nuol.edu.la



ຄະນະພັກຮາກຖານສຳນັກງານອະທິການບໍດີ ມຊ ເປີດບັ້ນດຳເນີນຊີວິດການເມືອງປັບປຸງປົວແປງພາຍໃນອົງຄະນະພັກ

1498716040 tmp IMG 7516

ໃນວັນທີ 28 ມິຖຸນາ 2017, ຄະນະພັກຮາກຖານສຳນັກງານອະທິການບໍດີ ມະຫາວິທະຍາໄລແຫ່ງຊາດ ໄດ້ຈັດພິທີເປີດບັ້ນດຳເນີນຊິວິດການເມືອງປັບປຸງປົວແປງພາຍໃນອົງຄະນະພັກ ທີ່ຫ້ອງປະຊຸມສະໂມສອນ ມະຫາວິທະຍາໄລແຫ່ງຊາດ, ໂດຍການເປັນປະທານຂອງ ສະຫາຍ ຮສ. ໂພສີ ທິບດາວັນ ເລຂາຄະນະພັກຮາກຖານສຳນັກງານ, ຮອງປະທານກວດກາພັກ ມະຫາວິທະຍາໄລແຫ່ງຊາດ ມີບັນດາຮອງເລຂາຄະນະພັກຮາກຖານ, ເລຂາໜ່ວຍພັກ, ສະມາຊິກພັກສົມບູນ ແລະສະມາຊິກພັກສຳຮອງເຂົ້າຮ່ວມ ຈຳນວນ 200 ສະຫາຍ.

ໃນໂອກາດນີ້, ສະຫາຍ ຮສ. ໂພສີ ທິບດາວັນ ກໍໄດ້ກ່າວວ່າ: ເພື່ອເປັນການປັບປຸງປົວແປງພາຍໃນພັກ ປະຈຳປີ 2017 ທົ່ວຄະນະພັກຮາກຖານສໍານັກງານ ໃຫ້ມີຄວາມປອດໃສເຂັ້ມແຂງ ແລະເຊື່ອມຊືມເນື້ອໃນເອກະສານສໍາຄັນຂອງສູນກາງພັກໃນບັ້ນດຳເນີນຊີວິດການເມືອງຂອງພັກ, ການດຳເນີນຊີວິດການເມືອງທົ່ວອົງຄະນະພັກ ມະຫາວິທະຍາໄລແຫ່ງຊາດ ຄັ້ງນີ້, ແມ່ນຄວາມຈຳເປັນພາວະວິໄສ, ເປັນຄວາມຮຽກຮ້ອງຕ້ອງການອັນຮີບດ່ວນເພື່ອປັບປຸງ, ເຊີດຊູສະຕິ ຄວາມຮັບຜິດຊອບຂອງຄະນະພັກ, ສະມາຊິກພັກໃນການເຄົາລົບ ແລະປະຕິບັດຫຼັກການກໍ່ສ້າງພັກເຊິ່ງກ່ອນອື່ນໝົດແມ່ນຫຼັກການລວມສູນປະຊາທິປະໄຕ ຫຼັກການຕຳນິຕິຊົມຕົນເອງ, ຕິຊົມເຊິ່ງກັນ ແລະກັນ, ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນການຖືເບົາໃນການເຝິກຝົນຕົນເອງ, ປະກົດການເຊື່ອມຄຸນປ່ຽນທາດ, ພະຍາດອາດຍາສິດ, ສໍ້ລາດບັງຫຼວງ, ການຝ່າຝືນລ່ວງລະເມີດລະບຽບກົດໝາຍທີ່ພວກແຜ່ລາມຢ່າງຫຼວງຫຼາຍຢູ່ພາຍໃນພັກ ເພື່ອແນ່ໃສ່ໃຫ້ພັກມີຄວາມປອດໃສ, ເຂັ້ມແຂງ ແລະໝັກແໜ້ນຮອບດ້ານ. ສຳລັບບັ້ນດຳເນີນຊີວິດການເມືອງແມ່ນໄດ້ຮັບການຊີ້ນຳໆພາຈາກຄະນະນຳ ມະຫາວິທະຍາໄລແຫ່ງຊາດ.

ສຳລັບບັ້ນດຳເນີນຊີວິດການເມືອງປັບປຸງປົວແປງພາຍໃນຄະນະພັກຮາກຖານສຳນັກງານ ມະຫາວິທະຍາໄລແຫ່ງຊາດ ປະຈຳປີ 2017, ແມ່ນຈະດຳເນີນໄປເຖິ່ງວັນທີ 30 ມິຖຸນາ 2017, ໂດຍໄດ້ຮັບຟັງການເຜີຍແຜ່ເຊື່ອມຊືມເນື້ອໃນເອກະສານ ເດັດດ່ຽວປັບປຸງປົວແປງພັກໃຫ້ປອດໃສເຂັ້ມແຂງ ແລະໜັກແໜ້ນ; ຕີລາຄາບົດສະຫຼຸບການດຳເນີນຊີວິດການເມືອງປັບປຸງປົວແປງພັກປະຈຳປີ 2017 ຂອງຄະນະພັກຮາກຖານສຳນັກງານອະທິການບໍດີ. ນອກຈາກນີ້ ແຕ່ລະສະຫາຍຍັງຂຽນຄວາມຄິດເຫັນ, ຕິຊົມ, ສົ່ງຂ່າວ ໃຫ້ແກ່ບັນດາສະຫາຍໃນຄະນະພັກ. ຫຼັງຈາກນັ້ນ ບັນດາສະຫາຍໃນຄະນະບໍລິຫານງານພັກ ໄດ້ຜ່ານບົດສຳຫຼວດກວດກາຕົນເອງ ແລະຕຳນິຕິຊົມ ເຊິ່ງກັນ ແລະກັນ, ຄະນະພັກແຕ່ລະສະຫາຍໄດ້ທາບທາມລົງຄະແນນສຽງໄວ້ວາງໃຈ ຕໍ່ບັນດາສະຫາຍໃນຄະນະພັກ ແລະຕໍ່ບັນດາສະຫາຍໃນຄະນະບໍລິຫານງານພັກອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄະນະພັກຮາກຖານສຳນັກງານອະທິການບໍດີ ມຊ ເປີດບັ້ນດຳເນີນຊີວິດການເມືອງປັບປຸງປົວແປງພາຍໃນອົງຄະນະພັກ

ການຮັບສະໝັກ

ທຶນການສຶກສາ