nuol.edu.la



ຄສສ ເປີດບັ້ນດຳເນີນຊີວິດການເມືອງປັບປຸງປົວແປງທົ່ວຄະນະພັກຮາກຖານ

1498554975 tmp IMG 7365

ໃນວັນທີ 26 ມິຖຸນາ 2017, ຄະນະສຶກສາສາດ ມະຫາວິທະຍາໄລແຫ່ງຊາດ ໄດ້ເປີດບັ້ນດຳເນີນຊີວິດການເມືອງປັບປຸງປົວແປງທົ່ວຄະນະພັກຮາກຖານ ທີ່ຫ້ອງປະຊຸມສະໂມສອນ ມະຫາວິທະຍາໄລແຫ່ງຊາດ, ໂດຍການເປັນປະທານຂອງສະຫາຍ ຮສ. ປອ. ອຸດົມ ພອນຄຳເພັງ ປະທານກວດກາພັກ, ຄະນະປະຈຳພັກ, ຮອງອະທິການບໍດີມະຫາວິທະຍາໄລແຫ່ງຊາດ, ສະຫາຍ ອາທິດອຸໄທ ຈະຕຸພອນໄຊ ວ່າການຄະນະບໍດີ ຄະນະສຶກສາສາດ, ພ້ອມດ້ວຍ ທ່ານຮອງຄະນະບໍດີ, ເລຂາໜ່ວຍພັກ, ສະມາຊິກພັກສົມບູນ ແລະສຳຮອງເຂົ້າຮ່ວມຈຳນວນ 300 ສະຫາຍ.

ໃນພິທີ, ສະຫາຍ ຮສ. ປອ. ຄຳແສງ ທະລັງສີ ອົງຄະນະພັກ ມະຫາວິທະຍາໄລແຫ່ງຊາດ, ຮອງຄະນະບໍດີຄະນະສຶກສາສາດ ໄດ້ກ່າວວ່າ: ອີງຕາມມະຕິຕົກລົງຂອງຄະນະບໍລິຫານງານອົງຄະນະພັກ ມະຫາວິທະຍາໄລແຫ່ງຊາດ ຄັ້ງວັນທີ 16 ມິຖຸນາ 2016 ແລະອີງຕາມແຈ້ງການສະບັບເລກທີ 039/ມຊ.ອພ, ລົງວັນທີ 19 ມິຖຸນາ 2017, ກ່ຽວກັບບັ້ນດຳເນີນຊີວິດການເມືອງປັບປຸງປົວແປງອົງຄະນະພັກ ມະຫາວິທະຍາໄລແຫ່ງຊາດ. ດັ່ງນັ້ນ, ຄະນະສຶກສາສາດຈຶ່ງໄດ້ເປີດບັ້ນດຳເນີນຊີວິດການເມືອງປັບປຸງປົວແປງທົ່ວຄະນະພັກຮາກຖານ, ເພື່ອເປັນການປັບປຸງປົວແປງພາຍໃນພັກປະຈຳປີ 2017 ທົ່ວຄະນະພັກຮາກຖານ ໃຫ້ມີຄວາມປອດໃສເຂັ້ມແຂງ ແລະເຊື່ອມຊືມເນື້ອໃນເອກະສານສຳຄັນຂອງສູນກາງພັກໃນບັ້ນດຳເນີນຊີວິດການເມືອງຂອງພັກ ພາຍໃຕ້ການຊີ້ນຳໆພາຈາກຄະນະພັກມະຫາວິທະຍາໄລແຫ່ງຊາດ.

