nuol.edu.la



ມຊ ຈັດພິທີເຜີຍແຜ່ຜົນງານການຄົ້ນຄວ້າທາງວິທະຍາສາດ ເນື່ອງໃນໂອກາດວັນແມ່ຍິງລາວຄົບຮອບ 62 ປີ

1500878107 tmp IMG 8128

           ເພື່ອ​ເປັນ​ການ​ຫວນ​ຄືນ​ປະຫວັດ​ມູນ​ເຊື້ອການ​ກໍາ​ເນີ​ດ, ​ເຕີບ​ໃຫຍ່​ຂະຫຍາຍຕົວ ​ແລະ ຜົນງານ​ການ​ເຄື່ອນ​ໄຫວ​ຂອງ​ອົງການ​ຈັດ​ຕັ້ງ​ສູນ​ກາງ​ສະຫະພັນ​ແມ່ຍິງ ​ແລະ​ແມ່ຍິງ​ລາວ​ບັນດາ​ເຜົ່າ ​ທີ່​ໄດ້​ອຸທິຕົນ​ເພື່ອ​ ພາລະກິດ​ປົດ​ປ່ອຍ​ຊາດ​ ແລະປົກ​ປັກ​ຮັກ​ສາ​, ສ້າງສາ ​ພັດທະນາ​ປະ​ເທດ​ຊາດ​ກໍ​ຄື​ພາລະ​ກິດ​ພັດທະນາ​ແມ່ຍິງ ​ຕະຫລອດ​ໄລຍະ 62 ປີ (20 ກໍລະກົດ 1955 – 20 ກໍລະກົດ 2017), ໃນວັນທີ 18 ກໍລະກົດ 2017 ນີ້, ມະຫາວິທະຍາໄລແຫ່ງຊາດໄດ້ຈັດພິທີເຜີຍແຜ່ຜົນງານການຄົ້ນຄວ້າທາງດ້ານວິທະຍາສາດ, ໂດຍການເປັນປະທານຂອງທ່ານ ນາງ ບົວຄຳ ດາວສະຫວັນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງສຶກສາທິການ ແລະກີລາ, ທ່ານ ນາງ ວຽງສຸກ ແພງບຸບຜາ ປະທານສະຫະພັນແມ່ຍິງ ມະຫາວິທະຍາໄລແຫ່ງຊາດ, ມີບັນດາຫົວໜ້າ-ຮອງຫົວໜ້າ ຫ້ອງການ, ຄະນະບໍລິຫານງານຊາວໜຸ່ມ, ກຳມະບານ, ປະທານສະຫະພັນແມ່ຍິງແຕ່ລະຮາກຖານ ແລະຕາງໜ້າສະມາຊິກແມ່ຍິງແຕ່ລະຮາກຖານ ເຂົ້າຮ່ວມຈຳນວນ 250 ຄົນ.

