nuol.edu.la



ກອງປະຊຸມ ແລກປ່ຽນ ລະຫວ່າງ ຊາວໜຸ່ມ ແຂວງ ໄຊສົມບູນ ແລະ ຊາວໜຸ່ມ ມະຫາວິທະຍາໄລແຫ່ງຊາດ

1499915566 tmp IMG 8041

          ໃນຕອນເຊົ້າ ວັນທີ 11 ກໍລະກົດ 2017ນີ້, ຄະນະບໍລິຫານງານຊາວໜຸ່ມປະຊາຊົນປະຕິວັດລາວ (ຄຊປປລ) ມະຫາວິທະຍາໄລແຫ່ງຊາດ ແລະຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ແຂວງໄຊສົມບູນ ໄດ້ຈັດກອງປະຊຸມແລກປ່ຽນທາງດ້ານວິຊາການຮ່ວມກັນ, ໂດຍການເປັນປະທານຂອງ ສະຫາຍ ປອ. ສຳລານ ພັນຄະວົງ ຄະນະເລຂາສູນກາງ ຊາວໜຸ່ມປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະກີລາ, ສະຫາຍ ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ມະຫາວິທະຍາໄລແຫ່ງຊາດ, ສະຫາຍ ອິນຕອງ ໂຄດປັນຍາ ຄະນະບໍລິຫານງານ, ເລຂາຄະນະຊາວໜຸ່ມ ປະຊາຊົນ ປະຕິວັດລາວ ແຂວງໄຊສົມບູນ, ມີບັນດາເລຂາຊາວໜຸ່ມຮາກຖານທັງ 14 ຮາກຖານ, ພະນັກງານ-ຄູອາຈານ ແລະຜູ້ຊີ້ນຳວຽກງານຊາວໜຸ່ມເຂົ້າຮ່ວມ.

ຈຸດປະສົງຂອງການຈັດກອງປະຊຸມແລກປ່ຽນຂອງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ທັງສອງຝ່າຍໃນຄັ້ງນີ້, ກໍເພື່ອປຶກສາຫາລື ແລະແລກປ່ຽນບົດຮຽນໃນການບໍລິຫານງານ ວຽກງານຊາວໜຸ່ມໃນໄລຍະທີ່ຜ່ານມາຂອງທັງສອງຝ່າຍ; ເຊິ່ງໃນໄລຍະທີ່ຜ່ານມາມະຫາວິທະຍາໄລແຫ່ງຊາດ ໄດ້ມີການລະດົມ ແລະແຜ່ປັດໄຈ ນຳສະມາຊິກຊາວໜຸ່ມທົ່ວ ມຊ ເປັນຕົ້ນ ແມ່ນອຸປະກອນກີລາ, ເຄື່ອງນຸ່ງຫົ່ມ ແລະຕຳລາການຮຽນ-ການສອນ ມອບໃຫ້ແກ່ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງ ໄຊສົມບູນ.

ໂອກາດນີ້, ສະຫາຍ ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ມະຫາວິທະຍາໄລແຫ່ງຊາດ ໄດ້ກ່າວລາຍງານສະພາບລວມການເຄື່ອນໄຫວ ຂອງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດວ່າ: ມະຫາວິທະຍາໄລແຫ່ງຊາດມີທັງໝົດ 14 ຮາກຖານຊາວໜຸ່ມທີ່ຂຶ້ນກັບ ສຳນັກງານອະທິການບໍດີ, ມີສະມາຊິກຊາວໜຸ່ມທັງໝົດ 14 ພັນກວ່າສະຫາຍ, ໃນແຕ່ລະໄຕມາດ ຄະນະບໍລິຫານຊາວໜຸ່ມພວຫເຮົາໄດ້ມີການ ຈັດກອງປະຊຸມສະຫຼຸບວຽກງານອັນພົ້ນເດັ່ນທີ່ໄດ້ເຄື່ອນໄຫວໃນແຕ່ລະໄຕມາດ(ໄຕມາດ Iມີ 3 ເດືອນ), ພ້ອມນັ້ນ ຍັງໄດ້ຈັດຕັ້ງໂຄງການ “ອ້າຍ-ເອື້ອຍສອນພາສາອັງກິດໃຫ້ນ້ອງ” ທີ່ແຂວງ ບໍລິຄໍາໄຊ, ໄດ້ປະກອບສ່ວນໃນງານຕ່າງໆທີ່ມະຫາວິທະຍາໄລແຫ່ງຊາດຈັດຂຶ້ນເປັນຕົ້ນ ແມ່ນການສະເຫຼີມສະຫຼອງມະຫາວິທະຍາໄລແຫ່ງຊາດ ຄົບຮອບ 20 ປີ, ການສະແດງສິລະປະ ແລະເຂົ້າຮ່ວມການແຂ່ງຂັນກີລາໃນລະດັບຕ່າງໆ.

          ຈາກນັ້ນ, ຄະນະບໍລິຫານຊາວໜຸ່ມທັງສອງຝ່າຍ ກໍໄດ້ມີການແລກປ່ຽນຄວາມຄິດເຫັນເຊິ່ງກັນ ແລະກັນ ກ່ຽວກັບການຮ່ວມມືກັນໃນຕໍ່ໜ້າ ກໍຄືການແຮກສ່ຽວລະຫວ່າງ ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ມະຫາວິທະຍາໄລແຫ່ງຊາດ ແລະຄະນະບໍລິຫານຊາວໜຸ່ມ ແຂວງ ໄຊສົມບູນ; ໃນຕອນທ້າຍ ຄະນະບໍລິຫານງານຊາວໜຸ່ມກະຊວງສຶກສາທິການ ແລະກີລາ ໄດ້ມອບ ແພແດງຈໍານວນ 200 ຜືນ ແລະໝວກ 200 ໜ່ວຍ ໃຫ້ແກ່ນ້ອງນ້ອຍເຍົາວະຊົນທັນວາ ແຂວງໄຊສົມບູນຕື່ມອີກ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກອງປະຊຸມ ແລກປ່ຽນ ລະຫວ່າງ ຊາວໜຸ່ມ ແຂວງ ໄຊສົມບູນ ແລະ ຊາວໜຸ່ມ ມະຫາວິທະຍາໄລແຫ່ງຊາດ

ການຮັບສະໝັກ

ທຶນການສຶກສາ