nuol.edu.la



ຄສວ ຈັດງານສຳມະນາໃນຫົວຂໍ້ “ເຊື່ອມໂຍງມະນຸດເຂົ້າກັບທຳມະຊາດ” ເນື່ອງໃນໂອກາດວັນສິ່ງແວດລ້ອມໂລກ

1496737899 tmp IMG 5803

  ໃນວັນທີ 5 ມິຖຸນາ 2017 ນີ້, ຄະນະ ວິທະຍາສາດສິ່ງແວດລ້ອມ ມະຫາວິທະຍາໄລແຫ່ງຊາດ ໄດ້ຈັດງານສຳມະນາໃນຫົວຂໍ້ “ເຊື່ອມໂຍງມະນຸດເຂົ້າກັບທຳມະຊາດ” ເນື່ອໃນໂອກາດວັນສິ່ງແວດລ້ອມໂລກ (ວັນທີ 5 ມິຖຸນາ) ທີ່ຫ້ອງປະຊຸມ ຄະນະວິທະຍາສາດສິ່ງແວດລ້ອມໂດຍການເປັນປະທານຂອງທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ ເລອົງ ໂປນ ຝາເບ (Leon Paul Faber) ທູດສະຫະພາບເອີຮົບປະຈໍາ ສປປ ລາວ, ທ່ານ ຮສ. ປອ. ຮຸ່ງເພັດ ຈັນທະວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ແກ່ນຈັນ ສິນສໍາພັນ ຄະນະບໍດີ ຄະນະວິທະຍາສາດສິ່ງແວດລ້ອມ, ບັນດາຮອງຄະນະບໍດີ, ຫົວໜ້າ ແລະຮອງພາກວິຊາ, ແຂກທີ່ຖືກເຊີນ, ມີຕົວແທນຈາກສະມາຄົມພັດທະນາກະສິກຳ ແລະສິ່ງແວດລ້ອມ, ອົງການເກຣັກ, ພະນັກງານ, ຄູ-ອາຈານ ແລະນັກສຶກສາ ຄະນະດັ່ງກ່າວເຂົ້າຮ່ວມ.

          ໃນໂອກາດນີ້, ທ່ານ ຮສ. ແກ່ນຈັນ ສິນສຳພັນ ຄະນະບໍດີ ຄະນະວິທະຍາສາດສິ່ງແວດລ້ອມ ໄດ້ຂຶ້ນກ່າວເປີດພິທີ, ເຊິ່ງທ່ານກ່າວວ່າ: ວັນສິ່ງແວດລ້ອມໂລກແມ່ນວັນທີ່ມີຄວາມໝາຍຄວາມສຳຄັນ ເປັນພິເສດເພາະມັນເປັນໂອກາດໃຫ້ປະເທດຕ່າງໆໃນທົ່ວໂລກໄດ້ທົບທວນຄືນກ່ຽວກັບການເຄື່ອນໄຫວວຽກງານການປົກປັກຮັກສາສິ່ງແວດລ້ອມ, ສຳລັບຄະນະ ວິທະຍາສາດສິ່ງແວດລ້ອມ ກໍຄືມະຫາວິທະຍາໄລແຫ່ງຊາດ ພວກເຮົາ ໄດ້ຖືເອົາວັນດັ່ງກ່າວນີ້ ເປັນປາງບຸນໃຫຍ່ ແລະໄດ້ຈັດຕັ້ງສະເຫຼີມສະຫຼອງກັນຢ່າງຄຶກຄຶ້ນມ່ວນຊື່ນເພື່ອເປັນການປູກຈິດສຳນຶກ ແລະສະສົມບົດຮຽນກ່ຽວກັບການຄຸ້ມຄອງ-ບໍລິຫານຈັດການດ້ານສິ່ງແວດລ້ອມຫຼາຍຂຶ້ນ. ບັນດາກິດຈະກຳທີ່ຈັດຂຶ້ນໃນປີ 2017 ທີ່ຄະນະວິທະຍາສາດສິ່ງແວດລ້ອມ ປະກອບມີ: ການຈັດສຳມະນາທາງດ້ານວິຊາການກ່ຽວກັບສິ່ງແວດລ້ອມ, ການປູກຕົ້ນໄມ້ຈຳນວນ 300 ຕົ້ນ, ປະກວດຮູບພາບກ່ຽວກັບທຳມະຊາດ, ປະກະກວດການຕົບແຕ່ງບູດ ແລະສິ່ງປະດິດຈາກສິ່ງເສດເຫຼືອ, ປະກວດອາຫານປອດສານພິດ, ປະກວດບົດຟ້ອນ, ສະແດງສິລະປະວັນນະຄະດີ ແລະການສະແດງລະຄອນ.

          ໃນໂອກາດດຽວກັນ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ກໍໄດ້ໃຫ້ກຽດໂອ້ລົມຕໍ່ພິທີ, ເຊິ່ງທ່ານໄດ້ກ່າວເນັ້ນໜັກ ກ່ຽວກັບສິ່ງແວດລ້ອມວ່າ: ການອະນຸລັກ-ປົກປັກຮັກສາສິ່ງແວດລ້ອມ ແມ່ນໜ້າທີ່ຂອງໝົດທຸກຄົນ, ເພີ່ມທະວີການພັດທະນາເສດຖະກິດສັງຄົມແຕ່ຕ້ອງຄຽງຄູ່ກັບການພັດທະນາສະພາບແວດລ້ອມອ້ອມຂ້າງ, ລະດົມຂົນຂວາຍໃຫ້ນັກສຶກສາທຸກຄົນ ມີຈິດສຳນຶກໃນການຮັກສາສະພາບແວດລ້ອມໃຫ້ສະອາດ. ນອກນັ້ນ, ພາຍໃນງານຍັງມີ ການນໍາສະເໜີຄວາມຮູ້ທາງວິຊາການ ໃນການປົກປັກຮັກສາສິ່ງແວດລ້ອມ, ຊົມການວາງສະແດງຜົນງານຂອງພາກສ່ວນຕ່າງໆ ແລະປູກຕົ້ນໄມ້ຮ່ວມກັນ ຕື່ມອີກ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄສວ ຈັດງານສຳມະນາໃນຫົວຂໍ້ “ເຊື່ອມໂຍງມະນຸດເຂົ້າກັບທຳມະຊາດ” ເນື່ອງໃນໂອກາດວັນສິ່ງແວດລ້ອມໂລກ

ການຮັບສະໝັກ

ທຶນການສຶກສາ