nuol.edu.la



ພິທີເປີດ-ປິດງານແຂ່ງຂັນກີລານັກສຶກສາທົ່ວ ມະຫາວິທະຍາໄລແຫ່ງຊາດ ປະຈໍາ ສົກສຶກສາ 2016-2017

1498192783 tmp IMG 7305

ໃນວັນທີ 21 ມິຖຸນາ 2017 ທີ່ຜ່ານມາ, ມະຫາວິທະຍາໄລແຫ່ງຊາດ ໄດ້ຈັດພິທີປິດສາກການແຂ່ງຂັນກີລານັກສຶກສາທົ່ວມະຫາວິທະຍາໄລແຫ່ງຊາດ ຊີງຂັນທ່ານວ່າການອະທິການບໍດີ ມະຫາວິທະຍາໄລແຫ່ງຊາດ ປະຈຳສົກສຶກສາ 2016-2017 ທີ່ສະໜາມກີລາກາງ ມະຫາວິທະຍາໄລແຫ່ງຊາດ, ໂດຍການເປັນປະທານຂອງ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ, ທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ແລະທັງເປັນປະທານສະໂມສອນກີລາ ມະຫາວິທະຍາໄລແຫ່ງຊາດ ພ້ອມດ້ວຍ ທ່ານຫົວໜ້າຫ້ອງການ, ຄະນະບໍດີ, ຮອງຄະນະບໍດີ, ແຂກທີ່ຖືກເຊີນ, ພະນັກງານ-ຄູອາຈານ ແລະນັກສຶກສາເຂົ້າຮ່ວມຢ່າງຄຶກຄື້ນ.

ໂອກາດດັ່ງກ່າວ, ທ່ານ ຮສ. ປອ. ອາທິດອຸໄທ ຈະຕຸພອນໄຊ ຮອງປະທານສະໂມສອນກີລາມະຫາວິທະຍາໄລແຫ່ງຊາດ ໄດ້ກ່າວວ່າ: ເພື່ອສ້າງຂະບວນການຊຸກຍູ້ວຽກງານວິຊາສະເພາະ ແລະຊຸກຍູ້ສົ່ງເສີມຂະບວນການກີລາຢູ່ໃນມະຫາວິທະຍາໄລແຫ່ງຊາດ, ເປັນການເປີດກວ້າງໃຫ້ນັກສຶກສາໄດ້ທົດສອບຄວາມສາມາດຂອງຕົນໂດຍຜ່ານການວັດ-ປະເມີນຈາກການແຂ່ງຂັນກີລາຕົວຈິງ ພ້ອມທັງເປັນການຄັດເລືອກນັກກີລາປະເພດຕ່າງໆ ເປັນຕົວແທນໃຫ້ສະໂມສອນ ກີລາ ມະຫາວິທະຍາໄລແຫ່ງຊາດໂດຍພື້ນຖານໃຫ້ແກ່ສະຫະພັນກີລາມະຫາວິທະຍາໄລ ກໍ່ຄືສະຫະພັນກີລາປະເພດຕ່າງໆຂອງຊາດໃນອະນາຄົດ. ນອກນັ້ນ ຍັງເປັນການປູກຈິດສຳນຶກໃຫ້ນັກສຶກສາມີຄວາມເຂົ້າໃຈຕໍ່ກັບການເຄື່ອນໄຫວວຽກງານກີລາ ແລະເປັນການເຕົ້າໂຮມຄວາມສາມັກຄີຕື່ມອີກ.

