nuol.edu.la



ພິທີວາງສະແດງຕົວອັກສອນຈີນ ຂອງສະມາຄົມມິດຕະພາບປະຊາຊົນຈີນ ກັບນາໆຊາດ

1494991493 tmp IMG 4214

            ໃນຕອນເຊົ້າ ວັນທີ 15 ພຶດສະພາ 2017 ນີ້, ຫ້ອງການພົວພັນຕ່າງປະເທດ ມະຫາວິທະຍາໄລແຫ່ງຊາດ ແລະສະຖາບັນຂົງຈື ມະຫາວິທະຍາໄລແຫ່ງຊາດ ໄດ້ຈັດພິທີວາງສະແດງຕົວອັກສອນຈີນ ຂອງສະມາຄົມມິດຕະພາບປະຊາຊົນຈີນກັບນາໆຊາດ ຂຶ້ນທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເປັນປະທານຮ່ວມຂອງ ທ່ານ ສຈ. ປອ. ສົມສີ ຍໍພັນໄຊ ວ່າການແທນອະທິການບໍດີມະຫາວິທະຍາໄລແຫ່ງຊາດ, ທ່ານ ໝ່າຊ່ຽວມິງ (Mr. Ma Xiao Ming)ຫົວໜ້າພະແນກແລກປ່ຽນວັດທະນະທຳຂອງສະມາຄົມມິດຕະພາບປະຊາຊົນຈີນກັບນາໆຊາດ, ທ່ານ ດວນຢຽນສິນ (Mr. Duan Yan Qin)ຫົວໜ້າພະແນກອຸດສາຫະກຳ ແລະວັດທະນະທຳ ຫໍພິພິຕະພັນ ອັກສອນແຫ່ງປະເທດຈີນ, ມີຄະນະບໍດີ, ຮອງຄະນະບໍດີ, ມີຫົວໜ້າ ແລະຮອງຫົວໜ້າຫ້ອງການ, ມີຜູ້ອໍານວຍການ ແລະຮອງຜູ້ອໍານວຍການສະຖາບັນຂົງຈື, ແຂກທີ່ຖືກເຊີນ ພ້ອມດ້ວຍພະນັກງານ-ຄູອາຈານ ແລະນັກສຶກສາເຂົ້າຮ່ວມ.

           ຈຸດປະສົງຂອງການຈັດງານຄັ້ງນີ້ ແມ່ນເພື່ອວາງສະແດງຜົນງານສິລະປະການແຕ້ມຕົວອັກສອນພາສາຈີນ, ເປັນການເຜີຍແຜ່ ລວດລາຍການຂຽນອັກສອນຈີນທີ່ມີຄຸນຄ່າທາງດ້ານວັດທະນະທຳ ແລະເປັນເອກະລັກຂອງ ສປ ຈີນ. ໂອກາດນີ້, ທ່ານ ສຈ. ປອ. ສົມສີ ຍໍພັນໄຊ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ໄດ້ໃຫ້ກຽດຂຶ້ນກ່າວເປີດພິທີ, ເຊິ່ງບາງຕອນທ່ານກ່າວວ່າ: ໃນນາມຕາງໜ້າໃຫ້ແກ່ຄະນະນຳ ມະຫາວິທະຍາໄລແຫ່ງຊາດລາວ ຮູ້ສຶກພາກພູມໃຈຢ່າງສູງທີ່ໄດ້ຮ່ວມກັບ ສະມາຄົມມິດຕະພາບປະຊາຊົນຈີນ ກັບນາໆຊາດ ແລະຫໍພິພິຕະພັນຕົວອັກສອນແຫ່ງປະເທດຈີນ ຈັດກິດຈະກຳສະແດງຕົວອັກສອນຈີນ ຢູ່ມະຫາວິທະຍາໄລແຫ່ງຊາດໃນຄັ້ງນີ້, ຄຽງຄູ່ກັບການຍົກສູງສາຍພົວພັນການຮ່ວມມືຂອງສອງປະເທດລາວ-ຈີນ ທີ່ສືບຕໍ່ຮ່ວມມືກັນໃນຫຼາຍດ້ານເປັນຕົ້ນແມ່ນດ້ານເສດຖະກິດ ແລະວັດທະນະທຳຢ່າງບໍ່ຢຸດຢັ້ງ. ທາງດ້ານການສຶກສາ ແລະດ້ານການຄົ້ນຄວ້າວິໄຈ ກໍໄດ້ມີການຮ່ວມມືກັນໃນຫຼາຍໂຄງການ ແລະໄດ້ເຊັນສັນຍາການຮ່ວມມືກັບຫຼາຍມະຫາວິທະຍາໄລ ຂອງ ສປ ຈີນ, ປັດຈຸບັນມີນັກສຶກສາ ຈີນທີ່ກຳລັງສຶກສາຢູ່ໃນມະຫາວິທະຍາໄລແຫ່ງຊາດທັງໝົດ ຈໍານວນ 200 ຄົນ, ໃນໄລຍະທີ່ຜ່ານມາ ມະຫາວິທະຍາໄລຊົນເຜົ່າກວາງຊີ ແລະມະຫາວິທະຍາໄລແຫ່ງຊາດ ກໍໄດ້ຮ່ວມມືກັນໃນການສ້າງສະຖາບັນຂົງຈື ທີ່ມະຫາວິທະຍາໄລແຫ່ງຊາດ ເຊິ່ງໃນແຕ່ລະປີມີນັກສຶກສາມາລົງທະບຽນຮຽນປະມານ 1,000 ກວ່າຄົນ, ສ່ວນຫຼັກສູດການສອນ ກໍແມ່ນການສອນພາສາຈີນເປັນຫຼັກ. ການຮ່ວມມືຕ່າງໆທີ່ກ່າວມານັ້ນ ໄດ້ສະແດງໃຫ້ເຫັນວ່າ ສອງປະເທດ ລາວ-ຈີນ ແມ່ນມີການພັດທະນາການຮ່ວມມືກັນນັບມື້ກວ້າງຂວາງ.

          ໃນພິທີ ທ່ານ ສຈ. ປອ. ສົມສີ ຍໍພັນໄຊ ວ່າການແທນອະທິການບໍດີມະຫາວິທະຍາໄລແຫ່ງຊາດ ແລະທ່ານ ໝ່າຊ່ຽວມິງ (Mr. Ma Xiao Ming)ຫົວໜ້າພະແນກແລກປ່ຽນວັດທະນະທຳ ສະມາຄົມມິດຕະພາບປະຊາຊົນຈີນ ກັບນາໆຊາດ ຍັງໄດ້ມອບຂອງທີ່ລະນຶກເຊິ່ງກັນ ແລະກັນ ແລະຍ່າງຊົມການວາງສະແດງຕົວອັກສອນ ໃນຄັ້ງນີ້ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີວາງສະແດງຕົວອັກສອນຈີນ ຂອງສະມາຄົມມິດຕະພາບປະຊາຊົນຈີນ ກັບນາໆຊາດ

ການຮັບສະໝັກ

ທຶນການສຶກສາ