nuol.edu.la



ພິທີປິດໂຄງການແລກປ່ຽນຄວາມຮູ້ດ້ານພາສາ ແລະວັດທະນະທຳລະຫວ່າງ ຄະນະສຶກສາສາດ ມະຫາວິທະຍາໄລແຫ່ງຊາດ ແລະມະຫາວິທະຍາໄລ ຣາຊະພັດບ້ານສົມເດັດເຈົ້າພະຍາ

1494836960 tmp IMG 4130

          ໃນຕອນຄໍ່າ ວັນທີ 12 ພຶດສະພາ 2017ນີ້, ຄະນະ ສຶກສາສາດ ມະຫາວິທະຍາໄລແຫ່ງຊາດໄດ້ຈັດພິທີ ປິດໂຄງການແລກປ່ຽນຄວາມຮູ້ດ້ານພາສາ ແລະວັດທະນະທຳລະຫວ່າງ ຄະນະສຶກສາສາດ ມະຫາວິທະຍາໄລແຫ່ງຊາດ ແລະມະຫາວິທະຍາໄລຣາຊະພັດບ້ານສົມເດັດເຈົ້າພະຍາ ຣາຊະອານາຈັກໄທ ທີ່ຫ້ອງປະຊຸມສະໂມສອນ ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ສາຍຍັນ ພຸດທະລາ ອະທິການບໍດີ ມະຫາວິທະຍາໄລຣາຊະພັດບ້ານສົມເດັດເຈົ້າພະຍາ, ທ່ານ ຮສ. ປອ. ອາທິດອຸໄທ ຈະຕຸພອນໄຊ ຮັກສາການຄະນະບໍດີ ຄະນະ ສຶກສາສາດ, ມີບັນດາຮອງຄະນະບໍດີ, ຫົວໜ້າ ແລະຮອງພາກວິຊາ, ພະນັກງານ-ຄູອາຈານ ແລະນັກສຶກສາ ທີ່ກ່ຽວຂ້ອງທັງສອງມະຫາວິທະຍາໄລເຂົ້າຮ່ວມ.

          ໂຄງການແລກປ່ຽນຄວາມຮູ້ດ້ານພາສາ ແລະວັດທະນະທຳລະຫວ່າງ ຄະນະສຶກສາສາດ ມະຫາວິທະຍາໄລແຫ່ງຊາດ ແລະມະຫາວິທະຍາໄລ ຣາຊະພັດ ບ້ານສົມເດັດເຈົ້າພະຍາ ຣາຂະອານາຈັກໄທ ຈັດຂຶ້ນໃນຄັ້ງນີ້, ມີນັກສຶກສາຈາກ ມະຫາວິທະຍາໄລ ຣາຊະພັດບ້ານສົມເດັດເຈົ້າພະຍາ ມາເຂົ້່ຮ່ວມແລກປ່ຽນຈຳນວນ 35 ຄົນ ແລະອາຈານຕິດຕາມອີກ 3 ທ່ານ ແລະມີອາສາສະໝັກຈາກຄະນະ ສຶກສາສາດ ມະຫາວິທະຍາໄລແຫ່ງຊາດ ຈຳນວນ 25 ຄົນ, ເວລາໃນການດໍາເນີນ ໂຄງການແມ່ນ 15 ວັນ (30 ເມສາ ຫາ 13 ພຶດສະພາ 2017), ນັກສຶກສາທີ່ເຂົ້າຮ່ວມແລກປ່ຽນແມ່ນໄດ້ຮຽນຮູ້ ພາສາ ແລະວັດທະນະທຳ ຂອງສອງປະເທດລາວ-ໄທ; ໄທ-ລາວຮ່ວມກັນ.

          ໂອກາດນີ້ ທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ໄດ້ຂຶ້ນກ່າວປິດພິທີໂດຍຫຍໍ້ວ່າ: ມະຫາວິທະຍາໄລແຫ່ງຊາດແມ່ນມີຄວາມຮູ້ສຶກດີໃຈທີ່ໄດ້ຕ້ອນຮັບຂະບວນແລກປ່ຽນ ພາສາ ແລະວັດທະນະທໍາ ຈາກມະຫາວິທະຍາໄລ ຣາຊະພັດບ້ານສົມເດັດເຈົ້າພະຍາ ປະເທດໄທ. ດັ່ງທີ່ຮູ້ແລ້ວວ່າສອງປະເທດ ລາວ-ໄທ ແມ່ນມີຄວາມຄ້າຍຄືກັນທາງດ້ານພາສາປາກເວົ້າ, ວັດທະນະທຳ ແລະການດຳລົງຊີວິດ, ລາວ-ໄທ; ໄທ-ລາວ ເປັນປະເທດເພື່ອນບ້ານ ຖານບ້ານໃກ້ ເຮືອນຄຽງ, ປະຊາຊົນສອງຊາດ ມີການໄປມາຫາສູ່ກັນຢ່າງບໍ່ຂາດສາຍ, ຖ້າເວົ້າເຖິງການຮ່ວມມື ມະຫາວິທະຍາໄລແຫ່ງຊາດແມ່ນມີການຮ່ວມມືກັບຫຼາຍມະຫາວິທະຍາໄລ ໃນໄທ, ໂດຍສະເພາະແມ່ນດ້ານວິຊາການ, ການແລກປ່ຽນນັກສຶກສາ ແລະອາຈານສອນ ແລະການແລກປ່ຽນໃນຄັ້ງນີ້, ກໍເປັນອີກການຮ່ວມມືທີ່ຈະເສີມສ້າງອີກຫຼາຍໆວຽກງານການຮ່ວມມື ໃຫ້ມີການເຕີບໃຫຍ່ຂະຫຍາຍຕົວຍິ່ງໆຂຶ້ນຕື່ມ. ຈາກນັ້ນ ທ່ານຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ ກໍໄດ້ມອບໃບຢັ້ງຢືນການເຂົ້າຮ່ວມໂຄງການແລກປ່ຽນພາສາ ແລະວັດທະນະທໍາ ໃຫ້ແກ່ນັກສຶກສາ ຈາກມະຫາວິທະຍາໄລ ຣາຊະພັດບ້ານສົມເດັດເຈົ້າພະຍາ ແລະອາສາສະໝັກຈາກ ຄະນະ ສຶກສາສາດ ມະຫາວິທະຍາໄລແຫ່ງຊາດ, ພ້ອມທັງມອບຂອງທີລະນຶກໃຫ້ແກ່ ທ່ານ ສາຍຍັນ ພຸດທະລາ ອະທິການບໍດີ ມະຫາວິທະຍາໄລ ຣາຊະພັດບ້ານສົມເດັດເຈົ້າພະຍາ ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີປິດໂຄງການແລກປ່ຽນຄວາມຮູ້ດ້ານພາສາ ແລະວັດທະນະທຳລະຫວ່າງ ຄະນະສຶກສາສາດ ມະຫາວິທະຍາໄລແຫ່ງຊາດ ແລະມະຫາວິທະຍາໄລ ຣາຊະພັດບ້ານສົມເດັດເຈົ້າພະຍາ

ການຮັບສະໝັກ

ທຶນການສຶກສາ