nuol.edu.la



ມຊ ຈັດພິທີປາຖະກະຖາວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ

1111IMG 4035

             ໃນຕອນບ່າຍ ວັນທີ 19 ມັງກອນ 2018 ນີ້, ມະຫາວິທະຍາໄລແຫ່ງຊາດ ໄດ້ຈັດພິທີ ປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ, ຂຶ້ນທີ່ ສະໂມສອນໃຫຍ່ ມະຫາວິທະຍາໄລແຫ່ງຊາດ, ໃຫ້ກຽດປາຖະກະຖາໂດຍທ່ານ ຮສ.ປອ. ອຸດົມ ພອນຄໍາເພັງ ປະທານກວດກາພັກ, ຮອງອະທິການບໍດີມະຫາວິທະຍາໄລແຫ່ງຊາດ, ມີຄະນະພັກຮາກຖານ, ຄະນະໜ່ວຍພັກ, ຄະນະບໍລິຫານງານ ຊາວໜຸ່ມ, ແມ່ຍິງ, ສະຫະພັນກໍາມະບານ, ແຂກທີ່ຖືກເຊີນ ພະນັກງານ, ຄູ-ອາຈານ ແລະນັກສຶກສາຄະນະວິຊາຕ່າງໆອ້ອມຂ້າງ ມະຫາວິທະຍາໄລແຫ່ງຊາດເຂົ້າຮ່ວມຮັບຟັງ.

                ໃນພິທີ, ທ່ານ ຮສ. ປອ. ອຸດົມ ພອນຄໍາເພັງ ໄດ້ຍົກໃຫ້ເຫັນບາງຕອນສໍາຄັນວ່າ: ການສໍ້ລາດບັງຫຼວງແມ່ນ ສະພາບຫຍໍ້ທໍ້ໜຶ່ງຢູ່ໃນກົງຈັກການຈັດຕັ້ງ ເຊິ່ງເປັນໄພອັນຕະລາຍຮ້າຍແຮງສົ່ງຜົນກະທົບ ແລະກົດໜ່ວງຖ່ວງດຶງເຖິງການພັດທະນາເສດຖະກິດ-ສັງຄົມຂອງແຕ່ລະປະເທດໃນໂລກ ບໍ່ວ່າຈະເປັນປະເທດນ້ອຍ ຫລືໃຫຍ່, ທຸກຍາກ ຫລືຮັ່ງມີ ກໍລ້ວນແຕ່ມີຜົນກະທົບເຊັ່ນດຽວກັນ. ການສໍ້ລາດບັງຫຼວງພວມເປັນໄພຂົ່ມຂູ່ເຖິງຄວາມມີສະຖຽນລະພາບຂອງການຈັດຕັ້ງທັງພາກລັດ ແລະເອກະຊົນ, ສ້າງໃຫ້ເກີດມີຄວາມບໍ່ສະຫງົບ, ຄວາມບໍ່ຍຸດຕິທຳໃນສັງຄົມ, ເປັນການບັ່ນທອນກໍາລັງແຮງ ກໍຄືຄວາມເຊື່ອໝັ້ນ ແລະຄ່ານິຍົມຂອງສັງຄົມຕໍ່ສະຖາບັນການປົກຄອງ.ການສໍ້ລາດບັງຫຼວງເປັນການຕັດຮອນລາຍໄດ້ຂອງຊາດ, ຂອງລວມໝູ່ ກໍຄືຂອງພົນລະເມືອງດ້ວຍຫຼາຍຮູບຫຼາຍວິທີ, ສ້າງຄວາມເສຍຫາຍໃຫ້ແກ່ຊັບສິນເງິນຄໍາຂອງລັດ, ລວມໝູ່ ແລະຂອງປະຊາຊົນເປັນຈໍານວນມະຫາສານ; ການສໍ້ລາດບັງຫຼວງເປັນການສະແດງອອກຢ່າງເປີດແປນຂອງການຂາດຄຸນນະທໍາ, ຂາດຈັນຍາບັນຂອງຜູ້ດໍາເນີນງານໃນສັງຄົມ ກໍ່ໃຫ້ເກີດມີກຸ່ມກ້ອນຮ່ວມຜົນປະໂຫຍດທາງເສດຖະກິດ, ການເມືອງນໍາໄປສູ່ຄວາມບໍ່ເປັນເອກະພາບ, ເກີດມີຄວາມແຕກແຍກ ແລະອື່ນໆ. ຍ້ອນເຫັນໄດ້ຜົນຮ້າຍ ແລະອັນຕະລາຍຂອງການສໍ້ລາດບັງຫຼວງ ຄືດັ່ງກ່າວ ປະຊາຄົມໂລກຈຶ່ງໄດ້ມີການຄົ້ນຄິດສ້າງຂອບເຂດ, ກໍານົດໝາຍສາກົນເປັນບ່ອນອີງໃຫ້ແກ່ການພົວພັນຮ່ວມມືລະຫວ່າງປະເທດຕ່າງໆນັບທັງຢູ່ໃນຂົງເຂດພາກພື້ນ ແລະໃນໂລກ ເພື່ອພ້ອມກັນສະກັດກັ້ນ ແລະຕໍ່ສູ້ຢ່າງມີປະສິດທິພາບ, ປະສິດທິຜົນຕໍ່ກັບບັນດາການກະທໍາ ກໍຄື ພຶດຕິກໍາທີ່ເປັນການສໍ້ລາດບັງຫລວງ.

