nuol.edu.la



ກອງປະຊຸມເຜີຍແຜ່ ກົດລະບຽບຂອງຄະນະຊາວໜຸ່ມ ແລະພິທີມອບໃບຍ້ອງຍໍໃຫ້ສະມາຊິກຊາວໜຸ່ມຜູ້ທີ່ເຄື່ອນໄຫວດີເດັ່ນ

1510565779 tmp IMG 0286

           ໃນຕອນບ່າຍວັນທີ 8 ພະຈິກ 2017ນີ້, ຄະນະຊາວໜຸ່ມຮາກຖານ ຄະນະສະຖາປັດຕະຍະກໍາສາດ ມະຫາວິທະຍາໄລແຫ່ງຊາດ ໄດ້ຈັດກອງປະຊຸມເຜີຍແຜ່ກົດລະບຽບ ຂອງຄະນະຊາວໜຸ່ມ ປະຊາຊົນ ປະຕິວັດລາວ ແລະພິທີມອບໃບຍ້ອງຍໍໃຫ້ແກ່ສະມາຊິກຊາວໜຸ່ມຜູ້ທີ່ເຄື່ອນໄຫວດີເດັ່ນ ປະຈໍາປີ 2017, ທີ່ຄະນະ ສະຖາປັດຕະຍະກໍາສາດ, ໂດຍການເປັນປະທານຂອງ ສະຫາຍ ສິນທະວອນ ດາລາວົງ ຄະນະພັກຮາກຖານ, ຮອງຄະນະບໍດີ ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນ ຄະນະສະຖາປັດຕະຍະກໍາສາດ; ໃນພິທີ ມີສະຫາຍ ປອ. ຕຸດາວັນ ໜໍ່ເມືອງເສດ ຮອງເລຂາ ຄະນະບໍລິຫານງານ ຊາວໜຸ່ມປະຊາຊົນ ປະຕິວັດລາວ ກະຊວງສຶກສາທິການ ແລະກີລາ, ສະຫາຍ ພຽງສະໜິດ ຈັນທະວີໄຊ ເລຂາຄະນະຊາວໜຸ່ມ ມະຫາວິທະຍາໄລແຫ່ງຊາດ, ມີເລຂາ, ຮອງເລຂາຄະນະຊາວໜຸ່ມຮາກຖານ, ບັນດາ ສະຫາຍ ສະມາຊິກຊາວໜຸ່ມ ພະນັກງານ, ຄູ-ອາຈານ ແລະນັກສຶກສາທົ່ວຄະນະສະຖາປັດຕະຍະກໍາສາດເຂົ້າຮ່ວມ.

            ໃນພິທີ ສະຫາຍ ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ ໄດ້ຂຶ້ນເຜີຍແຜ່ກົດລະບຽບ ຂອງຄະນະຊາວໜຸ່ມປະຊາຊົນປະຕິວັດວ່າ: ຄະນະຊາວໜຸ່ມ ແມ່ນບຸກຄົນໜຶ່ງທີ່ເປັນແບບເປັນຢ່າງທີ່ດີໃຫ້ແກ່ບຸກຄົນທົ່ວໄປ, ຕ້ອງມີຄວາມກ້າຫານ, ກ້າສະແດງອອກ ສິ່ງສໍາຄັນຕ້ອງໃຫ້ຖືກຕ້ອງຕາມກົດລະບຽບ12 ໝວດ ແລະ 53 ມາດຕາ ຂອງຄະນະຊາວໜຸ່ມ ປະຊາຊົນ ປະຕິວັດລາວ ວາງອອກຢ່າງເຂັ້ມງວດ; ເປັນຕົ້ນແມ່ນການນຸ່ງຖືື ແລະການເອົາໃຈໃສ່ ຕໍ່ການຕຄົ້ນຄວ້າ-ຮໍ່າຮຽນ ເພື່ອພັດທະນາຕົນເອງໃຫ້ມີຄວາມກ້າວໜ້າ ແລະກຽມພ້ອມຮັບໃຊ້ຊາດຢ່າງຫ້າວຫັນ. ໃນໂອກາດດຽວກັນ ຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ ກໍໄດ້ມອບໃບຍ້ອງຍໍໃຫ້ແກ່ ສະມາຊິກຊາວໜຸ່ມຮາກຖານ ຄະນະສະຖາປັດະຍະກໍາສາດ ຜູ້ທີ່ມີຜົນງານເຄື່ອນໄຫວດີເດັ່ນ ປະຈໍາປີ 2017 ຈໍານວນ 104 ສະຫາຍ, ຍິງ 36 ສະຫາຍ, ໂດຍການເປັນກຽດມອບ ຂອງສະຫາຍ ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ.

             ຕອນທ້າຍພິທີ ສະຫາຍ ປອ. ຕຸດາວັນ ໜໍ່ເມືອງເສດ ຮອງເລຂາ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ກະຊວງສຶກສາທິການ ແລະກີລາໄດ້ໂອ້ລົມຕໍ່ທີ່ປະຊຸມສະຫາຍກ່າວບາງຕອນວ່າ: ໃນພາລະກິດການກໍາເນີດ ແລະເຄື່ອນໄຫວຂອງຊາວໜຸ່ມ ປະຊາຊົນປະຕິວັດລາວ ແມ່ນມີມາແຕ່ດົນນານແລ້ວ, ເຊິ່ງເປັນກ້ອນກໍາລັງທີ່ຊ່ວຍເຫຼືອ ໃນພາລະກິດປົກປັກຮັກສາ ແລະພັດທະນາປະເທດຊາດ. ສະນັ້ນ, ສະມາຊິກຊາວໜຸ່ມທຸກຄົນຄວນຮັກສາມູນເຊື້ອດັ່ງກ່າວໄວ້ ແລະນໍາໄປເສີມຂະຫຍາຍໃຫ້ຕົນເອງ ກໍຄືວຽກງານຊາວໜຸ່ມ ປະຊາຊົນ ປະຕິວັດລາວໃຫ້ກ້າວໜ້າຂຶ້ນໄປເລື້ອຍໆ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກອງປະຊຸມເຜີຍແຜ່ ກົດລະບຽບຂອງຄະນະຊາວໜຸ່ມ ແລະພິທີມອບໃບຍ້ອງຍໍໃຫ້ສະມາຊິກຊາວໜຸ່ມຜູ້ທີ່ເຄື່ອນໄຫວດີເດັ່ນ

ການຮັບສະໝັກ

ທຶນການສຶກສາ