nuol.edu.la



ກະຊວງສຶກສາທິການ ແລະກີລາ ແລະມະຫາວິທະຍາໄລແຫ່ງຊາດ ເຊື່ອມຊືມ 3 ວັນປະຫວັດສາດ

1501834944 tmp IMG 7562

ຫ້ອງການກະຊວງສຶກສາທິການ ແລະກີລາ ຮ່ວມກັບ ມະຫາວິທະຍາໄລແຫ່ງຊາດ ຈັດກອງປະຊຸມປາຖະກະຖາ 3 ວັນປະຫວັດສາດ ກໍຄືວັນຄ້າຍວັນເກີດຂອງປະທານ ສຸພານຸວົງ ຄົບຮອບ 108 ປີ, ວັນເຊັນສົນທິສັນຍາມິດຕະພາບ ແລະການຮ່ວມມືລາວ-ຫວຽດນາມ ຄົບຮອບ 40 ປີ ແລະວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ. ພີທີດັ່ງກ່າວ ໄດ້ຈັດຂຶ້ນ ໃນວັນທີ 24 ກໍລະກົດ 2017 ທີ່ຜ່ານມາ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໃຫ້ກຽດປາຖະກະຖາໂດຍທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດປະທານກຳມະການຮ່ວມມືລາວ-ຫວຽດນາມ, ເຂົ້າຮ່ວມຮັບຟັງມີທ່ານ ຮສ. ປອ. ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ລີຕູ້ ບົວປາວ ອະດີດຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ,ບັນດາທ່ານ ຮອງອະທິການບໍດີ, ບັນດາສະຫາຍຄະນະພັກ ມະຫາວິທະຍາໄລແຫ່ງຊາດ, ຕາງໜ້າສະຖານທູດ ສສ ຫວຽດນາມ ປະຈຳລາວ, ສະມາຄົມມິດຕະພາບຫວຽດນາມ-ລາວ, ຄະນະໜ່ວຍພັກທີ່ຂຶ້ນກັບກະຊວງສຶກສາທິການ ແລະກີລາ ຕະຫຼອດຮອດສະມາຊິກພັກ, ບັນດາພະນັກງານ-ຄູອາຈານ ແລະຕົວແທນນັກສຶກສາ ທົ່ວມະຫາວິທະຍາໄລແຫ່ງຊາດເຂົ້າຮ່ວມ.

ໃນໂອກາດດັ່ງກ່າວ, ທ່ານ ສົມສະຫວາດ ເລັ່ງສະຫວັດ ໄດ້ຫວນຄືນຜົນງານ ແລະຄຸນງາມຄວາມດີ ຂອງປະທານສຸພານຸວົງ ວ່າ: ຄຸນລັກສະນະທີ່ພົ້ນເດັ່ນແມ່ນເປັນຜູ້ນຳທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລາອາດຫານ ຍາມໃດກໍໄດ້ຍົກສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ເອື້ອເຟື້ອເພື່ອແຜ່ຮັກແພງມິດສະຫາຍຢ່າງຈິງໃຈ, ດຳລົງຊີວິດຢ່າງຊື່ສັດບໍລິສຸດ ແລະງ່າຍດາຍ; ປະທານ ສຸພານຸວົງ ດຳລົງຊີວິດ ແບບງ່າຍດາຍ, ກະທັດຮັດ ເຊິ່ງທ່ານເປັນຄົນດຸໝັ່ນຂະຫຍັນພຽນ, ປະຢັດມັດທະຍັດ, ບໍ່ຖືຕົວ, ນິ້ມນວນ, ມີນິໄສຄ່ຽມຄົມ, ມີແຜນການໃຫ້ແກ່ຕົນເອງ ແລະທ່ານໄດ້ກາຍເປັນຜູ້ອອກແຮງງານເກັ່ງທາງດ້ານມັນສະໝອງ ແລະທາງກາຍ ກໍຄືເປັນນັກວິສະວະກອນຂົວທາງ, ເປັນຜູ້ນຳທີ່ເປັນທີ່ເຄົາລົບຮັກ ແລະນັບຖື ຂອງປະຊາຊົນລາວບັນດາເຜົ່າ. ນອກນຈາກນີ້, ປະທານ ສຸພານຸວົງ ຍັງເປັນຜູ້ນຳທີ່ປະເສີດຂອງຊາດ, ເປັນລູກກະຕັນຍູຂອງພໍ່-ແມ່ພີ່ນ້ອງ, ເປັນປູ່, ເປັນພໍ່ເຖົ້າທີ່ແສນເຄົາລົບຮັກ ແລະແສນດີໃນຄອບຄົວໃຫຍ່ ສຸພານຸວົງ, ເປັນແວ່ນແຍງອັນເຫຼື້ອມໃສແກ່ທຸກໆຄົນໃນຄອບຄົວ.

ຂະນະດຽວກັນ, ໃນທີ່ປະຊຸມ ຍັງໄດ້ເຜີຍແຜ່ເອກະສານ ວັນເຊັນສົນທິສັນຍາມິດຕະພາບ ແລະການຮ່ວມມືລາວ-ຫວຽດນາມຄົບຮອບ 40 ປີ ແລະວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ, ໂດຍໄດ້ເວົ້າເຖິງໝາກຜົນອັນພົ້ນເດັ່ນ-ສາຍພົວພັນການຮ່ວມມືມິດຕະພາບ ແລະການຮ່ວມມືຢ່າງຮອບດ້ານຂອງສອງປະເທດລາວ-ຫວຽດນາມ ໃນໄລຍະຜ່ານມາ ແລະສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະເພີ່ມທະວີຂຶ້ນເລື້ອຍໆ, ຕັ້ງໜ້າເປັນເຈົ້າການໃນຄົ້ນຄວ້າເຊື່ອມຊຶມ ແລະຈັດຕັ້ງປະຕິບັດສົນທິສັນຍາ ແລະຂໍ້ຕົກລົງຕ່າງໆ, ພ້ອມທັງເອົາໃຈໃສ່ຄົ້ນຄວ້າປັບປຸງລະບຽບການ ແລະກົນໄກໃຫ້ແທດເໝາະກັບການຮ່ວມມືພິເສດ ແລະມີລັກສະນະເຊື່ອມໂຍງພາກພື້ນ ແລະສາກົນ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກະຊວງສຶກສາທິການ ແລະກີລາ ແລະມະຫາວິທະຍາໄລແຫ່ງຊາດ ເຊື່ອມຊືມ 3 ວັນປະຫວັດສາດ

ການຮັບສະໝັກ

ທຶນການສຶກສາ