nuol.edu.la



ພິທີປາຖະກະຖາ ແລະຈັດກິດຈະກຳສະເຫຼີມສະຫຼອງວັນສ້າງຕັ້ງກຳມະບານລາວ ຄົບຮອບ 61 ປີ

1486109179 tmp IMG 0752

            ໃນຕອນບ່າຍ ວັນທີ 1 ກຸມພາ 2017 ນີ້, ສະຫະພັນກຳມະບານ ມຊ. ໄດ້ຈັດພິທີປາຖະກະຖາ ແລະກິດຈະກຳສະເຫຼີມ-ສະຫຼອງວັນສ້າງຕັ້ງກຳມະບານລາວ ຄົບຮອບ 61 ປີ. ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ສຈ. ປອ. ສົມສີ ຍໍພັນໄຊ ຄະນະປະຈຳພັກກະຊວງ ສຶກສາທິການ ແລະກີລາ, ເລຂາຄະນະພັກ ວ່າການແທນອະທິການບໍດີ ມຊ, ທ່ານ ຮສ. ປອ. ອານຸລົມ ວິໄລພອນ ປະທານສະຫະພັນກຳມະບານ ມຊ. ວ່າການຄະນະບໍດີ ຄະນະວິທະຍາສາດການກີລາ, ມີບັນດາເລຂາໜ່ວຍກຳມະບານຮາກຖານ ພາກສ່ວນຕ່າງໆອ້ອມຂ້າງ ມຊ. ແຂກທີ່ຖືກເຊີນ, ສະມາຊິກກໍາມະບານ ພາກສ່ວນພະນັກງານຄູ-ອາຈານ ແລະນັກສຶກສາເຂົ້າຮ່ວມ.

          ໂອກາດນີ້ ທ່ານ ສຈ. ປອ. ສົມສີ ຍໍພັນໄຊ ຄະນະປະຈຳພັກກະຊວງ ສຶກສາທິການ ແລະກີລາ, ເລຂາຄະນະພັກ ວ່າການແທນອະທິການບໍດີ ມຊ. ກໍໄດ້ໃຫ້ກຽດຂຶ້ນກ່າວປາຖະກະຖາ ເພື່ອເປັນການເຜີຍແຜ່ ແລະເລົ່າຄືນມູນເຊື້ອປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວຂອງອົງການຈັດຕັ້ງກຳມະບານທີ່ມີເນື້ອໃນ ມີຄວາມສຳຄັນຢ່າງເລິກເຊິ່ງ, ກວ້າງຂວາງ ທົ່ວສະມາຊິກກຳມະບານ, ຊົນຊັ້ນກຳມະກອນ ແລະຊາວຜູ້ອອກແຮງງານລາວບັນດາເຜົ່າ. ໜ້າທີ່ຕົ້ນຕໍຂອງວຽງານ ກຳມະບານແມ່ນຖືເອົາການໂຄສະນາ ການປະຕິບັດແນວທາງນະໂຍບາຍຂອງພັກແຕ່ລະໄລຍະເປັນເນື້ອໃນໃຈກາງຂອງການເຄື່ອນໄຫວ ສ້າງຂະບວນການຕ່າງໆ, ສຶກສາອົບຮົມມະຫາຊົນ ແລະເຮັດລ້ອນໜ້າທີ່ວິຊາສະເພາະຂອງຕົນ. ຜ່ານພຶດຕິກຳຕົວຈິງໃນໄລຍະຜ່ານມາ ສາມາດຖອດຖອນບົດຮຽນໄດ້ດັ່ງນີ້: ເພີ່ມທະວີບົດບາດການຊີ້ນຳໆພາຂອງພັກ; ການຄົ້ນຄວ້າເຊື່ອມຊຶມກຳແໜ້ນແນວທາງນະໂຍບາຍຂອງພັກ, ແຜນການຂອງລັດ ກໍຄືການຮັບໃຊ້ເຂົ້າໃນການປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະພັດທະນາປະເທດຊາດ ຕາມທິດທາງບຸກທະລຸສະຫັດສະວັດແຫ່ງການພັດທະນາເພື່ອລົບລ້າງຄວາມທຸກຍາກ ນຳເອົາປະເທດເຮົາຫຼຸດພົ້ນອອກຈາກຄວາມດ້ວຍພັດທະນາໃນປີ 2020; ຢູ່ຫົວໜ່ວຍແຮງງານໃດມີການຈັດຕັ້ງກຳມະບານທີ່ເຂັ້ມແຂງ, ຢູ່ຫົວໜ່ວຍແຮງງານນັ້ນ ກໍມີຄວາມສະຫງົບເທົ່າທີ່ຄວນ ແລະພ້ອມດຽວກັນນັ້ນກໍຮຽກຮ້ອງໃຫ້ທຸກຮາກຖານ ອ້ອມຂ້າງ ມຊ. ອອກແຮງແຂ່ງຂັນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂອງສະຫະພັນກຳມະບານລາວຄັ້ງທີ VII ໃຫ້ປະກົດຜົນເປັນຈິງ.

          ໂອກາດຽວກັນ ຄະນະສະຫະພັນແມ່ຍິງ ແລະຄະນະຊາວໜຸ່ມ ມຊ. ກໍໄດ້ມອບກະຕ່າໝາກໄມ້ອວຍພອນແກ່ ປະທານສະຫະພັນກຳມະບານ ມຊ ແລະໃນຕອນແລງຂອງວັນດຽວກັນ ກໍໄດ້ມີການຈັດກິດກຳແຂ່ງຂັນກີລາບານເຕະ, ດຶງເຊືອກ ດ້ວຍບັນຍາກາດຟົດຟືນມ່ວນຊື່ນ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີປາຖະກະຖາ ແລະຈັດກິດຈະກຳສະເຫຼີມສະຫຼອງວັນສ້າງຕັ້ງກຳມະບານລາວ ຄົບຮອບ 61 ປີ

ການຮັບສະໝັກ

ທຶນການສຶກສາ