nuol.edu.la



ກິດຈະກຳການແຂ່ງຂັນ ວິເຄາະຂໍ້ມູນວິທະຍາສາດ ໂດຍການນຳໃຊ້ໂປແກຣມ SAP

1510049670 tmp IMG 9906

ໃນຕອນເຊົ້າ ວັນທີ 3 ພະຈິກ 2017 ທີ່ຜ່ານມາ, ມະຫາວິທະຍາໄລແຫ່ງຊາດ ໄດ້ຈັດກິດຈະກຳ ການແຂ່ງຂັນ ວິເຄາະຂໍ້ມູນວິທະຍາສາດ ໂດຍການນຳໃຊ້ໂປແກຣມ SAP ທີ່ຫ້ອງປະຊຸມ ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ, ໂດຍການເປັນປະທານຂອງ ທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ,  ທ່ານ ILan Asqolani ປະທານມູນນິທິ Asean Foundation, ທ່ານ Eugene Ho ຫົວໜ້າຫ້ອງການຮ່ວມມືສາກົນ SAP ອາຊີຕາເວັນອອກສ່ຽງໃຕ້, ມີບັນດາ ແຂກຖືກເຊີນ, ພະນັກງານ-ຄູອາຈານ ແລະນັກສຶກສາເຂົ້າຮ່ວມ.

ໂອກາດນີ້, ທ່ານ ຮສ. ປອ.​ ອຸດົມ ພອນຄໍາເພັງ ໄດ້ເປັນກຽດກ່າວເປີດພິທີ, ທ່ານໄດ້ກ່າວບາງຕອນວ່າ: ຂ້າພະເຈົ້າໃນນາມຕາງໜ້າໃຫ້ແກ່ ມະຫາວິທະຍາໄລແຫ່ງຊາດ ມີຄວາມຮູ້ສຶກເປັນກຽດ ແລະພາກພູມໃຈຢ່າງຍິ່ງ ທີ່ມະຫາວິທະຍາໄລແຫ່ງຊາດ ກໍຄືໃນນາມປະເທດລາວ ທີ່ໄດ້ຖືກເລືອກເປັນອີກໜຶ່ງເຂົ້າຮ່ວມການແຂ່ງຂັນວິເຄາະຂໍ້ມູນວິທະຍາສາດໃນລະດັບອາຊຽນ, ຖືເປັນບາດກ້າວອັນຍິ່ງໃຫຍ່ ຂອງມະຫາວິທະຍາໄລແຫ່ງຊາດທີ່ຈະໄດ້ສົ່ງນັກສຶກສາເຂົ້າຮ່ວມແຂ່ງຂັນໃນລະດັບພາກພື້ນ, ເພື່ອໃຫ້ນັກສຶກສາມີຄວາມຮູ້ທາງດ້ານການນໍາໃຊ້ໂປແກຣມເຂົ້າໃນການວິເຄາະຂໍ້ມູນທີ່ມີຄວາມແມ່ນຍໍາ, ຖືກຕ້ອງ ແລະຊັດເຈນ, ພ້ອມທັງເປັນການເປີດກວ້າງໃຫ້ນັກສຶກສາທີ່ເຂົ້າຮ່ວມກິດຈະກຳໄດ້ຮຽນຮູ້ກ່ຽວກ່ຽວເທັກໂນໂລຊີຫຼາຍຂຶ້ນຕື່ມອີກ.

          ສຳລັບຫົວຂໍ້ທີ່ນັກສຶກສາໄດ້ນຳສະເໜີ ປະກອບມີຫຼາຍຢ່າງໂດຍອີງໃສ່ສະພາບພູມິປະເທດ ແລະວິຖີຊີວິດການເປັນຢູ່ ຂອງປະຊາຊົນໂດຍກົງ, ໃນການແຂ່ງຂັນຄັ້ງນີ້ ມີນັກສຶກສາ 10 ທີມ; ທີມລະ 2 ຄົນ, ທີ່ມາຈາກ 7 ຄະນະວິຊາ ເຂົ້າຮ່ວມແຂ່ງຂັນຄື: ຄະນະວິທະຍາສາດ ທຳມະຊາດ, ອັກສອນສາດ, ເສດຖະສາດ ແລະບໍລິຫານທຸລະກິດ, ນິຕິສາດ ແລະລັດຖະສາດ, ວິສະວະກຳສາດ, ວິທະຍາສາດປ່າໄມ້ ແລະວິທະຍາສາດສັງຄົມ. ຜ່ານການແຂ່ງຂັນທີມຊະນະເລີດໄດ້ແກ່ທີມ TONKA DATA ຈາກຄະນະວິສະວະກໍາສາດ ໄດ້ຮັບເງິນຮາງວັນ 800 ເອີໂຣ ພ້ອມທັງໄດ້ເປັນຕົວແທນຈາກປະເທດລາວເຂົ້າຮ່ວມການແຂ່ງຂັນໃນລະດັບອາຊຽນ ທີ່ນະຄອນຫຼວງຈາກາຕ້າ ປະເທດອິນໂດເນເຊຍ, ຮອງຊະນະເລີດອັນດັບສອງໄດ້ແກ່ທີມ Green Rangers ຈາກຄະນະ ວິທະຍາສາດປ່າໄມ້ ໄດ້ຮັບເງິນຮາງວັນ 400 ເອີໂຣ ແລະຮອງຊະນະເລີດອັນດັບສາມ ໄດ້ແກ່ທີມ The Courage ຈາກຄະນະ ວິສະວະກຳສາດ ໄດ້ຮັບເງິນຮາງວັນ 200 ເອີໂຣ. ການແຂ່ງຂັນວິເຄາະຂໍ້ມູນວິທະຍາສາດໃນລະດັບອາຊຽນແມ່ນມີ 6 ປະເທດເຂົ້າຮ່ວມການແຂ່ງຂັນຄື: ອິນໂດເນເຊຍ, ສິງກະໂປ, ຟິລິບປິນ, ມຽນມາ, ມາເລເຊຍ ແລະລາວ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກິດຈະກຳການແຂ່ງຂັນ ວິເຄາະຂໍ້ມູນວິທະຍາສາດ ໂດຍການນຳໃຊ້ໂປແກຣມ SAP

ການຮັບສະໝັກ

ທຶນການສຶກສາ