nuol.edu.la



ມະຫາວິທະຍາໄລແຫ່ງຊາດ ເປີດບັ້ນດຳເນີນຊີວິດການເມືອງປັບປຸງປົວແປງທົ່ວອົງຄະນະພັກ

1498470133 tmp IMG 6676

            ໃນວັນທີ 19 ມິຖຸນາ 2017, ມະຫາວິທະຍາໄລແຫ່ງຊາດ ໄດ້ເປີດບັ້ນດຳເນີນຊີວິດການເມືອງທົ່ວອົງຄະນະພັກ ມະຫາວິທະຍາໄລແຫ່ງຊາດ ທີ່ຫ້ອງປະຊຸມສະໂມສອນ ມະຫາວິທະຍາໄລແຫ່ງຊາດ, ໂດຍໃຫ້ກຽດເປັນປະທານໂດຍສະຫາຍ ນາງ ແສງເດືອນ ຫຼ້າຈັນບູນ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງສຶກສາທິການ ແລະກີລາ, ມີ ສະຫາຍ ສຈ. ປອ. ສົມສີ ຍໍພັນໄຊ ຄະນະປະຈຳພັກ, ເລຂາບໍລິຫານງານພັກ, ວ່າການອະທິການບໍດີ ມະຫາວິທະຍາໄລແຫ່ງຊາດ, ພ້ອມດ້ວຍບັນດາສະຫາຍຮອງເລຂາຄະນະບໍລິຫານງານພັກ, ພະນັກງານຫຼັກແຫຼ່ງ, ຄະນະພັກຮາກຖານ, ຄະນະບໍດີ, ຮອງຄະນະບໍດີ, ຫົວໜ້າຫ້ອງການ, ຜູ້ອຳນວຍການສະຖາບັນ, ຄະນະພັກວິຊາ ແລະຄະນະພັກອ້ອມຂ້າງ ມະຫາວິທະຍາໄລແຫ່ງຊາດ ເຂົ້າຮ່ວມ.

          ໃນພິທີ, ສະຫາຍ ສຈ. ປອ. ສົມສີ ຍໍພັນໄຊ ກ່າວວ່າ: ເພື່ອເປັນການປັບປຸງປົວແປງພາຍໃນພັກ ປະຈຳປີ 2017 ທົ່ວອົງຄະນະພັກມະຫາວິທະຍາໄລແຫ່ງຊາດ ໃຫ້ມີຄວາມປອດໃສເຂັ້ມແຂງ ແລະເຊື່ອມຊືມເນື້ອໃນເອກະສານສຳຄັນຂອງສູນກາງພັກໃນບັ້ນດຳເນີນຊີວິດການເມືອງຂອງພັກ. ພາຍຫຼັງ ຄະນະພັກ ມະຫາວິທະຍາໄລແຫ່ງຊາດ ໄດ້ຮັບການຊີ້ນຳຈາກຂັ້ນເທິງກໍຄືເລຂາຄະນະພັກກະຊວງ, ໄດ້ຮັບເອກະສານດຳເນີນບັ້ນຊີວິດການເມືອງປັບປຸງປົວແປງທົ່ວອົງຄະນະພັກ ປີ 2017, ຄະນະພັກ ມະຫາວິທະຍາໄລແຫ່ງຊາດຈຶ່ງໄດ້ກະກຽມບັ້ນດຳເນີນຊີວິດການເມືອງທົ່ວອົງຄະນະພັກຂອງຕົນຕາມທິດຊີ້ນຳຂອງຂັ້ນເທິງ ດ້ວຍການແຕ່ງຕັ້ງຄະນະຮັບຜິດຊອບ ແລະສ້າງແຜນການຈັດຕັ້ງດຳເນີນຊີວິດການເມືອງປັບປຸງປົວແປງທົ່ວອົງຄະນະພັກຂອງຕົນ ແລະກຸ່ມເປົ້າໝາຍເຂົ້າຮ່ວມ, ເນື່ອງຈາກວ່າອົງຄະນະພັກ ມະຫາວິທະຍາໄລແຫ່ງຊາດ ໄດ້ມີຫຼາຍຮາກຖານພັກທີ່ຂຶ້ນກັບ. ສະນັ້ນ, ບັ້ນດຳເນີນຊີວິດການເມືອງຄັ້ງນີ້, ແມ່ນໄດ້ດຳເນີນຊີວິດການເມືອງອອກເປັນ 3 ຂັ້ນຄື: ຂັ້ນມະຫາວິທະຍາໄລແຫ່ງຊາດ, ຂັ້ນຮາກຖານ ແລະຂັ້ນໜ່ວຍພັກທີ່ຂຶ້ນກັບຮາກຖານພັກ. ສຳລັບຂັ້ນ ມະຫາວິທະຍາໄລແຫ່ງຊາດແມ່ນໄດ້ຮັບການຊີ້ນຳຊ່ວຍເຫຼືອຢ່າງໃກ້ຊິດຈາກຄະນະພັກກະຊວງ ແລະໄດ້ຮັບອະນຸມັດຢ່າງເປັນທາງການ. ພາຍຫຼັງທີ່ສຳເລັດໃນຂັ້ນ ມະຫາວິທະຍາໄລແຫ່ງຊາດແລ້ວ ແມ່ນຈະສືບຕໍ່ດຳເນີນໃນຂັ້ນຮາກຖານພັກ ແລະໜ່ວຍພັກຕໍ່ໄປ.

