nuol.edu.la



ເທສະການສາຍຮູບເງົາ ແລະສາລະຄະດີສັ້ນ ຄັ້ງທີ IV ຂອງຄະນະອັກສອນສາດ ມະຫາວິທະຍາໄລແຫ່ງຊາດ

1496282226 tmp IMG 5031

          ໃນຕອນບ່າຍ ວັນທີ 26 ພຶດສະພາ 2017ນີ້, ຄະນະອັກສອນສາດ ມະຫາວິທະຍາໄລແຫ່ງຊາດ ໄດ້ຈັດງານເທສະການສາຍຮູບເງົາ ແລະສາລະຄະດີສັ້ນ ທີ່ຫ້ອງປະຊຸມສະໂມສອນ ໃຫຍ່ ມະຫາວິທະຍາໄລແຫ່ຊາດ, ໂດຍການເຂົ້າຮ່ວມເປັນປະທານຂອງ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ ຊາງຮຸນລີ (Sang Hoon Lee)ອຸປະທູດ ສາທາລະນະລັດເກົາຫລີ ປະຈຳ ສປປ ລາວ, ທ່ານ ຮສ. ອາລຸນ ສີລັດຕະນະກຸນຄະນະບໍດີ ຄະນະ ອັກສອນສາດ ພ້ອມຄະນະ, ມີຮອງຜູ້ອຳນວຍການຈາກອົງການກອຍກາ(KOICA), ມີບັນຫົວໜ້າຫ້ອງການ, ຮອງຫົວໜ້າຫ້ອງການ, ແຂກທີ່ຖືກເຊີນ, ພະນັກງານ,ຄູ-ອາຈານ, ນັກສຶກສາເຂົ້າຮ່ວມ.

          ໃນໂອກາດນີ້, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ໄດ້ຂຶ້ນກ່າວເປີດພິທີ, ເຊິ່ງບາງຕອນທ່ານກ່າວວ່າ: ຂ້າພະເຈົ້າໃນນາມຕາງໜ້າຄະນະນຳ ມະຫາວິທະຍາໄລແຫ່ງຊາດ, ສະແດງຄວາມຂອບໃຈມາຍັງອົງການກອຍກາ (KOICA) ທີ່ໃຫ້ການສະໜັບສະໜູນ ແລະຮ່ວມມືເປັນຢ່າງດີໃນການຈັດງານໃນຄັ້ງນີ້, ດັ່ງທີ່ຮູ້ແລ້ວວ່າ ສັງຄົມປັດຈຸບັນ ມີຄວາມຕ້ອງການບຸກຄະລາກອນດ້ານສື່ສານມວນຊົນຫຼາຍພໍສົມຄວນ ເຊັ່ນວ່າ: ຜູ້ຜະຫຼິດສື່ໂທລະພາບ, ສື່ວິທະຍາຍຸ, ໜັງສືພິມ, ຜູ້ປະກາດຂ່າວ, ນັກຂຽນຂ່າວ ແລະອື່ນໆໃນການພັດທະນາວົງການ ສື່ສານມວນຊົນໃຫ້ກ້າວໄກທັນກັບສະພາບການປ່ຽນແປງຂອງໂລກ, ສະນັ້ນ ຫວັງຢ່າງຍິ່ງວ່າການຈັດງານຄັ້ງນີ້ຈະເປັນອີກບາດກ້າວໜຶ່ງໃນການສົ່ງເສີມຄວາມຮູ້-ຄວາມສາມາດໃຫ້ແກ່ນັກສຶກສາ ໃນສາຂາ ສື່ສານມວນຊົນໄດ້ນຳໃຊ້ຄວາມຮູ້ຄວາມສາມາດຂອງຕົນທີ່ໄດ້ສຶກສາຮໍ່າຮຽນໃນການຜະຫຼິດຮູບເງົາ ແລະສາລະຄະດີສັ້ນໃນຄັ້ງນີ້.

          ການຈັດງານເທສະການຮູບເງົາ ແລະສາລະຄະດີສັ້ນ ແມ່ນເລີ່ມຕົ້ນມາແຕ່ສົກສຶກສາ 2014-2015 ໂດຍເປັນການນຳເອົາຜົນງານຂອງນັກສຶກສາ ກໍຄືຮູບເງົາ ແລະສາລະຄະດີສັ້ນ ມາເປີດສາຍໃຫ້ທຸກຄົນທີ່ມີຄວາມສົນໃຈໄດ້ເຂົ້າຊົມຢ່າງເປີດກວ້າງໂດຍບໍ່ເສຍຄ່າ; ທັງນີ້ກໍເພື່ອສົ່ງເສີມໃຫ້ໄວໝຸ່ມລາວມີຄວາມຮັກມັກໃນການສ້າງຮູບເງົາ ແລະສາລະຄະດີ ທັງເປັນການສ້າງບຸກຄະລາກອນດ້ານສື່ສານມວນຊົນໃຫ້ມີຄວາມພ້ອມ ກ່ອນການໄປປະກອບອາຊີບວຽກງານຕົວຈິງໃນອະນາຄົດ. ງານເທສະການຮູບເງົາ ແລະສາລະຄະດີສັ້ນຄັ້ງນີ້ ແມ່ນຈັດຂຶ້ນເປັນຄັ້ງທີ IV ໂດຍການຮ່ວມມືລະຫວ່າງພາກວິຊາສື່ສານມວນຊົນ ຄະນະອັກສອນສາດ ມະຫາວິທະຍາໄລແຫ່ງຊາດ ແລະອົງການ(KOICA), ສຳລັບຜົນງານທີນຳມາສາຍໃນຄັ້ງນີ້ ມີທັງໝົດ 11 ເລື່ອງໃນນັ້ນ, ສາລະຄະດີສັ້ນມີ 6 ເລື່ອງ ແລະຮູບເງົາສັ້ນ 5 ເລື່ອງ. ສຳລັບຮູບເງົາທີ່ໄດ້ຮັບຮາງວັນ ຮູບເງົາດີເດັ່ນໄດ້ແກ່ເລື່ອງ “ພໍ່ຂອງຂ້ອຍ” ແລະຮູບເງົາເລື່ອງ “ບະ”; ສາລະຄະດີ ດີເດັ່ນໄດ້ແກ່ ສາລະຄະດີເລື່ອງ “ແສງສະຫວ່າງໃນຄວາມມືດ”ເຊິ່ງໃຫ້ກຽດໃນການມອບຮາງວັນໂດຍທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ເທສະການສາຍຮູບເງົາ ແລະສາລະຄະດີສັ້ນ ຄັ້ງທີ IV ຂອງຄະນະອັກສອນສາດ ມະຫາວິທະຍາໄລແຫ່ງຊາດ

ການຮັບສະໝັກ

ທຶນການສຶກສາ