ໂອກາດດັ່ງກ່າວ, ສະຫາຍ ຮສ. ປອ. ອຸດົມ ພອນຄຳເພັງ ກໍໄດ້ກ່າວອີກວ່າ: ການດຳເນີນຊີວິດການເມືອງທົ່ວຄະນະພັກຮາກຖານ ຄະນະສຶກສາສາດ ມະຫາວິທະຍາໄລແຫ່ງຊາດ ຄັ້ງນີ້, ແມ່ນຄວາມຈຳເປັນພາວະວິໄສ, ເປັນຄວາມຮຽກຮ້ອງຕ້ອງການອັນຮີບດ່ວນເພື່ອປັບປຸງ, ເຊີດຊູສະຕິ ຄວາມຮັບຜິດຊອບຂອງຄະນະພັກ, ສະມາຊິກພັກໃນການເຄົາລົບ ແລະປະຕິບັດຫຼັກການກໍ່ສ້າງພັກ, ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນການຖືເບົາໃນການເຝິກຝົນຕົນເອງ, ປະກົດການເຊື່ອມຄຸນປ່ຽນທາດ, ພະຍາດອາດຍາສິດ, ສໍ້ລາດບັງຫຼວງ. ພ້ອມນັ້ນສະຫາຍ ຮສ. ປອ. ອຸດົມ ພອນຄຳເພັງ ຍັງໄດ້ເນັ້ນໜັກບາງບັນຫາສຳຄັນຄື: ຄຸນນະພາບການສຶກສາ, ຄວາມປະຢັດມັດຖະຢັດ, ຄວາມໂປງໃສ, ປະກົດການຫຍໍ້ທໍ້ສັງຄົມ ທີ່ພວມແຜ່ຫຼາຍໃນປັດຈຸບັນ.

ສຳລັບບັ້ນດຳເນີນຊີວິດການເມືອງປັບປຸງປົວແປງທົ່ວຄະນະພັກຮາກຖານ ຄະນະສຶກສາສາດ ມະຫາວິທະຍາໄລແຫ່ງຊາດ ປະຈຳປີ 2017, ແມ່ນຈະດຳເນີນໄປເຖິ່ງວັນທີ 28 ມິຖຸນາ 2017, ໂດຍໄດ້ຮັບຟັງການເຜີຍແຜ່ເຊື່ອມຊືມເນື້ອໃນເອກະສານ ເດັດດ່ຽວປັບປຸງປົວແປງພັກໃຫ້ປອດໃສເຂັ້ມແຂງ ແລະໜັກແໜ້ນ; ບົດສະຫຼຸບຕີລາຄາຄວາມຮັບຜິດຊອບການນຳພາລວມຂອງຄະນະພັກມະຫາວິທະຍາໄລແຫ່ງຊາດ ໃນການນຳພາຜັນຂະຫຍາຍມະຕິກອງປະຊຸມໃຫ່ຍຄັ້ງທີ IV ຂອງ ມຊ; ມະຕິກອງປະຊຸມໃຫ່ຍຄັ້ງທີ VIII ຂອງອົງຄະນະພັກກະຊວງສຶກສາທິການ ແລະກີລາ ແລະມະຕິກອງປະຊຸມໃຫ່ຍຄັ້ງທີ X ຂອງພັກ, ນອກນຈາກນີ້ ແຕ່ລະສະຫາຍຍັງຂຽນຄວາມຄິດເຫັນ, ຕິຊົມ, ສົ່ງຂ່າວ ໃຫ້ແກ່ບັນດາສະຫາຍໃນຄະນະພັກ. ຫຼັງຈາກນັ້ນ ບັນດາສະຫາຍໃນຄະນະບໍລິຫານງານພັກໄດ້ຜ່ານບົດສຳຫຼວດກວດກາຕົນເອງ ແລະຕຳນິຕິຊົມກໍ່ສ້າງຊ່ວຍເຫຼືອເຊິ່ງກັນ ແລະກັນ, ຄະນະພັກແຕ່ລະສະຫາຍໄດ້ທາບທາມລົງຄະແນນສຽງໄວ້ວາງໃຈ ຕໍ່ບັນດາສະຫາຍໃນກຳມະການສູນກາງພັກ ແລະຕໍ່ບັນດາສະຫາຍໃນຄະນະບໍລິຫານງານພັກອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄສສ ເປີດບັ້ນດຳເນີນຊີວິດການເມືອງປັບປຸງປົວແປງທົ່ວຄະນະພັກຮາກຖານ

ການຮັບສະໝັກ

ທຶນການສຶກສາ