nuol.edu.la



ມະຫາວິທະຍາໄລແຫ່ງຊາດ ຈັດພິທີມອບ-ຮັບທຶນນາກາໂອະ ປະຈຳສົກສຶກສາ 2016-2017

1494838930 tmp IMG 4048

          ໃນຕອນບ່າຍວັນທີ 12 ພຶດສະພາ 2017 ຜ່ານມານີ້, ມະຫາວິທະຍາໄລແຫ່ງຊາດໄດ້ຈັດພິທີ ມອບ-ຮັບ ທຶນ NAGAO (ນາກາໂອະ) ປະຈໍາສົກສຶກສາ 2016-2017 ທີ່ຫ້ອງປະຊຸມສະໂມສອນ ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ຮອງປະທານມູນນິທິທຶນການສຶກສາ ຂອງມະຫາວິທະຍາໄລແຫ່ງຊາດ, ທ່ານ ອຈ. ຄຳແສນ ສຸດທະວົງ ວ່າການຫົວໜ້າຫ້ອງການຄຸ້ມຄອງນັກສຶກສາ, ບັນດາຄະນະກໍາມະການ ມູນນິທິການສຶກສາ ມະຫາວິທະຍາໄລແຫ່ງຊາດ, ພະນັກງານ-ຄູອາຈານທີ່ກ່ຽວຂ້ອງ, ມີຕົວແທນນັກສຶກສາ ແລະນັກສຶກສາທີ່ໄດ້ຮັບທຶນເຂົ້າຮ່ວມ.

          ໂອກາດນີ້, ທ່ານ ນາງ ສີວອນ ຫອມປິ່ນແກ້ວ ຮອງຫົວໜ້າຫ້ອງການຄຸ້ມຄອງນັກສຶກສາ,ໄດ້ຂຶ້ນເຜີຍແຜ່ກົດລະບຽບ ແລະຂໍ້ຕົກລົງຂອງອະທິການບໍດີ ມະຫາວິທະຍາໄລແຫ່ງຊາດ ວ່າດ້ວຍການຮັບທຶນມູນນິທິການສຶກສາ ຂອງມະຫາວິທະຍາໄລແຫ່ງຊາດ, ພ້ອມທັງຮຽກຮ້ອງໃຫ້ນັກສຶກສາທີ່ໄດ້ຮັບທຶນທຸກຄົນຈົ່ງນຳໃຊ້ທຶນທີ່ໄດ້ຮັບ ໃຫ້ເກີດປະໂຫຍດສູງສຸດ ເຂົ້າໃນການສຶກສາຮໍ່າຮຽນພ້ອມທັງປະຕິບັດຕາມກົດລະບຽບທີ່ວາງອອກຢ່າງເຄັ່ງຄັດ.

          ທຶນການສຶກສາ ມູນນິທິສິ່ງແວດລ້ອມ ນາກາໂອະ ຫຼື NAGAO Natural Environmental Foundation (NEF) ເປັນໂຄງການທີ່ມອບທຶນການສຶກສາ ໃຫ້ແກ່ນັກສຶກສາທີ່ມີຄວາມມຸ່ງໜັ້ນ ແຕ່ຂາດທຶນຮອນໃນການສຶກສາຕໍ່ໃນລະດັບມະຫາວິທະຍາໄລ ໃນສາຂາ ສິ່ງແວດລ້ອມ ແລະປ່າໄມ້ ຫຼືສາຂາທີ່ກ່ຽວຂ້ອງ, ເຊິ່ງມີເປົ້າໝາຍແນ່ໃສ່ພັດທະນາຊັບພະຍກອນມະນຸດໃນຂົງເຂດອາຊີຕາເວັນອອກສ່ຽງໃຕ້ ໃນການອະນຸລັກສິ່ງແວດລ້ອມ ແລະທຳມະຊາດ.        

     ສຳລັບນັກສຶກສາທີ່ໄດ້ຮັບທຶນໃນຄັ້ງນີ້ ມີຈຳນວນ 90 ຄົນ ທີ່ສຶກສາຢູ່ໃນລະດັບປະລິນຍາຕີ, ຈາກ 6 ຄະນະວິຊາຄື: ຄະນະວິທະຍາສາດປ່າໄມ້, ກະເສດສາດ, ຊັບພະຍາກອນນໍ້າ, ສຶກສາສາດ, ວິທະຍາສາດທຳມະຊາດ, ວິສະວະກຳສາດ ແລະລະດັບ ປະລິນຍາໂທ 2 ຄົນ ຈາກຄະນະ ກະເສດສາດ. ໃນລະດັບ ປະລິນຍາຕີ ນັກສຶກສາຈະໄດ້ຮັບເງິນເປັນອັດຕາເງິນເດືອນ ເດືອນລະ 219,000 ກີບ/ຄົນ/ເດືອນ, ສ່ວນລະດັບປະລິນຍາໂທແມ່ນຈະໄດ້ຮັບເງິນເດືອນລະ 512,000 ກີບ/ຄົນ/ເດືອນ ແລະໃນຕອນທ້າຍພິທີທ່ານ ຮສ. ປອ. ນາງ ສົມຈັນ ບຸນພັນມີ ກໍໄດ້ຂຶ້ນມອບໃບຢັ້ງຢືນໃຫ້ນັກສຶກສາ ທັງ 92 ຄົນ ທີ່ຮັບທຶນໃນສົກສຶກສານີ້ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມະຫາວິທະຍາໄລແຫ່ງຊາດ ຈັດພິທີມອບ-ຮັບທຶນນາກາໂອະ ປະຈຳສົກສຶກສາ 2016-2017

ການຮັບສະໝັກ

ທຶນການສຶກສາ