nuol.edu.la



ຄະນະພັກຮາກຖານ ຄສປ ເປີດບັ້ນດຳເນີນຊີວິດການເມືອງປັບປຸງປົວແປງພາຍໃນຄະນະພັກ

1498817001 tmp IMG 7760

            ໃນຕອນເຊົ້າວັນທີ 29 ມິຖຸນາ 2017, ຄະນະພັກຮາກຖານ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ໄດ້ເປີດບັ້ນດຳເນີນຊີວິດການເມືອງປັບປຸງປົວແປງພາຍໃນຄະນະພັກ, ໂດຍການເປັນປະທານຂອງສະຫາຍ ຮສ. ປອ. ພຸດ ສິມມາລາວົງ ຮອງເລຂາຄະນະພັກ, ຄະນະປະຈຳພັກ ມະຫາວິທະຍາໄລແຫ່ງຊາດ, ສະຫາຍ ຮສ. ດາສັກ ອຸເທນທະປັນຍາ ເລຂາຄະນະພັກຮາກຖານ ຄະນະສະຖາປັດຕະຍະກຳສາດ, ມີບັນດາສະຫາຍເລຂາໜ່ວຍພັກ, ສະມາຊິກພັກສົມບູນ ແລະສຳຮອງ, ພະນັກງານຄູອາຈານ ເຂົ້າຮ່ວມຈຳນວນ 63 ສະຫາຍ.

          ໃນໂອກາດນີ້, ສະຫາຍ ຮສ. ປອ. ພຸດ ສິມມາລາວົງ ໄດ້ກ່າວວ່າ: ການດຳເນີນຊີວິດການເມືອງທົ່ວອົງຄະນະພັກ ມະຫາວິທະຍາໄລແຫ່ງຊາດ ຄັ້ງນີ້, ແມ່ນຄວາມຈຳເປັນພາວະວິໄສ, ເປັນຄວາມຮຽກຮ້ອງຕ້ອງການອັນຮີບດ່ວນເພື່ອປັບປຸງ, ເຊີດຊູສະຕິ ຄວາມຮັບຜິດຊອບຂອງຄະນະພັກ, ສະມາຊິກພັກໃນການເຄົາລົບ ແລະປະຕິບັດຫຼັກການກໍ່ສ້າງພັກ, ເຊິ່ງກ່ອນອື່ນໝົດແມ່ນຫຼັກການລວມສູນປະຊາທິປະໄຕ ຫຼັກການຕຳນິຕິຊົມຕົນເອງ, ຕິຊົມເຊິ່ງກັນ ແລະກັນ, ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນການຖືເບົາໃນການເຝິກຝົນຕົນເອງ, ປະກົດການເຊື່ອມຄຸນປ່ຽນທາດ, ພະຍາດອາດຍາສິດ, ສໍ້ລາດບັງຫຼວງ, ການຝ່າຝືນລ່ວງລະເມີດລະບຽບກົດໝາຍທີ່ພວກແຜ່ລາມຢ່າງຫຼວງຫຼາຍຢູ່ພາຍໃນພັກ ເພື່ອແນ່ໃສ່ໃຫ້ພັກມີຄວາມປອດໃສ, ເຂັ້ມແຂງ ແລະໝັກແໜ້ນຮອບດ້ານ.

          ສຳລັບບັ້ນດຳເນີນຊີວິດການເມືອງປັບປຸງປົວແປງພາຍໃນພັກທົ່ວ ຄະນະພັກຮາກຖານ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ປະຈຳປີ 2017, ແມ່ນຈະດຳເນີນໄປເຖິງວັນທີ 3 ກໍລະກົດ 2017, ໂດຍໄດ້ຮັບຟັງການເຜີຍແຜ່ເຊື່ອມຊືມເນື້ອໃນເອກະສານ ເດັດດ່ຽວປັບປຸງປົວແປງພັກໃຫ້ປອດໃສເຂັ້ມແຂງ ແລະໜັກແໜ້ນ; ບົດສະຫຼຸບຕີລາຄາຄວາມຮັບຜິດຊອບການນຳພາລວມຂອງຄະນະພັກຮາກຖານ ຄສປ ໃນການນຳພາຜັນຂະຫຍາຍມະຕິກອງປະຊຸມໃຫ່ຍຄັ້ງທີ IV ຂອງ ມຊ; ມະຕິກອງປະຊຸມໃຫ່ຍຄັ້ງທີ VIII ຂອງອົງຄະນະພັກກະຊວງສຶກສາທິການ ແລະກີລາ, ມະຕິກອງປະຊຸມໃຫ່ຍຄັ້ງທີ X ຂອງພັກ ແລະມະຕິກອງປະຊຸມໃຫ່ຍຄັ້ງທີ II ຂອງຄະນະພັກຮາກຖານ ຄສປ. ນອກຈາກນີ້ ແຕ່ລະສະຫາຍຍັງຂຽນຄວາມຄິດເຫັນ, ຕິຊົມ, ສົ່ງຂ່າວ ໃຫ້ແກ່ບັນດາສະຫາຍໃນຄະນະພັກ. ຫຼັງຈາກນັ້ນ ບັນດາສະຫາຍໃນຄະນະພັກຮາກຖານໄດ້ຜ່ານບົດສຳຫຼວດກວດກາຕົນເອງ ແລະຕຳນິຕິຊົມກໍ່ສ້າງຊ່ວຍເຫຼືອເຊິ່ງກັນ ແລະກັນ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄະນະພັກຮາກຖານ ຄສປ ເປີດບັ້ນດຳເນີນຊີວິດການເມືອງປັບປຸງປົວແປງພາຍໃນຄະນະພັກ

ການຮັບສະໝັກ

ທຶນການສຶກສາ