nuol.edu.la



ສະຖາບັນຂົງຈືຈັດງານແຂ່ງຂັນຮ້ອງເພງຈີນຄັ້ງທີ 3

1494315396 tmp IMG 3758

ໃນຕອນຄໍ່າ ວັນທີ 5 ພຶດສະພາ 2017ນີ້, ສະຖາບັນຂົງຈື ມະຫາວິທະຍາໄລແຫ່ງຊາດໄດ້ຈັດງານແຂ່ງຂັນຮ້ອງເພງຈີນຄັ້ງທີ 3 ໃນຫົວຂໍ້ “ຮຽນຮູ້ພາສາຈີນໂດຍຜ່ານບົດເພງ ” (ຮອບຊີງຊະນະເລີດ) ຂຶ້ນທີ່ຫ້ອງປະຊຸມສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ຄຳຮຸ່ງ ແສນມະນີ ຜູ້ອຳນວຍການສະຖາບັນຂົງຈື ຝ່າຍລາວ, ທ່ານ ນາງ ລີຊ່ຽວ ຜູ້ອຳນວຍການສະຖາບັນຂົງຈື ຝ່າຍຈີນ ພ້ອມດ້ວຍແຂກທີ່ຖືກເຊີນ, ພະນັກງານຄູ-ອາຈານ ແລະນັກຮຽນ, ນັກສຶກສາເຂົ້າຮ່ວມ.

ຈຸດປະສົງຂອງການຈັດການແຂ່ງຂັນໃນຄັ້ງນີ້ແມ່ນເພື່ອແນ່ໃສ່ໃຫ້ນັກຮຽນ-ນັກສຶກສາທີ່ສຶກສາຢູ່ມະຫາວິທະຍາໄລແຫ່ງຊາດ ເວົ້າລວມເວົ້າສະເພາະກໍຄືນັກຮຽນ-ນັກສຶກສາ ທີ່ສຶກສາຢູ່ພາຍໃນສະຖາບັນຂົງຈື ທີ່ມີຄວາມມັກຮັກການຮ້ອງເພງພາສາຈີນໄດ້ມີໂອກາດສະແດງຄວາມສາມາດ ແລະກ້າສະແດງອອກເທິງເວທີ, ການຈັດງານຄັ້ງນີ້ແມ່ນໄດ້ຮັບການສະໜັບສະໜູນຈາກ ສະຖານ

ທູດຈີນ ປະຈຳລາວ, ສູນວັດທະນະທຳ, ວິທະຍຸກະຈາຍສຽງ CRI ແລະອີກຫຼາຍພາກສ່ວນ.

ໂອກາດນີ້ ທ່ານ ນາງ ລີຊ່ຽວ ຜູ້ອໍານວຍການຂົງຈື ຝ່າຍຈີນ ໄດ້ຂຶ້ນກ່າວເປີດພິທີ, ເຊິ່ງທ່ານໄດ້ກ່າວວ່າ: ການຈັດງານແຂ່ງຂັນຮ້ອງເພງຄັ້ງນີ້ແມ່ນໄດ້ຮັບການຊີ້ນຳຈາກ ຄະນະນຳມະຫາວິທະຍາໄລແຫ່ງຊາດ ແລະສະຖາບັນຂົງຈື; ເປັນໜຶ່ງໃນກິດຈະກຳໃນການສົ່ງເສີມການຮຽນຮູ້ດ້ານພາສາຈີນ, ຕະຫຼອດໄລຍະທີ່ຜ່ານມາສະຖາບັນຂົງຈືໄດ້ຖືຄະຕິທີ່ວ່າ “ໜຶ່ງເສັ້ນທາງ ໜຶ່ງແນວທາງ”; ນັບແຕ່ມື້ມີການສ້າງຕັ້ງສະຖາບັນເປັນຕົ້ນມາ ພວກເຮົາໄດ້ສ້າງບຸກຄະລາກອນ ທີ່ມີຄວາມຮູ້-ຄວາມສາມາດດ້ານພາສາຈີນ ອອກມາຮັບໃຊ້ສັງຄົມຢ່າງຫຼວງຫຼາຍ ພ້ອມກັນນັ້ນ ຍັງມີການຈັດກິດຈະກຳແລກປ່ຽນວັດທະນະ ເພື່ອເສີມສ້າງສາຍພົວພັນລະຫວ່າງສອງປະເທດ ລາວ-ຈີນໃຫ້ແໜ້ນແຟ້ນຍິ່ງຂຶ້ນ.

         ການແຂ່ງຂັນຮ້ອງເພງຈີນໃນຮອບຊີງຊະນະເລີດ ມີຜູ້ເຂົ້າແຂ່ງຂັນ (ຜ່ານຮອບຄັດເລືອກ) ທັງໝົດ 20 ຄົນ; ມີ 4 ປະເພດຮາງວັນຄື: ຮາງວັນທີ 1 (ຊະນະເລີດ), ຮາງວັນທີ 2 ມີ 2 ຮາງວັນ, ຮາງວັນທີ 3 ມີ 3 ຮາງວັນ ແລະຮາງວັນທີ 4 ແມ່ນຮາງວັນຊົມເຊີຍມີ 14 ຮາງວັນ; ພາຍຫຼັງສໍາເລັດການແຂ່ງຂັນ ຮາງວັນຊະນະເລີດ(ອັນດັບ 1) ໄດ້ແກ່ ທ້າວ ກູ້ລໍ່ ຈົ່ງ ໄດ້ຮັບເງິນຮາງວັນ 1,000,000 ກີບ ພ້ອມໃບຢັ້ງຢືນ; ຮາງວັນທີ 2 ໄດ້ແກ່ ທ້າວ ສົມປາດຖະໜາ ແລະທ້າວ ສຸກສະຫວາດ ໄດ້ຮັບເງິນຮາງວັນຜູ້ລະ 500,000 ກີບ ພ້ອມໃບຢັ້ງຢືນ; ຮາງວັນທີ 3 ໄດ້ແກ່ ທ້າວ ຄຳສີ, ນາງ ວຽງນະຄອນ ແລະທ້າວ ບົວພັນ ໄດ້ຮັບເງິນຮາງວັນຜູ້ລະ 300,000 ກີບ ພ້ອມໃບຢັ້ງຢືນ ແລະອີກ 14 ຄົນ ແມ່ນໄດ້ຮັບຮາງວັນຊົມເຊີຍ ຜູ້ລະ 200,000 ກີບ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ສະຖາບັນຂົງຈືຈັດງານແຂ່ງຂັນຮ້ອງເພງຈີນຄັ້ງທີ 3

ການຮັບສະໝັກ

ທຶນການສຶກສາ