nuol.edu.la



ສສ ຫວຽດນາມ ໃຫ້ການຊ່ວຍເຫຼືອໃນໂຄງການກໍ່ສ້າງອາຄານຮຽນ ແລະປັບປຸງຫໍພັກນັກສຶກສາ ແກ່ ສປປ ລາວ

1510804328 tmp IMG 1170

  ໃນທ່າມກາງບັນຍາກາດທີ່ທົ່ວພັກທົ່ວລັດ, ທົ່ວປວງຊົນລາວທັງຊາດພວມຈັດຕັ້ງ ບັນດາກິດຈະກຳຕ່າງໆທີ່ມີຄວາມໝາຍ-ຄວາມສຳຄັນ ແລະພວມສະເຫຼີມສະຫຼອງ ສອງວັນປະຫວັດສາດ ຄື: ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ແລະວັນເຊັນສົນທິສັນຍາຮ່ວມມືຮອບດ້ານລາວ-ຫວຽດນາມ ຄົບ 40 ປີ, ບົນເນື້ອໃນດັ່ງກ່າວ ເພື່ອເປັນການຈັດຕັ້ງປະຕິບັດ ການຮ່ວມມືລະຫວ່າງກະຊວງສຶກສາທິການ ແລະກີລາ ສປປ ລາວ ແລະກະຊວງສຶກສາ ແລະກໍ່ສ້າງ ສສ ຫວຽດນາມ ໃຫ້ປະກົດຜົນເປັນຈິງ, ໃນຕອນເຊົ້າ ວັນທີ 14 ພະຈິກ 2017 ນີ້, ໄດ້ມີພິທີເປີດໂຄງການປັບປຸງ-ກໍ່ສ້າງ ໂຮງຮຽນມັດທະຍົມສົມບູນມິດຕະພາບລາວ-ຫວຽດນາມ ໄລຍະ 2, ໂຄງການປັບປຸງ-ສ້ອມແປງອາຄານຫໍພັກນັກສຶກສາຕ່າງປະເທດ(ຫໍພັກນັກສຶກສາຫວຽດນາມ) ທີ່ມະຫາວິທະຍາໄລແຫ່ງຊາດ ແລະສ້າງພາກວິຊາພາສາຫວຽດນາມ ທີ່ມະຫາວິທະຍາໄລສຸພານຸວົງ; ພິທີໄດ້ຈັດຂຶ້ນທີ່ຫໍພັກນັກສຶກສາຕ່າງປະເທດ ວິທະຍາເຂດດົງໂດກ, ໂດຍການເປັນປະທານຂອງ ທ່ານ ຮສ. ປອ. ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະກີລາ, ທ່ານ ຫງວຽນ ບ່າຮຸ່ງ ເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ມີຫົວໜ້າກົມ, ຮອງອະທິການບໍດີຈາກ ມະຫາວິທະຍາໄລແຫ່ງຊາດ ແລະມະຫາວິທະຍາໄລ ສຸພານຸວົງ, ຫົວໜ້າຫ້ອງການ, ແຂກທີ່ຖືກເຊີນຈາກຝ່າຍລາວ ແລະຫວຽດນາມ ເຂົ້າຮ່ວມຢ່າງພ້ອມພຽງ.

