nuol.edu.la



ມຊ ຈັດພິທີສະຫຼຸບຊຸດຮຽນຮຸ່ນທີ 17(2013-2017) ແລະເປີດສົກຮຽນໃໝ່ 2017-2018

1510284583 tmp IMG 85344

           ໃນຕອນເຊົ້າ ວັນທີ 8 ພະຈິກ 2017ນີ້, ມະຫາວິທະຍາໄລແຫ່ງຊາດ ໄດ້ຈັດພິທີສະຫຼຸບຊຸດຮຽນ ຮຸ່ນທີ 17(2013-2017) ແລະເປີດສົກຮຽນໃໝ່ 2017-2018 ທີ່ສະໂມສອນໃຫຍ່ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ປອ. ສຸລິອຸດົງ ສູນດາລາ ຮອງລັດຖະມົນຕີກະຊວງ ວິທະຍາສາດ ແລະເຕັກໂນໂລຊີ, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ມີຮອງອະທິການບໍດີ, ມີບັນດາຫົວໜ້າກົມ, ຮອງກົມ, ຄະນະບໍດີ, ຫົວໜ້າຫ້ອງການ, ຜູ້ອໍານວຍການສະຖາບັນ, ສູນ, ໂຮງໝໍ, ໂຮງຮຽນ ອ້ອມຂ້າງ ມະຫາວິທະຍາໄລແຫ່ງຊາດ ເຂົ້າຮ່ວມ.

          ໃນໂອກາດນີ້, ທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ ໄດ້ຂຶ້ນຜ່ານບົດສະຫຼຸບຊຸດຮຽນຮຸ່ນທີ 17(2013-2017) ແລະເປີດສົກຮຽນໃໝ່ 2017-2018 ແລະຜ່ານແຜນການຈັດຕັ້ງປະຕິບັດ ປະຈຳສົກຮຽນ 2017-2018 ວ່າ: ໃນສົກຮຽນ 2016-2017 ນີ້ ມະຫາວິທະຍາໄລແຫ່ງຊາດ ມີຈຳນວນພະນັກງານ-ຄູອາຈານທັງໝົດ 1,892 ຄົນ, ຍິງ 864 ຄົນ, ໃນນີ້ ໄດ້ຮັບນາມມະຍົດເປັນສາດສະດາຈານຈຳນວນ 5 ທ່ານ, ຍິງ 0, ຮອງສາດສະດາຈານ ຈຳນວນ 122 ທ່ານ, ຍິງ 21 ທ່ານ, ອາຈານ 53 ທ່ານ, ຍິງ 17 ທ່ານ ແລະ ຜູ້ຊ່ວຍອາຈານ ຈຳນວນ 6 ທ່ານ, ຍິງ 4 ທ່ານ; ໃນດ້ານວຽກງານວິຊາສະເພາະ ໃນສົກຮຽນ 2016-2017 ມະຫາວິທະຍາໄລແຫ່ງຊາດ ໄດ້ດຳເນີນ ການຮຽນ-ການສອນໃນຫຼາຍລະດັບວິຊາ, ມີທັງໝົດ 171 ຫຼັກສູດຄື: ປະລິນຍາເອກ 