nuol.edu.la



ປະທານສະພາວິທະຍາສາດແຫ່ງຊາດ ສປ ຈີນ ຢ້ຽມຢາມມະຫາວິທະຍາໄລແຫ່ງຊາດ

1493266439 tmp IMG 3556

ໃນຕອນບ່າຍ ວັນທີ 26 ເມສາ 2017, ມະຫາວິທະຍາໄລແຫ່ງຊາດ ໄດ້ຕ້ອນຮັບການຢ້ຽມຢາມຂອງທ່ານ ສຈ. ປອ. ປາຍ ຊຸນຫຼີ ( Prof. BAI Chunli, President, Chinese Academy of Science) ປະທານສະພາວິທະຍາສາດແຫ່ງຊາດ ສປ ຈີນ ພ້ອມດ້ວຍຄະນະ, ເປັນກຽດຕ້ອນຮັບໂດຍທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ຄະນະບໍດີ, ຮອງຄະນະບໍດີ, ຫົວໜ້າຫ້ອງການ, ຮອງຫົວໜ້າຫ້ອງການ, ແລະບັນດາແຂກທີ່ຖືກເຊີນກໍເປັນກຽດເຂົ້າຮ່ວມ.

ໃນໂອກາດນີ້ ທ່ານ ສຈ. ປອ. ປາຍ ຊຸນຫຼີ ກໍໄດ້ກ່າວສະແດງຄວາມຂອບໃຈໃນການຕ້ອນເປັນຢ່າງດີ ຂອງມະຫາວິທະຍາໄລແຫ່ງຊາດ ພ້ອມນັ້ນທ່ານຍັງໄດ້ເວົ້າເຖິງຄວາມເປັນມາ ຂອງສະພາວິທະຍາສາດ ແຫ່ງຊາດ ສປ ຈີນໂດຍຫຍໍ້ວ່າ: ສະພາວິທະຍາສາດແຫ່ງຊາດ ສປ ຈີນ ແມ່ນເປັນສະພາທີ່ໄດ້ຮັບການສະໜັບສະໜູນຈາກລັດຖະບານຈີນໂດຍກົງ, ມີໜ້າທີ່ໃນການສ້າງບຸກຄະລາກອນ, ນັກຄົ້ນຄວ້າ, ວິໄຈ ອອກມາຮັບໃຊ້ສັງຄົມ. ປັດຈຸບັນສະພາວິທະຍາສາດມີ 104 ສະຖາບັນ ແລະ 3 ມະຫາວິທະຍາໄລ ທີ່ຂຶ້ນກັບ, ເກືອບ 99% ຂອງນັກສຶກສາ ທັງໝົດແມ່ນສຶກສາໃນລະດັບ ປະລິນຍາເອກ, ມີນັກສຶກສາຕ່າງປະເທດທີ່ກຳລັງສຶກສາຢູ່ ຈຳນວນ 1,000 ຄົນ, ນັກສຶກສາສ່ວນໃຫ່ຍທີ່ເຂົ້າມາສຶກສາຕໍ່ແມ່ນຜ່ານການສອບເສັງຄັດເລືອກ. ສະນັ້ນ, ການມາຢ້ຽມຢາມ ມະຫາວິທະຍາໄລແຫ່ງຊາດໃນຄັ້ງນີ້ ກໍແມ່ນເພື່ອເສີມຂະຫຍາຍສາຍພົວພັນການຮ່ວມມື ລະຫວ່າງ ສະພາວິທະຍາສາດແຫ່ງຊາດ ສປ ຈີນ ແລະມະຫາວິທະຍາໄລແຫ່ງຊາດ.

ໃນໂອກາດດຽວກັນ, ທ່ານ ສຈ. ປອ. ສົມສີ ຍໍພັນໄຊ ກໍໄດ້ກ່າວສະແດງຄວາມຍິນດີຕ້ອນຮັບໃນການຢ້ຽມຢາມຄັ້ງນີ້ ພ້ອມນັ້ນ ກໍຍັງໄດ້ລາຍງານສະພາບລວມຂອງມະຫາວິທະຍາໄລແຫ່ງຊາດ ແລະການຮ່ວມມືຂອງ ມະຫາວິທະຍາໄລແຫ່ງຊາດກັບ ສປ ຈີນ ທີ່ມີຄວາມສຳພັນກັນຢ່າງແໜ້ນແຟ້ນ. ນອກນັ້ນ, ທ້າຍພິທີ ທ່ານ ສຈ. ປອ. ສົມສີ ຍໍພັນໄຊ ແລະທ່ານ ສຈ. ປອ. ປາຍ ຊຸນຫຼີ ກໍໄດ້ມີການມອບຂອງທີ່ລະນຶກເຊິ່ງກັນ ແລະກັນ ພ້ອມທັງຮ່ວມກັນຖ່າຍພາບລວມອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ປະທານສະພາວິທະຍາສາດແຫ່ງຊາດ ສປ ຈີນ ຢ້ຽມຢາມມະຫາວິທະຍາໄລແຫ່ງຊາດ

ການຮັບສະໝັກ

ທຶນການສຶກສາ