ການແຂ່ງຂັນຄັ້ງນີ້ປະກອບມີ 5 ປະເພດການແຂ່ງຂັນຄື: ບານເຕະ, ກະຕໍ້, ເປຕັງ, ບານສົ່ງ ແລະແລ່ນ-ລານ. ພາຍຫຼັງການແຂ່ງຂັນ ເປັນເວລາ 1 ເດືອນ ຜົນປະກົດວ່າ: ກີລາບານເຕະຊາຍອັນດັບທີ 1 ຄະນະວິທະຍາສາດການກີລາ-ກາຍະກຳ, ອັນດັບທີ 2 ຄະນະນິຕິສາດ ແລະລັດຖະສາດ ແລະອັນດັບທີ 3 ຄະນະເສດຖະສາດ ແລະບໍລິຫານທຸລະກິດ; ປະເພດບານເຕະຍິງ ອັນດັບທີ 1 ຄະນະວິທະຍາສາດການກີລາ-ກາຍະກຳ, ອັນດັບທີ 2 ຄະນະວິສະວະກຳສາດ, ອັນດັບທີ 3 ຄະນະວິທະຍາສາດທຳມະຊາດ; ກີລາກະຕໍ້ປະເພດທີມດ່ຽວຊາຍ ອັນດັບທີ 1 ຄະນະວິທະຍາສາດສິ່ງແວດລ້ອມ, ອັນດັບທີ 2 ຄະນະວິທະຍາສາດການກີລາ-ກາຍະກຳ, ອັບດັບທີ 3 ຄະນະສຶກສາສາດ; ກີລາກະຕໍ້ທີມຍິງ ອັນດັບທີ 1 ຄະນະວິທະຍາສາດການກີລາ-ກາຍະກຳ, ອັນດັບທີ 2 ຄະນະສຶກສາສາດ ແລະອັນດັບທີ 3 ຄະນະ ວິທະຍາສາດສັງຄົມ; ກີລາບານສົ່ງ ປະເພດທີມຊາຍ ອັນດັບທີ 1 ຄະນະວິສະວະກຳສາດ, ອັນດັບທີ 2 ຄະນະວິທະຍາສາດການກີລາ-ກາຍະກຳ ແລະອັນດັບທີ 3 ຄະນະວິທະຍາສາດທຳມະຊາດ; ສ່ວນປະເພດທີມຍິງ ອັນດັບທີ 1 ຄະນະເສດຖະສາດ ແລະບໍລິຫານທຸລະກິດ, ອັນດັບທີ 2 ຄະນະວິທະຍາສາດສັງຄົມ ແລະ ອັນດັບທີ 3 ຄະນະສຶກສາສາດ; ກີລາເປຕັງ ປະເພດທີມຊຸດຊາຍ ອັນດັບທີ 1 ຄະນະວິສະວະກຳສາດ ແລະປະເພດທີມປະສົມ ໄດ້ແກ່ຄະນະ ກະເສດສາດ.

ສຳລັບກີລາ-ແລ່ນລານ ລາຍການແລ່ນ 100 ແມັດ ແລະເຕັ້ນຍາວຊາຍອັນດັບທີ 1 ໄດ້ແກ່ ທ້າວ ພຸດທະໄຊ ນັນທະວົງ ຈາກຄະນະວິທະຍາສາດສິ່ງແວດລ້ອມ; ແລ່ນ 200 ແມັດຊາຍ ທ້າວແສງສົມພອນ ທົງຄຳຫານ, ສ່ວນປະເພດເຕັ້ນຍາວຍິງອັນດັບທີ 1 ນາງ ພຸດທະຫວັນ ຈັນທະວົງສາ ຈາກຄະນະວິທະຍາສາດການກີລາ-ກາຍະກຳ, ປະເພດແລ່ນ 100 ແມັດຍິງ ອັນດັບທີ1 ນາງ ສຸພົນສາ ພາສີເມືອງທອງ ຈາກຄະນະວິທະຍາສາດການກີລາ-ກາຍະກຳ, ແລ່ນ 200 ແມັດຍິງ ອັນດັບທີ 1 ນາງ ແກ້ວມະນີ ເພັງເມິງຄຸນ ຈາກຄະນະວິທະຍາສາດການກີລາ-ກາຍະກຳ, ແລ່ນ 400 ແມັດຍິງ ອັນດັບທີ 1 ນາງ ພຸດທະຫວັນ ຈັນທະວົງສາ ຈາກຄະນະວິທະຍາສາດການກີລາ-ກາຍະກຳ, ແລ່ນ 1,500 ແມັດຍິງ ອັນດັບທີ 1 ນາງ ຄຳມະນີ ສອນໄຊຍະລາດ ຈາກຄະນະວິທະຍາສາດການກີລາ-ກາຍະກຳ, ແລ່ນ 1,500 ແມັດຊາຍ ອັນດັບທີ 1 ທ້າວ ຕຸ້ຍ ໄຊຍະແສງ ຈາກຄະນະວິທະຍາສາດການກີລາ-ກາຍະກຳ ແລະແລ່ນ 4x100 ແມັດຊາຍ ອັນດັບທີ 1 ຄະນະວິທະຍາສາດການກີລາ-ກາຍະກຳ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີເປີດ-ປິດງານແຂ່ງຂັນກີລານັກສຶກສາທົ່ວ ມະຫາວິທະຍາໄລແຫ່ງຊາດ ປະຈໍາ ສົກສຶກສາ 2016-2017

ການຮັບສະໝັກ

ທຶນການສຶກສາ