3 ຫຼັກສູດ, ປະລິນຍາໂທ 44 ຫຼັກສູດ, ປະລິນຍາຕີ 100 ຫຼັກສູດ (ລະບົບ 4 ປີ 98 ຫຼັກສູດ, ລະບົບ 5 ປີ 1 ຫຼັກສູດ ແລະລະບົບ 6 ປີ 1 ຫຼັກສູດ) ແລະຫຼັກສູດຕໍ່ເນື່ອງປະລິນຍາຕີ 23 ຫຼັກສູດ ແລະອະນຸປະລິນຍາ 1 ຫຼັກສູດ. ມີນັກສຶກສາທັງໝົດ 21,247 ຄົນ, ຍິງ 9,047 ຄົນ; ໃນນັ້ນ ມີນັກສຶກສາໃນແຜນຈຳນວນ 4,802 ຄົນ, ຍິງ 2,272 ຄົນ (ມີນັກສຶກສາຕ່າງປະເທດ 214 ຄົນ, ຍິງ 79 ຄົນ), ນັກສຶກສາຈ່າຍຄ່າຮຽນ 16,445 ຄົນ, ຍິງ 6,775 ຄົນ (ນັກສຶກສາຕ່າງປະເທດ 248 ຄົນ, ຍິງ 93 ຄົນ); ດ້ວຍຄວາມເອົາໃຈໃສ່ໃນການສິດສອນຂອງບັນດາອາຈານ ບວກກັບຄວາມຫ້າວຫັນເອົາໃຈໃສ່ໃນການຄົ້ນຄວ້າສຶກສາຮໍ່າຮຽນ ແລະພັດທະນາຕົນເອງໃຫ້ເປັນຄົນເກັ່ງ ມີຄວາມຮູ້-ຄວາມສມາດຂອງນັກສຶກສາ; ສະນັ້ນ, ໃນສົກຮຽນທີ່ຜ່ານມາ ມະຫາວິທະຍາໄລແຫ່ງຊາດ ມີນັກສຶກສາທີ່ໄດ້ຮັບປະກາສະ ນີຍະບັດກຽດນິຍົມ ແລະໄດ້ຮັບໃບຍ້ອງຍໍຂັ້ນອະທິການບໍດີ ມະຫາວິທະຍາໄລແຫ່ງຊາດ ຈຳນວນ 46 ຄົນ, ຍິງ 25 ຄົນ ເທົ່າກັບ 54,34% ເມື່ອທຽບໃສ່ສົກຮຽນທີ່ຜ່ານມາແມ່ນເພີ່ມຂຶ້ນ 12 ຄົນ. ນອກນັ້ນ ຍັງມີນັກສຶກສາສາທີ່ມີຜົນງານດີເດັ່ນຮອບດ້ານ ຈຳນວນ 610 ຄົນ, ຍິງ 203 ຄົນ, ເດັ່ນການຮຽນ 516 ຄົນ, ເດັ່ນເຄື່ອນໄຫວກິດຈະກຳ 89 ຄົນ ແລະເດັ່ນການເຄື່ອນໄຫວດ້ານກີລາ 175 ຄົນ ໄດ້ຮັບການຍ້ອງຍໍຂັ້ນຄະນະວິຊາ; ຄຽງຄູ່ກັບການເຄື່ອນໄຫວວຽກງານວິຊາການ ມະຫາວິທະຍາໄລແຫ່ງຊາດ ຍັງໄດ້ສຸມໃສ່ການສ້າງແຜນພັດທະນາຈາກ 6 ແຜນງານ 31 ໂຄງການເປັນແຜນຈັດຕັ້ງປະຕິບັດລະອຽດ (ແຜນປະຈຳປີ) ແລະໄດ້ລິເລີ່ມປະຕິບັດຢ່າງຕັ້ງໜ້າ.      

