nuol.edu.la



ມຊ ຈັດພິທີປູກຕົ້ນໄມ້ຄືນປ່າໃຫ້ດົງເດີມ

1496386168 tmp IMG 5274

          ໃນວັນທີ 31 ພຶດສະພາ 2017ນີ້, ມະຫາວິທະຍາໄລແຫ່ງຊາດໄດ້ຈັດພິທີ ປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ (ວັນທີ 1 ມິຖຸນາ), ໂດຍການໃຫ້ກຽດເຂົ້າຮ່ວມຂອງທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ, ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະກີລາ, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ມີບັນດາທ່ານຮອງອະທິການບໍດີ, ທ່ານຄະນະບໍດີ, ຫົວໜ້າຫ້ອງການ, ຜູ້ອໍານວຍການສະຖາບັນ, ສູນ, ຫໍສະໝຸດກາງ, ໂຮງໝໍ, ໂຮງຮຽນ, ພະນັກງານ, ຄູ-ອາຈານ, ນັກສຶກສາ ແລະນ້ອງນ້ອຍເຍົາວະຊົນເຂົ້າຮ່ວມ.

          ໃນໂອກາດອັນມີຄວາມໝາຍສໍາຄັນດັ່ງກ່າວ ທ່ານ ສຈ. ປອ. ສົມສີ ຍໍພັນໄຊ ໄດ້ກ່າວໃນພິທີວ່າ: ໂດຍປະຕິບັດຕາມທິດຊີ້ນຳຂອງພັກ ແລະລັດຖະບານ ໃນການພັດທະນາຕາມທິດສີຂຽວ, ໃນຍຸກໂລກາພິວັດ ແຫ່ງການຂະຫຍາຍຕົວທາງດ້ານອຸດສະຫະກຳທັນສະໄໝ, ການອະນຸລັກສິ່ງແວດລ້ອມ ແລະທຳມະຊາດເປັນປັດໄຈສຳຄັນຕົ້ນຕໍ, ເປັນພັນທະຂອງທຸກຄົນຕ້ອງໄດ້ປະຕິບັດ ສືບຕໍ່ສົ່ງເສີມສິ່ງດັ່ງກ່າວໃຫ້ຢູ່ຄຽງຄູ່ກັບການດຳລົງຊີວິດປະຈຳວັນ ແລະເປັນການປູກຈິດສຳນຶກທີ່ດີໃຫ້ແກ່ຊາວໝຸ່ມເຍົາວະຊົນ, ອະນຸຊົນຄົນຮຸ່ນຫຼັງ ໄດ້ເຫັນເຖິງຄວາມໝາຍຄວາມສຳຄັນຂອງປ່າໄມ້. ດັ່ງນັ້ນ, ພັກ ແລະລັດຖະບານຈຶ່ງໄດ້ກຳນົດເອົາວັນ ທີ 1 ມິຖຸນາ ຂອງທຸກໆປີເປັນວັນປູກຕົ້ນໄມ້ແຫ່ງຊາດ, ເຊິ່ງໄດ້ເລີ່ມຈັດຕັ້ງປະຕິບັດໂດຍອີງໃສ່ມະຕິຕົກລົງຂອງສະພາລັດຖະມົນຕີ ສະບັບເລກທີ 48/ນຍ ແລະມະຫາວິທະຍາໄລແຫ່ງຊາດໄດ້ດຳເນີນການປູກຕົ້ນໄມ້ ເພື່ອຄືນປ່າໃຫ້ດົງເດີມຕະຫຼອດມາ ເພື່ອສ້າງ ແລະພັດທະນາ ມະຫາວິທະຍາໄລແຫ່ງຊາດເປັນມະຫາວິທະຍາໄລ ສີຂຽວ, ສະອາດ ແລະສວຍງາມ ຕາມທິດທາງພັດທະນາແບບຍືນຍົງ.

          ການສົ່ງເສີມການປູກຕົ້ນໄມ້ໃນຄັ້ງນີ້, ແມ່ນປູກໃນເຂດປ່າສັກ(ສວນອະນຸລັກທຳມະຊາດ) ພາຍໃນວິທະຍາເຂດດົງໂດກ ເພື່ອເປັນການສ້າງຄວາມອຸດົມສົມບູນ, ຄວາມສົດຊື່ນສີຂຽວ ແລະເປັນການຫຼຸດຜ່ອນມົນລະພິດໃນເຂດ ສະຖານການສຶກສາ ເພື່ອອະນາຄົດທີ່ສົດໃສຂອງລູກຫຼານ. ສຳລັບເບ້ຍໄມ້ທີ່ນຳມາປູກໃນຄັ້ງນີ້ ປະກອບມີ: ໄມ້ແຕ້ຄ່າ, ໄມ້ຂະຍຸງ, ໄມ້ດູ່ ຊະນິດລະ 200 ຕົ້ນ ແລະປະເພດຕົ້ນໄມ້ກິນໝາກ ອີກຈຳນວນ 100 ຕົ້ນ, ລວມຕົ້ນໄມ້ທີ່ປູກທັງໝົດ 700 ຕົ້ນ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ຈັດພິທີປູກຕົ້ນໄມ້ຄືນປ່າໃຫ້ດົງເດີມ

ການຮັບສະໝັກ

ທຶນການສຶກສາ