nuol.edu.la



ພິທີເຜີຍແຜ່ພາລະບົດບາດຂະບວນການກາແດງ ແລະ ກົດໝາຍມະນຸດສະທຳສາກົນ

1498635925 tmp IMG 74033

        

           ໃນວັນທີ 27 ມິຖຸນາ 2017, ອົງການກາແດງລາວຮ່ວມກັບສະຫະພັນກຳມະບານ ມະຫາວິທະຍາໄລແຫ່ງຊາດ ໄດ້ຈັດພິທີ ເຜີຍແຜ່ພາລະບົດບາດຂະບວນການກາແດງ ແລະ ກົດໝາຍມະນຸດສະທຳສາກົນ ທີ່ຫ້ອງປະຊຸມ ສະໂມສອນມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ທອງພະຈັນ ສອນນະສິນ ຮອງປະທານອົງການກາແດງລາວ, ທ່ານ ຮສ. ປອ. ອານຸລົມ ວິໄລພອນ ປະທານກຳມະບານ ມະຫາວິທະຍາໄລແຫ່ງຊາດ, ບັນດາທ່ານຄະນະພັກຮາກຖານ, ສະມາຊິກກຳມະບານ, ພະນັກງານ-ຄູອາຈານ ແລະນັກສຶກສາເຂົ້າຮ່ວມ.

          ໃນໂອກາດດັ່ງກ່າວ, ທ່ານ ຮສ. ປອ. ອານຸລົມ ວິໄລພອນ ກໍໄດ້ຂຶ້ນກ່າວເປີດພິທີວ່າ: ສະຫະພັນກຳມະບານ ຖືວ່າເປັນອົງການຈັດຕັ້ງໜື່ງທີ່ຢູ່ພາຍໃຕ້ການຊີ້ນຳໆພາຂອງພັກ-ລັດຖະບານ ເວົ້າລວມເວົ້າສະເພາະກໍແມ່ນສະຫະພັນກຳມະບານ ມະຫາວິທະຍາໄລແຫ່ງຊາດ ເຊິ່ງມີພາລະບົດບາດໃນການປຸກລະດົມໃຫ້ສະມາຊິກທຸກຄົນເຂົ້າຮ່ວມຂະບວນການຕ່າງໆ ກໍຄືການສ້າງກອງທຶນຊ່ວຍເຫຼືອເຊິ່ງກັນ ແລະກັນ; ວຽກງານຂອງສະຫະພັນກຳມະບານ ຖືເປັນວຽກງານທີ່ສຳຄັນອີກອັນໜື່ງທີ່ສະມາຊິກທຸກຄົນຕ້ອງເອົາໃຈໃສ່ ແລະຕັ້ງໜ້າປະຕິບັດຢ່າງໜັກແໜ້ນ.

          ໂອກາດດຽວກັນ, ທ່ານ ພອນຄຳ ແກ້ວວິໄລ ຮັກສາການກອງໂຄສະນາ ແລະຂົນຂວາຍການກຸສົນ ອົງການກາແດງລາວ ໄດ້ຂຶ້ນໃຫ້ຄວາມຮູ້ເຊິ່ງເນື້້ອໃນທີ່ນຳມາເຜີຍແຜ່ໃນຄັ້ງນີ້ປະກອບດ້ວຍ: 1. ຂະບວນການກາແດງໃນໂລກ, 2. ເຄື່ອງໝາຍຂອງກາແດງ, 3. ປະຫວັດຄວາມເປັນມາຂອງອົງການກາແດງລາວ ແລະ 4. ພື້ນຖານກ່ຽວກັບກົດໝາຍມະນຸດສະທຳສາກົນ. ຂະບວນການຂອງອົງການກາແດງ ແລະຊີກວົງເດືອນແດງສາກົນປະກອບມີ 3 ພາກສ່ວນ ທີ່ເຮັດໜ້າທີ່ແຕກຕ່າງກັນຄື: ຄະນະກຳມະການກາແດງສາກົນ ເຮັດໜ້າທີ່ປົກປ້ອງ ແລະໃຫ້ການຊ່ວຍເຫຼືອທະຫານທີ່ໄດ້ຮັບບາດເຈັບຈາກການສູ້ຮົບ ແລະເຜີຍແຜ່ກົດໝາຍມະນຸດສະທຳສາກົນ; ສະຫະພັນກາແດງ ແລະຊີກວົງເດືອນແດງສາກົນ ເຮັດໜ້າທີ່ໃນການຊ່ວຍເຫຼືອຜູ້ເຄາະຮ້າຍຈາກໄພພິບັດທຳມະຊາດ ແລະເປັນກະບອກສຽງຂອງອົງການກາແດງໃນເວທີສາກົນ; ອົງການກາແດງ ແລະຊີກວົງເດືອນ ແມ່ນເຮັດໜ້າທີ່ຊ່ວຍຜູ້ໄດ້ຮັບເຄາະຮ້າຍຈາກການກະທຳຂອງມະນຸດ. ອົງການກາແດງສາກົນມີສາມາຊິກທັງໝົດ 190 ປະເທດຈາກທົ່ວໂລກ. ສໍາລັບ ສປປ ລາວ ອົງການກາແດງສ້າງຕັ້ງຂຶ້ນ ໃນວັນທີ 01 ມັງກອນ 1955 ຖືກຮັບຮູ້ຈາກຄະນະກຳມະການກາແດງສາກົນ ໃນວັນທີ 23 ພຶດສະພາ 1957, ເຂົ້າເປັນສະມາຊິກຂອງສະຫະພັນກາແດງ ແລະ ຊີກວົງເດືອນແດງ ໃນວັນທີ 25 ຕຸລາ 1957 ໂດຍກອງປະຊຸມ ຄັ້ງທີ 24 ທີ່ ກຸງນິວເດນລີ ປະເທດອິນເດຍ. ນັບແຕ່ປີ 1976-1992 ອົງການກາແດງລາວ ຂຶ້ນກັບກະຊວງສາທາລະນະສຸກ ແລະ ກະຊວງແຮງງານສະຫວັດດີການສັງຄົມ, ຈົນມາເຖິງ ວັນທີ 04 ເມສາ 1992 ຈຶ່ງແຍກຕົວອອກເປັນອົງການເອກະລາດ ຕາມດຳລັດເລກທີ 36/ນຍ, ລົງວັນທີ 21 ເມສາ 1992. ອົງການກາແດງລາວ ມີທັງໝົດ 17 ອົງການກາແດງແຂວງ ແລະ 1 ອົງການກາແດງນະຄອນຫຼວງວຽງຈັນເຊິ່ງເຮັັດໜ້າທີ່ເປັນໃຈກາງໃນການຊີ້ນຳ ແລະ ຄຸ້ມຄອງໃນການເຄື່ອນໄຫວວຽກງານມະນຸດສະທຳໃນທົ່ວປະເທດທັງເປັນເສນາທິການໃຫ້ແກ່ຄະນະນຳ ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີເຜີຍແຜ່ພາລະບົດບາດຂະບວນການກາແດງ ແລະ ກົດໝາຍມະນຸດສະທຳສາກົນ

ການຮັບສະໝັກ

ທຶນການສຶກສາ