          ໃນໂອກາດນີ້ທ່ານ ນາງ ວຽງສຸກ ແພງບຸບຜາ ປະທານສະຫະພັນແມ່ຍິງ ມະຫາວິທະຍາໄລແຫ່ງຊາດ, ໄດ້ຂຶ້ນເລົ່າປະຫວັດຄວາມເປັນມາ ແລະຄວາມສຳຄັນຂອງວັນສ້າງຕັ້ງແມ່ຍິງລາວ ເຊິ່ງບາງຕອນທ່ານກ່າວວ່າ: ຕະຫຼອດໄລຍະເວລາທີ່ຜ່ານມາ ແມ່ຍິງລາວໄດ້ເຮັດພາລະກິດຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານຄຽງບ່າຄຽງໄຫຼ່ກັບເພດຊາຍຢ່າງເດັດດ່ຽວ ເພື່ອຕ້ານພວກສັກດີນາ ແລະພວກລ່າເມືອງຂຶ້ນແບບເກົ່າ ດ້ວຍຄວາມອົງອາດກ້າຫານ, ດັ່ງນັ້ນ ການຈັດຕັ້ງພິທີ​ສະ​ເຫຼີມ ສະຫຼອງ ​ວັນ​ສ້າງຕັ້ງສະຫະພັນ​ແມ່ຍິງ​ລາວ​ໃນ​ຄັ້ງນີ້ ​ແມ່ນ​ມີ​ຄວາມໝາຍຄວາມສຳຄັນ ​ເປັນ​ຢ່າງ​ຍິ່ງ , ເພື່ອ​ແນ່​ໃສ່​ໃຫ້ສະມາຊິກ​ແມ່ຍິງ ​ແລະ​ເອື້ອຍ​ນ້ອງ​ແມ່ຍິງ ໃນມະຫາວິທະຍາໄລແຫ່ງຊາດ​ໄດ້​ຮັບ​ຮູ້ ​ແລະ​ເຂົ້າ​ໃຈ​ເລິກ​ເຊິ່ງໃນການແກ້ໄຂບັນຫາຄວາມບໍ່ສະເໜີພາບລະຫວ່າງ ຍິງ-ຊາຍ, ບົດບາດແມ່ຍິງໃນສັງຄົມ; ດັ່ງນັ້ນ, ພັກ-ລັດເຮົາໄດ້ສຸມໃສ່ວຽກງານການພັດທະນາຄວາມກ້າວໜ້າຂອງແມ່ຍິງ ໂດຍມີ 3 ກົງຈັກການຈັດຕັ້ງຂອງລັດເປັນຜູ້ນຳພາປະກອບດ້ວຍ: ຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ ເຮັດໜ້າທີ່ເປັນເລຂາທິການໃຫ້ລັດຖະບານ, ສູນກາງສະຫະພັນແມ່ຍິງລາວເປັນອົງການຈັດຕັ້ງຂອງພັກ, ສະມາຊິກສະພາແຫ່ງຊາດເພດຍິງແຕ່ລະເຂດ ເປັນກົນໄກການຈັດຕັ້ງປະຕິບັດ ໃນການສົ່ງເສີມຄວາມເທົ່າທຽມລະຫວ່າງຍິງ-ຊາຍ.

          ໃນໂອກາດອັນສໍາຄັນນີ້, ໃນພິທີ ຍັງໄດ້ມີການນຳສະເໜີຜົນງານການຄົ້ນຄວ້າວິທະຍາສາດ ໃນຫົວຂໍ້ “ການປະຕິບັດຄວາມສະເໜີພາບສະຫວ່າງຍິງ-ຊາຍ” ຂອງທ່ານ ປອ. ນາງ ກາບມະນີວັນ ໂພໄຊ ແລະບົດຄົ້ນຄວ້າໃນຫົວຂໍ້ “ສຶກສາພຶດຕິກຳການຮຽນຂອງນັກຮຽນຍິງໃນ ມຊ” ຂອງທ່ານ ຮສ. ປອ. ນາງ ພິມໂພ ຫຼວງລາດ. ນອກນັ້ນ ໃນພິທີ ທ່ານ ຮສ. ປອ. ອານຸລົມ ວິໄລພອນ ປະທານສະຫະພັນກຳມະບານ ມະຫາວິທະຍາໄລແຫ່ງຊາດ ແລະທ່ານ ອຈ.ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ ກໍໄດ້ຂຶ້ນກ່າວຄຳອວຍພອນແກ່ບັນດາເອື້ອຍນ້ອງແມ່ຍິງໃນທົ່ວ ມະຫາວິທະຍາໄລແຫ່ງຊາດ ພ້ອມທັງມອບກະຕ່າດອກໄມ້ໃຫ້ແກ່ ທ່ານ ນາງ ວຽງສຸກ ແພງບຸຜາ ປະທານສະຫະພັນແມ່ຍິງ ມະຫາວິທະຍາໄລແຫ່ງຊາດອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ຈັດພິທີເຜີຍແຜ່ຜົນງານການຄົ້ນຄວ້າທາງວິທະຍາສາດ ເນື່ອງໃນໂອກາດວັນແມ່ຍິງລາວຄົບຮອບ 62 ປີ

ການຮັບສະໝັກ

ທຶນການສຶກສາ