nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ມະຫາວິທະຍາໄລແຫ່ງຊາດ ແລະລັດວິສະຫະກິດລົດເມນະຄອນຫຼວງ ສືບຕໍ່ເຊັນບົດບັນທຶກຄວາມເຂົ້າໃຈການນຳໃຊ້ບັດລົດເມ

1486023022 tmp IMG 0591

          ໃນຕອນເຊົ້າວັນທີ 31 ມັງກອນ 2017, ມະຫາວິທະຍາໄລແຫ່ງຊາດ ແລະລັດວິສະຫະກິດລົດເມນະຄອນຫຼວງ ໄດ້ຮ່ວມກັນຈັດກອງປະຊຸມຕໍ່ບົດບັນທຶກຄວາມເຂົ້າໃຈ ວ່າດ້ວຍການນຳໃຊ້ບັດລົດເມ ຂຶ້ນທີ່ຫ້ອງປະຊຸມຕຶກສຳນັກງານອະທິການບໍດີ ມຊ. ເຊິ່ງຝ່າຍ ມຊ. ເຊັນໂດຍທ່ານ ຮສ. ປອ. ບົວດໍາ ແສງຄໍາຄຸດລາວົງ ຫົວໜ້າຫ້ອງການສັງລວມ ມຊ ແລະຝ່າຍລັດວິສາຫະກິດລົດເມນະຄອນຫຼວງ ເຊັນໂດຍ ທ່ານ ຄຳພູນ ເຕເມລາດ ອຳນວຍການລັດວິສະຫະກິດລົດເມນະຄອນຫຼວງ ໂດຍຊ້ອງໜ້າທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ, ມີຄະນະບໍດີ, ຫົວໜ້າຫ້ອງການ, ຕາງໜ້າຄະນະຊ່ຽວຊານອົງການໄຈກ້າທີ່ປະຈໍາຢູ່ໂຄງການ, ພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

          ໂອກາດນີ້ທ່ານ ທະນົງສີ ເດດວົງສອນ ຫົວໜ້າແຜນການ, ລັດວິສະຫະກິດລົດເມນະຄອນຫຼວງ ໄດ້ຜ່ານບົດສະຫຼຸບຂອງໂຄງການໃນໄລຍະທີ 1 ວ່າ: ໂຄງການປັບປຸງການຂົນສົ່ງສາທາລະນະໃນຕົວເມືອງນະຄອນຫຼວງວຽງຈັນ ແມ່ນເປັນການຮ່ວມມືລະຫວ່າງ ອົງການໄຈກາ ປະເທດຢີ່ປຸ່ນ ກັບລັດວິສະຫະກິດລົດເມນະຄອນຫຼວງໃນໄລຍະທີ 1 ເພື່ອເປັນການທົດລອງການຫັນໃຫ້ມວນຊົນມານຳໃຊ້ລົດເມ ສາທາລະນະໃຫ້ນັບມື້ນັບຫຼາຍຂຶ້ນ, ເພື່ອເປັນການຫຼຸດຜ່ອນການນຳໃຊ້ລົດສ່ວນຕົວ ແລະຫຼຸດຜ່ອນການຈະລາຈອນແອອັດຕາມທ້ອງຖະໜົນ. ພ້ອມດຽວກັນນັ້ນ, ກໍເພື່ອເປັນການຫຼຸດຜ່ອນການເກີດອຸປະຕິເຫດ ແລະຮັກສາສະພາບແວດລ້ອມໃນຕົວເມືອງ ເປົ້າໜາຍຂອງໂຄງການໃນເບື້ອງຕົ້ນແມ່ນເປັນການທົດລອງໃຫ້ສະເພາະນັກສຶກສາ, ຄູ-ອາຈານ ທີ່ຂຶ້ນກັບ ມະຫາວິທະຍາໄລແຫ່ງຊາດ ແລະອ້ອມຂ້າງເທົ່ານັ້ນ, ໃນເບື້ອງຕົ້ນທາງໂຄງການໄດ້ຕັ້ງລາຄາໄວ້ 400,000 ກີບ/ ຄົນ/ ປີ. ເຊິ່ງຜູ້ຖືບັດລົດເມ ແມ່ນສາມາດຂຶ້ນລົດເມທີ່ແລ່ນພາຍໃນຕົວເມືອງທີ່ຂຶ້ນກັບລັດວິສະຫະກິດລົດເມນະຄອນຫຼວງໄດ້ແບບບໍ່ຈຳກັດຖ້ຽວ. ສຳລັບການຈັດຕັ້ງປະຕິບັດໃນໄລຍະຜ່ານມາ ນັບແຕ່ວັນທີ 5 ພະຈິກ 2014 ຫາ ວັນທີ 31 ທັນວາ 2016, ແມ່ນມີຜູ້ລົງທະບຽບນໍາໃຊ້ບັດລົດເມທັງໝົດ 1.792 ບັດ (ຍິງ 658 ບັດ), ອັດຕາການນໍາໃຊ້ແຕ່ລະໂຮງຮຽນແມ່ນ:

-         - ນັກສຶກສາຈາກມະຫາວິທະຍາໄລແຫ່ງຊາດ: 551 ບັດ, ກວມເອົາ 31%

-         - ວິທະຍາໄລ ອື່ນໆ: 519 ບັດ, ກວມເອົາ 29%

-         - ນັກຮຽນມັດທະຍົມ ຕອນຕົ້ນ-ຕອນປາຍ: 666​ ບັດ, ກວມເອົາ 37%

-         - ພະນັກງານຄູ-ອາຈານ: 56 ບັດ, ກວມເອົາ 3%

-          - ນັກສຶກສາຕ່າງປະເທດ: ຢີ່ປຸ່ນ 7 ບັດ, ຫວຽດນາມ 14 ບັດ, ເກົາຫຼີ 8 ບັດ, ຈີນ 1 ບັດ ແລະອາເມລິກາ 3 ບັດ.

   ທ່ານໃຫ້ຮູ້ຕື່ມວ່າ: ໃນອະນາຄົດຂ້າງໜ້າຍັງຈະສືບຕໍ່ປັບປຸງການຂົນສົ່ງສາທາລະນະໃນນະຄອນຫຼວງ ຂອງອົງການໄຈກ້າ ໄລຍະທີ 2 ໃນການນຳໃຊ້້ບັດລົດເມລາຄາຖືກໃຫ້ທົ່ວເຖິ່ງ ແລະໃຫ້ມີຜູ້ໃຊ້ບໍລິການຫຼາຍຂຶ້ນ, ສ້າງທາງເລືອກໃຫ້ແກ່ຜູ້ຊົມໃຊ້ເຊັ່ນ: ບັດທີ່ສາມາດນຳໃຊ້ໃນໄລຍະເວລາ 1 ເດືອນ, ບັດທີ່ສາມາດນຳໃຊ້ໃນໄລຍະເວລາ3 ເດືອນ, ບັດທີ່ສາມາດນຳໃຊ້ໃນໄລຍະເວລາ 6 ເດືອນ ແລະບັດທີ່ສາມາດນຳໃຊ້ໃນໄລຍະເວລາ 1 ປີ ໃຫ້ແກ່ນັກສຶກສາ, ພະນະນັກງານ, ຄູ-ອາຈານ ແລະມວນຊົນທົ່ວໄປໄດ້ນຳໃຊ້. ພ້ອມກັນນັ້ນ, ໃນທີ່ປະຊຸມກໍໄດ້ມີການປະກອບຄຳຄິດເຫັນເພື່ອເປັນທິດທາງໃນການພັດທະນາໂຄງການໆຮ່ວມມືດັ່ງກ່າວໃຫ້ດີຂຶ້ນໃນອະນາຄົດ.

ພາບບັນຍາກາດ



ທ່ານກຳລັງຢູ່ທີ່: Home ຂ່າວ ມະຫາວິທະຍາໄລແຫ່ງຊາດ ແລະລັດວິສະຫະກິດລົດເມນະຄອນຫຼວງ ສືບຕໍ່ເຊັນບົດບັນທຶກຄວາມເຂົ້າໃຈການນຳໃຊ້ບັດລົດເມ

ການຮັບສະໝັກ

ທຶນການສຶກສາ