          ໂອກາດດັ່ງກ່າວ, ສະຫາຍ ນາງ ແສງເດືອນ ຫຼ້າຈັນທະບູນ ໄດ້ກ່າວວ່າ: ການດຳເນີນຊີວິດການເມືອງທົ່ວອົງຄະນະພັກ ມະຫາວິທະຍາໄລແຫ່ງຊາດ ຄັ້ງນີ້, ແມ່ນຄວາມຈຳເປັນພາວະວິໄສ, ເປັນຄວາມຮຽກຮ້ອງຕ້ອງການອັນຮີບດ່ວນເພື່ອປັບປຸງ, ເຊີດຊູສະຕິ ຄວາມຮັບຜິດຊອບຂອງຄະນະພັກ, ສະມາຊິກພັກໃນການເຄົາລົບ ແລະປະຕິບັດຫຼັກການກໍ່ສ້າງພັກ, ເຊິ່ງກ່ອນອື່ນໝົດແມ່ນຫຼັກການລວມສູນປະຊາທິປະໄຕ ຫຼັກການຕຳນິຕິຊົມຕົນເອງ, ຕິຊົມເຊິ່ງກັນ ແລະກັນ, ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນການຖືເບົາໃນການເຝິກຝົນຕົນເອງ, ປະກົດການເຊື່ອມຄຸນປ່ຽນທາດ, ພະຍາດອາດຍາສິດ, ເອກະຊົນ, ສໍ້ລາດບັງຫຼວງ, ການຝ່າຝືນລ່ວງລະເມີດລະບຽບກົດໝາຍທີ່ພວກແຜ່ລາມຢ່າງຫຼວງຫຼາຍຢູ່ພາຍໃນພັກ ເພື່ອແນ່ໃສ່ໃຫ້ພັກມີຄວາມປອດໃສ, ເຂັ້ມແຂງ ແລະໝັກແໜ້ນຮອບດ້ານ. ພ້ອມນັ້ນ, ສະຫາຍ ນາງ ແສງເດືອນ ຫຼ້າຈັນທະບູນ ຍັງໄດ້ເນັ້ນໜັກບາງບັນຫາຄື: ໃຫ້ຄະນະພັກແຕ່ລະຂັ້ນຕ້ອງມີຄວາມສາມັກຄີ, ມີແບບແຜນວິທີການເຮັດວຽກ, ມີການຫຼັກການລວມສູນປະຊາທິປະໄຕ, ພັດທະນາຫຼັກສູດການຈັດການຮຽນ-ການສອນ ໃຫ້ມີຄຸນນະພາບໂດຍສະເພາະແມ່ນ ການຄົ້ນຄວ້າວິທະຍາສາດ, ການສິດສອນ ແລະການນຳເອົາຫຼັກສູດວິຊາການເມືອງເຂົ້າໃນທຸກສາຂາ, ການຄຸ້ມຄອງການນຳໃຊ້ງົບປະມານ ຕ້ອງມີລະບຽບ ແລະຖືກຕ້ອງ.

          ສຳລັບບັ້ນດຳເນີນຊີວິດການເມືອງປັບປຸງປົວແປງພາຍໃນພັກທົ່ວອົງຄະນະພັກ ມະຫາວິທະຍາໄລແຫ່ງຊາດ ປະຈຳປີ 2017, ແມ່ນຈະດຳເນີນໄປເຖິ່ງວັນທີ 23 ມິຖຸນາ 2017, ໂດຍໄດ້ຮັບຟັງການເຜີຍແຜ່ເຊື່ອມຊືມເນື້ອໃນເອກະສານ ເດັດດ່ຽວປັບປຸງປົວແປງພັກໃຫ້ປອດໃສເຂັ້ມແຂງ ແລະໜັກແໜ້ນ; ບົດສະຫຼຸບຕີລາຄາຄວາມຮັບຜິດຊອບການນຳພາລວມຂອງຄະນະພັກມະຫາວິທະຍາໄລແຫ່ງຊາດ ໃນການນຳພາຜັນຂະຫຍາຍມະຕິກອງປະຊຸມໃຫ່ຍຄັ້ງທີ IV ຂອງ ມຊ; ມະຕິກອງປະຊຸມໃຫ່ຍຄັ້ງທີ VIII ຂອງອົງຄະນະພັກກະຊວງສຶກສາທິການ ແລະກີລາ ແລະມະຕິກອງປະຊຸມໃຫ່ຍຄັ້ງທີ X ຂອງພັກ, ນອກນຈາກນີ້ ແຕ່ລະສະຫາຍຍັງຂຽນຄວາມຄິດເຫັນ, ຕິຊົມ, ສົ່ງຂ່າວ ໃຫ້ແກ່ບັນດາສະຫາຍໃນຄະນະພັກ. ຫຼັງຈາກນັ້ນ ບັນດາສະຫາຍໃນຄະນະບໍລິຫານງານພັກໄດ້ຜ່ານບົດສຳຫຼວດກວດກາຕົນເອງ ແລະຕຳນິຕິຊົມກໍ່ສ້າງຊ່ວຍເຫຼືອເຊິ່ງກັນ ແລະກັນ, ຄະນະພັກແຕ່ລະສະຫາຍໄດ້ທາບທາມລົງຄະແນນສຽງໄວ້ວາງໃຈ ຕໍ່ບັນດາສະຫາຍໃນກຳມະການສູນກາງພັກ ແລະຕໍ່ບັນດາສະຫາຍໃນຄະນະບໍລິຫານງານພັກອີກດ້ວຍ.

         

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມະຫາວິທະຍາໄລແຫ່ງຊາດ ເປີດບັ້ນດຳເນີນຊີວິດການເມືອງປັບປຸງປົວແປງທົ່ວອົງຄະນະພັກ

ການຮັບສະໝັກ

ທຶນການສຶກສາ