             ການສະກັດກັ້ນ ແລະການຕ້ານການສໍ້ລາດບັງຫຼວງ ແມ່ນຄວາມຮຽກຮ້ອງຕ້ອງການອັນຈໍາເປັນຂອງວົງຄະນະຍາດສາກົນ. ດັ່ງນັ້ນ, ອົງການສະຫະປະຊາຊາດຈຶ່ງກໍານົດເອົາວັນທີ 9 ທັນວາ ຂອງທຸກໆປີເປັນວັນຕ້ານການສໍ້ລາດບັງຫຼວງສາກົນກາຍເປັນວັນທີ່ມີຄວາມໝາຍສໍາຄັນເປັນວັນແຫ່ງຄວາມສາມັກຄີຮ່ວມແຮງ-ຮ່ວມໃຈກັນ ໃນການຕໍ່ສູ້ຕ້ານການສໍ້ລາດບັງຫຼວງຂອງບັນດາປະເທດພາຄີ ແລະບັນດາປະຊາຊາດໃນໂລກ. ເຊິ່ງການສະເຫຼີມສະຫຼອງວັນຕ້ານການສໍ້ລາດບັງຫຼວງສາກົນໃນປີນີ້ ແມ່ນພາຍໃຕ້ຄຳຂວັນ: ຮ່ວມແຮງຮ່ວມໃຈຕ້ານການ ສໍ້ລາດບັງຫຼວງເພື່ອພັດທະນາ, ສະຫງົບສຸກ ແລະຄວາມໝັ້ນຄົງ. ເພື່ອສືບຕໍ່ຜັນຂະຫຍາຍ ແລະສະກັດກັ້ນຕ້ານການສໍ້ລາດບັງຫຼວງ ບັນດາຫ້ອງການກວດກາລັດແຕ່ລະພາກສ່ວນ ຕ້ອງເພີ່ມທະວີຄວາມຮັບຜິດຊອບໃນການຕິດຕາມ, ກວດກາຂອງອົງການລັດແຕ່ລະຂັ້ນ ຕໍ່ຂົງເຂດທີ່ມີຄວາມສ່ຽງໃນການສໍ້ລາດບັງຫຼວງ, ຄຸ້ມຄອງລາຍຮັບ-ລາຍຈ່າຍງົບປະມານການລົງທຶນ, ກໍ່ສ້າງພື້ນຖານໂຄງລ່າງ, ຄຸ້ມຄອງການນໍາໃຊ້ທີ່ດິນ ແລະນໍາໃຊ້ຊັບພະຍາກອນທໍາມະຊາດຢ່າງເຂັ້ມງວດ, ທັນການ ແລະສັກສິດຕາມລະບຽບກົດໝາຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ຈັດພິທີປາຖະກະຖາວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ

ການຮັບສະໝັກ

ທຶນການສຶກສາ