nuol.edu.la



ຄສປ ຈັດພິທີສະຫຼຸບສົກຮຽນ

1505207398 tmp IMG 0282

             ໃນວັນທີ 9 ກັນຍາ 2017ນີ້, ຄະນະ ສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ໄດ້ຈັດພິທີສະຫຼຸບສົກຮຽນ 2016-2017 ແລະຜ່ານແຜນການ 2017-2018 ຂຶ້ນທີ່ຫ້ອງປະຊຸມຄະນະ ສະປັດຕະຍະກຳສາດ, ໂດຍການເປັນປະທານຂອງທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ປອ. ດາສັກ ອຸເທນທະປັນຍາ ຄະນະບໍດີ ຄະນະ ສະປັດຕະຍະກຳສາດ, ມີທ່ານຮອງຄະນະບໍດີ, ຫົວໜ້າຫ້ອງການ, ຫົວໜ້າພາກວິຊາ, ພະນັກງານ-ຄູອາຈານ ແລະນັກສຶກສາຄະນະດັ່ງກ່າວເຂົ້າຮ່ວມ.

            ໃນພິທີ, ທ່ານ ຮສ. ບຸນຖະໄຫວ ແກ້ວປັນຍາ ຮອງຄະນະບໍດີ ຄະນະ ສະຖາປັດຕະຍະກຳສາດ ໄດ້ຂຶ້ນຜ່ານບົດສະຫຼຸບປະຈຳສົກສຶກສາ 2016-2017 ທີ່ຜ່ານມາວ່າ: ຄະນະ ສະຖາປັດຕະຍະກຳສາດ ມີພະນັກງານ-ຄູອາຈານ ທັງໝົດ 73 ຄົນ, ຍິງ 24 ຄົນ; ຄະນະ ສະຖາປັດຕະຍະກຳສາດ ປະກອບມິີ 4 ພາກວິຊາຄື: ພາກວິຊາ ສະຖາປັດຕະຍະກຳສາດ, ພາກວິຊາ ສະພາບແວດລ້ອມຜັງເມືອງ, ພາກວິຊາ ອອກແບບຜະລິດຕະພັນ-ຕົບແຕ່ງ ແລະ ພາກວິຊາ ວິທະຍາການອາຄານ; ໃນສົກສຶກສາ 2016-2017 ມີນັກສຶກສາ ຈົບຊັ້ນ ປະລິນຍາຕີຈຳນວນ 175 ຄົນ, ຍິງ 53 ຄົນ, ລະດັບປະລິນຍາໂທ ຈຳນວນ 16 ຄົນ, ຍິງ 2 ຄົນ, ມີນັກສຶກສາ ໄດ້ຮັບໃບຍ້ອງຍໍຂັ້ນຄະນະບໍດີ ປະເພດ I ຈໍານວນ 13 ຄົນ, ປະເພດ II ຈຳນວນ 21 ຄົນ ແລະປະເພດ III ຈຳນວນ 4 ຄົນ; ໃນສົກສຶກສາທີ່ຜ່ານມາ ຄະນະສະຖາປັດຕະຍະກຳສາດ ໄດ້ຈັດຕັ້ງການຮຽນ-ການສອນ ເປັນປົກກະຕິຕາມທິດທາງແຜນການສອນຂອງປະຕິທິນ ການຮຽນ-ການສອນ ທີ່ມະຫາວິທຍາໄລແຫ່ງຊາດທີ່ໄດ້ວາງອອກ, ພ້ອມນັ້ນ ຍັງໄດ້ມີການຈັດສົ່ງນັກສຶກສາລົງຝຶກງານ ຈຳນວນ 25 ບໍລິສັດ, ມີນັກສຶກສາ 135 ຄົນ ແລະສົ່ງນັກສຶກສາໄປທັດສະນະແລກປ່ຽນ ກັບບັນດາບໍລິສັດ ແລະມະຫາວິທະຍາໄລຕ່າງປະເທດ, ໄດ້ມີການດຳເນີນການກະກຽມສ້າງຫຼັກສູດໃນລະດັບປະລິນຍາໂທ ສາຂາ ວິທະຍາການອາຄານ ແລະປະລິນຍາຕີ ສາຂາ ອະສັງຫາລິມະຊັບ. ນອກນັ້ນ, ຄະນະ ສະຖາປັດຕະຍະກໍາສາດ ຍັງໄດ້ຈັດການແຂ່ງຂັນອອກແບບໃນແຕ່ລະປີ ເພື່ອໃຫ້ນັກສຶກສາໄດ້ສົ່ງຜົນງານຂອງຕົນເອງເຂົ້າຮ່ວມແຂ່ງຂັນໃນລະດັບຕ່າງໆ; ສຳລັບແຜນງານ ປີ 2017-2018 ນີ້ ຄະນະ ສະປັດຕະຍະກຳສາດ ຈະສືບຕໍ່ຈັດຕັ້ງການຮຽນ-ການສອນຕາມຫຼັກສູດທີ່ວາງໄວ້ ຄຽງຄູ່ກັນນັ້ນ, ໃນການດໍາເນີນການຂຽນບົດຈົບຊັ້ນຂອງນັກສຶກສາແມ່ນຈະສືບຕໍ່ເອົາໃຈໃສ່ໃຫ້ຄຳແນະນຳເພື່ອໃຫ້ບົດຈົບຊັ້ນ ທີ່ນັກສຶກສາຂຽນນັ້ນ ໄດ້ຄຸນນະພາບ ທຽບເທົ່າກັບພາກພື້ນ ແລະສາກົນ ໂດຍຜ່ານການຖອດຖອນບົດຮຽນທີ່ຕົນເອງໄດ້ສຶກສາຮໍ່າຮຽນມາປະກອບໃສ່ເນື້ອໃນບົດຈົບຊັ້ນ.

          ໃນໂອກາດສໍາຄັນນີ້, ທ່ານ ຮສ. ປອ. ພຸດ ສິມມາລາວົງ ໄດ້ກ່າວໂອ້ລົມຕໍ່ພິທີ, ເຊິ່ງທ່ານໄດ້ກ່າວເນັ້ນໜັກແກ່ບັນດານັັັກສຶກສາທີ່ຈົບໃໝ່ວ່າ: ໃຫ້ບັນດິດໃໝ່ ທັງຫຼາຍນຳເອົາຄວາມຮູ້ ແລະຄວາມສາມາດຂອງຕົນເອງທີ່ໄດ້ສຶກສາ-ຮໍ່າຮຽນມາ ປະກອບສ່ວນ ເຂົ້າໃນການພັດທະນາສ້າງສາປະເທດຊາດ ໃຫ້ມີຄວາມຮັ່ງມີຜາສຸກ ແລະຈະເລີນຮຸ່ງເຮືອງ, ເຖິງຈະຈົບຈາກສະຖານການສຶກສາໄປແລ້ວກໍຕາມ ທຸກຄົນກໍຖືເປັນສ່ວນໜຶ່ງ ຂອງຄະນະສະຖາປັດຕະຍະກຳສາດ ເວົ້າລວມ; ເວົ້າສະເພາະ ກໍຄືມະຫາວິທະຍາໄລແຫ່ງຊາດ, ໃຫ້ທຸກຄົນຈົ່ງເປັນແບບຢ່າງ ແລະເປັນແວ່ນແຍງທີ່ດີໃຫ້ບັນດານັກສຶກສາຮຸ່ນນ້ອງທີ່ກໍາລັງສຶກສາຢູ່.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄສປ ຈັດພິທີສະຫຼຸບສົກຮຽນ

ການຮັບສະໝັກ

ທຶນການສຶກສາ