nuol.edu.la



ກິດຈະກຳການແຂ່ງຂັນກີລາພື້ນເມືອງ ຂອງນັກສຶກສາມູນນິທິການສຶກສາ ມະຫາວິທະຍາໄລແຫ່ງຊາດປະຈຳປີ 2017

1496387772 tmp IMG 5645

          ໃນວັນທີ 31 ພຶດສະພາ 2017 ຜ່ານມານີ້, ຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ ໄດ້ຈັດກິດຈະກຳກິດແຂ່ງຂັນກີລາພື້ນເມືອງ ຂອງນັກສຶກສາມູນນິທິການສຶກສາ ມະຫາວິທະຍາໄລແຫ່ງຊາດ ປະຈຳປີ 2017, ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ ໂດຍການເປັນປະທານຂອງ ທ່ານ ອຈ. ຄໍາແສນ ສຸດທະວົງ ວ່າການຫົວໜ້າຫ້ອງການຄຸ້ມຄອງນັກສຶກສາ, ມີຮອງຫົວໜ້າຫ້ອງການ, ຫົວໜ້າພະແນກ, ແຂກທີ່ຖືກເຊີນ ພະນັກງານ, ຄູ-ອາຈານ ແລະນັກສຶກສາຜູ້ໄດ້ຮັບທຶນມູນນິທິ ແລະຕົວແທນນັກສຶກສາ ຄະນະວິຊາ ຕ່າງໆເຂົ້າຮ່ວມ.

          ໂອກາດນີ້, ທ່ານ ອຈ. ຄຳແສນ ສຸດທະວົງ ວ່າການຫົວໜ້າຫ້ອງການຄຸ້ມຄອງນັກສຶກສາ ກໍໄດ້ກ່າວໃນພິທີວ່າ: ກິດຈະກຳທີ່ຈັດຂຶ້ນໃນຄັ້ງນີ້ ເປັນກິດຈະກຳປະຈຳປີຂອງນັກສຶກສາທີ່ໄດ້ຮັບທຶນທັງໝົດໃນທົ່ວມະຫາວິທະຍາໄລແຫ່ງຊາດ, ເຊິ່ງມີເປົ້າໝາຍ ເພື່ອຮັດແໜ້ນຄວາມສາມັກຄີຂອງນັກສຶກສາທີ່ມີມາແລ້ວນັ້ນ ໃຫ້ແໜ້ນແຟ້ນຍິ່ງຂຶ້ນ ແລະມີຄວາມຮັກແພງເຊິ່ງກັນ ແລະກັນ; ທັງເປັນການເສີມສ້າງ ໃຫ້ນັກສຶກສາທີ່ເຂົ້າຮ່ວມກິດຈະກຳມີສຸຂະພາບແຂງແຮງ, ມີຄວາມເບີກບານມ່ວນຊື່ນ ກ່ອນການຈົບປີການສຶກສາ. ນອກນັ້ນ ກໍເພື່ອເປັນການຕ້ອນຮັບວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ (ວັນທີ 1 ມິຖຸນາ)

          ສຳລັບກິດຈະກຳທີ່ຈັດຂຶ້ນທັງໝົດມີ 4 ປະເພດຄື: ກີລາພາຍເຮືອບົກ ຫຼືເຕັ້ນກົບ(ຍິງ-ຊາຍ), ໂຍນບານເຂົ້າກະຕ່າ (ຍິງ-ຊາຍ), ຢຽບປຸມເປົ້າ (ຍິງ-ຊາຍ) ແລະເປົ່າປຸມເປົ້າ, ສ່ວນກະຕິກາການແຂ່ງຂັນແມ່ນໃຫ້ແຕ່ລະຄະນະວິຊາ ເກັບຄະແນນແຕ່ລະປະເພດການແຂ່ງຂັນໃນແຕ່ລະອັນດັບ (ອັນດັບ 1 ໄດ້ 3 ຄະແນນ; ອັນດັບ 2 ໄດ້ 2 ຄະແນນ ແລະອັນດັບ 3 ໄດ້ 1 ຄະແນນ); ພາຍຫຼັງການແຂ່ງຂັນ ທີມທີໄດ້ຄະແນນສະສົມອັນດັບທີ 1 ໄດ້ແກ່ຄະນະ ວິທະຍາສາດທຳມະຊາດ, ອັນດັບທີ 2 ຄະນະ ວິທະຍາສາດສິ່ງແວດລ້ອມ ແລະອັນດັບທີ 3 ຄະນະ ສຶກສາສາດ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກິດຈະກຳການແຂ່ງຂັນກີລາພື້ນເມືອງ ຂອງນັກສຶກສາມູນນິທິການສຶກສາ ມະຫາວິທະຍາໄລແຫ່ງຊາດປະຈຳປີ 2017

ການຮັບສະໝັກ

ທຶນການສຶກສາ