nuol.edu.la



ຄະນະສຶກສາສາດ ຈັດງານແຂ່ງຂັນ ສິລະປະ-ວັນນະຄະດີ ປະຈຳສົກສຶກສາ 2016-2017

1495786638 tmp IMG 4829

           ໃນຕອນບ່າຍວັນທີ 24 ພຶດສາພາ 2017ນີ້, ຄະນະສຶກສາສາດ ມຊ. ໄດ້ຈັດງານແຂ່ງຂັນສິລະປະ-ວັນນະຄະດີ ຂຶ້ນທີ່ສະໂມສອນໃຫຍ່ ມຊ. ໂດຍການເປັນປະທານຂອງທ່ານ ປທ. ວິຊຽນ ທອງທະວີຮອງຄະນະບໍດີ ຄສສ,ມີທ່ານຫົວໜ້າຫ້ອງການຄຸ້ມຄອງນັກສຶກສາ ມຊ, ຫົວໜ້າພາກວິຊາ, ຫົວໜ້າພະແນກ, ຕາງໜ້າພະແນກກິດຈະກຳນັກສຶກສາແຕ່ລະຄະນະວິຊາ,ບັນດາພະນັກງານ-ຄູອາຈານ ແລະນັກສຶກສາຄະນະດັ່ງກ່າວເຂົ້າຮ່ວມຢ່າງພ້ອມພຽງ.

          ໂອກາດນີ້, ທ່ານ ອຈ. ວິຊຽນ ທອງທະວີ ຮອງຄະນະບໍດີ ຄະນະສຶກສາສາດ ໄດ້ຂຶ້ນກ່າວເປີດພິທີ, ເຊິ່ງທ່ານໄດ້ໃຫ້ຮູ້ວ່າ: ຈຸດປະສົງໃນການຈັດງານນີ້ ແມ່ນເພື່ອປະຕິບັດຕາມ 5 ຫຼັກມູນການສຶກສາ ຂອງກະຊວງສຶກສາທິການ ແລະກີລາ ເຊິ່ງໃນນັ້ນ, ສິລະປະສຶກສາ ກໍແມ່ນຫຼັກມູນໜຶ່ງທີ່ຊ່ວຍເສີມສ້າງກິດຈະກຳນອກຫຼັກສູດໃຫ້ມີຊີວິດຊີວາ ແລະເບີກບານມ່ວນຊື່ນ, ເພື່ອເປັນການສົ່ງເສີມລຳວົງລາວເຂົ້າໃນໝູ່ນັກສຶກສາ, ເພື່ອເຝິກທັກສະໃຫ້ນັກສຶກສາກ້າສະແດງອອກຕໍ່ໜ້າມະຫາຊົນ ແລະສັງຄົມ, ເພື່ອເປັນການເຜີຍແຜ່ ແລະອະນຸລັກຮັກສາ ວັດທະນະທຳ-ຮີດຄອງປະເພນີລາວໃຫ້ຄຽງຄູ່ກັບຄົນລາວເວົ້າລວມເວົ້າສະເພາະກໍແມ່ນນັກສຶກສາຄູ.

          ການແຂ່ງຂັນສິລະປະ-ວັນນະຄະດີ ທີ່ຄະນະສຶກສາສາດຈັດຂຶ້ນໃນຄັ້ງນີ້, ມີ 7 ພາກວິຊາເຂົ້າຮ່ວມການແຂ່ງຂັນຄື: ພາກວິຊາສ້າງຄູພາລະສຶກສາ, ພາກວິຊາສ້າງຄູວິທະຍາສາດສັງຄົມ, ພາກວິຊາສ້າງຄູຈິດຕະວິທະຍາການສຶກສາ, ພາກວິຊາສ້າງຄູພາສາຕ່າງປະເທດ, ພາກວິຊາສ້າງຄູພາສາລາວ-ວັນນະຄະດີ, ພາກວິຊາສ້າງຄູ ວິທະຍາສາດທຳມະຊາດ ແລະພາກວິຊາສ້າງຄູບໍລິຫານການສຶກສາ ແລະ ມີ 5 ປະເພດການແຂ່ງຂັນຄື: ປະເພດຮ້ອງເພງຍິງ, ປະເພດຮ້ອງເພງຊາຍ, ປະເພດຂັບ-ລຳຍິງ, ປະເພດຂັບ-ລຳຊາຍ ແລະປະເພດບົດຟ້ອນ.

