຂໍກ່າວກ່ຽວກໍ້າ     ທາງຝ່າຍມະຫາວິທະຍາໄລແຫ່ງຊາດ

ເປັນສູນກາງການສຶກສາ         ວັດທະນະທໍາໂຮມເຕົ້າ

ເນົາຢູ່ໃນຫົນຫ້ອງ               ແດນຄໍາກໍ້າດົງໂດກ

ບໍ່ໄດ້ໂສກເສົ້າສີ້ນ               ແປປີ້ນລ່າຍລືມ       ດອກນາ

   ວັດທະນະທໍາຍັງຄຶກຄື້ນ       ຢືນຮຽງຫໍ່ອຸດົມການ

ແຕ່ລະປີສືບສານ               ມ່ວນມານານເຍີ້ນ

ບໍ່ໄດ້ເຫີນຫາຍເຊື້ອ             ເຄືອຄານວັດທະນະທໍາເກົ່າ

ເຫຼົ່າການນໍາ, ພະນັກງານ,

ນັກສຶກສາກໍພໍ່າພ້ອມ             ສະຫຼອງສືບສ້າງມາ     ຊອບແລ້ວ

ມາເຖິງຕອນສຸດທ້າຍ           ຮຽມຂໍກ່າວພອນໄຊ

ໄປຍັງປວງຊົນລາວ               ທຸກຖິ່ນເລີງບານແຍ້ມ

ອາຍຸ ວັນນະຂໍໃຫ້ແຂງແກ່ກ້າ       ດັ່ງສີລາຫີນກ້ອນໃຫຍ່

ໃຈມີສຸກຢູ່ເລື້ອຍ                 ບໍ່ມີມື້ໝົ່ນໝອງ       ແດ່ເນີ.

   ສ່ວນວ່າ ທາງແຫ່ງຫ້ອງ       ດົງໂດກແດນວິໄລ

ຂໍໃຫ້ແພງພຽນຮັກ                 ຫໍ່ໂຮມພັນເຊື້ອ

ເປັນເຮືອຫຼວງລໍາຄໍ້າ               ນໍາປະຊາຂວໍ້າຝັ່ງ

ສອນສັ່ງສິດໃຫ້ເກັ່ງກ້າ             ພາລາວກ້າວພັດທະນາ   ແດ່ທ້ອນ.    

You are here: Home ຂ່າວ ສະດຸດີປີໃໝ່ລາວ