nuol.edu.la



ພິທີມອບ-ຮັບປະກາສະນີຍະບັດແກ່ນັກສຶກສາໃນໂຄງການທຶນການສຶກສາ ລາວ-ອົດສະຕຣາລີ LANS ຊຸດທີ 3

1498184613 tmp IMG 6893

ໃນວັນທີ 21 ມິຖຸນາ 2017, ມະຫາວິທະຍາໄລແຫ່ງຊາດໄດ້ຈັດພິທີມອບ-ຮັບປະກາສະນີຍະບັດແກ່ນັກສຶກສາໃນໂຄງການທຶນການສຶກສາ ລາວ-ອົດສະຕາລີ ຫຼື ທຶນການສຶກສາ LANS ຊຸດທີ 3 ສຳລັບນັກສຶກສາພາຍໃນປະເທດ ທີ່ຫ້ອງປະຊຸມສະໂມສອນ ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ ອອງເດຣສ ເຊີເບຼກ ຮອງເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ຄະນະບໍດີ, ທ່ານຫົວໜ້າຫ້ອງການ, ຮອງຫົວໜ້າຫ້ອງການ, ຮອງຄະນະບໍດີ, ແຂກທີ່ເຊີນ, ພະນັກງານຄູ-ອາຈານ ແລະ ນັກສຶກສາຜູ້ທີ່ຈົບການສຶກສາໃນຊຸດນີ້ເຂົ້າຮ່ວມ.

ໃນໂອກາດນີ້, ທ່ານ ອອງເດຣສ ເຊີເບຼກ ກໍໄດ້ຂຶ້້ນກ່າວເປີດພິທີວ່າ: ໃນໄລຍະທີ່ຜ່ານມາລັດຖະບານອົດສະຕຣາລີ ໄດ້ໃຫ້ການຊ່ວຍເຫຼືອຊາວໜຸ່ມລາວ ໃນການໃຫ້ທຶນການສຶກສາ ແລະນັກສຶກສາສ່ວນໃຫ່ຍທີ່ຮັບທຶນການສຶກສາຈາກ LANS ແມ່ນນັກສຶກສາທີ່ມີຖານະຄອບຄົວທີ່ທຸກຍາກ, ຢູ່ເຂດຫ່າງໄກສອກຫຼີກ ແລະຂາດທຶນຮອນໃນການສຶກສາຮຽນຕໍ່ໃນລະດັັບປະລິນຍາຕີ; ສະນັ້ນ, ເມື່ອນັກສຶກສາໄດ້ຮັບທຶນຈາກໂຄງການທຶນສຶກສາ LANS ແມ່ນຈະບໍ່ໄດ້ເສຍຄ່າຮຽນໃນໄລຍະເວລາ 4 ປີ ທີ່ສຶກສາຢູ່ໃນ ມະຫາວິທະຍາໄລແຫ່ງຊາດ; ນອກຈາກ ການຊ່ວຍເຫຼືອທາງດ້ານການເງິນແລ້ວ, ໂຄງການທຶນການສຶກສາ LANS ຍັງໄດ້ໃຫ້ໂອກາດແກ່ນັກສຶກສາທຸກຄົນໄດ້ຮຽນທັກສະຊີວິດ ແລະທັກສະພາສາອັງກິດ ອີກດ້ວຍ, ພ້ອມນັ້ນ ຍັງໄດ້ມີການສົ່ງນັກສຶກສາຍິງຈຳນວນ 27 ຄົນ ເຂົ້າຮ່ວມເຝິກອົບຮົມກ່ຽວກັບການກະກຽມຄວາມພ້ອມສູ່ການເຮັດວຽກ ເປັນເວລາ 6 ອາທິດ ຢູ່ທີ່ ມະຫາວິທະຍາໄລ Queensland University Technology (ປະເທດ ອົດສະຕຣາລີ) ອີກດ້ວຍ.

ໃນໂອກາດດັ່ງກ່າວ, ທ່ານ ສຈ. ປອ. ສົມສີ ຍໍພັນໄຊ ໄດ້ຂຶ້້ນກ່າວມີຄຳເຫັນວ່າ: ສຳລັບໃນສົກສຶກສາ 2015-2016 ນີ້, ມີນັກສຶກສາທີ່ຈົບການສຶກສາຈາກການຊ່ວຍເຫຼືອຂອງໂຄງການທຶນການສຶກສາ LANS ທັງໝົດ 72 ຄົນ, ຍິງ 40 ຄົນ, ນອກນັ້ນ, ຍັງມີການນັກສຶກສາ ທີ່ກຳລັງສຶກສາທີ່ມະຫາວິທະຍາໄລແຫ່ງຊາດ ອີກຈຳນວນ 372 ຄົນ; ລວມມູນຄ່າທຶນຊ່ວຍເຫຼືອທັງໝົດຈາກໂຄງການ LANS ຈຳນວນ 3,990,428,500 ກີບ; ທ້າຍສຸດນີ້, ຂ້າພະເຈົ້າໃນນາມຕາງໜ້າໃຫ້ແກ່ຄະນະນຳ ມະຫາວິທະຍາໄລແຫ່ງຊາດ, ຂໍສະແດງຄວາມຂອບໃຈຢ່າງສູງມາຍັງການໃຫ້ການຊ່ວຍເຫຼືອດ້ານທຶນຮອນການສຶກສາ ຈາກລັດຖະບານອົດຕຣາລີ ແລະຂໍອວຍພອນໄຊແກ່ຈົ່ງມີສຸຂະພາບແຂງແຮງ, ປະສົບຜົນສຳເລັດໃນວຽກງານ.

ໃນພິທີ ທ່ານ ອອງເດຣສ ເຊີເບຼກ ກໍໄດ້ຂຶ້ນມອບປະກາສະນີຍະບັດໃຫ້ແກ່ນັກສຶກສາທີ່ຈົບການສຶກສາໃນຄັ້ງນີ້ ແລະຮ່ວມກັນຖ່າຍພາບອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີມອບ-ຮັບປະກາສະນີຍະບັດແກ່ນັກສຶກສາໃນໂຄງການທຶນການສຶກສາ ລາວ-ອົດສະຕຣາລີ LANS ຊຸດທີ 3

ການຮັບສະໝັກ

ທຶນການສຶກສາ