nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ກອງປະຊຸມສະໄໝສາມັນ ສະພາມະຫາວິທະຍາໄລແຫ່ງຊາດຄັ້ງທີ 27 ຊຸດທີ IV

1487139595 tmp IMG 0926

            ໃນຕອນບ່າຍ ວັນທີ 13 ກຸມພາ 2017ຜ່ານມານີ້, ມະຫາວິທະຍາໄລແຫ່ງຊາດໄດ້ຈັດ ກອງປະຊຸມສະໄໝສາມັນ ສະພາມະຫາວິທະຍາໄລແຫ່ງຊາດຄັ້ງທີ 27 ຊຸດທີ IV ຂຶ້ນ ທີ່ຫ້ອງປະຊຸມ ຕຶກສໍານັກງານອະທິການບໍດີ ມຊ. ໂດຍພາຍໃຕ້ການເປັນປະທານຂອງທ່ານ ສຈ. ປອ. ບໍ່ແສງຄຳ ວົງດາລາ ປະທານສະພາ ມະຫາວິທະຍາໄລແຫ່ງຊາດ, ລັດຖະມົນຕີກະຊວງຖະແຫຼງຂ່າວ-ວັດທະນະທຳ ແລະທ່ອງທ່ຽວ, ທ່ານ ສຈ. ປອ. ສົມສີ ຍໍພັນໄຊ ຮອງປະທານສະພາ, ວ່າການແທນອະທິການບໍດີ ມະຫາວິທະຍາໄລແຫ່ງຊາດ, ບັນດາທ່ານຮອງອະທິການບໍດີ ແລະສະມາຊິກສະພາ ມຊ. 20 ທ່ານເຂົ້າຮ່ວມ.

           ໂອກາດນີ້ທ່ານ ສຈ. ປອ. ບໍ່ແສງຄຳ ວົງດາລາ ປະທານສະພາ ມະຫາວິທະຍາໄລແຫ່ງຊາດ, ລັດຖະມົນຕີກະຊວງຖະແຫຼ່ງຂາວ-ວັດທະນະທຳ ແລະທ່ອງທ່ຽວ ໄດ້ກ່າວໃນທີ່ປະຊຸມວ່າ: ພາຍຫຼັງກອງປະຊຸມຄັ້ງປະຖົມມະລຶກຄັ້ງ ວັນທີ 24 ພະຈິກ 2015, ບັນຫາຕ່າງໆທີ່ກອງປະຊຸມໄດ້ຄົ້ນຄວ້າພິຈາລະນາໃນກອງປະຊຸມຄັ້ງນັ້ນ, ທາງກອງເລຂາປະທານສະພາ ມຊ. ກໍໄດ້ສືບຕໍ່ຈັດຕັ້ງປະຕິບັດ ແລະໄດ້ລາຍງານໃຫ້ແກ່ປະທານສະພາ ມຊ. ໄດ້ຮັບຊາບເປັນໄລຍະ, ແຕ່ເນື່ອງຈາກວ່າໄລຍະ 1 ປີຜ່ານມາ ໄດ້ມີຫຼາຍສະພາບເກີດຂຶ້ນ ແລະໄດ້ດຳເນີນວຽກງານຫຼາຍຢ່າງເຊັ່ນ: ມຊ. ໄດ້ຈັດກອງປະຊຸມໃຫຍ່ອົງຄະນະພັກຂອງຕົນ, ມີການປັບປຸງກົງຈັກການຈັດຕັ້ງຂັ້ນອະທິການບໍດີ, ຮອງອະທິການບໍດີ, ມີການຈັດການສະເຫຼີມສະຫຼອງວັນສ້າງ ມຊ. ຄົບຮອບ 20 ປີ, ໄດ້ເປັນເຈົ້າພາບຈັດງານມະຫາກຳ ກີລາມະຫາວິທະຍາໄລລາວຄັ້ງທີ 1 , ໄດ້ປະກອບສ່ວນເປັນເຈົ້າພາບ ແລະຈັດກອງປະຊຸມ ສຸດຍອດອາຊຽນຄັ້ງທີ 28 ແລະ29 ແລະກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 49 ແລະອື່ນໆ. ໃນການຈັດກອງປະຊຸມສະພາ ມຊ. ຄັ້ງນີ້ ກໍເປັນຄັ້ງສຳຄັນ ທີ່ບັນດາທ່ານຈະໄດ້ທຸ້ມເທສະຕິປັນຍາ ພ້ອມທັງເຫື່ອແຮງ ເພື່ອປະຕິບັດສິດ ແລະໜ້າທີ່ຂອງພວກທ່ານໃນການປະກອບສ່ວນເຮັດໃຫ້ສະພາ ມຊ. ໄດ້ເຄື່ອນໄຫວຕາມພາລະບົດບາດເປັນຕົ້ນຈະໄດ້ຮັບຟັງການລາຍງານ ການເຄື່ອນໄຫວຂອງ ມຊ. ໄລຍະຜ່ານມາ, ການສະຫຼຸບການເຄື່ອນໄຫວຂອງສະພາ ມຊ. ຟັງລາຍງານສະພາບການຈັດຕັ້ງປະຕິບັດແຜນງົບປະມານສົກ 2015-2016, ຜ່ານແຜນງົບປະມານປີ 2017, ຜັນຂະຫຍາຍແຜນຍຸດທະສາດ ມຊ. ຄົ້ນຄວ້າ ແລະປະກອບຄຳຄິດເຫັນສຳລັບຂໍ້ກຳນົດກ່ຽວກັບສະພາ ມຊ. ສະບັບນໍາໃຊ້ປັດຈຸບັນ, ຜ່ານປະຕິທິນການເຄື່ອນໄຫວຂອງສະພາ ມຊ. ປີ 2017.

