nuol.edu.la



ນັກສຶກສາ ມະຫາວິທະຍາໄລແຫ່ງຊາດ ຄວ້າ 2 ຮາງວັນ ການແຂ່ງຂັນ ນະວັດຕະກຳຊາວໜຸ່ມ

IMG 1576

          ໃນຕອນບ່າຍ ວັນທີ 28 ກຸມພາ 2017ຜ່ານມານີ້, ຫ້ອງການຄົ້ນຄວ້າວິທະຍາສາດ ແລະບໍລິການວິຊາການ ໄດ້ຈັດພິທີ ສະເໜີຜົນງານການແຂ່ງຂັນແຜນທຸລະກິດ ແລະນະວັດຕະກຳຂອງຊາວໜຸ່ມ ຂອງນັກສຶກສາ ມະຫາວິທະຍາໄລແຫ່ງຊາດ ໃນໄລຍະຜ່ານມາ, ທີ່ຫ້ອງປະຊຸມສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທັງເປັນປະທານຊີ້ນຳໆພາຂະບວນການແຂ່ງຂັນ, ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ປອ. ໂພສີ ຈັນມິ່ງ ຮອງຫົວໜ້າຫ້ອງການຄົ້ນຄວ້າວິທະຍາສາດ ແລະບໍລິການວິຊາການ, ຄະນະຮັບຜິດຊອບຂະບວນການແຂ່ງຂັນ ພ້ອມດ້ວຍຄະນະ, ມີບັນດາແຂກຖືກເຊີນ, ພະນັກງານ, ຄູ-ອາຈານທີ່ກ່ຽວຂ້ອງ ແລະນັກສຶກສາເຂົ້າຮ່ວມ.

          ໂອກາດກ່າວເປີດພິທີ ທ່ານ ຮສ. ປອ.ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ ໄດ້ກ່າວວ່າ: ການແຂ່ງຂັນນະວັດຕະກຳຊາວໜຸ່ມ ທີ່ ສປ.ຈີນ ໃນລະຫວ່າງວັນທີ 12-16 ກຸມພາ 2017 ຜ່ານມານີ້, ນັກສຶກສາ ຈາກມະຫາວິທະຍາໄລແຫ່ງຊາດ ສາມາດຄວ້າໄດ້ 2 ຮາງວັນ ຈາກການແຂ່ງຂັນດັ່ງກ່າວ, ເຊິ່ງການແຂ່ງຂັນຄັ້ງນີ້ ມີ 6 ປະເທດໃນລຸ່ມແມ່ນໍ້າຂອງເຂົ້າຮ່ວມ. ຈຸດປະສົງຂອງການແຂ່ງຂັນແມ່ນເພື່ອເຮັດໃຫ້ຊາວໜຸ່ມໄດ້ຄົ້ນຄິດປະດິດສ້າງຜົນງານອັນສ້າງສັນໃນການໜູນໃຊ້ນະວັດຕະກຳ ປັບປ່ຽນເຂົ້າກັບການປ່ຽນແປງສະພາບດິນຟ້າອາກາດ ແລະເພື່ອຮັບມືກັບໄພພິບັດທີ່ອາດຈະເກີດຂຶ້ນ. ຕະຫຼອດໄລຍະເວລາຂອງການແຂ່ງຂັນດັ່ງກ່າວ ແມ່ນໄດ້ຮັບການສະໜັບສະໜູນຈາກຫຼາຍພາກສ່ວນເປັນຕົ້ນແມ່ນ ສູນອາຫານ ມະຫາວິທະຍາໄລແຫ່ງຊາດ.

