nuol.edu.la



ຄອສ. ຈັດງານເທສະການອາຫານສະໝອງຄັ້ງທີ 2 ໃນຫົວຂໍ້ “ປູກຝັງການອ່ານເລີ່ມແຕ່ເຍົາໄວ”

1496635551 tmp IMG 5714

           ໃນວັນທີ 2 ມິຖຸນາ 2017 ນີ້, ຄະນະອັກສອນສາດ ມະຫາວິທະຍາໄລແຫ່ງຊາດ ໄດ້ຈັດງານເທສະການອາຫານສະໝອງຄັ້ງທີ 2 ໃນຫົວຂໍ້ “ປູກຝັງການອ່ານແຕ່ເຍົາໄວ” ຂຶ້ນທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ,  ທ່ານ ຮສ. ອາລຸນ ສີລັດຕະນະກຸນ ຄະນະບໍດີ ຄະນະອັກສອນສາດ, ທ່ານ ຄຳໃບ ໂພທິສານ ປະທານສະມາຄົມນັກປະພັນລາວ, ມີ ຮອງຄະນະບໍດີ, ຫົວໜ້າຫ້ອງການ, ບັນດາແຂກທີ່ຖືກເຊີນ, ພະນັກງານ,ຄູ-ອາຈານ, ຫ້າງຮ້ານ-ສຳນັກພິມໃນນະຄອນຫຼວງວຽງຈັນ ແລະນັກສຶກສາເຂົ້າຮ່ວມ.

             ໃນໂອກາດນີ້, ທ່ານ ຮສ. ອາລຸນ ສີລັດຕະນະກຸນ ຄະນະບໍດີ ຄະນະອັກສອນສາດ ໄດ້ຂຶ້ນກ່າວເປີດພິທີ ແລະໄດ້ກ່າວວ່າ: ການອ່ານເຮັດໃຫ້ຄົນເປັນຄົນດີ, ມີປັນຍາຄວາມຮູ້ ແລະບໍ່ມີຄວາມມ່ວນຊື່ນລືນເລີງອັນໃດທີ່ມີລາຄາຖືກເທົ່າກັບການອ່ານ, ພ້ອມດຽວກັນນັ້ນ ການເປັນນັກຂຽນທີ່ດີ ກໍຕ້ອງເປັນນັກອ່ານທີ່ດີ. ດັ່ງທີ່ພວກເຮົາຮູ້ນໍາກັນແລ້ວວ່າ ບັນດາທ່ານທີ່ເຄີຍເປັນຜູ້ນຳລະດັບໂລກ ລະດັບຊາດ, ນັກຄົ້ນຄວ້າ, ນັກປະພັນ, ນັກປາດອາຈານ ແລະນັກບໍລິຫານຜູ້ດີເດັ່ນທັງຫຼາຍ ລ້ວນແຕ່ເປັນຜູ້ສະຫງວນມັກໃນການອ່ານ, ແນ່ນອນວ່າ ການອ່ານຍ່ອມເພີ່ມປັນຍາຄວາມຮູ້ອັນໃໝ່ເລື້ອຍໆ. ໃນການຈັດງານເທສະການອາຫານສະໝອງໃນຄັ້ງນີ້ ແມ່ນເກີດຂຶ້ນຍ້ອນການຮ່ວມມືລະຫວ່າງ ຄະນະອັກສອນສາດ ມະຫາວິທະຍາໄລແຫ່ງຊາດ ແລະບັນດາການຈັດຕັ້ງ, ບໍລິສັດ, ສຳນັກພິມ ແລະຫ້າງຮ້ານ ທີ່ຈຳໜ່າຍປື້ມ ທີ່ໃຫ້ການອຸປະຖຳ ແລະການຈັດງານໃນຄັງນີ້ ມີບັນດາຫ້າງຮ້ານຕ່າງໆ ມາວາງສະແດງທັງໝົດ 26 ພາກສ່ວນ.

          ຂະນະດຽວກັນ, ທ່ານ ຄຳໃບ ໂພທິສານ ປະທານສະມາຄົມນັກປະພັນລາວ ຍັງໄດ້ມອບປື້ມ “ຈາກປະເທດໂລກທີສາມ ກ້າວສູ່ໂລກທີໜື່ງ” ໃຫ້ແກ່ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ ເປັນທີ່ລະນຶກ, ພ້ອມທັງຮ່ວມເດີນຊົມການວາງສະແດງປື້ມຂອງແຕ່ລະພາກສ່ວນອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄອສ. ຈັດງານເທສະການອາຫານສະໝອງຄັ້ງທີ 2 ໃນຫົວຂໍ້ “ປູກຝັງການອ່ານເລີ່ມແຕ່ເຍົາໄວ”

ການຮັບສະໝັກ

ທຶນການສຶກສາ