       ການຈັດຕັ້ງປະຕິບັດ ປະຈຳສົກສຶກສາ 2017-2018 ມະຫາວິທະຍາໄລແຫ່ງຊາດ ຈະສືບຕໍ່ຈັດຕັ້ງປະຕິບັດແຕ່ລະແຜນງານທີ່ໄດ້ວາງໄວ້ໃຫ້ໄດ້ຮັບຜົນເພື່ອພັດທະນາ ມະຫາວິທະຍາໄລແຫ່ງຊາດ ໃຫ້ກ້າວໜ້າຕາມທິດຍືນຍົງ ເປັນຕົ້ນ ດ້ານວຽກງານແນວຄິດການເມືອງ, ການປັບປຸງກົງຈັກການຈັດຕັ້ງ, ວຽກງານບໍລິຫານສັງລວມ, ການວາງແຜນພັດທະນາການສຶກສາ, ການຄຸ້ມຄອງການເງິນ ແລະຊັບສິນ ລວມທັງການພົວພັນຮ່ວມມືກັບສາກົນໃຫ້ມີໝາກຜົນ ແລະແໜ້ນແຟ້ນຂຶ້ນຕື່ມ.

          ໃນໂອກາດສໍາຄັນນີ້, ທ່ານ ຮສ. ປອ. ກອງສີ ແສງມະນີ ກໍໄດ້ເປັນກຽດຂຶ້ນໂອ້ລົມຕໍ່ພິທີວ່າ: ດັ່ງທີ່ໄດ້ຮັບຟັງການຜ່ານບົດຫຼຸບເຫັນວ່າ ມະຫາວິທະຍາໄລແຫ່ງຊາດ ໄດ້ຮັບຜົນສຳເລັດຢ່າງຫຼວງຫຼາຍ, ເຊິ່ງມັນໄດ້ສະແດງໃຫ້ເຫັນບັນດາຈໍານວນ ນັກສຶກສາທີ່ໄດ້ຮັບ ປະກາສະນີຍະບັດກຽດນິຍົມ(ໃບປະກາດແດງ)ມີຈຳນວນຫຼາຍຫວ່າປີທີ່ຜ່ານມາ, ຄວາມຮັກແພງລະຫວ່າງຄູ-ອາຈານ ແລະນັກສຶກສາ ກໍປຽບເໜືອນ ອ້າຍ-ເອື້ອຍ ກັບນ້ອງ, ພໍ່ແມ່ ກັບລູກ ທີ່ຍາມໃດກໍມີຄວາມຜູກພັນ ໝັ້ນແກ່ນເຊິ່ງກັນ ແລະກັນ. ໃນສົກຮຽນນີ້ ນັກສຶກສາຮຸ່ນທີ 17 ກໍປຽບສະເໜືອນຮຸ່ນສືບທອດທີ່ຈະສານຕໍ່ພາລະກິດສ້າງສາພັດທະນາປະເທດຊາດໃຫ້ມີບາດກ້າວຂະຫຍາຍຕົວ, ດັ່ງຄຳເວົ້າ ຂອງທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ກ່າວວ່າ: ພວກເຮົາຕ້ອງລິເລີ່ມດ້ວຍການປະຕິບັດ 3 ເປີດຄື: 1.ເປີດປະຕູໃຫ້ກວ້າງ, 2. ເປີດສິ່ງກີດຂວາງ ກີດກັ້ນການພັດນາ ແລະ3.ເປີດໃຈດ້ວຍຄວາມຮັກແພງ ຈິງໃຈ, ມີໄມຕີຈິດມິດຕະພາບ; ສະນັ້ນ ນອກຈາກການປະຕິບັດຕາມນະໂຍບາຍ 4 ບຸກທະລຸແລ້ວ ລັດຖະບານຍັງໄດ້ກຳນົດເອົາ 3 ເປີດເປັນອີກໜຶ່ງແນວທາງນະໂຍບາຍ ໃນຂະແໜງການສຶກສາກໍເຊັ່ນດຽວກັນ. ຂະນະດຽວກັນ ທ່ານ ໄດ້ສະແດງຄວາມຍິນດີ ກັບບັນດານັກສຶກສາທີ່ສຳເລັດການສຶກສາໃນສົກຮຽນ 2016-2017ທັງໝົດ ພ້ອມທັງຮຽກຮ້ອງໃຫ້ຜູ້ສໍາເລັດການສຶກສາ ກໍຄືນັກສຶກສາທີ່ຈົບຈາກ ມະຫາວິທະຍາໄລແຫ່ງຊາດທຸກຄົນຈົ່ງຕັ້ງໜ້າປະຕິບັດໜ້າທີ່ຂອງຕົນໃຫ້ປະສົບຜົນສຳເລັດ ແລະມະຫາວິທະຍາໄລແຫ່ງຊາດເອງ ກໍໃຫ້ເອົາໃຈໃສ່ຕັ້ງໜ້າປະຕິບັດຕາມແຜນງານເປົ້າໝາຍທີ່ໄດ້ວາງໄວ້ໃຫ້ປະກົດຜົນເປັນຈິງ. ຈາກນັ້ນ, ທ່ານ ສຈ. ປອ. ສົມສີ ຍໍພັນໄຊ ກໍເປັນກຽດຂຶ້ນມອບໃບຍ້ອງຍໍໃຫ້ແກ່ຕາງໜ້ານັກສຶກສາທີ່ໄດ້ຮັບໃບປະກາສະນີຍະບັດກຽດນີຍົມໃນສົກສຶກສາ 2016-2017 ອີກດ້ວຍ.

         

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ຈັດພິທີສະຫຼຸບຊຸດຮຽນຮຸ່ນທີ 17(2013-2017) ແລະເປີດສົກຮຽນໃໝ່ 2017-2018

ການຮັບສະໝັກ

ທຶນການສຶກສາ