          ຂະນະດຽວກັນ ທ່ານ ຮສ. ປອ. ໂພສີ ຈັນມິ່ງ ຮອງຫົວໜ້າຫ້ອງການຄົ້ນຄວ້າວິທະຍາສາດ ແລະບໍລິການວິຊາການ, ຄະນະຮັບຜິດຊອບຂະບວນການແຂ່ງຂັນ ກໍໄດ້ຂຶ້ນກ່າວສະຫຼຸບລາຍງານການແຂ່ງຂັນໂດຍຫຍໍ້ວ່າ: ການແຂ່ງຂັນຄັ້ງນີ້ ປະກອບມີ 6 ປະເທດ ລຸ່ມແມ່ນໍ້າຂອງເຂົ້າຮ່ວມຄື: ລາວ, ໄທ, ຫວຽດນາມ, ກຳປູເຈຍ, ມຽນມ້າ ແລະ ຈີນ. ພາຍໃຕ້ຫົວຂໍ້ການແຂ່ງຂັນທີ່ວ່າ “ແຜນພັດທະນານໍ້າ ແລະສະພາບແວດລ້ອມຂອງນໍ້າແບບຍືນຍົງ”, ມີທັງໝົດ 5 ປະເພດຮາງວັນຄື: 1.The Most Valuable Issue Award; 2.The Most Innovative Team Award; 3.The Best Project Improvement Award; 4.The Best Multinational Team Award; 5.Project Incubation and Implementation Award ແລະຈໍານວນໂຄງການທີ່ເຂົ້າຮອບສຸດທ້າຍມີທັງໝົດ 14 ໂຄງການ; ໃນນັ້ນ, ມີໂຄງການຂອງນັກສຶກສາ ຈາກ ມະຫາວິທະຍາໄລແຫ່ງຊາດ 2 ໂຄງການ ແລະສາມາດຍາດໄດ້ 2 ຮາງວັນຄື: ທີມທີ 1: ນໍາສະເໜີຫົວຂໍ້ໂຄງການ “ການນຳໃຊ້ຕົ້ນໃບເຕີຍເຂົ້າໃນການຫຼຸດຜ່ອນຜົນກະທົບຢູໂຕຣຟີເຄເຊິນ” ໄດ້ຮັບຮາງວັນນະວັດຕະກຳທີ່ດີເລີດ (The Most Innovative Team Award) ພ້ອມດ້ວຍເງິນສົດ 3000 ຢວນ(ສະກຸນເງິນຈີນ), ສະມາຊິກໃນທີມປະກອບດ້ວຍ: ທ້າວ ວັນສີ ເພັງທະແຈ່ມ, ທ້າວ ສັນຕິສຸກ ລັດດາວົງ ແລະນາງ ແສງຕາວັນ ດວງພະຈັນ. ທີມທີ 2: ນຳສະເໜີຫົວຂໍ້ໂຄງການ “ແພໄມ້ປ່ອງ ເພື່ອປ້ອງກັນການລະເຫີຍອາຍຂອງນໍ້າ” ໄດ້ຮັບຮາງວັນການບົ່ມເພາະທີ່ດີເລີດ ພ້ອມດ້ວຍເງິນສົດ 10,000 ຢວນ, ສະມາຊິກໃນທີມ ປະກອບດ້ວຍ: ທ້າວ ໄຊປະຊາ ລາດຊະວົງ, ນາງ ລັກສະນີ ພົງພັນ ແລະນາງ ທິບສະຫວັນ ສີລາກຸນ.

          ສຳລັບການກະກຽມທີມກ່ອນເຂົ້າແຂ່ງຂັນ ແມ່ນໄດ້ອອກແຈ້ງການໃຫ້ແກ່ຄະນະວິຊາຕ່າງໆໃນ ມະຫາວິທະຍາໄລແຫ່ງຊາດ, ຄັດເລືອກເອົານັກສຶກສາຜູ້ທີ່ມີຄວາມສາມາດສື່ສານເປັນພາສາອັງກິດໄດ້ໃນລະດັບດີ, ຮຽນເກັ່ງ, ມີຫົວຄິດປະດິດສ້າງ ແລະຖືກຄັດເລືອກມາທັງໝົດ 24 ຄົນ, ແບ່ງອອກເປັນ 8 ກຸ່ມໆລະ 3 ຄົນ. ແລະຜ່ານການຄັດເລືອກແມ່ນໄດ້ 2 ກຸ່ມ ຈາກທັງໝົດ 8 ກຸ່ມ ແລ້ວຈຶ່ງສົ່ງໄປເຂົ້າຮ່ວມແຂ່ງຂັນ ໃນເວທີດັ່ງກ່າວ. ການກະກຽມການແຂ່ງຂັນປີຕໍ່ໄປນີ້ ມະຫາວິທະຍາໄລແຫ່ງຊາດ ຈະມີການກະກຽມນັກສຶກສາ ແລະສືບຕໍ່ຂໍອະນຸມັດ ຈາກກະຊວງສຶກສາທິການ ແລະກີລາ ເພື່ອຂໍເປັນເຈົ້າພາບໃນການຈັດການແຂ່ງຂັນ ນະວັດຕະກຳຊາວໜຸ່ມປະຈຳປີ 2018 ເຊິ່ງຫົວຂໍ້ທີ່ຈະຈັດການແຂ່ງຂັນແມ່ນ: “The Development of Tourism and Other Green Industries”.

          ຈາກນັ້ນ, ນັກສຶກສາ ທັງສອງທີມ ທີ່ໄດ້ຮັບຮາງວັນ ກໍໄດ້ຂຶ້ນບັນຍາຍ ແລະນຳສະເໜີຜົນງານຂອງຕົນ ທີ່ໄດ້ຮັບຮາງວັນ ໃຫ້ແກ່ບັນດາແຂກທີ່ເຂົ້າຮ່ວມໄດ້ຮັບຊົມ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ນັກສຶກສາ ມະຫາວິທະຍາໄລແຫ່ງຊາດ ຄວ້າ 2 ຮາງວັນ ການແຂ່ງຂັນ ນະວັດຕະກຳຊາວໜຸ່ມ

ການຮັບສະໝັກ

ທຶນການສຶກສາ