nuol.edu.la



ຄະນະນໍາ ມຊ ເຂົ້າອວຍພອນທ່ານເອກອັກຄະລັດຖະທູດ ສປ ຈີນ ປະຈຳ ສປປ ລາວ ເນື່ອງໃນໂອກາດບຸນປີໃໝ່ ຈີນ (ກຸດຈີນ)

1518425712 tmp IMG 5857

ໃນຕອນເຊົ້າວັນທີ 7 ກຸມພາ 2018 ຜ່ານມານີ້, ທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍ ທ່ານຄະນະບໍດີ ຄະນະອັກສອນສາດ, ຮອງຫົວໜ້າຫ້ອງການ ແລະພະນັກງານ ທີ່ກ່ຽວຂ້ອງ ໄດ້ໄປອວຍພອນປີໃໝ່ ຈີນ (ກຸດຈີນ) ແກ່ທ່ານ ຫວາງ ເຫວີນ ທ່ຽນ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ທີ່ເຮືອນພັກທ່ານເອກອັກຄະລັດຖະທູດ.

ໂອກາດນີ້ ທ່ານ ຫວາງເຫວີນ ທ່ຽນ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ໃຫ້ກ່າວໂອ້ລົມ ແລະກ່າວຕອ້ນຮັບການອວຍພອນ ເຊິ່ງທ່ານກ່າວບາງຕອນວ່າ: ຂ້າພະເຈົ້າຂໍຂອບໃຈຢ່າງສູງມາຍັງ ຄະນະນຳ ມະຫາວິທະຍາໄລແຫ່ງຊາດ ກໍຄື ທ່ານຮອງອະທິການບໍດີ ແລະຄະນະ ທີ່ໄດ້ມາອວຍພອນ ເນື່ອງໃນໂອກາດບຸນປີໃໝ່ ຂອງ ສປ ຈີນ. ໃນໄລຍະທີ່ຜ່ານມາ ທາງ ສປ ຈີນ ກໍໄດ້ໃຫ້ການຊ່ວຍເຫຼືອ ແລະການຮ່ວມມືຫຼາຍຢ່າງ ກັບມະຫາວິທະຍາໄລແຫ່ງຊາດລາວ ເປັນຕົ້ນແມ່ນ: ການກໍ່ສ້າງອາຄານສະຖາບັນຂົງຈື ທີ່ພວມລົງມື ກໍ່ສ້າງໃນປັດຈຸບັນ ແລະຫວ່າງບໍ່ດົນມານີ້ ມະຫາວິທະຍາໄລແຫ່ງຊາດ ໄດ້ມີການຈັດງານແຂ່ງຂັນ ນະວັດຕະກຳຊາວໜຸ່ມ 6 ປະເທດລຸ່ມແມ່ນນໍ້າຂອງ-ແມ່ນໍ້າລ້ານຊ້າງ; ເຊິ່ງມະຫາວິທະຍາໄລແຫ່ງຊາດ ກໍສາມາດຍາດໄດ້ຮາງວັນທີ 1, ສຳລັບການຮ່ວມມືທາງດ້ານການສຶກສາກໍໄດ້ມີການແລກປ່ຽນ ຊ່ຽວຊານ, ອາຈານ ແລະນັກສຶກສາ ກັບຫຼາຍໆ ມະຫາວິທະຍາໄລ, ສະຖາບັນການສຶກສາຂອງ ສປ ຈີນ. ດັ່ງນັ້ນ, ຈຶ່ງເວົ້າໄດ້ວ່າການຮ່ວມມື ລະຫວ່າງ ສອງປະເທດ ລາວ-ຈີນ; ຈີນ-ລາວ ນັບມື້ນັບແໜ້ນແຟ້ນຍິ່ງຂຶ້ນ, ຂ້າພະເຈົ້າຂໍສະແດງຄວາມຂອບໃຈມາຍັງທ່ານ ຄະນະນຳ ພ້ອມດ້ວຍ ພະນັກງານ-ຄູອາຈານ ໃນມະຫາວິທະຍາໄລແຫ່ງຊາດ ທີ່ໄດ້ເອົາໃຈໃສ່ເບິ່ງແຍງບັນດານັກສຶກສາ ແລະຊ່ຽວຊານ ຈີນ ທີ່ກຳລັງສຶກສາຮໍ່າຮຽນ ແລະເຮັດວຽກ ຢູ່ມະຫາວິທະຍາໄລແຫ່ງຊາດ ເປັນຢ່າງດີຕະຫຼອດມາ.

ຈາກນັ້ນ, ທ່ານ ຮສ. ປອ. ພຸດ ສິມມາລາວົງ ກໍໄດ້ກ່າວ ສະແດງຄວາມຮູ້ບຸນຄຸນ ຕໍ່ທ່ານ ເອກອັກ ຄະລັດຖະທູດ ກໍຄື ລັດຖະບານ ສປ ຈີນ ທີ່ໄດ້ໃຫ້ການຊ່ວຍເຫຼືອແກ່ມະຫາວິທະຍາໄລແຫ່ງຊາດ ພ້ອມທັງກ່າວຄຳອວຍພອນ ແລະມອບກະຕ່າດອກໄມ້ ແກ່ ທ່ານ ຫວາງ ເຫວີນທ່ຽນ ເອກອັກຄະລັດຖະທູດ ສປ ຈີນ ເນື່ອງໃນໂອກາດບຸນປີໃໝ່ ຈີນ (ກຸດຈີນ) ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄະນະນໍາ ມຊ ເຂົ້າອວຍພອນທ່ານເອກອັກຄະລັດຖະທູດ ສປ ຈີນ ປະຈຳ ສປປ ລາວ ເນື່ອງໃນໂອກາດບຸນປີໃໝ່ ຈີນ (ກຸດຈີນ)

ການຮັບສະໝັກ

ທຶນການສຶກສາ