          ຜົນການແຂ່ງຂັນປະເພດຮ້ອງເພງຍິງ ຊະນະເລີດໄດ້ແກ່ ນ.ຈັນສະໝອນ ມະນີວົງ ຈາກພາກວິຊາສ້າງຄູພາສາລາວ-ວັນນະຄະດີ, ອັນດັບ 2 ໄດ້ແກ່ ນ.ໄອວີນີ ລໍ່ເບຼ່ຍຢ້າວ ຈາກພາກວິຊາສ້າງຄູວິທະຍາສາດສັງຄົມ ແລະອັນດັບ 3 ໄດ້ແກ່ ນ. ລົດຈະນາ ສຸລິຍະວົງ ຈາກພາກວິຊາສ້າງຄູວິທະຍາສາດທຳມະຊາດ. ປະເພດຮ້ອງເພງຊາຍ ຊະນະເລີດໄດ້ແກ່ ທ. ຂັນຄຳ ນວນມາລາ ຈາກພາກວິຊາສ້າງຄູ ພາສາລາວ-ວັນນະຄະດີ,  ອັນດັບ 2 ໄດ້ແກ່ ທ. ກິ່ງເພັດ ສີປະເສີດ ຈາກພາກວິຊາສ້າງຄູວິທະຍາສາດທຳມະຊາດ ແລະອັນດັບ 3 ໄດ້ແກ່ ທ. ວັນໄຊ ຕັນໄມທອງ ຈາກພາກວິຊາສ້າງຄູພາສາຕ່າງປະເທດ; ປະເພດຂັບ-ລຳຍິງ ຊະນະເລີດ ໄດ້ແກ່ ນ.ສົມສັກ ໄຊຍະສອນ ຈາກພາກວິຊາສ້າງຄູ ພາສາລາວ-ວັນນະຄະດີ,  ອັນດັບ 2 ໄດ້ແກ່ ນ. ພຸດທະສອນ ຍອຍສາຍຄຳ ຈາກພາກວິຊາສ້າງຄູບໍລິຫານການສຶກສາ ແລະອັນດັບ 3 ໄດ້ແກ່ ນ. ຊາຍວ້າ ຈາກພາກວິຊາສ້າງຄູພາສາຕ່າງປະເທດ.  ປະເພດຂັບ-ລຳຊາຍ ຊະນະເລີດ ໄດ້ແກ່ ທ. ທອງວັນ ຈາກພາກວິຊາສ້າງຄູພາສາຕ່າງປະເທດ, ອັນດັບ 2 ໄດ້ແກ່ ທ. ທອງໄມ ພິມມະຈັນ ຈາກພາກວິຊາສ້າງຄູ ວິທະຍາສາດສັງຄົມ ແລະອັນດັບ 3 ໄດ້ແກ່ ທ. ສັນຕິ ວິໄລພອນ ຈາກພາກວິຊາສ້າງຄູ ວິທະຍາສາດທຳມະຊາດ. ສວ່ນປະເພດບົດຟ້ອນ ຊະນະເລີດໄດ້ແກ່ ພາກວິຊາສ້າງຄູ ວິທະຍາສາດທຳມະຊາດ, ອັນດັບ 2 ໄດ້ແກ່ພາກວິຊາສ້າງຄູ ພາສາລາວ-ວັນນະຄະດີ ແລະອັນດັບ 3 ໄດ້ແກ່ ພາກວິຊາສ້າງຄູ ວິທະຍາສາດສັງຄົມ.

          ນອກຈາກນີ້, ພາຍໃນງານຍັງມີການສະແດງມາຍາກົນ ແລະການເຕັ້ນລີລາ-ລີລາດ ໃຫ້ຜູ້ເຂົ້າຮ່ວມງານໄດ້ຮັບຊົມ ແລະຮັບຟັງຢ່າງມ່ວນຊື່ນອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄະນະສຶກສາສາດ ຈັດງານແຂ່ງຂັນ ສິລະປະ-ວັນນະຄະດີ ປະຈຳສົກສຶກສາ 2016-2017

ການຮັບສະໝັກ

ທຶນການສຶກສາ