nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ມະຫາວິທະຍາໄລແຫ່ງຊາດ(ມຊ) ສຳເລັດການສອບເສັງຄັດເລືອກເອົານັກສຶກສາເຂົ້າຮຽນ ປະຈຳສົກສຶກສາ 2014-2015

ເພື່ອເປັນການປະຕິບັດຕາມທິດຊີ້ນຳຂອງ ກະຊວງສຶກສາທິການ ແລະກິລາ ໃນການແບ່ງສິດໃຫ້ ມະຫາວິທະຍາໄລ 4 ແຫ່ງ, ຈັດຕັ້ງການສອບເສັງຄັດເລືອກເອົານັກສຶກສາເຂົ້າຮຽນສົກສຶກສາ 2014 - 2015 ໃຫ້ມີຄຸນນະພາບ. ດັ່ງນັ້ນຄະນະຮັບຜິດຊອບ ການສອບເສັງ ມຊ ຊຶ່ງປະກອບດ້ວຍ ທ່ານ ສຈ.ດຣ ສຸກກົງແສງ ໄຊຍະເລີດ ກໍາມະການສູນກາງພັກ, ອະທິການບໍດີ ມຊ ເປັນປະທານ, ມີບັນດາທ່ານຮອງປະທານ ແລະຜູ້ປະຈຳການ: ຮສ.ດຣ ສາຍຂອງ ສາຍນາສິນ ເລຂາອົງຄະນະພັກ, ຮອງອະທິການບໍດີ ມຊ ຜູ້ຊີ້ນໍາວຽກງານວິຊາການ, ທ່ານ ຮສ ລຳໄມ ພິພັກຂະວົງ ຮອງອະທິການບໍດີ ຮອງປະທານ, ທ່ານ ສຈ.ດຣ.ເພັດສະໝອນ ຄູນສະຫວັດ ຮອງອະທິການບໍດີ ຮອງປະທານ, ທ່ານ ສຈ.ດຣ. ສົມສີ ຍໍພັນໄຊ ຮອງອະທິການບໍດີ, ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະກິລາ ນະຄອນຫຼວງ, ພ້ອມດ້ວຍບັນດາທ່ານຄະນະບໍດີ, ຫົວໜ້າຫ້ອງການ ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມເປັນຄະນະ. ໄດ້ພ້ອມກັນຈັດຕັ້ງການສອບເສັງຂຶ້ນຢ່າງເປັນທາງການໃນວັນທີ 5-6 ກໍລະກົດ 2014. ໂອກາດນີ້ ທ່ານຮສ.ດຣ ຄຳຜົງ ນາມມະວົງໄຊ ຫົວໜ້າຫ້ອງການວິຊາການ ມຊ ກໍໄດ້ໃຫ້ຮູ້ວ່າ: ໃນປີນີ້ມີນັກຮຽນເສັງຈົບ ມັດທະຍົມປາຍ ມາລົງທະບຽນສະເໜີເຂົ້າສອບເສັງ ຊຶ່ງໄດ້ເລີ່ມເປີດຮັບແຕ່ວັນທີ 30 ມິຖຸນາ ຫາ 30 ກໍລະກົດ 2014 ທັງໝົດ 16.510 ຄົນ ແຕ່ມີແຜນຈະຮັບນັກສຶກສາຜູ້ທີ່ເສັງໄດ້ພຽງແຕ່ 3.927 ຄົນ ຊຶ່ງບໍ່ໄດ້ລວມກັບນັກສຶກສາໃນແຜນ(ຜູ້ທີ່ຮຽນເກັ່ງແລ້ວໄດ້ຮັບທືນແບ່ງປັນຈາກລັດຖະບານໃຫ້ໃນແຕ່ລະແຂວງສົ່ງເຂົ້າມາຮຽນໃນ ມຊ.)