            ໃນພິທີ, ທ່ານ ເຈິ່ນ ແທ໊ງຄວຽດ(Tran thanh khiet)ຫົວໜ້າຄະນະຄຸ້ມຄອງໂຄງການກະຊວງສຶກສາ ແລະກໍ່ສ້າງ ສສ. ຫວຽດນາມ ໄດ້ຂຶ້ນຜ່ານບົດລາຍງານໂຄງການວ່າ: ຄະນະຄຸ້ມຄອງໂຄງການກະຊວງສຶກສາ ແລະກໍ່ສ້າງ ສສ. ຫວຽດນາມ ໄດ້ຮັບມອບໝາຍຈາກລັດຖະມົນຕີ ກະຊວງສຶກສາ ແລະກໍ່ສ້າງ ສສ ຫວຽດນາມ ໃນການເປັນເຈົ້າຂອງໂຄງການລົງທຶນ 4 ໂຄງການກໍ່ສ້າງ. ໂດຍນໍາໃຊ້ທຶນຊ່ວຍເຫຼືອລ້າຈາກລັດຖະບານຫວຽດນາມ ໃຫ້ແກ່ລັດຖະບານລາວປະກອບດ້ວຍ: ໂຄງການກໍ່ສ້າງ-ປັບປຸງ ໂຮງຮຽນ ມັັັັດທະຍົມສົມບູນມິດຕະພາບ ລາວ-ຫວຽດນາມ ໄລຍະ 1 ແລະໄລຍະທີ 2, ໂຄງການສ້ອມແປງຫໍພັກນັກສຶກສາຕ່າງປະເທດ ທີ່ມະຫາວິທະຍາໄລແຫ່ງຊາດ ແລະໂຄງການກໍ່ສ້າງພາກວິຊາພາສາຫວຽດນາມ ທີ່ມະຫາວິທະຍາໄລ ສຸພານຸວົງ; ສຳລັບລາຍລະອຽດຂອງ 3 ໂຄງການທີ່ຈັດພິທີເປີດໃນຄັ້ງນີ້ມີຄື: 1.ໂຄງການກໍ່ສ້າງ-ປັບປຸງ ໂຮງຮຽນ ມັັັັດທະຍົມສົມບູນມິດຕະພາບ ລາວ-ຫວຽດນາມ ໄລຍະ 2 ແມ່ນອາຄານ 1 ຫຼັງ 3 ຊັ້ນ, ໃນນັ້ນ ລວມມີຫ້ອງຮຽນ 12 ຫ້ອງ, ຫ້ອງພັກຄູ 3 ຫ້ອງ, ປັບປຸງຄືນລະບົບທາງຍ່າງ, ເດີ່ນ, ສວນດອກໄມ້ ແລະອາຄານຮຽນຕ່າງໆ, ປ່ຽນໂຕະ-ຕັ່ງ ຈຳນວນ 210 ຊຸດ, ລວມມູນຄ່າການກໍ່ສ້າງ 20,51 ຕື້ດົງ(ສະກຸນເງິນຫວຽດນາມ). ໃນນັ້ນ, ທຶນຊ່ວຍເຫຼືອລ້າໃຫ້ແກ່ລັດຖະບານລາວ 20,19 ຕື້ດົງ(ສະກຸນເງິນຫວຽດນາມ) ເທົ່າກັບ 98,4%ຂອງມູນຄ່າລົງທຶນ, ທຶນສົມທົບຝ່າຍລາວ 0,32 ຕື້ດົງ(ສະກຸນເງິນຫວຽດນາມ) ເທົ່າກັບ 1,6% ໄລຍະເວລາການກໍ່ສ້າງ 14 ເດືອນ; ເລີ່ມແຕ່ ເດືອນ 11/2017 ຫາ ເດືອນ 1/2019; 2. ໂຄງການສ້ອມແປງຫໍພັກນັກສຶກສາຕ່າງປະເທດ ທີ່ມະຫາວິທະຍາໄລແຫ່ງຊາດ ໄດ້ມີການສ້ອມແປງອາຄານທີ່ນຶ່ງ 4 ຊັ້ນ, ເນື້ອທີ 2,450 ຕາແມັດ, ອາຄານທີສອງ 4 ຊັ້ນ, ເນື້ອທີ 2,046 ຕາແມັດ, ອາຄານ 2 ຊັ້ນ ເນື້ອທີ 384 ຕາແມັດ, ປັບປຸງລະບົບສວນທິວທັດອ້ອມຮອບອາຄານ ແລະຍົກພື້ນໃຫ້ສູງຂຶ້ນ, ລວມມູນຄ່າການລົງທຶນ 40,14 ຕື້ດົງ(ສະກຸນເງິນຫວຽດນາມ) ເປັນທຶນຊ່ວຍເຫຼືອລ້າ ຈາກລັດຖະບານຫວຽດນາມທັງໝົດ, ໃຊ້ໄລຍະເວລາໃນການກໍ່ສ້າງ 9 ເດືອນ ເລີ່ມແຕ່ ເດືອນ 11/2017 ຫາເດືອນ 8/2018; 3.ໂຄງການກໍ່ສ້າງພາກວິຊາພາສາຫວຽດນາມ ທີ່ມະຫາວິທະຍາໄລ ສຸພານຸວົງ ເປັນອາຄານຮຽນ 2 ຊັ້ນ, ມີເນື້ອທີ 1,535 ຕາແມັດ ປະກອບດ້ວຍ 7 ຫ້ອງຮຽນ ແລະບັນດາຫ້ອງຕ່າງໆ, ມີຫ້ອງປະຊຸມໃຫຍ່ຂະໜາດ 80 ບ່ອນນັ່ງ ແລະຫ້ອງເຮັດວຽກສຳລັບຄູ, ລວມມູນຄ່າການກໍ່ສ້າງ 24,04 ຕື້ດົງ(ສະກຸນເງິນຫວຽດນາມ), ທຶນຊ່ວຍເຫຼືອລ້າຈາກລັດຖະບານຫວຽດນາມ 23,74 ຕື້ດົງ(ສະກຸນເງິນຫວຽດນາມ) ເທົ່າກັບ 98,7% , ທຶນສົມທົບຈາກລັດຖະບານລາວ ຈຳນວນ 0,30 ຕື້ດົງ; ເທົ່າກັບ 1,3%, ໃຊ້ໄລຍະເວລາໃນການກໍ່ສ້າງ 16 ເດືອນ, ເລີ່ມແຕ່ເດືອນ11/2017 ຫາເດືອນ 3/2019.

           ໃນພິທີ ທ່ານ ຮສ. ປອ. ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະກີລາ, ທ່ານ ຫງວຽນ ບ່າຮຸ່ງ ເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍບັນດາແຂກກໍໄດ້ເປັນກຽດຂຶ້ນປ່ອຍປ້າຍພິທີເປີດໂຄງການດັ່ງກ່າວນີ້ ແລະຖ່າຍພາບຮ່ວມກັນອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ສສ ຫວຽດນາມ ໃຫ້ການຊ່ວຍເຫຼືອໃນໂຄງການກໍ່ສ້າງອາຄານຮຽນ ແລະປັບປຸງຫໍພັກນັກສຶກສາ ແກ່ ສປປ ລາວ

ການຮັບສະໝັກ

ທຶນການສຶກສາ