nuol.edu.la



ກອງປະຊຸມເຊື່ອມຊືມເອກະສານມະຕິກອງປະຊຸມຄົບຄະນະບໍລິຫານສູນກາງ ສະຫະພັນແມ່ຍິງລາວຄັ້ງທີ 2 ສະໄໝທີ VII

1IMG 1704

          ໃນວັນທີ 3 ມີນາ 2017, ສະຫະພັນແມ່ຍິງ ມະຫາວິທະຍາໄລແຫ່ງຊາດ ໄດ້ຈັດກອງປະຊຸມເຊື່ອມຊືມເອກະສານມະຕິກອງປະຊຸມຄົບຄະນະບໍລິຫານສູນກາງ ສະຫະພັນແມ່ຍິງລາວຄັ້ງທີ 2 ສະໄໝທີ VII ທີ່ຫ້ອງປະຊຸມສະໂມສອນ, ມະຫາວິທະຍາໄລແຫ່ງຊາດ, ໂດຍເປັນກຽດເຂົ້າຮ່ວມຂອງທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ໂພສີ ທິບດາວັນ ຫົວໜ້າຫ້ອງການກວດກາ, ທ່ານ ນາງ ວຽງສຸກ ແພງບຸບຜາ ປະທານສະຫະພັນແມ່ຍິງ ມະຫາວິທະຍາໄລແຫ່ງຊາດ ພ້ອມດ້ວຍຄະນະ, ສະຫະພັນແມ່ຍິງຮາກຖານທັງ 13 ຮາກຖານ ແລະແຂກທີ່ເຊີນເຂົ້າຮ່ວມ.

          ຈຸດປະສົງຂອງກອງປະຊຸມຄັ້ງນີ້ແມ່ນເພື່ອເຜີຍແຜ່ເຊືອມຊືມ ເອກະສານມະຕິກອງປະຊຸມຄົບຄະນະບໍລິຫານສູນກາງ ສະຫະພັນແມ່ຍິງລາວຄັ້ງທີ 2 ສະໄໝທີ VII.

          ໃນໂອກາດນີ້, ທ່ານ ນາງ ວຽງສຸກ ແພງບຸບຜາ ປະທານສະຫະພັນແມ່ຍິງ ມະຫາວິທະຍາໄລແຫ່ງຊາດ ກໍໄດ້ຂຶ້ນຜ່ານມະຕິຕົກລົງກອງປະຊຸມຄົບຄະນະບໍລິຫານງານສູນກາງສະຫະພັນແມ່ຍິງລາວ ຄັ້ງທີ 2 ສະໄໝທີ VII. ຄັ້ງວັນທີ 12-14 ພະຈິກ 2016. ເລກທີ 030/ສສຍລ. ລົງວັນທີ 25 ມັງກອນ 2017 ແລະຜ່ານຂໍ້ຕົກລົງປະທານຄະນະບໍລິຫານງານສູນກາງສະຫະພັນແມ່ຍິງລາວ ເລກທີ 037/ສສຍລ. ລົງວັນທີ 30 ມັງກອນ 2017 ວ່າດ້ວຍການຈັດຕັ້ງ ແລະເຄື່ອນໄຫວວຽກງານຂອງສະຫະພັນແມ່ຍິງກະຊວງ-ອົງການຂັ້ນສູນກາງ.

         

ໃນຂະນະດຽວກັນ, ທ່ານ ຮສ. ປອ. ນາງ ສິລິນທອນ ສັກລໍຄຳ ຄະນະບໍລິຫານງານ ແມ່ຍິງມະຫາວິທະຍາໄລແຫ່ງຊາດ ກໍໄດ້ຂຶ້ນອ່ານບົດໂອ້ລົມຂອງ ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດວ່າ: ການຈັດຕັ້ງປະຕິບັດມະຕິກອງປະຊຸມວິສາມັນຄົບຄະນະບໍລິຫານງານສູນກາງສະຫະພັນແມ່ຍິງລາວ ແມ່ນຜົນສຳເລັດປີທຳອິດແຫ່ງການຜັນຂະຫຍາຍວິໄສທັດ, ຍຸດທະສາດ ແລະແຜນພັດທະນາແມ່ຍິງລາວ 2016-2020 ໂດຍສະເພາະແມ່ນການກໍານົດຈະແຈ້ງ ບັນດາພາລະບົດບາດ, ສິດ ແລະໜ້າທີ່, ແບບແຜນວິທີເຮັດວຽກ, ແຜນການດຳເນີນງານ ແລະໂຄງການຕ່າງໆ ທີ່ຖືກຕ້ອງແທດເໝາະກັບສະຫະພັນແມ່ຍິງໃນແຕ່ລະຂັ້ນ, ແມ່ຍິງລາວໄດ້ເຂົ້າເຖິ່ງການບໍລິການຮັກສາສຸຂະພາບຢ່າງກວ້າງຂວາງ, ໄດ້ມີໂອກາດສຶກສາຮໍ່າຮຽນ, ຍົກລະດັບທິດສະດີການເມືອງ, ວິຊາສະເພາະ ແມ່ຍິງມີບົດບາດໃນການນຳພາ-ຄຸ້ມຄອງນັບແຕ່ຮາກຖານຮອດສູນກາງ, ຜູ້ທີ່ເປັນສະມາຊິກສະພາແຫ່ງຊາດ ແລະສະພາຫ້ອງຖິ່ນທີ່ເປັນເພດຍິງກໍມີຈຳນວນຫຼາຍ. ໃນໂອກາດນີ້ ທ່ານ ປອ. ໄຊສົມພອນ ພົມວິຫານ ຍັງຮຽກຮ້ອງໃຫ້ ສະຫະພັນແມ່ຍິງທຸກຂັ້ນ, ສະມາຊິກ ແລະແມ່ຍິງລາວບັນດາເຜົ່າຈົ່ງເພີ່ມທະວີຄວາມສາມັກຄີເປັນປຶກແຜ່ນໃຕ້ການນຳພາຂອງພັກ; ເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ຕັດສິນໃຈຜ່ານຜ່າຄວາມຫຍຸ້ງຍາກນາໆປະການປະກອບສ່ວນຕັ້ງໜ້າເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຕາມຈຸດໝາຍສັງຄົມນິຍົມທີ່ພັກ ແລະປະຊາຊົນໄດ້ເລືອກເອົາໄວ້.

 

ພາຍຫຼັງສຳເລັດກອງປະຊຸມ, ສະຫະພັນແມ່ຍິງຮາກຖານ ແລະແຂກທີ່ຖືກເຊີນ ກໍໄດ້ຮ່ວມກັນເຕັ້ນແອລໂລບິກ ເພື່ອສຸຂະພາບ ທີ່ໜ້າສະໂມສອນໃຫ່ຍມະຫາວິທະຍາໄລແຫ່ງຊາດ ເຊິ່ງໄດ້ສ້າງບັນຍາກາດຟົດຟື້ນມ່ວນຊື່ນຢ່າງຍິິ່ງ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກອງປະຊຸມເຊື່ອມຊືມເອກະສານມະຕິກອງປະຊຸມຄົບຄະນະບໍລິຫານສູນກາງ ສະຫະພັນແມ່ຍິງລາວຄັ້ງທີ 2 ສະໄໝທີ VII

ການຮັບສະໝັກ

ທຶນການສຶກສາ