NUOL Finish Entrance

ສຳລັບສູນລວມການສອບເສັງແມ່ນໄດ້ຈັດຢູ່ວິທະຍາເຂດດົງໂດກ ແຕ່ເນື່ອງຈາກວ່ານັກສອບເສັງມີຈຳນວນຫລວງຫລາຍ ຈຶ່ງໄດ້ເປີດເປັນຫຼາຍສູນສອບເສັງຍ່ອຍຄື: ມສ. ສີໂຄດຕະບອງ, ມສ ວຽງຈັນ, ມສ. ວຽງຈັນຮ່າໂນ້ຍ, ຄະນະນິຕິສາດ ແລະລັດຖະສາດ, ຄະນະວິສະວະກຳສາດ ແລະ ໂຮງຮຽນສັບບພະວິຊາ. ການສອບເສັງໄດ້ແບ່ງນັກສອບເສັງອອກເປັນຫຼາຍຫ້ອງ, ແຕ່ລະຫ້ອງບັນຈຸນັກສອບເສັງ 20-40 ຄົນ ແລະໄດ້ກຳນົດໃຫ້ມີກຳມະການຍາມຫ້ອງສອບເສັງ 1 ທ່ານຕໍ່ນັກສອບເສັງ 10 ຄົນ ທັງນີ້ກໍເພື່ອຫລີກເວັ້ນ ການທຸດຈະລິດ ໃນຮູບແບບຕ່າງໆຂອງນັກສອບເສັງ ທັງຮັບປະກັນໄດ້ໃນການຄັດເອົານັກສຶກສາທີ່ເກັ່ງ, ມີຄຸນນະພາບເຂົ້າມາສຶກສາຕໍ່ທີ່ ມຊ. ຕາມລະດັບຄາດໝາຍ ແລະມາດຕະຖານຂອງ ມຊ. ທີ່ໄດ້ວາງໄວ້.

ທ່ານຍັງໃຫ້ຮູ້ຕື່ມວ່າ: ຖ້າທຽບໃສ່ທຸກປີ, ການຈັດການສອບເສັງໃນປີນີ້ແມ່ນມີຄວາມເປັນລະບຽບຮຽບຮ້ອຍ ແລະປາສະຈາກໄດ້ການທຸດຈະລິດໃນຮູບແບບຕ່າງໆເປັນຢ່າງດີ ທັງນີ້ກໍເນື່ອງຈາກວ່າ ຄະນະຮັບຜິດຊອບແຕ່ລະຂັ້ນມີປະສົບການສູງ ແລະມີຄວາມຮັບຜິດຊອບເປັນຢ່າງດີ. ທ່ານ ຮສ.ດຣ ຄຳຜົງ ນາມມະວົງໄຊ ໄດ້ແຈ້ງໃຫ້ຊາບວ່າ: ຜົນການສອບເສັງຈະແຈ້ງໃຫ້ຮູ້ພາຍໃນ ຕົ້ນເດືອນ ກັນຍາ 2014, ຈາກນັ້ນກໍຈະຂໍອະນຸມັດຈາກກະຊວງສຶກສາທິການ ແລະກິລາ ເພື່ອເປີດຮັບເອົານັກຮຽນຜູ້ທີ່ເສັງໄດ້ນັ້ນມາລົງທະບຽນຮຽນໃນລະຫວ່າງຕົ້ນເດືອນ ຕຸລາ ທີ່ຈະມາເຖິງນີ້.

ພາບ: https://picasaweb.google.com/107441718450994229956/FinishEntranceAugust062014  

ທ່ານກຳລັງຢູ່ທີ່: Home ຂ່າວ ມະຫາວິທະຍາໄລແຫ່ງຊາດ(ມຊ) ສຳເລັດການສອບເສັງຄັດເລືອກເອົານັກສຶກສາເຂົ້າຮຽນ ປະຈຳສົກສຶກສາ 2014-2015

ການຮັບສະໝັກ

ທຶນການສຶກສາ