           ໂອກາດດຽວກັນ ທ່ານ ສຈ.ປອ. ສົມສີ ຍໍພັນໄຊ ຮອງປະທານສະພາ ມະຫາວິທະຍາໄລແຫ່ງຊາດ, ວ່າການແທນອະທິການບໍດີ ມະຫາວິທະຍາໄລແຫ່ງຊາດ ກໍໄດ້ຜ່ານບົດສະຫຼຸບສົກຮຽນ 2015-2016 ແລະແຜນການສຶກສາ 2016-2017 ເຊິ່ງທ່ານໄດ້ກ່າວວ່າ: ມະຫາວິທະຍາໄລແຫ່ງຊາດໄດ້ສ້າງຕັ້ງຂຶ້ນຕາມດຳລັດຂອງນາຍົກລັດຖະມົນຕີ ສະບັບເລກທີ 50/ນຍ, ລົງວັນທີ 09/06/1995 ແລະໄດ້ໄຂສົກຮຽນຢ່າງເປັນທາງການໃນວັນທີ 5 ພະຈິກ 1996 ມາຮອດປີນີ້ຄົບຮອບ 20 ປີ, ປັດຈຸບັນ ມຊ. ມີທັງໝົດ 13 ຄະນະວິຊາ, 2 ສະຖາບັນ, 11 ຫ້ອງການ, 4 ສູນ, ຫໍສະໝຸດກາງ, ໂຮງໝໍວິທະຍາເຂດດົງໂດກ ແລະໂຮງຮຽນພອນສະຫວັນ. ສະຖິຕິພະນັກງານ-ຄູອາຈານ ແລະນັກສຶກສາປະຈຳສົກຮຽນ 2015-2016 ມີຄື: ພະນັກງານບໍລິຫານ 514 ຄົນ, ຍິງ 260 ຄົນ, ອາຈານສອນ 1,451 ຄົນ, ຍິງ 621 ຄົນ, ນັກສຶກສາທັງໝົດ 21,253 ຄົນ, ຍິງ 8,837 ຄົນ, ໃນນັ້ນ ມີນັກສຶກສາໃນແຜນ 6,589 ຄົນ, ຍິງ 3,093 ຄົນ. ດ້ານວຽກງານວິຊາສະເພາະ ໃນສົກປີ 2015-2016 ນີ້ ມະຫາວິທະຍາໄລແຫ່ງຊາດ ໄດ້ດຳເນີນການຮຽນ-ການສອນໃນຫຼາຍລະດັບ, ມີທັງໝົດ 176 ຫຼັກສູດ ໃນນັ້ນມີ: ປະລິນຍາເອກ 2 ຫຼັກສູດ; ປະລິນຍາໂທ 53 ຫຼັກສູດ, ປະລິນຍາຕີ 98 ຫຼັກສູດ; ຫຼັກສູດຕໍ່ເນື່ອງປະລິນຍາຕີ 22 ຫຼັກສູດ ແລະຫຼັກສູດອະນຸປະລິນຍາ 01 ຫຼັກສູດ; ດ້ານວຽກງານການຄົ້ນຄວ້າໄດ້ດຳເນີນການຄົ້ນຄ້ວາຈຳນວນ 53 ຫົວຂໍ້, ໄດ້ຈັດຕັ້ງກອງປະຊຸມນາໆຊາດ ວ່າດ້ວຍນະວັດຕະກຳ ແລະບົດບາດຂອງມະຫາວິທະຍາໄລໃນການພັດທະນາຕາມທິດສີຂຽວ ແລະຍືນຍົງ ຈຳນວນ 2 ຄັ້ງ, ໄດ້ຄັດເລືອກເອົານັກຄົ້ນຄ້ວາດີເດັ່ນ ຈຳນວນ 11 ທ່ານ, ໄດ້ເຂົ້າຮ່ວມແຂ່ງຂັນນະວັດຕະກຳ ກ່ຽວກັບສິ່ງແວດລ້ອມ ແລະການປະກອບກິດຈະການ GMS ແລະໄດ້ຮັບລາງວັນຊະນະເລີດທັງສອງທີມ ແລະຈາກນັ້ນ ໃນທີ່ປະຊຸມຍັງໄດ້ມີການສະເໜີແຜນຍຸດທະສາດ ມຊ. ແລະມີການປະກອບຄຳຄິດເຫັນໃສ່ ຂໍ້ກຳນົດກ່ຽວກັບສະພາ ມຊ. ສະບັບນຳໃຊ້ປັດຈຸບັນອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກອງປະຊຸມສະໄໝສາມັນ ສະພາມະຫາວິທະຍາໄລແຫ່ງຊາດຄັ້ງທີ 27 ຊຸດທີ IV

ການຮັບສະໝັກ

ທຶນການສຶກສາ